Display Style:
Column Style
के—हब ज्याझ्वःया लागि महानगर व युएनडिपि दथुइ सम्झौता
सुरेन्द्रभक्त श्रेष्ठ | थिंलागा चौथी (दिसेम्वर १६ २०१९)
काठमाडौं मेट्रोपोलिटन सिटी हब (के—हब) ज्याझ्वः यायेगु निति येँ महानगरपालिका व संयुक्त राष्ट्रसंघीय बिकास कार्यक्रम (युएनडिपि) दथुइ सम्झौता जुगु दु ।
राष्ट्रिय सभा गृहय् ग्वसाः ग्वगु उगु ज्याझ्वलय् येँ महानगरया प्रमुख बिद्यासुन्दर शाक्य व युएनडिपिया आवासीय प्रतिनिधि आइसानी मेडागाङ्गोडा लबे दथुइ ल्याय्म्हपिं दथुइ उद्यमशीलताया आधारित तथा उत्पादन मुलक ज्याझ्वः जुइगु सम्झौता जुगु दुु ।
उगु सम्झौताया ज्याझ्वलय् येँ महानगरया प्रमुख शाक्यं झीसं सार्वजनिक, निजी तथा सामुदायिक क्षेत्रय् मिल जुया सहर ल्याय्म्ह तयेगु लागि थ्व ज्याझ्वः न्ह्याका खँ धका धयादिगु खः । थःगु थासय् कमे मजुइगु सम्भावना खना ज्याया लागि बाध्यताबश बिदेश वनेमापि सहरी ल्याय्म्हपिन्त सहभागी यायेगु जुइ धका धयादिगु खः ।
अथेहे, सहरी योजना आयोगया सदस्य डा. कीर्ति कुसुम जोशीं झीस आशा याये थज्यागु ज्याझ्वः न बिदेश वना ज्याया वनिपि कमि याये फइ , थ ज्याज्यागु ज्याया लागि प्रोत्सााहन बिया वइगु निदँया दुने म्हति न न्याःगु उद्योग सञ्चालन यायेगु जुइ धका न धयादिगु खः ।
येँ मनपाया २५ क्वःगु दिवसया लसताय बाजंगुरु नाप पत्रकारपिन्त सम्मान
शोभा श्रेष्ठ | थिंलागा तृतिया ११४० (दिसेम्वर १५ २०१९)
येँ महानगरपालिकाया २५ क्वःगु दिवसया लसताय् थौं बसन्तपुरय् छगु ज्याझ्वःयासे जिवित निम्ह मखं कुमारी व किलागः कुमारी नाप परम्परागत बाजं गुरुपि व झीम्ह पत्रकारपिन्त सम्मान याःगु दु ।
उगु ज्याझ्वलय् मूपाहाँ कथं संघीय मामिला तथा सामान्य प्रशासन तथा स्थानीय विकास मन्त्री हृदयेश त्रिपाठीं हनापौ, शहरी विकास राज्यमन्त्री रामवीर मानन्धर नगद व येँ महानगरपालिकाया मेयर विद्यासुन्दर शाक्यं सम्मानीत जुपिन्त स्वांमा क्वखायेकादिगु खः ।
थौंया ज्याझ्वलय् झीम्ह पत्रकारपिं लहना वाःपौपाखे नृपेन्द्रलाल श्रेष्ठ, झिंगु डटकम पाखे रेखा शाक्य, संस्थागतपाखे नेवाः अनलाइनन्युज डट् कम, अनलाईन खबरया डम्बरप्रसाद (रोयल) आचार्य, , नागरिक दैनिकया हिमाल लम्साल, नयाँपत्रिका दैनिकया तीर्थ बस्नेत, राष्ट्रिय समाचार समितिया शर्मिला पाठक, राजधानी दैनिकया केशवप्रसाद पाण्डे व संस्थागतपाखे गोरखापत्र न्हिपौयात न्यय् द्धः नाप हनापौ लल्हाःगु खः ।
उगु ज्याझ्वलय् परम्परागत बाजं खलःया गुरुपि ६३, खड्गी समुदायया ६०, गुँला बाजाया २३ गु बाजागुरुपिन्त नीन्याद्धः नगद नाप हनापौ लल्हाइगु खःसा येँया इलय् पिहा वइगु पुलुकिसि, दी प्याखं, लाखे, आकाश भैरव (सवःद्यः) पिनिगु बाजं गुरुपिन्त न नीन्याद्ध नगद बिया हनापौ लल्हाइगु खः ।
कार्तिक नाचया नितिं यल महानगरया १ करोड ग्वाहालि
शोभा श्रेष्ठ | थिंलागा दुतिया ११४०
यलया ऐतिहासिक कार्तिक नाचया संरक्षणया नितिं यल महानगरपालिकांं १ करोड तकाया ग्वाहालि याइगु जूगु दु ।
शनिबाः यलया कात्ति दबुलिइ जूगु ज्याझ्वःयात सम्वोधन यासें यल महानगरपालिकाया मेयर चिरिबाबु महर्जनं उगु ग्वाहालिया घोषणा यानादीगु खः । यलया मूर्त अमूर्त सम्पदाया संरक्षण व प्रवद्र्धन यायेगु लमपाया दायित्व दुने लाःगु धासें मेयर महर्जनं लिपाया आर्थिक वर्षय् कात्ति प्याखंया नितिं विशेष योजना दयेकेगु प्रतिवद्धता नं प्वंकादिल ।
कार्तिक नाच संरक्षण समितिं छगू ज्याझ्वः यासें थुगुसीया कात्ति प्याखंया औपचारिक समापन याःगु खः । उगु हे ज्याझ्वलय् नेवाः पत्रकार राष्ट्रिय दबूया नवनिर्वाचित केन्द्रीय कार्यसमितियात भिंतुना नं ब्यूगु खः ।
दबूपाखें न्ववासें मू छ्यान्जे सुनिल महर्जनं कात्ति प्याखं यलया जक मखु नेपाःया म्हसिका खःगु व थुगु प्याखं निरन्तर न्ह्याकावःगुलिइ प्याखंया कलाकार व सम्वद्ध सकसितं भिंतुना देछानादिल ।
मू छ्यान्जे महर्जनं जन प्रतिनिधि वयेधुंकाःस्थानीय मूर्त अमूर्त सम्पदा, परम्परायात ल्यंकातयेत स्थानीय सरकार न्ह्यज्यायेमाःगुलिइ बः बियादिल । स्थानीय सरकार बल्लायेधुंकूगु अवस्थाय् आः स्थानीय तजिलजि संरक्षणया नितिं सम्वन्धित खलः पुचलं चिन्ता कयाच्वनेमाःगु अवस्थायात न्हंकेत जनप्रतिनिधिपिन्सं ज्या यायेमाःगु महर्जनया धापू खः ।
ज्याझ्वलय् कार्तिक नाच संरक्षण समितिया नायः किरण चित्रकारं नेपाःया दक्कले पुलांगु निरन्तर न्ह्यानावःगु नाट्य परम्परा कात्ति प्याखं हे खःगु जानकारी ब्युसें थुकिया भविष्य सुनिश्चित यायेगु नितिं १० करोडया अक्षय कोषया नितिं ज्या यानाच्वनागु नं कनादिल ।
उगु हे ज्याझ्वलय् समितिया दुजः संजय शर्मा राजोपाध्यायं कात्ति प्याखं न्ह्याकेगु नितिं यमपा १६ वडापाखें बांलाक ग्वाहालि जुयाच्वंगु धासें १६ वडायात सुभाय् देछानादिल । यल लाय्कूलिसे स्वानाच्वंगु मेगु वडां धाःसा नापलायेत तकं थाकु चाःगु धासें नेपाःया तजिलजि ल्यंकेगु ज्याय् योगदान बीत नं छाय् न्ह्यचिले मफूगु धकाः उगु वडायात न्ह्यसः तयादिल ।
‘अकुपाई तिंख्यः राजनीतिक फाइदा कायेत जुयाच्वंगु’ – मेयर शाक्य
नृपेन्द्रलाल श्रेष्ठ | थिंलागा पारु ११४० (दिसेम्वर १३ २०१९)
येँ महानगरपालिकाया मेयर विद्यासुन्दर शाक्यं तिंख्यःया नामय् राजनीति यायेमज्यूगु धयादीगु दु ।
छु दिं न्ह्यःनिसे अकुपाई तिंख्यः अभियन्तातयसं येँ महानगरपालिकाया मेयर शाक्य व उपमेयर हरीप्रभा खड्गी श्रेष्ठ दथुइ स्वापू स्यन्का ल्वापु याकेत स्वःगु द्वपं नं बियादीगु दुसा मेयर शाक्यं थथे ल्वापु याकाः सुयात न फाइदा जुइ फइमखुगू धयादिल ।
राजनीतिक लवः नयेत हे गुलिसिनं मेयरं तिंख्यः मियाः नल धयाजूगु धासें मेयर शाक्यं तिंख्यः सरकारी जग्गा खःगुलिं सुनां नं न्यायेमिइ याये मफइगु स्पष्ट यानादिल ।
अकुपाई तिंख्यःया न्हापांगु दिं येँ मनपाया निम्ह वडाध्यक्षलिसें उपमेयरं ब्बति कयाः महानगरया नियम हाचां गाःगु द्वपं ब्युसे शाक्यं महानगरं बोर्डं याइगु निर्णय दक्वसिनं पालना यायेमाःगु खँय् न बः बियादिल ।
मेयर शाक्यं अकुपाई तिंख्यःया नामं पुलाम्ह रक्षामन्त्री लिसें सांसद भीमसेनदास प्रधानं राजनीति यायेगु स्वयाच्वंगु द्वपं नं बियादिल ।
सांसद प्रधानलिसें अभियन्तापिन्सं रानीपुखूनिसें दशरथ रंगशालातक्क खुला क्षेत्र याये माःगु माग यासे अकुपाई टुडिख्यः अभियान न्ह्याका वयाच्वंगु खः ।
येँ महानगरपालिकाया मेयर बिद्यासुन्दर शाक्यं अभियन्तापिन्सं उपमेयर खड्गी व पुर्वमन्त्री प्रधानयात न्ह्यःने तयाः आन्दोलन यानाच्वंगु द्वपं नं बियादिल । वयकलं सैनिक मुख्यालय चिइकेगु वा मचिइकेगु धइगु विषयया निर्णय यायेगु अधिकार सरकारयात जक दुगुलिं थुकिया जिम्मा महानगरपालिकां काये फइमखुगु प्रष्ट यानादिल ।
पुर्वमन्त्री प्रधानं थः मन्त्री जुया च्वंगु इलय सेनाया मुख्यालय चिइकेगु लागिं छुं कुतः मयाःगु व आः थः सत्ताय् मदुगु इलय् हालाः छुं अर्थ मदुगु नं धयादिल ।
सांसद प्रधानया पालय् हे नेपाली सेनां कामपा ज्याकू न्ह्यःने नक्सा पास हे मयाःसे सैनिक पुस्तकालय दयेकुूगु नं लुमंकादिल ।
अथेहे वयकलं खुला मञ्चया बसपार्क अस्थायी जक खःगु धासें तिंख्यलय् दुगु सरकारया हे इनापय् वीर अस्पताल व धरहरायागु सामाग्री मुंके बियागु धयादिल । । उगु थाय् आः याकनं हे खाली जुइगु नं वयकलं जानकारी बियादिल ।
मेयर शाक्यं अकुपाई तिंख्यः अभियान न्ह्याकाच्वंपिन्सं बसन्तपुरय् पर्यटक लिसें लँजुवाःत जुइ हे मछिंक मुंकातःगु सामग्री चिइकेबीत नं हाथ्या बियादिल ।
येँ नगरपालिकाया न्हापाम्ह मेयर जनकमान श्रेष्ठ मन्त
नृपेन्द्रलाल श्रेष्ठ | थिंलागा पारु ११४० (दिसेम्वर १३ २०१९)
येँ नगरपालिकाया न्हापाम्ह निर्वाचित मेयर जनकमान श्रेष्ठ थौं सुथय् मन्त । स्येँय् क्यान्सर ल्वचं कया च्वम्ह श्रेष्ठ ९२ दँय् मदुगु खः ।
श्रेष्ठ मदुगुलि येँ महानगरपालिकाया प्रमुख विद्यासुन्दर शाक्यं दुःख प्वकादिगु खः । प्रमुख शाक्य थौं हे पशुपति आर्यघाट वना पार्थिव शरीरय् श्रद्धाञ्जलि प्वकादिगु खः । नेपालय् स्थानीय सरकारया जग स्वनादिम्ह मदुम्ह श्रेष्ठं म्हितादिगु योगदानया स्मरण न यानादिगु दु ।
मेयर शाक्यं मदुम्ह श्रेष्ठया छेँय् जःपिन्त बिचाः हायेका धैर्य धारण यायेत इनाप यानादीगु खः । मदुम्ह श्रेष्ठया कलाः काय् छम्ह व म्ह्याय् छम्ह दु ।
वि.सं. २०१० सालय् जूगु तत्कालीन येँ नगरपालिकाया न्हापांगु निर्वाचनं वयकः नगरपालिकाया सभापति (मेयर) निर्वाचित जुयादीगु खः । न्याय सेवा प्रवेश यानाः येँ जिल्ला अदालतय् न्यायाधीशया रुपय् नं वय्कलं ज्या यानादी धुंकूगु दु ।
येँ महानगरपालिकां वंगु दँ २४ क्वःगु महानगर दिवसया लसताय् वयकःयात महानगर सम्मानं सम्मानित याःगु खः ।
थौं हे पशुपति आर्यघाटय् वय्कःया अन्तिम संस्कार सम्पन्न जुल ।
