Display Style:
Column Style
बाग्लुङ्गया ६५दँया जिथिम्ह कोरोनामुक्त
लहना न्यूज | ने.सं. ११४० चौलागा एकादसि (१८ अप्रिल २०२०), सञ्चरवाः
कोरोना भाइरस संक्रमण पुष्टि जुइधुंकाः वासः याकाच्वनादीम्ह बाग्लुङ्गया ६५दँया जिथिम्ह कोरोनामुक्त जुयादीगु दु ।
धौलागिरी अञ्चल अस्पताल, बाग्लुङ्गया आइसोलेसनय् वासः याकाच्वनादीम्ह वय्कःया स्वक्वःखुसी व प्यक्वःखुसीइ स्वाब परीक्षणया लिच्वः नेगेटिभ वःगु खः ।
वय्कःयात वंगु विहिवाः याःगु स्वक्वःखुसीया रिपोर्ट व थौं सञ्चरवाः याःगु प्यक्वःखुसीया रिपोर्ट कोरोना मदुगु पुष्टि जूगु बाग्लुङ्गया प्रमुख जिल्ला अधिकारी गौलोचन सैंजुं जानकारी बियादीगु खः । वय्कःया कथं निक्वलं रिपोर्ट नेगेटिभ वयेधुंकाः डिस्चार्जया तयारी याःगु दु ।
वंगु चैत्र २० गते संक्रमण पुष्टि जुइधुंकाः उम्ह जिथियात धौलागिरी अञ्चल अस्पतालय् भर्ना याःगु खः । वय्कः चैत्र ४ गते बेल्जियमपाखें कतार एअरवेजया क्यूआर ६५२या फ्लाइटं नेपाः वयादीगु खः ।
बाग्लुङ्गया मेम्ह कोरोना संक्रमित मचाल्यासेया धाःसा रिपोर्ट पोजेटिभ वःगु दु । थौं हे टेकु अस्पतालय् वासः याकाच्वनादीम्ह येँया १९दँया ल्यासेम्ह नं कोरोना मुक्त जुयाः छेँ लिहां वनादीगु दु ।
सुदूरपश्चिमया कोरोना संक्रमित ल्याय्म्हया निक्वःखुसीया रिपोर्ट नेगेटिभ
लहना न्यूज | ने.सं. ११४० चौलागा एकादसि (१८ अप्रिल २०२०), सञ्चरवाः
सेती प्रादेशिक अस्पतालय् वासः याका च्वनादीम्ह कोरोना संक्रमित न्याम्ह मध्ये छम्हेसिगु निक्वःखुसी याःगु परीक्षणया रिपोर्ट नेगेटिभ वःगु दु ।
भारतपाखें लिहां वःम्ह लम्की चुहा नगरपालिका–१या २१दँ दुम्ह ल्याय्म्हया निक्वःखुसी याःगु परीक्षणया रिपोर्ट नेगेटिभ वःगु अस्पतालया प्रवक्ता डा. जगदीश जोशीं धयादीगु दु ।
भारतपाखें वयाः कैलालीया प्रतापपुर क्वारेन्टाइनय् च्वनादीम्ह उम्ह ल्याय्म्हया स्वाब परीक्षणय् कोरोना संक्रमण पुष्टि जुइधुंकाः सेती प्रादेशिक अस्पतालया आइसोलेसन वार्डय् वासः जुयाच्वंगु खः ।
थ्व हे झ्वलय्, सेती प्रादेशिक अस्पतालय् वासः याकाच्वनादीपिं मेपिं प्यम्ह कोरोनाया संक्रमितपिनिगु धाःसा निक्वःखुसी याःगु परीक्षणया रिपोर्ट नं पोजेटिभ हे वःगु दु ।
धनगढी उप–महानगरपालिका वडा ल्याः ५या ३४दँ दुम्ह ल्याय्म्ह, वय्कःया ३४दँ दुम्ह तताजु, कञ्चनपुरया बेदकोट नगरपालिकाया ४१दँ दुम्ह मिजंम्ह व लम्की चुहा नगरपालिका वडा ल्याः १या ६५दँ दुम्ह जिथिम्हेसिगु रिपोर्ट हाकनं पोजेटिभ हे वःगु दु ।
थ्व स्वयां न्ह्यः निक्वःतक पोजेटिभ वःम्ह धनगढी उप–महानगरपालिका वडा ल्याः ५या ३४दँ दुम्ह उम्ह ल्याय्म्हया स्वक्वःखुसीया रिपोर्ट नं पोजेटिभ हे वःगु अस्पतालं जानकारी ब्यूगु दु ।
‘पुरा स्वनिगः छगू यूनिटया रुपं न्ह्याःवनेमाः’
बिराजकाजी राजोपाध्याय | चौलागा एकादशी ११४०
येँ महानगरपालिकाया मेयर विद्यासुन्दर शाक्यं हलिंन्यंक महामारीया रुपं न्यनाच्वंगु कोरोना भाइरस कोभिड १९ या रोकथाम व नियन्त्रणया लागिं मुक्कं स्वनिगः हे छगू यूनिटया रुपं न्ह्याःवनेमाःगु धयादीगु दु ।
उपत्यका मेयर फोरमया कजि तकं खःम्ह कामपा मेयर विद्यासुन्दर शाक्यं आःया परिस्थितीइ थवंथवय् ग्वाहालि व सहकार्य यासें न्ह्याःवनेमाःगु जूगुलिं छगू स्थानीय तह वा जिल्ला धकाः च्वने मफइगु धयादिल ।
महामारीया रुपं न्यनाच्वंगु कोभिड १९या संक्रमण छथाय् छम्हेसित जुयाकथं उकिं मुक्कं समाजयात हे संक्रमित याये फुगु जूवुलिं दक्वं छधी जुयाः रोकथाम व नियन्त्रणय् जायेगुया विकल्प मदुगु शाक्यया धापू खः ।
‘छगू जिल्ला वा स्थानीय तह धकाः च्वंसा टेकु अस्पताल येँय् दु, थन मेपिन्त वासः यायेमखु धाये पायछि जुइ ला ?’ मेयर शाक्यं धयादिल ‘अथे हे, येँया मनूयात ख्वप वा यलय् क्वारेन्टाइन वा आइसोलेसनय् तयेमालीगु स्थिती नि मवइ धाये फइमखु ।’
थ्व हे परिकल्पनायात लिनाः उपत्यका मेयर फोरमं योजना न्ह्यःने यंकागु वयकलं जानकारी बियादिल ।
आःया परिस्थितीइ स्थानीय तह, जिल्ला आदिया नामं बायाः मखु, छधी जुयाः न्ह्याःवनेमाःगु धासें शाक्यं थवंथवय् साथ व ग्वाहालि बियाः सहकार्य यासें येँ लिसें स्वनिगः व मुक्कं राष्ट्रयात हे संक्रमणमुक्त दयेकेगु अभियानय् थःपिं जानागु धयादिल ।
प्रशासनिकय ज्याया लागिं दयेकूगु क्षेत्र धकाः आःया परिस्थितीइ लिकुने मफइगु शाक्यं धयादिल ।
कागेश्वरी मनहरा नगरपालिकास्थित सनसिटि अपार्टमेन्टय् निम्ह संक्रमित खनेदुगु लिसें स्वनिगःया दक्वं स्थानीय तहया सहकार्यया अपरिहार्यता झन पुष्टि जूगु शाक्यं दावी यानादिल ।
कागेश्वरी मनहरा नगरपालिका पेप्सीकोलास्थित सनसिटी अपार्टमेन्टय् लण्डनं लिहांवःपिं निम्हेसिके कोरोना भाइरस कोभिड १९या संक्रमण पुष्टि जुइधुंकूगु दु ।
शाक्यं धयादिल, ‘आः कागेश्वरी मनहरा नगरपालिकालिसे मध्यपुर थिमि नगरपालिका स्वाना हे च्वंगु दु । ख्वप नगरपालिका लिक्क हे दु । निपलाः न्ह्यःने येँ महानगरपालिका अले यल महानगरपालिका व यल जिल्लाया नगरपालिकात दु ।’
संक्रमणया रोकथाम व नियन्त्रणया लागिं परिक्षणया दायरा थकायेमाःगु व थःपिं थुकिया हे तयारीइ जानाच्वनागु शाक्यं धयादिल ।
सरकारं माःगु ज्वलं याकनं उपलब्ध याकाब्यूसा परिक्षणयात तच्वयेकाः संक्रमितया पहिचान यासें सुरक्षित लकस दयेकावनेगु योजना शाक्यं कनादिल ।
थुकिया नापं, अन्तर्राष्ट्रिय उडान बन्द जुइधुंकूगु अवस्थाय् विमानपाखें संक्रमण दुहांवइगु सम्भावना आः मदुगु तर भारतीय सीमानाकां धाःसा जोखिम दुगु शाक्यं धयादिल ।
भारतीय सीमानाकां सुलाः सुलां नेपाल दुहांवयेगु ज्या मद्यूबलय् नेपालय् संक्रमणया जोखिम अप्वःगु वयकःया धापू दु ।
लकडाउन ताःहाकयावंगु लिसें नसा ज्वलंया अभाव जुइके मबीत सुनां नं स्वनिगः पिनं तरकारी, फलफुल लिसेंया नसा ज्वलं हयेगु धाःसा कामपां समन्वय यानाबीगु नं वयकलं धयादिल ।
सरकारं लकडाउनया छुं भचा छ्वासुकाः थीथी घरेलु उद्योगं न्ह्याके बी धुंकूगु अवस्थाय् अवस्था स्वयाः किसानयात बुइँ ज्या याकेबी नं ज्यूगु तर सर्वसाधारण थः हे सचेत जुयाः न्ह्याःवनेमाःगुलिइ मेयर शाक्यं बः बियादिल ।
कोरोनापाखें संक्रमित निम्हम्ह मनू डिस्चार्ज जुल
लहना न्यूज | ने.सं. ११४० चौलागा एकादसि (१८ अप्रिल २०२०), सञ्चरवाः
नेपाःया कोरोना भाइरस (कोभिड–१९) संक्रमित लनाः थौं सञ्चरवाः डिस्चार्ज जुयादीगु दु ।
वंगु चैत्र १० गते कोरोना भाइरसपाखें संक्रमित जूगु पुष्टि जुयादीम्ह येँया १९दँ दुम्ह ल्यासेम्ह टेकुइ च्वंगु शुक्रराज ट्रपिकल तथा सरुवा रोग अस्पतालया आइसोलेन वार्डय् वासः याका च्वनादीम्ह खः ।
फुक्क रिपोर्ट नेगेटिभ वयेधुंकाः वय्कःयात थौं सञ्चरवाः डिस्चार्ज याःगु स्वास्थ्यमन्त्री भानुभक्त ढकालया प्रेस सल्लाहकार माधवप्रसाद तिवारीं जानकारी बियादीगु खः ।
उम्ह ल्यासेम्ह चैत्र ४ गते फ्रान्सपाखें नेपाः वयादीगु खः ।
फ्रान्सपाखें कतारया दोहातक नापं वःम्ह भियतनाकी पासां फोन यानाः थःत कोरोना भाइरसपाखें संक्रमित जूगु धायेवं छेँजःपिन्सं वय्कःयात टेकु अस्पताल हःगु खः ।
सर्लाहीइ छम्ह मिजंमचायात कोरोनाया आशंका
लहना न्यूज | ने.सं. ११४० चौलागा एकादसि (१८ अप्रिल २०२०), सञ्चरवाः
सर्लाहीइ र्यापिड डायग्नोष्टिक टेष्ट (आरडीटी) याःगु इलय् छम्हेसिके कोरोनाया संक्रमण खनेदुगु दु ।
सर्लाहीया क्वारेन्टाइनय् च्वनाच्वंपिं ६५म्हेसित र्यापिड टेष्ट याःगु इलय् छम्हेसिके पोजिटिभ खनेदुगु खः ।
सर्लाहीया धनकौल गाउँपालिकाया क्वारेन्टाइनय् च्वनाच्वंम्ह छम्ह झिंप्यदँ दुम्ह मिजंमचायात म्हिगः शुक्रवाः सनिलय् आरडीटी परीक्षण याःगु इलय् पोजिटिभ खनेदुगु सर्लाहीया प्रमुख जिल्ला अधिकारी मोहन बहादुर जिसीं पुष्टि यानादीगु खः ।
कोरोना पोजिटिभ खनेदुम्ह उम्ह मिजंमचायात थप परीक्षणया नितिं प्रादेशिक अस्पताल जनकपुरय् छ्वःगु प्रमुख जिल्ला अधिकारी जिसीं धयादिल । मिजंमचानापं क्वारेन्टाइनय् च्वनाच्वंम्ह मेम्ह छम्हेसित आरडीटी याःगु इलय् नेगेटिभ खनेदुसां नं थप परीक्षणया नितिं मेम्हेसित नं जनकपुर छ्वयागु जिसीं जानकारी बियादिल ।
कोरोना पोजिटिभ खनेदुम्ह उम्ह मिजंमचा वंगु चैत्र २३ गते भारतया राजधानी दिल्लीपाखें थःगु छेँ धनकौल वःगु खः ।
भारतपाखें वःगु जानकारी सुरक्षाकःमितसें सीवं उम्ह मिजंमचायात थःगु छेँय् मथ्यंनीबलय् हे क्वारेन्टाइनय् तःगु खः ।
