Display Style:
Column Style
येँय् ३६ लिसें स्वनिगलय् ४४ संक्रमित थप
शोभा श्रेष्ठ | गुंलागा ७ ११४०,साउन २६ सोमवाः
नेपालय् कोरोना भाईरस (कोभिड १९) पाखें संक्रमित जूपिनिगु ल्याः २३द्वः थ्यंगु दु ।
थौं ३सः व ३८म्हे न्हूपिं संक्रमित खनेदुगु लिसें कोभिड १९ पाखें संक्रमित जूपिनिगु ल्याः २३द्वः ३सः व १० थ्यंगु खः ।
थौं संक्रमण पुष्टि जूपिं ३सः ३८ मध्ये स्वनिगलय् ४४ दु ।
येँ जिल्ला दुने ३६म्हेसिके संक्रमण पुष्टि जूगु दुसा यल व ख्वप दुने ४/४ न्हूपिं संक्रमित लूगु दु ।
म्हिगः म्हीगःया तुलनाय् थौं स्वनिगः दुने संक्रमितया ल्याः म्ह्वः खनेदु । अथेखःसां लिपांगु इलय् न्हिं न्हिं हे थन न्हूपिं संक्रमित लुया हे च्वंगु दु ।
लिपांगु २४ घौ दुने सच्छि व ४० संक्रमित ल्वय् लंकाः छेँय् लिहांवंगु लिसें कोरोनायात त्याकूपिनिगु ल्याः १६द्वः ४सः व ९६ थ्यंगु दु ।
थौंतक्क पिसिआर विधिं ४ लख ५२द्वः २सः व ३६म्हेसिया परिक्षण जूगु दु । लिपांगु २४ घौ दुने ८४सः व ३२ नमूना परिक्षण जूगु दु ।
देयन्यंक क्वारेन्टीनय् च्वंपिनिगु ल्याः १०द्वः ७सः व ५९ दुसा आइसोलेसनय् उपचाररत संक्रमितया ल्याः ६७सः व ३८ दु ।
थौं थप प्यम्ह संक्रमित मदुगु लिसें कोरोना संक्रमणया हुनिं मदुपिनिगु ल्याः ७९ थ्यंगु दु ।
प्रहरी कन्ट्रोलय् ज्यायाइपि स्वम्हेसित कोरोना संक्रमण पुष्टि
लहनान्युज | गुंलागा ७ ११४०,साउन २६ सोमवाः
महानगरीय प्रहरी कार्यालय रानीपुखूया प्रहरी कन्ट्रोलय् ज्या याइपि स्वम्हेसित कोरोना भाइरस संक्रमण पुष्टि जूगु दु ।
संक्रमित नाप स्वापू दुपि मनू तयेत न पीसीआर परीक्षणया तयारी याना च्वंगुु दुु ।
प्रहरीया ग्वाहालि वा प्रहरी नाप छु न सूचना काये माःसा १०० नम्बरय् फोन याये वयलय् प्रहरी कन्ट्रोलय् ल्हनिगु खः । थुगु थासय् प्रहरीपि २४ घण्टाय् दइगु थाय् खः ।
थ्व स्वया न्ह्य न रानीपुखूलि ज्या याइम्ह छम्हेसित कोरोना संक्रमण खने दुगु खः ।
थ्व नाप नेपाल प्रहरीया पहरा गण सामाखुसी व नगर प्रहरी छम्हेसित न कोरोना संक्रमण खने दये धुकुगु खः ।
नगर प्रहरीयात ज्वरो वःगुलि परीक्षण याःगु इलय् कोरोना संक्रमण पुष्टि जूगु खः ।
वीरगञ्जय् कोरोना संक्रमण छम्ह मन्त
लहनान्युज | गुंलागा ७ ११४०,साउन २६ सोमवाः
वीरगञ्जय् कोरोना संक्रमण मेम्ह छम्ह मन्त । वीरगञ्ज महानगरपालिका–१५ भेडियाहीयाम्ह ४५ दँया छम्ह मिसा मदुगु दु ।
उम्ह मनू सीइ धुका नारायणी अस्पतालया पीसीआर प्रयोगशालाय् याःगु परीक्षणय् वयागु रिपोर्ट पोजेटिभ वःगु खः ।
थ्व नाप साउनय् जक पसार्यय् सीपिनिगु ल्याः १८म्ह थ्यःगु दु ।
उम्ह मनूयाके न्हापा निसे उच्च रक्तचाप व थाइराइडया ल्वगि खः ।
वयात सासः ल्हाये थाकुगु समस्या वये वः अस्पताल भर्ना जू वःगु खः ।
किपूया मेयरं नगरपालिका दुने थीथी वडाय् अबलोकन
नृपेन्द्रलाल श्रेष्ठ | गुंलागा ७ ११४०,साउन २६ सोमवाः
विदायु दिनय् न किपू नगरपालिकाया मेयर रमेश महर्जनं नगरया विकास निर्माण ज्याय् थथिी थासय् जुया च्वंगु ज्याय् निरीक्षण यानादिगु दु ।
किपू नगरपालिका वडा नंं ७ य् दक्को थासय् सञ्चालन जुया च्वंगु योजनाया जानकारी कयादिसे सम्बन्धित थासय् आवश्यकता कथं न्हुगु योजनाया बारे सहलह यानादिगु खः ।
मेयर महर्जनं भाजंगाः (नगां मसानया च्वय्) थौं कन्ह्ये स्थापना जुया च्वंगु भगवान गौतम बुद्धया प्रतिमाया न अबलोकन यानादिगु खः ।
थुगु प्रतिमा दयेकेगु लागि वडापाखे न्यागु लाख ध्यवा ग्वाहालि याःगु व उगु प्रतिमाया क्वय् छगू कोठा दयेकागु दु धका वडा अध्यक्ष राजकुमार मालीं जानकारी बिःगु खः । मेयर महर्जनं भाजंगालय् महर्जन समुदायया दाहसंस्कार गुथिया अबलोकन यानादिसे उगु थासय् विष्णुदेवी द्यः, यरवःचा जुया स्टील ट्यांकी तक लँ तब्याः याये माःगु, ढः दयेके माःगु व सतक पेटी दयेका च्वइगु थाय् या न अबलोकन यानादिगु खः ।
नगरपालिका वडा नं. ७ य् दुने लागु उज्ज्वल स्कूल निसे ११ मिटर चौडाइ दहन वनेगु लँ दयेकेइगु योजना सञ्चालन जुया च्वइगु उगु लँय् थौंकन्ह्ये रिटेलिङ्क वाल (पःखाः ) दयेकेइगु ज्या जुया च्वंगु खः ।
उगु निरीक्षण भ्रमणय् किपू नगरपालिका वडा नंं १ या अध्यक्ष हर्ष महर्जन, ७ या अध्यक्ष राजकुमार माली नाप सदस्यपि राजकुमार महर्जन, प्रकाश महर्जन नाप स्थानीयपि न ब्बति दुगु खः ।
नाकाय् कडाइ यायेत रक्षामन्त्री ईश्वर पोखरेल यायेत मेयर फोरमया सुझाव
नृपेन्द्रलाल श्रेष्ठ | गुंलागा ७ ११४०,साउन २६ सोमवाः
तराईया छु जिल्ला नाप स्वनिगः दुने कोभिड–१९ या तधःगु जोखिम अप्वःया वःगु धका धाःसे नाकाय् कडा याये माःग् सीसीएमसीया संयोजक पोखरेलयात उपत्यका नगरपालिका फोरमं सुझाव बिःगु दु ।
उपत्यका नगरपालिका फोरमं कोभिङ–१९ संकट व्यवस्थापन केन्द्र (सीसीएमसी)या संयोजक उपप्रधानमन्त्री तथा रक्षामन्त्री ईश्वर पोखरेल नाप रक्षा मन्त्रालयय् छलफल याःगु दु । फोरमया अध्यक्ष एवं येँ महानगरपालिकाया मेयर विद्यासुन्दर शाक्य व सचिव एवं मध्यपुर थिमी नगरपालिकाया मेयर मदनसुन्दर श्रेष्ठं सहलह यानादिगु खः । संयोजक पोखरेल नाप वःगु छु इलय् स्वनिगलय् अप्वःया वःगु कोरोना संक्रमणया नियन्त्रण व थुकि यात सकारात्मक कदम लगायतया विषय सहलह यानाःगु फोरमया अध्यक्ष शाक्यं जानकारी बियादिगु खः ।
येँ महानगरया मेयर शाक्यं, ‘जिमिस स्वनिगःया मागया बारेय् जानकारी बियाःगु दु । उपप्रधानमन्त्री तथा रक्षामन्त्री ईश्वर पोखरेल जिमिसं बियाःगु सुझावयात सकारात्मक रुपं कयादिगु दु धका धयादिगु खः । थौं हे सीसीएमसीया बैठक सःता थुगु खँय् गम्भिरता कथं कया सहलह यायेगु प्रतिवद्धता प्वका दिगु दु ।’ सहलहया झ्वलय् फोरमपाखे तेस्रो मुलुकपाखे वये फइगु यक्को ल्याखः यात्रुपिनिगु ध्यानय् तया क्वारेन्टायन व्यवस्थापन व सञ्चालन नियमावली कथं एकीकृत क्वारेन्टायन संघीय सरकारं सञ्चालन याये माःगु व स्थानीय तह न व्यवस्थापनय् ग्वाहालि यायेगु कथं उपयुक्त जुइगु सुझाव बियाःगु धकाः मेयर शाक्यं धयादिगु खः ।
अथेहे उगु सहलह ज्याझ्वलय् फोरमया सचिव श्रेष्ठं कोरोना संक्रमण फैलै जुइगु अवस्थाय् सामाजिक सुरक्षा भत्ताया नविकरणया लागि ज्याथा ज्याथीपि छेँय् न पिहा वयेगुलि समस्या जुइगु व संक्रमणया खतरा अप्वये यः उकिया लागि नविकरणया लागि म्याद थपे यायेत सुझाव बियाःगु धका धयादिग खः ।
फोरमया अध्यक्ष शाक्य, उपाध्यक्ष एवं यल महानगरपालिकाया मेयर चिरिबाबु महर्जन व सचिव श्रेष्ठ नाप फोरमया बैठक च्वने त्यःगु दु ।
