Display Style:
Column Style
२०७७ सालय् गुकथ दु सार्वजनिक विदा ?
लहनान्युज | चौलाथ्व सप्तमी ११४०
सरकारं २०७७ सालय् सार्वजनिक विदाया सार्वजनिक सूची तयार याःगु दु । थुगु सूचीइ कथं २०७७ सालय् मोहनीेया टीका कात्तिक १० गते व किजापुजा मंसिर १ गते लाःगु दु ।
सरकारं २०७७ सालय् सार्वजनिक विदाया सूची नेपाल राजपत्रय् प्रकाशित जुगु दु ।
दच्छि यक ५२ गु शनिवाः, मोहनी कुन्हु न्यान्हु, स्वन्ति स्वन्हु व मेमेगु न्ह्यन्हु जम्मा ६७ न्हु देय् यकं सार्वजनिक विदा याःगु दु ।
मोहनि कात्तिक ७ गते फूलपाती निसे ११ गते एकादशी तक न्यान्हु देय् यक सार्वजनिक विदा दु । अथेहे स्वन्तु कात्तिक २९ गते लक्ष्मी पूजा निसे मंसिर १ गते किजा पुजा स्वन्हु सार्वजनिक विदा याःगु दु ।
सार्वजनिक विदा जुइगु दिं थुकथ दु ।
शनिवाः बाहेक बैशाख १ गते न्हुगु दँ, बैशाख १९ गते मजदुर दिवस, असोज ३ गते संविधान दिवस, फागुन २४ गते अन्तर्राष्ट्रिय महिला दिवस, बैशाख २५ गते बुद्ध जयन्ती व फागुन २७ गते शिला चःह्रे कुन्हु देय् यकं सार्वजनिक विदा याउगु दु ।
अथेहे, चैत १५ गते आइतवा होलिया ५६ गु जिल्ला व चैत १६ गते बाँकी २१ गु जिल्लाय् सार्वजनिक विदा दु ।
सम्वन्धित धर्म, संस्कृति व भौगोलिक आधारय् १६ न्हु विदा
सम्वन्धित धर्म, संस्कृति व भौगोलिक क्षेत्रया आधारय् १६ न्हु दिं विदा बिइगु निर्णय सरकारं याःगु दु । उगु कथं बैशाख २५ गते बिहीवाः उभौली पर्व, भदौ १० गते गौरा पर्व, मुस्लिम समुदायपिन्स माने याइगु इदुल फित्र व बकर इद नाप मंसिर ५ गते छठ पर्वया दिं कुन्हु सरकारं विदा बिःगु दु ।
अथहे, कात्तिक २५ गते मंगलवाः फाल्गुनन्द जयन्ती व मंसिर १५ गते सोमवाः गुरु नानक जयन्तीयात सम्बन्धित धर्मावलम्बीपिन्त जक विदा बिइगु जुगु दु ।
डिसेम्बर २५ य् क्रिसमस डे (पुस १० गते)या दिं सरकारं इसाई धर्मावलम्वीयात सार्वजनिक विदा बिइगु निर्णय याःगु दु ।
पुस १५ गते बुधवाः किराँत जातिया उधौली पर्व, योमरी पुन्ही–ज्यापु दिवस, तमु ल्होसारया विदा यानातःगु दु । थारु, मगर व छन्त्याल समुदाययात राष्ट्रिय पर्वया रुपं माने याइगु माघ, माघी पर्वया दिं माघ १ गते बिहीवा विदा याएगु दु ।
माघ ३० गते शुक्रवाः सोनाम ल्होसार व चैत १ गते आइतवाः ग्याल्पो ल्होसार कुन्हु विदा याःगु दु । सिरुवा पर्वय् दिं झापा, मोरङ, सुनसरी, सिराहा व सप्तरी जिल्लाय् विदा दु ।
मिसापिन्त भदौ ५ गते शुक्रवाः विदा याना तःगु दु । भदौ २५ गते बिहीवाः जितिया पर्व बिदा दु ।
शिक्षण संस्थापिनत अतिरिक्त विदा सरस्वती पूजाया दिं फागुन ४ गते आइतवाः लाःगु दु ।
स्वनिगलय् प्यन्हु विदा
सायाः, येँया पुन्हि, मत्स्येन्द्रनाथया भोटो क्यनेगु जात्रा व घोडेजात्राया दिं स्वनिलय् जक सार्वजनिक विदा बियातःगु दु । साउन २० गते आइतवा सायाः, येँयाः भदौ १६ गते मंगलवाः लाःगु दु ।
क्षत्रपाटी निःशुल्क चिकित्सालयपाखें फोनपाखें स्वास्थ्य सेवा
नृपेन्द्रलाल श्रेष्ठ | चौलाथ्व षष्ठी ११४०,चैत्र १९ गते
हलिमय् न्यंक कोरोना भाइरस कोभिड १९ या प्रकोप न्यनाच्वंगु इलय् नेपाल नं थुगु समस्यां तापायेमफुत । नेपालय् आःतक्क न्याम्हेसिके थुगु भाइरस संक्रमणया पुष्टि जुइधुंकल ।
सामाजिक दुरी कायम यानाः फक्व संक्रमणपाखें तापाका च्वनेमाःगु थ्व अवस्थाय् अस्पतालपाखें बीगु स्वास्थ्य सेवा सुचारु यानातयेत नं थौंया दिनय् थाकुयाच्वंगु दु । व हे हुनिं मेमेगु स्वास्थ्य समस्या ज्वनाः अस्पताल वइपिन्त नं संक्रमणपाखें तापाका तयेगु नितिं नं सकसितं न्हापा थें अस्पतालय् दुकाये मफयाच्वंगु अवस्था दु ।
थुकिया झ्वलय् येँया पुलांगु बस्ती दुने क्षेत्रपाटीस्थित क्षेत्रपाटी निःशुल्क चिकित्सालयं नं इमरजेन्सी सेवा जक संचालन यानाच्वंगु दु ।
इमरजेन्सीइ वइपिं बिरामीतयत अस्पतालं पिने हे ल्हाः सिलेगु व्यवस्था अस्पतालं याःगु दु । ल्हाः सिलेधुंकाः स्यानिटाइजरं ल्हाः सफा यायेधुंकाः थर्मोगनं ज्वर नापे यायेगु यानाच्वंगु दु ।
थर्मोगनं ज्वर स्वयाः ज्वर दुसा अज्याःपिं विरामीपिन्त अलग्ग हे टेन्टय् चेकजाँच यायेगु यानाच्वंगु दुसा आवश्यक खनेदुसा मेथाय् रिफर यानाछ्वयेगु व पिने रिफर याये आवश्यक
खनेमदुसा वासः बियाः छ्वयेगु यानाच्वनागु क्षेत्रपाटी निःशुल्क चिकित्सालय संचालक समितिया नायः डा. मनोजमान श्रेष्ठं जानकारी बियादिल ।
ज्वरया बिरामी उगु थासं वनेधुंकाः बाघौया दुने उगु टेन्टय् डिसइनफेक्ट यायेत स्प्रे यायेगु यानागु नं वयकलं धयादिल ।
छगू कथंया विरामीया ल्वय् मेम्ह विरामीयात मपुनेमा धइगु खँय् थःपिन्सं सावधानी नालाः ज्या यानाच्वनागु नायः डा. श्रेष्ठया धापू खः ।
इमरजेन्सीइ वइपिन्त नं अनिवार्य मास्क तयावयेत धयागु व मास्क तयामवःपिन्त अनं हे सितिकं मास्क बीगु व्यवस्था नं यानागु श्रेष्ठंं धयादिल ।
उकिया नापं उगु अस्पतालय् ज्या यानाच्वंपिं डाक्टर, नर्स लगायतया स्वास्थ्यकःमिया स्वास्थ्य सुरक्षाया खँय् नं थःपिं तसकं सतर्क दुगु श्रेष्ठया धापू खः ।
अस्पतालय् ज्या याइपिं स्वास्थ्यकःमितयत बांलाःगु स्तरयागु पिपिइ उपलब्ध याकातयागु श्रेष्ठं धयादिल ।
डा. श्रेष्ठया धापू कथं अस्पतालया स्वास्थ्यकःमिपिन्त छेँय् काःवनेगु व तःवनेगु व्यवस्था लिसें अस्पतालया गाडी छकः पिने वनावयेवं हे गाडियात सिलाः डिसइनफेक्ट यायेगु यानाच्वंगु दु । लिसें विरामी हःगु एम्बुलेन्सयात नं छक्वःपतिं हे सिलाः डिसइनफेक्ट यायेगु यानाच्वनागु धयादिल ।
लिसें ड्यूटि सिधयेकाः छेँय् लिहांवनीपिं स्वास्थयकःमितयत अस्पतालय् हे म्वःल्हुकाः जक लितछ्वयेगु यानागु नं श्रेष्ठं जानकारी बियादिल ।
थ्व हे झ्वलय् येँया पुलांगु वस्ती दुने छुं नं कथंया स्वास्थ्य समस्या जूसा थःत फोन यायेत डा.श्रेष्ठं इनाप यानादिल । लिसें मेमेगु स्वास्थ्य समस्याया नितिं नं फोनपाखें माःगु सल्लाह सुझाव लिसेंया सेवा बीगु व्यवस्था यानागु नं वयकलं धयादिल । थीथी ल्वय् वा स्वास्थ्य समस्या कथं विशेषज्ञ डाक्टरपिनिगु फोन नम्बर सार्वजनिक यासें चिकित्सालयं समस्या कथं चिकित्सकपिन्त स्वापू तयेत इनाप याःगु दु ।
नायः डा. मनोजमान श्रेष्ठ ९८५१२७६८८८
न्हाय्, न्हायपं, कथु ९८५१०१७५३७, ९८४१४८२४६९
मिखा ९८४१२२६६४४, ९८५१०४३१८४
मचा ल्वय् ९८४१२०३४४५, ९८४१३९९३९०
सर्जरी ९८६४२९७८५९
हाडजोर्नी अले नशा ९८४३०२८२३७, ९८४१२५४७०९
मिसा ल्वय् ९८४१२२१४७६, ९८०८०९४७८०
वा (दाँत) ९८४१२३००९५
फिजिसियन ९८४१४७५२३८
मधुमेह अले थाइराईड ९८१८४१४११०
कोरोना रोकथामपाखे चन्द्रागिरी नगरपालिकाया पलाः
नृपेन्द्रलाल श्रेष्ठ | चौलाथ्व षष्ठी ११४०, चैत्र १७ गते
स्वनिगलय् कोरोना रोकथाम व नियन्त्रणया लागिं चन्द्रागिरी नगरपालिका नं छगू प्रमुख थाय् जुयाच्वंगु दु । स्वनिगलं पिहांवनेगु वा दुहांवयेगु मू नाका जूगु ल्याखं नं चन्द्रागिरी नगरापालिकाया भूमिका आःया अवस्थाय् अहम् रुपं कयाच्वंगु दु ।
आःया अवस्थायात कयाः चन्द्रागिरी नगरपालिकां नं थःगु सक्रियता अप्वयेकूगु दु ।
चन्द्रागिरी नगरपालिकां दक्कले न्हापां हे नागढुङ्गां स्वनिगलय् दुहां वइपिं वा पिहांवनीपिन्त लक्षित यानाः हेल्थ डेस्क स्थापना यायेधुंकूगु दु ।
नगरपालिका दुनेया अस्पताल, स्वास्थ्य चौकीया स्वास्थ्यकःमितय्त पिपिइ छगू छगू सेट नं उपलब्ध याकेधुंकल । उकिया नापं स्वास्थ्यकःमितयत मास्क, पंजाया नापं स्यानिटाइजर नं उपलब्ध याकूगु दु ।
लहनान्यूजलिसे खँ ल्हासें चन्द्रागिरी नगरपालिकाया मेयर घनश्याम गिरीं नगरपालिका दुनेया स्वास्थ्य चौकीत विदाय् नं चायेकेगु व्यवस्था ताःलाकागु धयादिल । आःया अवस्थाय् स्वास्थ्यकःमिया भूमिका महत्वपूर्ण जुइगु ल्याखं उमिगु मनोबल थकायेत स्वास्थ्यकःमियात भत्ताया नं व्यवस्था यानागु वयकलं धयादिल ।
नगरपालिका दुने दक्वं थासय् नेपाल प्रहरी, नेपाली सेना तकंया सहयोगय् डिसइनफेक्सन स्प्रे यायेगु ज्या जुयाच्वंगु वयकःया धापू खः ।
विदेशं वःपिनिगु नां मुंकेगु ज्या जुयाच्वंगु जानकारी ब्युसें आःतक्क सच्छि व ३० विदेशं वःपिनिगु नां मुनेधुंकूगु वयकलं कनादिल ।
स्थानीयं अत्यावश्यकीय ज्वलंया समस्या फयेम्वाःलेमा धइगु ल्याखं खाद्यान्न, लः, पेट्रोलियम ज्वलं, फलफुल, वासः व ला पसः चायेके बियातयागु नं वयकलं धयादिल ।
स्वनिगलय् संक्रमणया सम्भावना क्वपालेत थन मनूया चाप नं म्ह्वः यायेमाःगु खँयात ध्यानय् तयाः स्वनिगलं पिहां वनीपिन्त थःथःगु थासय् वनेत बसया व्यवस्था नं यानातयागु वयकलं धयादिल । आः थुगु ज्या थःगु हे पहलय् अनौपचारिक रुपं यानाच्वनागु जूसां औपचारिक रुपं हे यायेगु तयारी जुयाच्वंगु मेयर गिरीं धयादिल ।
चन्द्रागिरी नगरपालिका अन्तर्गत नेपाल सरकारं नगरपालिका दुने राष्ट्रिय आइसोलेसन सेन्टर दयेकेगु योजना कथं आः उगु सेन्टर दयेकाच्वंगु व याकनं हे संचालनय् हयेगु नितिं थःपिं सक्रिय दुगु नं वयकलं धयादिल ।
न्हिं ज्या यानाः नयेमाःपिं, संकटया अवस्थाय् दुपिनिगु नां धलः मुंकेगु ज्या जुयाच्वंगु व समस्या जूगु अवस्थाय् इमित नकेगु व्यवस्था नं यायेगु कथं ज्या यानाच्वनागु गिरीया धापू खः ।
येँ महानगरपालिकां राहत वितरण याइगु
नृपेन्द्रलाल श्रेष्ठ | चौलाथ्व षष्ठी ११४०,चैत्र १६ गते
येँ महानगरपालिकां कोरोना भाइरस (कोभिड–१९) सम्वन्धि राहत वितरण मापदण्ड–२०७६ पारित याःगु दु । येँ महानगरपालिकाया प्रमुख बिद्यासुन्दर शाक्यया अध्यक्षताय् च्वंगु ४३ क्वःगु नगर कार्यपालिकाया बैठकं थुगु मापदण्ड पारित याःगु खः ।
कोरोना भाइरसया संक्रमण फैलें मयायेत व थुकिया रोकथाम– नियन्त्रण यायेत सरकारं जारी याःगु लकडाउनया कारण अत्यावश्यक सेवा बाहेक मेगु बन्द याना तःगु दु, मनू तयेत छेँय् पिहा मवयेग् बन्द याना तःगु खः ।
थुगुया कारणं येँ महानगपालिका दुने च्वनाच्वपि असाहय, अतिविपन्न व न्हिया न्हिथ ज्या यायेमाःपि ज्यालदारी मनू तयेगु पहिचान याना इमित तत्काल राहत उपलब्ध याकेगु मापदण्ड पारित याःगु दु धका प्रमुख शाक्यं जानकारी बियादिगु खः ।
थौंया बैठकं पारित याःगु मापदण्डय् अभिभावक मदुपि, थःगु आयश्रोत मदुपि, मेपिनिगु ग्वाहालि व सहाराय् च्वनिपि अनाथ आश्रम, बृद्धाश्रम, संरक्षण गृह, देगः, गुम्बा, मस्जिदय् च्वनिपि मनूत खः ।
अथेहे,उगु मापदण्डय् अतिविपन्न, छु हे आन्दामीया स्थायी स्रोत मदुपि, न्हिया न्हिथं गुजार याये थाुकुपि व सम्वन्धित वडां अतिविपन्न धयातःपि प्रमाणित जुपि मनूत धका उल्लेख याना तःगु खः ।
संगठित संस्थाय् ज्या याइपि बाहेक येँ महानगरय् न्हापानिसे मजदुरी याना वयाच्वपि, छेँय् बुँ मदुपि भरिया लगायतया न्हि न्हि ज्यालादारी ज्या याइपि मनूत खः ।
अथेतु थौंया बैठकं विवरण संकलनया लागि छगु हे प्रकारया फारम ३२ गु हे वडायात वितरण दुगु खाद्य सामाग्री न समान रुपं वितरण याये त्यःगु खः ।
थौं च्वंगु बैठकं पशुपंक्षीइ तयेगु म्वायेगु अधिकार सुनिश्चित यायेत महानगरपालिकां ३२ गु वडाय् आहाराया व्यवस्था यायेगु निर्णय याःगु दु । ‘लकडाउनया कारण मनूत छेँय् न पिहा वये मफुगु कारण खिचा, माकः,बखुतयेत न ध्यानय् तया ३२ गु हे
वडाय् पहल यायेगु निर्णय जुगु दु धका प्रमुख शाक्यं धयादिगु दु ।
कोरोना रोकथामय् महालक्ष्मी नगरपालिकाया पलाः
नृपेन्द्रलाल श्रेष्ठ | चौलाथ्व षष्ठी ११४०,चैत्र १७ गते
देय्न्यंक कोरोना भाइरस कोभिड १९ नियन्त्रण व रोकथामया नितिं थीथी ज्याखँत जुयाच्वंगु दु । व हे झ्वलय् महालक्ष्मी नगरपालिका नं तयारी व व्यवस्थापनया ज्याय् सक्रिय जूगु दु ।
संक्रमण खनेदुसा वा आइसोलेसनय् तयेमालीगु अवस्थायात बिचाः यानाः नगरपालिका व किस्ट हस्पिटलया सहकार्यय् किस्ट हस्पिटलय् ६० वेडया आइसोलेसन वार्ड तयार यायेधुंकूगु दु ।
उकिया नापं अस्पतालयात पिपिइ व डिसइनफेक्सनया नस्प्रे, थर्मल गन नं नगरपालिकापाखें हे उपलब्ध याकागु महालक्ष्मी नगरपालिकाया मेयर रामेश्वर श्रेष्ठं जानकारी बियादिल ।
लहनान्यूजलिसेया खँल्हाबल्हाया झ्वलय् मेयर श्रेष्ठं वडा वडाय् वडाध्यक्षपिं लिसें विपद व्यवस्थापन समिति परिचालन यानाः विदेशं वःपिं मनूत ट्«याक यानाच्वनागु जानकारी नं बियादिल ।
विदेशं वःपिं मनूत ट्र्याक यानाः सकसितं होम क्वारेन्टाइनय् तयेगुया नापं ज्वर, मुसु, सेखंया समस्या खनेदःसा तत्काल अस्पताल वा चिकित्सकयात स्वापू तयेत सुझाव बियागु नं वयकलं धयादिल ।
उकिया नापं नगरपालिका दुने स्वास्थ्यकःमिं छेँय् छेँय् वनाः स्वास्थ्य जाँच याकेगु व्यवस्था नं याःगु दु ।
महालक्ष्मी नगरपालिकाय् लकडाउन गथे जुयाच्वंगु दु धइगु न्ह्यसलय् वयकलं नगरवासीयात छेँय् नं पिहांमवयेत आव्हान यासें न्हियान्हिथं नगरपालिकालिसें प्रहरीपाखें माइकिङ यायेगु ज्या जुयाच्वंगु धयादिल ।
पेट्रोलियम ज्वलं, वासः, खाद्यान्न थुज्वःगु अत्यावश्यक ज्वलंया पसः चायेका बियाच्वनागु धासें वयकलं अत्यावश्यक सामान न्यायेत पिहां वयेबलय् नं मास्क, पन्जा छ्यलेत धायेगुया नापं सामाजिक दुरी कायम यायेत सकसितं सचेत याकाच्वनागु वयकःया धापू खः ।
बजार वना वयेधुंकाः नं साब्वं, लखं ल्हाः सिलाच्वनेगु लिसें स्यानिटाइजरं ल्हाः सफा यायेगु नितिं सकसितं सचेत याकाच्वनागु वयकलं धयादिल ।
उकिया नापं झाःझाः पिहां वयाच्वने म्वायक छकःया पालय् छवाःयात गाक्क न्यायेत नं सकसितं आव्हान यानागु श्रेष्ठं धयादिल ।
प्रेसर, सुगर थज्याःगु ल्वय्या वासः नमाःपिन्सं नं छकःया पालय् लच्छि निलायात गाक्क न्यायेत धयागु श्रेष्ठया धापू खः ।
बजारय् अत्यावश्यक सामानया अभाव, कालाबजारी जुइके मबीत व्यापारीयात सचेत याकाच्वनागु धासें आःतक्क थुकथंया छुं गुनासो नं मवःनिगु श्रेष्ठं धयादिल ।
न्हिं ज्यालादारि यानाः नयेमाःपिं नं द्यांलानाः च्वनेम्वाःलेमा धइगु ल्याखं अज्याःपिन्त नं ट्र्याक यानाः नां धलः मुंकाच्वनागु धासें अवस्था कथं अज्याःपिन्त वडाया संयोजनय् नगरपालिकापाखें आवश्यक सेवा बीगु नं जानकारी बियादिल ।
नगरपालिकाया न्हापा हे १ करोड तकाया विपद व्यवस्थापन कोष दुगु व आः कोभिड १९ या नितिं अलग्ग हे कोष ५० लख तकाया कोष दयेकागु वयकलं धयादिल । थुगु कोषय् व्यापारी, सर्वसाधारण सकसितं सहयोगया नितिं आव्हान यायेगु निर्णय जुइधुंकूगु व प्राविधिक समस्यां यानाः आव्हान मयानानिगु वयकलं जानकारी बियादिल ।
हरेक थासय् डिसइनफेक्सनया नितिं स्प्रे यायेगु ज्या नं जुयाच्वंगु वयकःया धापू खः ।
लकडाउनयात उल्लंघन यानाः छुं छुं मनूत म्वाःमदयक पिहांवयेगु यानाच्वंगु खँय् वयकलं दुःखः प्वंकादिल । न्ह्याक्व इनाप याःसां, थुइकूसां, सचेत याकेत स्वःसां छुं छुं मनूत म्वाःमदयक पिहां वयेगु धासें आःया अवस्थाय् सकलसित छेँय् छेँय् च्वनेत वयकलं इनाप यानादिल ।
