Display Style:
Column Style
ध्वाखाबहाःया नासःद्यःया देगः जिर्णोद्धार लिपा उलेज्या
शोभा श्रेष्ठ | थिंलागा एकादशी ११४०
येँ महानगरपालिकाया मेयर विद्यासुन्दर शाक्यं येँ महानगरया सँस्कृति, सम्पदाया संरक्षणय् छुं नं कुतः ल्यं मतयेगु धयादीगु दु ।
येँया ध्वाखाबहालय् पुनर्निर्माण क्वचाःगु नासःद्यःया देगः उलेज्या यासें मेयर शाक्यं येँया देगः, फल्चा, विहार आदि लिसेंया साँस्कृतिक सम्पदा संरक्षणया दायित्व स्थानीय सरकारयागु हे खःगु धासें सम्वन्धित खलः, गुथियात संरक्षणया नितिं फक्व व माक्व ग्वाहालि यायेत येँ महानगरपालिका तयार दुगु धयादिल ।
वंगु आइतबाः छगू ज्याझ्वःया दथुइ शाक्यं ध्वाखाबहाःया नासः चुकय् जिर्णोद्धार जूगु नासःद्यःया देगः उलेज्या यानाद्यूगु खः ।
मुक्कं ५ लख ६द्वः व ९९० तका लागतय् जिर्णोद्धार याःगु देगःया पुनर्निर्माणया नितिं कामपा २५ वडा कार्यालयपाखें ३ लख २०द्वः तका ग्वाहालि जूगु खःसा मेगु धेबा जनसमुदायपाखें मुंकूगु खः ।
ज्याझ्वःया सम्वोधन यासें शाक्यं कुतः यात धाःसा याये मफइगु छुं नं मदु धइगु थुगु नासः द्यःया देगः जिर्णोद्धारया ज्यां प्रमाणित याःगु धासें नाथेश्वर (नासःद्यः) मन्दिर पुनःर्निर्माण तथा संरक्षण समितियात च्वछानादिल । झीगु खः झीसं यायेमाः धकाः स्थानीय जन समुदाय न्ह्यचिल धाःसा थन साँस्कृतिक मूर्त अमूर्त सम्पदा संरक्षण बांलाक जुइगु बिचाः वय्कलं तयादिल । स्थानीय सँस्कृति, सम्पदाया संरक्षण यानाः आधुनिक प्रविधियात नं लिनाः न्ह्याःवनेफःसा नेवाः समाजया उत्थान याकनं जुइगु शाक्यया धापू खः ।
अथे हे, कामपा २५ वडाया अध्यक्ष नीलकाजी शाक्यं नेवाःत प्रशासनिक क्षेत्रय् यक्व ल्यूने लानावंगु खँ न्ह्यथँसें आः अभिभावकपिन्सं थः मस्तय्त विदेशय् छ्वयेगु मखसें प्रशासनिक क्षेत्रय् छ्वयाः सचिव, मुख्य सचिव दयेकेगु स्वयेमाःगु धयादिल । प्रशासनिक क्षेत्रय् दख्खल मदयाः हे नेवाः समाज झनझन ल्यूने लानावंगु धयादिल ।
लछिया दुने हे पुनर्निर्माण क्वचायेगु आज्जु खःसां ठेकेदारया लापरवाहिं भचा अप्वः ई काःगु समितिया नायः बुद्धराम महर्जनं धयादिल ।
जिर्णोद्धार ज्याया ल्याःचाः न्ह्यब्वसें समितिया दांभरिं नाति प्रजापतिं देगः पुनर्निर्माणया नितिं १० लख २६द्वः ६४५ तका मुंगु व ल्यं दुगु धेबा देगःया मर्मतसम्भारया नितिं कोषय् जम्मा यानातयेगु जानकारी बियादिल । ज्याझ्वलय् देगः पुनर्निर्माणया नितिं ५द्वः तकां च्वय् ग्वाहालि याःपिं दातापिन्त खादा न्ययेकेगु लिसें सुभाय् पौ लःल्हानाः सम्मान नं याःगु खः । द्ेगःया पुनर्निर्माण वंगु असारया न्हापांगु वालंनिसें न्ह्याःगु खः ।
लँय् द्यनिपि २१५ म्हेसिगु येँ महानगरपाखे उद्धार
सुरेन्द्रभक्त श्रेष्ठ | थिंलागा दशमी ११४० (दिसिेम्वर २१ २०१९)
चान्ह्य लँय् सिथय् द्यनिपि प्यन्हुया दिनय् २१५ म्ह मनू तयेत येँ महानगरपालिकाय ग्वहालिं उद्धार याउगु दु ।
वःगु मंसिर २९ गते महानगर दिवसया लसताय् जुुगु ज्याझ्वलय् जुगु घोषणा कथं पुष २ गते तकया दुने ३१ म्ह मिसापि, ४ म्ह मचापि न खः ।
शुक्रवाः सभा गृहय् महानगरया प्रमुख बिद्यासुन्दर शाक्यया संयोजकत्वय् ‘बेसहारा,, अभिभावकबिहिन, सडक आश्रित (सहयोगापेक्षी) मानवमुक्त महाअभियान घोषणा मुल व्यवस्थापन समिति’ च्वंगु मुँज्यां मानव सेवा आश्रमया ३ नं. प्रदेश इन्चार्ज सुमन बर्तौलां थुगु बिवरण न्ह्यब्बयादिगु खः ।
थथे उद्धार याउगु मध्ये १२९ म्ह मिजपि, १४ म्ह मिसापि, निम्ह मस्त तयेत मनोसामाजिक परामर्श लिपा छेँय् छ्वःगु धका विवरण न्ह्यब्बयादिगु खः ।
अभियान न्ह्याःगु वःगु मंसिर २९ गते हे ७ म्ह मिसापि, ३४ म्ह मिजपि व छम्ह मचायाना ४२ म्हसित उद्धार याउगु खःसा मंसिर ३० गते १० म्ह मिसा, ४५ म्ह मिज व निम्ह मचा नाप ५७ म्हेसित उद्धार याउगु खः ।
अथेहे पुष १ गते ११ म्ह मिसा, ३७ म्ह मिज व छम्ह मचा नाप ४९ म्हेसित व पुष २ गते ३ म्ह मिसा, ६४ म्ह मिजयान ६७ म्हेसित येँया थीथी थास लँय् उद्धार याउगु खः ।
येँ महानगरया प्रमुख एवं मुल व्यवस्थापन समितिया संयोजक बिद्यासुन्दर शाक्यं मनू तयेगु म्वायेगु व च्वनिगु नैसर्गिक अधिकारया सम्मान यासे उद्धार जुपि हरेक मनूयाःगुे उद्धार जुइ
न्ह्यःया अवस्थाया किपा व भिडियो सहित व्यवस्थित अभिलेख दयेकेट निर्देशन बियादिगु खः । मनू तयेगु पुनस्र्थापना यायेगु झ्वलय् थीथी खालया कानुनी, सामाजिक व अधिकार सम्बन्धि न्ह्यसः वयेफु धका न धयादिगु खः ।
उगु मुज्याय् महानगरया उपप्रमुख हरिप्रभा खड्गी श्रेष्ठ, महिला बालबालिका तथा जेष्ठ नागरिक मन्त्रालयया उपसचिव भरतराज शर्मा, महानगरीय ट्राफिक प्रहरी महाशाखाया प्रहरी उपरीक्षक राजकुमार बैदवार, नेपाल टेलिकमया व्यापार अधिकृत शिवकुमार भट्टराय नाप सरोकारवाला कार्यालयया अधिकारीपिनिगु न सहभागिता दगु खः ।
फोहोर व्यवस्थापनय् पगः थनिपिं मनूत मालेत मेयर शाक्यया इनाप
सुरेन्द्रभक्त श्रेष्ठ | थिंलागा अष्टमी ११४० (दिसेम्वर १९ २०१९)
फोहोर व्यवस्थापनय् पगः थनिपिं मनूत, संस्था, समुदाय तथा संरचना पत्ता लगे यायेत येँ महानगरपालिकाया मेयर बिद्यासुन्दर शाक्यं वातावरण व्यवस्थापन बिभागयात निर्देशन बियादिगु दु ।
थौं बुधवाः बिभागं याना च्वंगु ज्याया बारेय् जानकारी कायेगु झ्वलय् मेयर शाक्यं थःथे धयादिगु खः । वयकल जनशक्ति अभाव दु तर मगागु न मखु, ज्या यायेत व्यक्तिगत अभिलाषा व थःत केन्द्रय् तया ज्या याइगुलि समस्या जुगु धका धयादिगु खः ।
संस्थागत निर्णय कार्यान्वयनय् समस्या हइम्ह मनू वा समूह सु खः थुकिया थःत जानकारी बिइत न इनाप यानादिगु खः ।
मेयर शाक्यं फोहोरमैला व्यवस्थापन अत्यावश्यक सेवा खः थुकिया सम्बन्धि ज्या याये इलय् बालाक्क याये माःगु खँय् बःबियादिगु खः ।
अथेहे , वातावरण व्यवस्थापन बिभागया प्रमुख हरिकुमार श्रेष्ठं ओखरपौवाय् क्षमता क्वचाःगु व बञ्चरे डाँडाय् पूर्वाधार तयार मजुगुलि ल्याण्डफिल्ड साइट महानगरया लागि चुनौती दु धका
धयादिगु खः ।
महानगया वातावरण व्यवस्थापन बिभाग पाखे सुचुपिचू यायेगु लागि ज्या याइपिं कर्मचारीया ल्याः ४९३ म्ह दु । महानगरं भौगोलिक क्षेत्रया आधारं ८६ गु रुट दयेका सुचूपिचू याना
वयाच्वंगु खः ।
थुकिया लागि ११० गः सवारी तथा उपकरण छ्यला च्वंगु दु ।
थुगु दँय् न नेपाल प्रहरी बेरुजु फस्र्योटय् उत्कृष्ट
नृपेन्द्रलाल श्रेष्ठ | थिंलागा पञ्चमी (दिसेम्वर १८ २०१९)
गृह मन्त्रालय न प्रहरी महानिरीक्षक सर्वेन्द्र खनालयात पुरस्कृत याइगु जुगुु दु ।
बेरुजु फस्र्योटय् उत्कृष्ट ज्या याउगु धका मन्त्रालय न महानिरीक्षक खनालयात झीद्धः नगद नाप पुरस्कृत यायेगु निर्णय यागु दु। बेरुजु फस्र्योट मूल्यांकन तथा अनुगमन समितिं महानिरीक्षक खनाल नाप न्याम्ह प्रहरी कर्मचारीयात पुरस्कृत यायेगु निर्णय याःगु खः ।
नेपाल प्रहरी बेरुजु फस्र्योटय् हाकन उत्कृष्ट जुइत तालागु खः । प्रहरीं २०७४ व ०७५ तक कुल बेरुजु ध्यवा मध्ये ८८.५० प्रतिशत बेरुजु फस्र्योट याउगु उत्कृष्ट जुइत तालागु खः ।
आर्थिक वर्ष २०७४ व ०७५ या लेखा परीक्षण जुगु ल्याखय् १ दशमलव ८० प्रतिशत जक बेरुजु यायेत तालागु खः । बेरुजु फस्र्योटय् प्रगति यायेगुलि न्हयने लायेत तालागु खः धका गृह मन्त्रालय धाःगु खः ।
गृह मन्त्रालय नं बेरुजु फछ्र्योटय् प्रत्यक्ष संलग्न जुपि न्याम्ह प्रहरी कर्मचारीयात म्हति च्याद्धः बिया सिरपा लल्हाइगु निर्णय याःगु खः । वःगु मंसिर २४ गते च्वंगु मन्त्रीस्तरीय निर्णयपाखे प्रहरी महानिरीक्षक खनालयात सिरपा लल्हायेगु निर्णय याःगु धका गृह मन्त्रालय धाःगु खः ।
प्रहरी महानिरीक्षक खनालं नेतृत्व याये धुका झीगु ज्या मध्ये सांगठनिक सदृढीकरण, आन्तरिक शुद्धीकरण व भ्रष्टाचार शून्य सहनशीलताया नीति ज्वना न्ह्या वःगु खः ।
खनाल महानिरीक्षक जुइ धुका निकः तक प्रहरीं बेरुजु फछ्र्योटय् उत्कृष्ट जुइत तालागु खः ।
येँ महानगरय् च्वपिन्त निःशुल्क डाइलोसिस
सुरेन्द्रभक्त श्रेष्ठ | थिंलागा पञ्चमी (दिसेम्वर १८ २०१९)
स्वनिगःया जलास्यँ पीडित जनतायात राहत बीगु कथं येँ महानगरपालिका व आर्मी अस्पतालया दथुइ डाइलोसिस यायेगु सहमति जुइगु जूगु दु ।
थुगु सेवा नेपाली सेनाया वीरेन्द्र अस्पताल, छाउनीइ जलास्यँ पीडित तयेस सेवा काये फइगु जुगु दु ।
थौं बुधवाः प्रधानसेनापति पूर्णचन्द्र थापा व येँ महानगरपालिकाया मेयर विद्यासुन्दर शाक्य दथुइ नागरिकयात जँलास्ये ल्वय्या सेवा उपलब्ध यायेगु समझदारी पत्रय् ल्हाचिं तयादिगु खः ।
थुगु सेवा येँ महानगर दुने च्वपिं कार्यरत सरकारी कर्मचारीया हकय् लागू जुइगु खः । थुगु उपचार महागनरपालिकापाखे सिफारिस अनिवार्य याना तःगु दु ।
थ्व स्वया न्ह्य सैनिक अस्पतालय् सर्वसाधारणं दुर्घटना जुगु इलय् आकस्मिक सेवा जक ब्यवस्था दुगु खः । सेनाया नेपालगञ्जय् दुगु अस्पताल नं प्रदेशनाप जँलास्ये सम्बन्धी ल्वय्या उपचारयाःगु समझदारी जुगु खः
उगु समझदारी पत्रय् ल्हाचिं तये धुका येँ महानगरया मेयर शाक्यं थुगु ज्या ऐतिहासिक कथं जुगु धका धयादिगु खः । अथेहे, सेनाया बलाधिकृत रथी शरदकुमार गिरी, बलाध्यक्ष रथी गौरव तण्डुल व येँ महानगरया उपमेयर हरिप्रभा खड्गीपिनिगु न उपस्थिति दुगु खः ।
