उदाय्तय्गु सरोकारया सः हलिंन्यंक थ्यंकेगु तातुना उदाय् समाजं न्ह्यब्वया वयाच्वंगु उदाय् सः रेडियो ज्याझ्वः १५० ब्व थ्यंगुया लसताय् हना ज्याझ्वः याःगु दु । येँया ग्राण्डी सिटी हस्टिपलया सभा कक्षय् उगु ज्याझ्वः जूगु खः ।

उदाय् समाजया नायः डा.रुपज्योति कसाःया नायःसुइ जूगु थुगु ज्याभ्mवः उदाय् म्ये हायेका न्ह्याःगु खःसा उदाय् समाजया न्वकु डा. प्रेमरत्न स्थापितजुं लसकुस न्वचु बियादीगु खः । ज्याझ्वलय् थुगु रेडियो ज्याझ्वः कमितिया कजि डा. ज्ञानेन्द्ररत्न तुलाधरं “उदाय् सः ज्याझ्वः यायेत जूगु कुतः न्ह्यथंसें ज्याझ्वः थौं स्थापित जुजुं वनाच्वंगुु लसता न्ह्यथनादिल । वय्कलं समाजं चैत्रं थेरवाद भिक्षुपिन्त ब्वनाः स्वक्वःगु सामूहिक संघदान न्ह्याकेत्यंगु कनादिसें सकसित ब्वति कयादीत इनाप यानादिल ।

उदाय् म्यूजियम कमितिया कजि डा. सुमन कमल तुलाधरं उदाय्तय्गु पराम्परा, पेशा व जीवनशैलीनाप स्वाःगु थीथी हलज्वलं, ब्यक्तित्वपिनिगु म्हसीका थें जाःगु आपालं मुनां जाःगु उदाय् म्यूजियमया विषय थःगु खँ तयादिल । थुगु म्यूजियम असंया उदाय् छेँय् चाय्कातःगु दु ।

ज्याझ्वलय् “उदाय् सः” रेडियो ज्याझ्वःया नितिं अक्षयकोषया दातापिं विश्वरत्न तुलाधर, यूरीकाजी कसाः, मञ्जली तुलाधर, उदाय् सःया स्क्रिप राइटर सुगतरत्न सिन्दुराकार व ज्याझ्वः न्ह्याकामि विगेन तुलाधरपिन्त हनेज्या याःगु खः । हनेगु झ्वलय् उदाय् समाजया न्वकू डा. प्रेमरत्न स्थापितं सिन्हः तिकादिलसा समाजया नायो डा रुपज्योति कसाः भाजुं खादागा क्वखाय्कादिल । ज्याझ्वःया मूपाहां प्रचण्डमान बज्राचार्यं मतिनाया चिं लःल्हानादीगु खः । सुभाय् देछायेगु झ्वलय् नेपालय् मदीम्ह अक्षयकोषया दाता चिरिकःशोभा ताम्राकारयात नं ज्याझ्वलय् सुभाय् देछाःगु खःसा समाजया गुंगू थरया झिगू खलः पुचःया नायोपिं व समाजया मिसा पुचःया नकिंयात नं समाजया मूछ्याञ्जे राजुरत्न कसाःजुं  खादागा न्ययका हनादीगु खः ।

ज्याझ्वलय् नेवाः पत्रकारतय्गु राष्ट्रिय संगठन नेवाः पत्रकार राष्टिय दबूया न्हूगु ज्यासना पुचःया सकल दुजःपिन्त सिन्हः तिका, खादागां न्यय्का दोहलपा लःल्हासें कार्यकाल ताःलायेमा धकाः भिंतुनादीगु खः ।

ज्याझ्वलय् दबूया नायः सुरजवीर बज्राचार्यं “उदाय् सः” रेडियो ज्याझ्वः १५० ब्व थ्यंगु लसताय् भिंतुना देछाःसें नेवाः पत्रकारतय्त उदाय् समाजया भिंतुनानापं सकल नेवाः समाजया भिंतुना सदां दयाच्वनीगु भलसा प्वंकादिल ।

अक्षय कोषया दातापिनिगु प्रतिनिधित्व यासें नुगःखँ तयेगु झ्वलय् विश्वरत्न तुलाधरं छगू लख हाकनं तयेगु घोषणा यानादीगु खःसा प्रदेश नं ३ या सांसदनापं यँे महानगरपालिकाया पूर्वमेयर केशव स्थापितं नेपाःमिपिं सम्पन्न जुइगु नितिं ग्यसूग्यंक ग्वसाः दयेकेमाःगु खँ कनादीगु खः । ज्याझ्वलय् मूपाहाँ रेडियो उपत्यकाया नायो प्रचण्डमान बज्राचार्यं “उदाय् सः”नापं मेमेगु भाय्, व जातियात नं रेडियोय् थाय् बियागु कनादिल ।

ज्याझ्वःया सभापति उदाय् समाजया नायो डा.रुपज्योति कसाः भाजुं ज्याझ्वः बांलाक न्ह्याकेया नितिं अथक रुपं भूमिका म्हितादीपिं उपसमितिया दुजःपिं, दातापिंनाप तिबः बियादीपिं सकलसित  सुभाय् वियादीगु खः । ज्याझ्वःया झ्वलय् अक्षय कोषया नितिं ज्ञानीशोभा तुलाधर २५ द्वः, मञ्जली तुलााधर १० द्वः दां ग्वहालि यानादीगु खः । उदाय् म्ये हाय्कुसें न्ह्याःगु ज्याझ्वः समाजया मूदुजः सुदयराज शिलाकारं न्ह्याकादीगु खः । किपाः अनुप प्रधान, बुखँ लिधंसा – सुगतरत्न सिन्दुराकार