Display Style:
Column Style
प्रधानमन्त्रीयात तयातःगु भेन्टिलेटर चीकल
लहना न्यूज | ने.सं. ११४० थिंलाथ्व पारु (२७ नोभेम्बर २०१९), बुधवाः
म्हिगः मंगलवाः एपेन्डिसाइटिस लिसें पेरिटोनाइटिसया शल्यक्रिया यानादीम्ह प्रधानमन्त्री केपी शर्मा ओलीया उसाँय् छुं छुं सधार खनेदयेवं वय्कःयात तयातःगु भेन्टिलेटर चीकूगु दु ।
प्रधानमन्त्री ओली वासः याकाच्वनादीगु महाराजगञ्जय् च्वंगु मनमोहन कार्डियोथोरासिस, भास्कुलर व ट्रान्सप्लान्ट सेन्टरं थौं बुधवाः विज्ञप्ति पिथसें उकथं जानकारी ब्यूगु खः ।
अस्पतालयाकथं विशेषज्ञ चिकित्सकपिनिगु शल्यक्रिया लिपा संघन उपचार कक्ष अर्थात आइसियूस फुक्क व्यवस्थालिसें मदिक्क निगरानीइ च्वनादीम्ह प्रधानमन्त्री ओली बांलाक्क हे खँल्हायेफूगु अवस्थाय् दु ।
कार्डियोथोरासिस भास्कुलर व ट्रान्सप्लान्ट सेन्टरया कार्यकारी निर्देशक प्रा.डा. उत्तमकृष्ण श्रेष्ठं थौं सुथय् १०ः३० इलय् पिथंगु विज्ञप्तिइ न्ह्यथनातःगु खः ।
स्वास्थ्यय् समस्या खनेदयेवं प्रधानमन्त्री ओलीयात म्हिगः मंगलवाः सुथय् ९ ताः इलय् अस्पताल थ्यंकूगु खः । विशेषज्ञ चिकित्सकपिनिगु पुचलं परीक्षण याःगु इलय् वय्कःयात एपेन्डिसाइटिसया नापनापं पेरिटोनाइटिसतकं खनेदयेवं तुरुन्त हे ल्यापरोटोमी व एपेन्डेक्टोमी शल्यक्रिया याःगु खः ।
सेन्टरयाकथं शिक्षण अस्पतालया ग्यास्ट्रोइन्टेस्टाइनललिसें स्येँया प्रत्यारोपण शल्य चिकित्सक डा. रमेशसिंह भण्डारीया नेतृत्वय् शल्यक्रिया याःगु खः ।
शल्यक्रियालिपा सेन्टरं म्हिगः मंगलवाः न्हिनय् व सनिलय् यानाः निक्वःतक विज्ञप्ति पिथसें प्रधानमन्त्रीया स्वास्थ्य अवस्था स्थीर जूगु न्ह्यथंगु खः । विज्ञप्तिइ शल्यक्रिया लिपा प्रधानमन्त्रीया संघन उपचार कक्षय् वासः जुयाच्वंगु नं न्ह्यथंगु खः ।
सन्धिखर्क व हुम्लाय् जूगु दुर्घटनाय् २०म्ह सित
लहना न्यूज | ने.सं. ११४० थिंलाथ्व पारु (२७ नोभेम्बर २०१९), बुधवाः
अर्घाखाँचीया सन्धिखर्क नगरपालिका–६ नरपानीइ थौं बुधवाः सनिलय् जूगु बस दुर्घटनाय् १७म्ह घटनास्थल हे मन्त ।
सन्धिखर्कपाखें बुटवल वनाच्वंगु लु २ ख २१४८ ल्याःया बस नरपानी बजार लिक्कसं घुम्तीइ दुर्घटना जूगु खः । दुर्घटनास्थलय् नेपाली सेना, नेपाल प्रहरी व सशस्त्र प्रहरी लिसें स्थानीयवासीतसें उद्धार यानाच्वंगु दु । आःतक झिंन्हय्म्हेसिगु घटनास्थल हे सीगु उद्दारय् खटे जूम्ह प्रहरी निरीक्षक सुरज सुवेदीं जानकारी बियादिल ।
बस सडकपाखें थ्यंमथ्यं स्वसः मिटर क्वय् कुतुंवंगु खः ।
अथे हे, हुम्लाय् टिपर दुर्घटना जूगु इलय् स्वम्ह सीगु दुसा १३म्ह घाःपाः जूगु दु ।
नेपाल खाद्य संस्थानया जाकि व मेमेगु बन्दोबस्तिया हलंज्वलंलिसें सदरमुकाम सिमकोट वनाच्वंगु लु ४ ख ३२६९ ल्याःया टिपर सिमकोट गाँउपालिका–७या लाग्नाडाँडाय् दुर्घटना जूगु खः । दुर्घटनाय् नाम्खा गाउँपालिका–१, हेप्का गांया छिरिङ लामा, नोरी लामा व तान्ज्योत लामा सीगु खः । टिपर सतक स्वयां थ्यंमथ्यं ३०गू मिटर क्वय् कुतुंवंगु खः ।
घाःपाः जूपिनिगु जिल्ला अस्पताल हुम्लाय् वासः जुयाच्वंगु व अप्वसिगु अवस्था गम्भीर जूगु प्रहरी नायव उपरीक्षक रामप्रसाद घर्तीमगरं जानकारी बियादिल ।
टिपर चालक काभ्रे जिल्लाया बुद्ध नगरपालिका–११, भालुखर्कया आनन्द तामाङयात स्थानीयबासीतसें नियन्त्रणय् कयाः प्रहरीयात लःल्हाःगु दु ।
चालकं मादक पदार्थ त्वनातःगुलिं दुर्घटना जूगु स्थानीयवासीतसें द्वपं ब्यूगु दु । तर, प्रहरीं धाःसा दुर्घटना छु हुनिं जूगु खः धइगु खँय् अनुसन्धान जुयाच्वंगु धाःगु दु ।
थ्व हे झ्वलय् दुर्घटनाय् घाःपाः जूपिनिगु अवस्था सीकेत कर्णाली प्रदेशया सामाजिक विकासमन्त्री दल रावल अस्पताल थ्यंकादीगु दु ।
पन्ति देय् विश्वसम्पदाया धलखय् दुथ्यायेफइगु
लहना न्यूज | ने.सं. ११४० कछलागा आमाइ (२६ नोभेम्बर २०१९), मंगलवाः
युनेस्कोया नेपाल प्रतिनिधि मानहार्ट क्रिस्टियानं पन्ति देय् विश्व सम्पदाय् सूचीकृत जुइफइगु धयादीगु दु । पन्तियात सम्पदायुक्त शहरकथं विकसित यायेत दयेकूगु गुरुयोजना लःल्हायेगु ज्याझ्वलय् थौं मंगलवाः क्रिस्टियानं थुकिया नितिं पुरातत्व विभागलिसे समन्वय यायेत नं छ्याता बियादिल ।
छगू देसं दच्छिइ छगू जक सम्पदायात विश्व सम्पदाय् प्रस्तावित यायेफइगु न्ह्यथनादिसें क्रिस्टियानं थौंकन्हय् जनकपुरया जानकीधाम प्रस्तावित जूसां नं पूमवंनीगु धयादिल ।
पन्ति नगरपालिकाया प्रमुख भीम न्यौपानें २२दँ न्ह्यः विश्व सम्पदाय् प्रस्तावित यायेगु धकाः क्वःजीधुंकूगु अवस्थाय् तकं पन्ति आःतक सम्पदा प्रकृयाय् वनेमफूगु धयादिल । ‘पन्तियात अझ सम्पदाकथं दयेकेत आः वःगु गुरुयोजनाकथं याकनं हे ज्या न्ह्याइ । थनया फल्चा, सतः, देगः व छेँयात परम्परागत शैलीइ समृद्ध दयेकेगु जुइ ।’ प्रमुख न्यौपानें धयादिल ।
वय्कलं थुकिया नितिं थुगु हे आर्थिक दँय् १गू करोड तका फ्यानागु जानकारी बियादिसें तत्काल कार्ययोजना तय यानाः पन्तियात अझ पुरातात्विक महत्वया शहर दयेकेगु घोषणा नं यानादिल । प्रमुख न्यौपानें नगरपालिका स्थानीय जनसहभागिता व पुरातत्व नापं दातृ निकायया सहकार्यस पन्तियात सम्पदाजन्य भिजनया गुरुयोजना आरपी फाउण्डेशनपाखें इञ्जिनियर जेविन धौभडेलं तयार याःगु खः ।
फाउण्डेशनया संस्थापक सम्पदाविद् रविन्द्र पुरीं निदँया ई दुने पन्तियात सम्पदाजन्य पुरातात्विक महत्वया नमूना शहरकथं विकसित यायेफइगु प्रतिज्ञा यानादिल । ‘थन म्वाःमदुकथं धेंधेंबल्ला खनेमदु, जीर्णोद्धार व पुनःनिर्माण नं सम्पदायात मतिना यानाः न्ह्याः वनाच्वंगु अवस्था दु ।’ पुरीं धयादिल । ‘पन्तियात ल्यंकेत व म्हसीकेत उलि यक्व मिहिनेत यायेमाली मखु जुइ ।’
पन्ति शहरं क्वःछिनातःगु सम्पदा लागा दुने न्हूगु संरचना दयेकेत वा पुनःनिर्माणया हकय् नं निश्चित परम्परागत सम्पदाजन्य मापदण्ड पूवंकेमाःगु नियम कार्यान्वयन याना वयाच्वंगु दु । पन्ति देसय् छुं नं दयेकेत न्हापां पुरातत्व विभागं स्वीकृति कयाः जक संरचना तयार यायेदइगु नियम अनिवार्य दु ।
प्रधानमन्त्री ओलीया स्वास्थ्य स्थिर
लहना न्यूज | ने.सं. ११४० कछलागा आमाइ (२६ नोभेम्बर २०१९), मंगलवाः
प्रधानमन्त्री केपी शर्मा ओलीया स्वास्थ्य स्थिर जूगु दु ।
त्रिभुवन विश्वविद्यालय, शिक्षण अस्पतालया मनमोहन ‘कार्डियोथोरासिक भास्कुलर एण्ड ट्रान्सप्लान्ट सेन्टर’य् थौं मंगलवाः एपेन्डिसाइटिसया शल्यक्रिया यायेधुंकाः सेन्टरं प्रेस विज्ञप्ति पिथसें प्रधानमन्त्री ओलीया स्वास्थ्य अवस्था स्थिर जूगु न्ह्यथंगु खः ।
प्रधानमन्त्रीया एपेन्डिसाइटिसया शल्यक्रिया लिपा पोस्ट अपरेटिभ वार्डय् तयातःगु दु । उपचार यायेधुंकाः आः संघन उपचारया फुक्क व्यवस्थालिसें निरन्तर निगरानीइ तयातःगु दु ।’ विज्ञप्तिइ न्ह्यथनातःगु दु ।
प्रधानमन्त्री ओलीया त्रिभुवन विश्वविद्यालय, शिक्षण अस्पतालको मनमोहन ‘कार्डियोथोरासिक भास्कुलर एण्ड ट्रान्सप्लान्ट सेन्टर’य् एपेन्डिसाइटिसया शल्यक्रिया याःगु खः ।
प्रधानमन्त्री ओली स्वास्थ्य समस्या खनेदयेवं थौं सुथय् उगु सेन्टरय् झायादीगु खः । ओलीयात एपेन्डिसाइटिस जूगु सीदयेवं चिकित्सकपिन्सं शल्यक्रिया याःगु प्रधानमन्त्रीया प्रेस सल्लाहकार सूर्य थापां जानकारी बियादिल । प्रधानमन्त्रीया शल्यक्रिया ताःलाःगु नं थापां धयादीगु दु ।
उपचारय् प्रा. डा. अरुण सायमि, प्रा. डा. रमेशसिंह भण्डारी, डा. दिव्या सिंहलिसें चिकित्सकपिं दुथ्याःगु खः । प्रधानमन्त्री ओली छुं दिं अस्पताल हे च्वनेमाःगु जूगु दु । चिकित्सकया कथं एपेन्डिसाइटिस जूसा गुलि फु उलि याकनं थुकिया शल्यक्रिया यायेमाः ।
थ्व स्वयां न्ह्यः प्रधानमन्त्री ओलीया जलास्येँय् समस्या वयेधुंकाः डायलसिस याःगु खः ।
प्याजया भाः २५० किलो थ्यन
लहनान्युज | कछलागा औंसी ११४० (नोभेम्वर २६ २०१९)
नेपाःया बजारय् प्याज आतक दकलय् अप्वो जुगु दुु । कालिमाटी फलफूल तथा तरकारी विकास समितिइ थौं मंगलवाः प्याज छगु किलोया होलसेल भाः निसः तका क्वछिगु दु ।
वःगु वाः कालिमाटी बजारय् प्याजया छगु किलोया भाः १५२ तकां थ्यःगुु खः ।
थौं प्रतिकिलो ४८ तक थहा वना निसः तका थ्यःगु खः ।
अथेहे थौं कालिमाटी तरकारी बजारय् हे प्याजया भाः छगु किलोउा २२० निसे २३० थ्यःगु दु ।
कालिमाटी तरकारी बजारय् हरेक वाः पतिक प्याजया भाः झीतका थहा वना च्वंगु खः ।
