Display Style:
Column Style
सप्तखेल टोल सुधार समितिया झिंप्यक्वःगु दँमुँज्याया
लहनान्युज | कछलागा चतुर्दशी ११४० (नोभेम्वर २५ २०१९)
यल महानगरपालिका वडा ल्याः ९य् च्वंगु सप्तखेल टोल सुधार समितिपाखें नेपाल समाचारपत्र राष्ट्रिय दैनिकयात हंगु दु ।
समितिया झिंप्यक्वःगु दँमुँज्याया झ्वलय् ग्वसाः ग्वःगु छगू ज्याझ्वःया दथुइ उकथं हनेगु ज्या जूगु खः ।
उगु लागाया भौतिक विकास व सामाजिक, धार्मिकलिसें मानवीय विकासया समाचार सम्प्रेषण याना वयाच्वंगु धासें वडा ल्याः ९या वडाध्यक्ष राजु महर्जनं नेपाल समाचारपत्रया सहायक सम्पादक सुनील महर्जनयात हनापौलिसें मतिनाया चिं लःल्हासें हंगु खः ।
ज्याझ्वलय् समितिया नायः गुणराज शाक्य, समाचारपत्र दैनिकया सहायक सम्पादक सुनील महर्जनं थःथःगु नुगःखँ तयादीगु खः ।
सः छगू फरक अभिब्यक्ति साहित्यक ज्याझ्वः
लहनान्युज | कछलागा त्रयोदशी ११४० (नोभेम्वर २४ २०१९)
लय् लय् पतिक जुइगु नेपालभाषा साहित्यक ज्याझ्वः सः छगू फरक अभिब्यक्ति साहित्य ज्याझ्वः क्वचाःगु दु ।
थुगु लय् साहित्यकारपि सौरभ शाक्य, सुधिर ख्ववि व विमल ताम्राकार थःपिनिगु न्यापु न्यापु बाखं ब्वनान्यंकूगु खः ।
उगु ज्याझ्वलय् साहित्यकार ध्रुव मधिकःमिं न्हय्ब्वःगु चिबाखं यातकयाः सक्षिप्त समिक्षा यायेगु झ्वलय् दच्छिया दुने १२ गू ल्याः तक्क मदिक्क न्ह्याकाच्वंगु साहित्य ख्यःया नितिं सः छगू फरक अभिब्यक्तिया बांलागु कुतः जूगु खँ न्ह्यथनादिगु खः ।
समा श्री न्ह्याकादीगु उगु ज्याझ्वलय् नरेश अमात्यं बाखं ब्वंमिपिन्त स्वांमाः क्वखायेकाः लसकुस यानादीगु खःसा सुनिल बज्राचार्यं मतिनाचिं लःल्हानादीगु खः ।
ब्वतिकाःपिं मध्ये छम्हसित गोलाप्रथां दिलकुमारी डंगोलयात लुमन्ति चिं नं बज्राचार्यं लःल्हानादीगु खः । उगु हे ज्याझ्वलय् मोक्ष बहादुर अमात्यं च्वमिपिन्त खादां क्वखायेकाः दां नं लःल्हानादीगु खः ।
बुखँ–राजेन्द्र रञ्जित
किपा– नेवाः सूचना केन्द्र
राजनैतिक अभियानया भिंतुना ज्याझ्वः जुल
लहनान्युज | कछलागा त्रयोदशी ११४० (नोभेम्वर २४ २०१९)
नेवाः राजनैतिक अभियानया ग्वसालय् नेपाल संवत ११४० न्हूदँया लसताय् लखुतिर्थय् छगू भिंतुना कालबिल ज्याझ्वः जुगु दु ।
उगु ज्याझ्वलय् नेवाः न्ह्यलुवा डा. महेश मान श्रेष्ठ मूपाहाँ कथं झायादीगु खः ।
ज्याझ्वलय् ग्वहालि पुचःया थीथी वडाया नायः पिसं थःथःया नुगःखँ तयादीगु खः ।
ज्याझ्वः संस्थाया नायः श्रीकृष्ण मानन्धरया सभाध्यक्षताय् जुगु खः ।
बुखँ–रमिता बज्राचार्य
किपा–नेवाः सूचना केन्द्र
किर्तिपुण्य महाविहारया देगः जिर्णोद्धार लिपा उलेज्या जुल
शोभा श्रेष्ठ | कछलागा द्वादशी ११४०
येँया लगमय् किर्तिपुण्य महाविहारया देगः जिर्णोद्धार लिपा उलेज्या जूगु दु । २०७२ या तःभुखाचं क्षतिग्रस्त जूगु देगःया जिर्णोद्धार लिपा औपचारिक उलेज्या जूगु खः । वंगु शन्चरबाः कामपा २१ स्थित किर्तिपुण्य महाविहार लगं बहालय् येँ महानगरपालिकाया मेयर विद्यासुन्दर शाक्यं देगःया उलेज्या उलेज्या यानादीगु खः ।
उगु इलय् वौद्ध परम्परा कथं देगःया पूजा नं जूगु खः । पूजा क्वचायेधुंकाः जूगु औपचारिक ज्याझ्वलय् येँ महानगरपालिकाया प्रमुख शाक्यं सतः, फल्चा, विहार, महाविहार, देगः लिसें येँय् दुगु थीथी पुरातात्विक, धार्मिक, साँस्कृतिक महत्वया सम्पदाया पुनर्निर्माण महानगरपालिकाया नीति व दायित्व तकं खःगु धयादिल । कामपां न्हूगु निर्माणयात निषेध हे यानाः पुनर्निर्माणयात प्राथमिकता बियागु धासें माःगु थासय् कामपा व स्थानीय गुथियारया पहलय् ज्या न्ह्यःने यंकेगु प्रतिवद्धता शाक्यं प्वंकादिल ।
गुलिखे थासय् गुठी संस्थान व पुरातत्व विभागं बांलाक समन्वय यायेमफयाः समस्या जूसां पुनर्निर्माणया लागिं कामपायाके आर्थिक स्रोतया अभाव मदुगु कामपा प्रमुख शाक्यया धापू खः ।
मुक्कं ४९ लख तकाया लागतय् देगःया दयेकेज्या क्वचाःगु खः । देगःया पुनर्निर्माण दछिं दयेके सिधयेकेगु आज्जु तःगु खःसा आज्जु कथं हे ज्या क्वचाःगु खः ।
कीर्तिपुण्य महाविहार स्वनिगःया न्हापांगु महाविहार खःगु धाःगु दु । विम्विसारं कपिलवस्तुइ आक्रमण याःगु इलय् ल्वहँ छगः ज्वनाः येँय् बिस्युंवःपिं शाक्यतय्गु छगू पुचलं व हे ल्वहँ स्थापना यानाः थुगु महाविहार स्थापना याःगु धयातःगु दु ।
स्वक्वःगु नेपालभाषा साहित्य नखः शुरु
लहनान्युज | कछलागा द्धादशी ११४० (नोभेम्वर १९ २०१९)
निन्हु यंक. जुगु स्वक्वःगु नेपालभाषा साहित्य नखः येँया नेपाल प्रज्ञा प्रतिष्ठान न्ह्याःगु दु । नेपालभाषा टाइम्सया ग्वसालय् वःगु स्वदँ न्ह्यःनिसे याना वया च्वंगु खः ।
उगु ज्याझ्वलय् वरिष्ठ साहित्यकार मथुरा सायमिया आत्मकथा ’साय्मि जि मथुरा’, भूषण श्रेष्ठयाःगु गजल संग्रह ’ नुगःया गुनगुन’, राजेन्द्रकुमार पुतायाःगु सुथया लिसः गजल समालोचना, राज साय्मिया जासुसी उपन्यास ’तुयुगु अजः’ सफू बिमोचन जुगु खः ।
अथेहे कवि बासुदेव अधिकारीया नेपालभाषा अनुवादयाना चिनाख मुना युरो स्पर्श व साहित्यकार उद्धव मास्केया नियात्रा छगु बन्द देशय् .. न उगु ज्याझ्वलय् सफू पितब्बज्या जुगु खः ।
अथेहे ज्याझ्वलय् जनकवि दुर्गालाल श्रेष्ठं सीमा अतिक्रमण बारे चिनाखँ ब्बना न्यकादिगु खःसा बहनि सांस्कृतिक ज्याझ्वः न जुगु खः । ज्याझ्वः थौं न न्ह्याइतिनि ।
