Display Style:
Column Style
आरडीटी परीक्षणपाखें हेटौंडाय् प्यम्हेसिके पोजिटिभ
लहना न्यूज | ने.सं. ११४० चौलागा नवमि (१६ अप्रिल २०२०), विहिवाः
र्यापिड डायग्नोस्टिक टेष्ट (आडीटी) किटपाखें कोरोना भाइरसया एण्टिबडी परीक्षण याःगु इलय् हेटौंडाय् प्यम्हेसिके पोजिटिभ रिपोर्ट वःगु दु । हेटौंडा उप–महानगरपालिकाय् जूगु र्यापिड टेष्टय् प्यम्हेसिके पोजिटिभ खनेदुगु खः । हेटौडा–४ बासुदेव सभागृहस याःगु र्यापिड टेष्टय् प्यम्हेसिके पोजिटिभ वःगु जिल्ला स्वास्थ्य कार्यालय हेटौंडाया प्रमुख प्रणय उपाध्यायं जानकारी बियादिल । बासुदेव सभागृहस जूगु पीम्हेसिगु टेष्टय् छम्ह मिसा व स्वम्ह मिजंपिंके रिपोर्ट पोजिटिभ वःगु टेष्ट यायेगु ज्याय् दुथ्याःम्ह मेलानया केन्द्रीय सचिवालय दुजः उत्सव चौलागाईं धयादिल ।
उपिं मध्ये भारतया बिहार छेँ जुयाः थौंकन्हय् हेटौंडा–४य् थःथितिपिन्थाय् च्वना वयाच्वंम्ह ५५दँया छम्ह मिसा, भारत वनाः लिहां वःम्ह हेटौंडा–२या ६७दँया छम्ह ज्याथःम्ह, भारत बैंग्लोरपाखें लिहां वःम्ह हेटौंडा–५या २४दँ दुम्ह छम्ह ल्याय्म्ह व साउदी अरबपाखें लिहां वःम्ह ३२दँ दुम्ह छम्ह मिजंम्ह खः ।
पिसीआर जाँचया नितिं स्वाब कायेत हेटौंडा अस्पताल यंकूगु दु । उगु स्वाब हेटौंडा–१०य् च्वंगु किटजन्य रोग अनुसन्धान तथा तालिम केन्द्रया ल्याबय् परीक्षण जुइगु धाःगु दु । अथे हे, हेटौंडा–१५य् याःगु र्यापिड टेष्टय् धाःसा फुक्कसिगु नेगेटिभ लूगु दु ।
र्यापिड टेष्टय् पोजिटिभ लूपिनिगु छेँजः अथे हे नियमित स्वापुतिइ वःपिनिगु नं स्वाब संकलनया नितिं अस्पताल यंकूगु दु । थःपिन्त पोजिटिभ खनेदुपिन्सं नं परीक्षणय् ग्वाहालि याःगु उपाध्यायं जानकारी बियादिल ।
बागमती प्रदेश सरकारया ग्वाहालिइ मकवानपुर जिल्लाय् स्वसःगू किटपाखें परीक्षण जुयाच्वंगु दु । न्हापांगु चरणय् विदेशपाखें लिहांवःपिं व जिल्लाया थीथी थासय् दुगु क्वारेन्टाइनय् च्वनाच्वंपिनिगु परीक्षण जुयाच्वंगु दु ।
डाक्टरयात ल्हाःवाम्ह डीएसपीयात रानीपुखुलि सःतल
लहनान्युज | चौलागा नवमी ११४०, बैसाख ४ बुधवाः
महानगरीय प्रहरी वृत्त, महाराजगञ्जया डीएसपी उमेशराज लम्सालयात जिम्मेवारीपाखे हटे यात ।
लकडाउन उल्लङ्घन याःगु द्धपनय् प्रहरीं चिकित्सकया दाःगु घटना सार्वजनिक जुइवं लम्सालयात महानगरीय प्रहरी आयुक्तया कार्यालय, रानीपोखरीय् यकुगु दु ।
रानीपोखरीया डीआईजी विश्वराज पोखरेलं लम्सालयात छानबिनया लागि रानीपोखरी सतःगु धका धाःगु दु ।
बुधवाः सनिलय् जुगु घटना बारे छानबिनया लागि बिहीवा सुथय् एसएसपी किरण बज्राचार्ययाःगु नेतृत्वय् एसपी मुकेश सिंह व डीएसपी होविन्द्र बोगटी सदस्य जुगु समिति गठन याःगु दु ।
समितिया प्रतिवेदनया आधारय् चिकित्सक लाःगुलि संलग्न प्रहरीयात कारबाही जुइ धका धाःगु दु । समितिं अनुसन्धान यायेगु न्ह्यः हे लम्सालयात जिम्मेवारीपाखे चिइकुगु दु ।
लकडाउन अप्वयावंलिसे राहतया माग नं अप्वल
शोभा श्रेष्ठ | चौलागा अष्टमी ११४०
लकडाउन अप्वयावंलिसे राहतया माग नं अप्वयावंगु दु । न्हियान्हिथंया आर्थिक ज्याखँ व आम्दानी दिनाच्वंगु अवस्थाय् छेँय् छेँय् ल्हाः म्हुतु चूलाकेत समस्या जुयावःलिसे ज्यालादारि नयेमाःपिं लिसें स्थानीय मध्यमवर्गीय परीवारपाखें नं राहतया माग अप्वयावःगु दु ।
स्थानीय तगिमं लकडाउनया स्वंगूगु वाःपाखे राहत वितरण याःबलय् त्वःफ्यूपिं लिसें उबले राहत जरुरी मतायेकूगु परिवारं नं आः राहत माःगु धासें जनप्रतिनिधि व सामाजिक संघसंस्थातयथाय् समस्या प्वंकःवनेगु यानाहःगु दु ।
‘राहत वितरण याःबलय् त्वःफ्यूपिं, राहत वितरणबारे जानकारी मदयाः व माःथें मच्वनां मकाःगु परिवारं नं आः राहत माल धकाः वडाय् वयाच्वंगु दु’ येँ महानगरपालिकाया मेयर विद्यासुन्दर शाक्यं धयादिल ।
बुधबाःतक्कय् राहतया लागिं ५३द्वः ९सः २२ परिवारया पहिचान जुइधुंकूगु दु । व मध्ये ४४द्वः ५सः व १३ परिवारयात राहत वितरण जुइधुंकूगु मेयर शाक्यं जानकारी बियादिल ।
संघीय मामिला तथा सामान्य प्रशासन मन्त्रालयया निर्देशन कथं राहतया लागिं लगत मुंकेत क्वःछ्युगु ई पुलेधुंकाः वःगु परिवारयात नं राहत वितरण यानाच्वनागु मेयर शाक्यया धापू खः ।
यल महानगरपालिकां नं चैत्र २२ व २३ गते दुने तथ्याङ्क मुंकाः राहत वितरण याःगु खः । व इलय् त्वःफ्यूपिं लिसें न्हापा माःथें मतायेकूपिं राहतया माग यानाः वडाय् वयेगु अप्वयावःगु यल महानगरपालिका १६ या वडाअध्यक्ष निर्मलरत्न शाक्यं धयादिल ।
‘अथे वःपिन्त राहत इनेगु कि मइनेगु धइगु खँय् महानगरपालिकां निर्णय याःगु मदुनि । जिपिं नं अन्यौलय् हे दु’ वडाअध्यक्ष शाक्यया धापू खः ।
समस्याय् लाःगु परिवारयात राहत थ्यंकेत सामाजिक संस्थालिसे नं समन्वय यानाच्वनागु वडाअध्यक्ष शाक्यं धयादिल । गुलिसिया ला दुःख स्वये मफयाः थःके दुगु भचा धेबा तकं बियाछ्वयागु नं वय्कलं धयादिल ।
यल महानगरपालिका ११य् राहत काये त्वःफ्यूगु धासें समस्या प्वंकः वइपिं नं अप्वयाच्वंगु वडा सदस्य कृष्ण महर्जनं धयादिल ।
यल महानगरपालिकां १९द्वः ४सः व ७३ परिवारयात राहत इंगु खः ।
वडा नं ६या हिटलर शाक्यं नं राहत माल धकाः फोन याइपिं अप्वःगु धयादिल ।
दक्वसिया धइथें व्यापार व्यवसायया लिसें न्हियान्हिथंया आर्थिक ज्याखँ ठप्प जुयाः आम्दानीया लँ बन्द जूगु अवस्थाय् नसा ज्वलंलिसेंया न्हियान्हिथंया अत्यावश्यक ज्वलंया व्यवस्थापनय् स्थानीय सरकारं इलय् हे ठोस योजना न्ह्याके आवश्यक खनेदु ।
किपूमिया माग जायज खःगु मेयर शाक्यया धापू
शोभा श्रेष्ठ | चौलागा अष्टमी ११४०,बैसाख ६ गते
येँ महानगरपालिकाया मेयर विद्यासुन्दर शाक्यं किपुलिइ गर्भवती मिसाया बारे पिदंगु समाचारया खँय् किपूमिया माग जायज हे खःगु धयादीगु दु ।
छथासं मेथाय् वनेमालीबलय् क्वारेन्टाइनय् च्वनेमाःगु धकाः राज्यं हे परिपत्र जारी यानातःगु अवस्थाय् पिने जिल्लां वःपिं मनूतय्त क्वारेन्टाइनय् तयेमाःगु किपूमितय् माग पाय्छि हे खःगु मेयर शाक्यं धयादिल ।
वंगु चैत्र ३० गते आइतबाः किपुलिइ १०य् बालं च्वंम्ह छम्ह गर्भवती मिसायात छेँथुवालं जवर्जस्ती कोथां पितिंगु धकाः थीथी अनलाइन पोर्टलय् बुखँ पिदंगु खः ।
वागलुङ जैमिनि नगरपालिकायाम्ह गर्भवती देवी शर्मा व जाजरकोटय् अध्यापन याकावःम्ह वय्कःया जहान वैकुण्ठ शर्मा कोहलपुर अस्पतालं एम्बुलेन्सय् च्वनाः किपू थ्यंकःवःगु खः ।
किपुलिइ केहेँ वविता आचार्यं बालं कयातःगु कोथाय् इपिं च्वंवंबलय् महामारी न्यनाच्वंगु अवस्थाय् किपूमिपिन्सं उमित क्वारेन्टाइनय् तयेमाःगु माग तःगु खः ।
व धुंकाः स्थानीय वासीन्दा, प्रहरी प्रशासन व जनप्रतिनिधि समेतया पहलय् उमित त्रिभुवन विश्वविद्यालयस क्वारेन्टाइनय् तयेयंकूगु खः ।
थुगु घटनायात कयाः थीथी अनलाइन पोर्टलं बालं च्वंम्ह गर्भवती मिसायात छेँ थुवालं जवर्जस्ती पितिन धकाः बुखँ पिकाःगु खः ।
‘बुखँ पूर्वाग्रही व एक पक्षीय ढङ्गं च्वयातःगु खनेदु । लकडाउनया इलय् कोहलपुरं किपुलिइ वःपिन्त क्वारेन्टाइनय् च्वनेत धायेगु गलत मखु’ उपत्यका मेयर फोरमया कजि तकं खःम्ह कामपा मेयर शाक्यं धयादिल ।
स्थानीय सरकारं जिम्मेवारी कयाः व्यवस्थित रुपं क्वारेन्टाइनय् तयेयंकूगुलिइ नं एक पक्षीय ढङ्गं सामाजिक सद्भाव स्यंकीगु कथंया बुखँ पिथंगु धासें मेयर शाक्यं पत्रकारतयसं निष्पक्ष, सन्तुलित ढङ्गं सामाजिक सद्भाव दयेकातइगु कथं कलम न्ह्याकेत इनाप यानादिल ।
थ्व हे सम्वन्धय् किर्तिपुर नगरपालिका वडा १०या वडाध्यक्ष अमन महर्जनं नं विज्ञप्ति जारी यासें समाचारया खण्डन यानादीधुंकल ।
प्रदेश २ स ४१९म्हेसिगु र्यापिड टेष्ट याःगु इलय् निम्हेसिके पोजिटिभ
लहना न्यूज | ने.सं. ११४० चौलागा अष्टमि (१५ अप्रिल २०२०), बुधवाः
प्रदेश २ स र्यापिड डाइग्नोस्टिक टेष्ट (आडीटी) विधिपाखें कोरोना संक्रमणया परीक्षणयात तीब्रता ब्यूगु दु । लिपांगु निन्हुया दिनय् प्रदेशया च्यागू जिल्लाया ४१९म्ह मनूतय्गु आडीटी टेष्ट याःगु खः ।
थीथी अस्पताल व क्वारेन्टाइनय् तयातःपिनिगु र्यापिड टेष्ट विधिपाखें परीक्षण याःगु प्रदेशया सामाजिक विकास मन्त्रालयया सचिव रामप्रसाद घिमिरें धयादीगु दु । घिमिरेया कथं ४१९म्हेसिगु र्यापिड टेष्ट याःगु इलय् निम्हेसिके पोजिटिभ खनेदुगु खः । पोजेटिभ खनेदुपिं निम्हं सप्तरीइ च्वंपिं खः ।
र्यापिड टेष्टय् पोजिटिभ खनेदुपिनिगु प्रयोगशाला परीक्षणया नितिं छ्वःगु दु ।
सचिव घिमिरेया कथं सप्तरीइ ७८म्ह, सिरहाय् ४७, धनुषाय् ९म्ह, महोत्तरीइ २६म्ह, सर्लाहीइ ५७म्ह, रौटहतय् १६९, बाराय् १०म्ह व पर्साय् ११म्हेसिगु र्यापिड टेष्ट याःगु खः ।
