Display Style:
Column Style
प्याजया भाः २५० किलो थ्यन
लहनान्युज | कछलागा औंसी ११४० (नोभेम्वर २६ २०१९)
नेपाःया बजारय् प्याज आतक दकलय् अप्वो जुगु दुु । कालिमाटी फलफूल तथा तरकारी विकास समितिइ थौं मंगलवाः प्याज छगु किलोया होलसेल भाः निसः तका क्वछिगु दु ।
वःगु वाः कालिमाटी बजारय् प्याजया छगु किलोया भाः १५२ तकां थ्यःगुु खः ।
थौं प्रतिकिलो ४८ तक थहा वना निसः तका थ्यःगु खः ।
अथेहे थौं कालिमाटी तरकारी बजारय् हे प्याजया भाः छगु किलोउा २२० निसे २३० थ्यःगु दु ।
कालिमाटी तरकारी बजारय् हरेक वाः पतिक प्याजया भाः झीतका थहा वना च्वंगु खः ।
छत्रपाटी चिकित्सालय स्वास्थ्य शिविर
नृपेन्द्रलाल श्रेष्ठ | कछलागा औंसी ११४० (नोभेम्वर २६ २०१९)
छत्रपाटी निःशुल्क चिकित्सालयया ग्वसालय् निःशुल्क नाक, कान घाँटीया शिविर जुगु दु ।
उगु शिविरय् वरिष्ठ नाक कान घाँटी रोग विशेषज्ञ डा. लक्ष्मीराम मल्ल, डा प्रेमल कुमार जोशी, डा.आशिष ढकाल नाप डा.कन्चन गौतमं वासः यानादिगु खः ।
अथहे उगु शिविरय् २२६ म्ह पिनिगु ल्वय्या परीक्षण यायेगु ज्या जुगु खः ।
शिविरय् सितिक वासः इनेगु नाप अडियो मिटर तथा टिम्प्यानो मिटरपाखे सितिक परीक्षण न जुगु खः ।
पत्रकार दबूयात मेयर शाक्यया भिन्तुना
शोभा श्रेष्ठ | कछलागा चतुर्दशी ११४०
येँ महानगरपालिकाया मेयर विद्यासुन्दर शाक्यं नेवाः संचारमाध्यमया विकासया नितिं थम्हं फक्व ग्वाहालि यायेगु धयादीगु दु । थौं येँय् जूगु ज्याझ्वलय् न्ववासें मेयर शाक्यं स्थानीय सँस्कृतिया संरक्षणया नितिं स्थानीय मातृभाषाया संचारया नं विकास जुइमाःगु धयादिल ।
नेवाः पत्रकार राष्ट्रिय दबूया न्हूगु निर्वाचित केन्द्रीय कार्यसमितियात नापलासें मेयर शाक्यं स्थानीय मांभाय् नं सँस्कृतिया छगू ब्व खःगु धासें भायया विकास मजुइकं स्थानीय सँस्कृतिया विकास नं पूवंक जुइमफइगु धयादिल ।
स्थानीय सँस्कृतिया विकासया लागिं थनया पत्रकारपिन्सं नं महत्वपूर्ण भूमिका म्हितेमाःगुलिइ शाक्यं बः बियादिल ।
थःगु विगत लुमंकुसें मेयर शाक्यं न्हापा थः नं पत्रकार हे खःगु धयादिल । बुधबार साप्ताहिक व नेपालभाषाया न्हिपौ विश्वभूमिया नितिं थम्हं पत्रकारिता यानागु धासें शाक्यं नेवाः संचारमाध्ययमा अवस्था व समस्या थम्हं बांलाक हे थूगु धयादिल ।
ज्याझ्वलय् कामपा मेयर शाक्यं नेवाः पत्रकार राष्ट्रिय दबूया न्हूगु निर्वाचित केन्द्रीय कार्य समितियात कार्यकाल सफलताया भिंतुना बियादिल ।
ज्याझ्वलय् दबूया वरिष्ठ न्वकू नृपेन्द्रलाल श्रेष्ठं दबूया संगठनया स्वरुप, संगठन विस्तार, दबूपाखें जुया वयाच्वंगु ज्याखँया बारे जानकारी याकादिल । संगठनया अझ तःधंका यंकेगु व थुकियात अझ सुदृढ दयेकेगु नितिं थः योजनावद्ध दुगु धासें न्वकू श्रेष्ठं योजनाय् याकनं ज्या न्ह्याकेगु धयादिल ।
न्हापाया कार्यकालय् आदिवासी जनजाति पत्रकार महासंघलिसेया सहकार्यय् दबूपाखें न्हापांगु मातृभाषा पत्रकारिता दिवसया ग्वसाः ग्वयागु धासें वरिष्ठ न्वकू श्रेष्ठं व हे दिवसं नेपालभाषाया न्हापांगु पत्रिका पिथंम्ह धर्मादित्य धर्माचार्य नेपालया हे न्हापांम्ह मातृभाषी पत्रकार प्रमाणित जूगु जानकारी नं बियादिल ।
विद्यालय नं स्थानीय सरकारया अधिकार क्षेत्रय् वयेधुंकूगु अवस्थाय् धर्मादित्यया जीवनि पाठ्यक्रमय् दुथ्याकेत नं श्रेष्ठं मेयर शाक्ययात इनाप यानादिल । लिसें, धर्मादित्यया झ्वाता स्थापना यायेगु नितिं पहल यायेत नं श्रेष्ठं इनाप यानादिल ।
दबूया न्हूम्ह निर्वाचित नायः सुरजबीर बज्राचार्यं देय्न्यंकया नेवाः पत्रकारतयगु तथ्याङ्क मुंकेगु ज्या दबूपाखें यायेमाःगु धासें नेवाः पत्रकारया दक्षता थकायेगु ज्याय् दबू न्ह्यज्यायेगु धयादिल ।
कीर्तिपूण्य महाविहारया देगः जिर्णोद्धार लिपा उलेज्या
नृपेन्द्रलाल श्रेष्ठ | कछलागा चतुर्दशी ११४० (नोभेम्वर २५ २०१९)
येँया लगमय् कीर्तिपूण्य महाविहारया देगः जिर्णोद्धार लिपा उलेज्या जूगु दु । २०७२या तःभुखाचं क्षतिग्रस्त जूगु देगःया जिर्णोद्धार लिपा औपचारिक उलेज्या जूगु खः । वंगु सन्चरबाः येँ महानगरपालिका वडा ल्याः २१य् च्वंगु कीर्तिपूण्य महाविहार लगं बहालय् येँ महानगरपालिकाया प्रमुख विद्यासुन्दर शाक्यं देगःया उलेज्या यानादीगु खः ।
उगु इलय् वौद्ध परम्पराकथं देगःया पूजा नं जूगु खः । पूजा क्वचाय्धुंकाः जूगु औपचारिक ज्याझ्वलय् येँ महानगरपालिकाया प्रमुख शाक्यं सतः, फल्चा, विहार, महाविहार, देगःलिसें येँय् दुगु थीथी पुरातात्विक, धार्मिक, साँस्कृतिक महत्वया सम्पदाया पुनःनिर्माण महानगरपालिकाया नीति व दायित्व तकं खःगु धयादिल ।
येँ महानगरपालिकां न्हूगु निर्माणयात निषेध हे यानाः पुनःनिर्माणयात प्राथमिकता बियागु धयादिसें माःगु थासय् येँ महानगरपालिका व स्थानीय गुथ्याःपिनिगु पहलय् ज्या न्ह्यःने यंकेगु प्रतिबद्धता शाक्यं प्वंकादिल ।
गुलिखे थासय् गुथि संस्थान व पुरातत्व विभागं बांलाक्क समन्वय याय्मफयाः समस्या जूसां पुनःनिर्माणया नितिं येँ महानगरपालिकायाके आर्थिक स्रोतया अभाव मदुगु प्रमुख शाक्यया धापू खः ।
मुक्कं ४९लख तकाया लागतय् देगःया दय्केज्या क्वचाःगु खः । देगःया पुनःनिर्माण दच्छिं दय्के सिधय्केगु आज्जु तःगु खःसा आज्जु कथं हे ज्या क्वचाःगु खः ।
कीर्तिपूण्य महाविहार स्वनिगःया न्हापांगु महाविहार जूगु धाःगु दु । बिम्विसारं कपिलवस्तुइ आक्रमण याःगु इलय् ल्वहं छगः ज्वनाः येँय् बिस्युंवःपिं शाक्यतय्गु छगू पुचलं व हे ल्वहं स्थापना यानाः थुगु महाविहार पलिस्था याःगु धयातःगु दु ।
थ्याका साकोसया गुक्वःगु दँमुँज्या
पुर्णिमा शाक्य | कछलागा चतुर्दशी ११४० (नोभेम्वर २५ २०१९)
यलया थ्याका बचत तथा ऋण सहकारी संस्था लि.(थ्याका साकोस)या गुक्वःगु दँमुँज्या जुल ।
उगु दँमुँज्यापाखें सुदिम शाक्यया अध्यक्षताय् न्हूगु ज्यासना पुचः नं ल्यःगु दु । ज्यासना पुचलय् धर्म शाक्य न्वकू, महेन्द्रवीर शाक्य छ्याञ्जे व पुष्प शाक्य दांभरिकथं ल्यःगु दु ।
अथे हे, दुजलय् कमलहेरा शाक्य, शारदा शाक्य, किरण शाक्य, राजेन्द्र शाक्य, निराजन शाक्य व आशारत्न शाक्यपिं सर्वसम्मतं ल्यःगु खः ।
उकथं हे न्हूगु कार्यकालया नितिं लेखा समितिया पूर्णिमा शाक्यया संयोजकत्वय् बिजय शाक्य व सज्जा शाक्यपिन्त दुजःकथं ल्यःगु दु ।
सुहेन्द्ररत्न शाक्य व रामकृष्ण डंगोलसहितया निर्वाचन उपसमितिया निर्वाचन अधिकृत मधुर शाक्यपाखें घोषणा यानाः शपथग्रहणया ज्या नं जूगुु खः ।
ज्याझ्वलय् संस्थाया प्रगति बिबरण नायः सुनिलमान शाक्यं न्ह्यब्वयादीगु खःसा आर्थिक प्रतिबेदन दांभरि धर्मरत्न शाक्यपाखें न्ह्यब्वयादीगु खः ।
सुदिम शाक्यं न्ह्याकादीगु उगु ज्याझ्वलय् मूपाहाँकथं यल जिल्ला बचत संघया सचिब श्यामकृष्ण महर्जन झायादीगु खः ।
