Display Style:
Column Style
सत्तारुढ नेकपाय् प्रचण्ड कार्यकारी नायः
विकाश | कछलागा अष्टमी, ११४०
सत्तारुढ दल नेपाल कम्युनिष्ट पार्टी नेकपां पार्टी नायः पुष्पकमल दाहालयात कार्यकारी नायःया भाला ब्यूगु दु । प्रधानमन्त्री निवास बालुवाटारय् बुधबाः च्वंगु नेकपा सचिवालय बैठकं नायःद्वय केपीशर्मा ओली व पुष्पकमल दाहालया भाला इंगु खः ।
न्हूगु कार्यविभाजन कथं नायः केपी शर्मा ओली पूवंक कार्यकाल प्रधानमन्त्री जुइसा दाहालं पार्टीया नेतृत्व याइ ।
वंगु साउन लिपांगु वालय् निम्ह नायः दथुइ छम्हेसिनं सरकारया नेतृत्व यायेगु व मेम्हं पार्टीया नेतृत्व यायेगु सहमति जूगु खः । उगु सहमति कार्यान्वयन मजूगु धासें दाहालं असन्तुष्टि प्वंकावःगु खः ।
कार्यविभाजनलिसें आः दाहालं पार्टीया कार्यकारी नायःया ज्या अर्थात पार्टीया आन्तरिक बैठकया अध्यक्षता याइ ।
तत्कालिन एमाले व माओवादी केन्द्र दथुइ एकता याःबलय् निम्ह नायः दथुइ पालंपाः सरकारया नेतृत्व यायेगु गोप्य सहमति जूगु खः ।
सचिवालय बैठक च्वने न्ह्यः नायःद्वय ओली व दाहाल दथुइ मन्त्रीमण्डल पुनर्गठनबारे सहलह जूगु खः । सहलह धुंकाः निम्हेसिनं नं राष्ट्रपति विद्यादेवी भण्डारीलिसे नं सहलह याःगु खः ।
मन्त्रिपरिषद पुनर्गठन यायेगु तयारी
लहनान्युज | कछलागा अष्टमी ११४० (नोभेम्वर २० २०१९)
मन्त्रिपरिषद पुनर्गठन यायेगु लागि प्रधानमन्त्री केपी शर्मा ओली व नेकपा अध्यक्ष पुष्पकमल दाहाल प्रचण्डं राष्ट्रपति विद्यादेवी भण्डारीयात नाप लाय्ग दु ।
थौं बुधवाः सुथय् ओली व प्रचण्ड शितल निवास वाना राष्ट्रपति भण्डारीयात परामर्श काःगु दु ।
राष्ट्रपतियात नापलाय्् न्ह्यः ओली व प्रचण्ड बालुवाटारय् सहलह यासे निम्ह अध्यक्ष शितलनिवास वःगु खः ।
प्रधानमन्त्री ओलीं थौं हे मन्त्रिपरिषद हेरफेर यायेगु तयारी याना च्वंगु दु ।
पत्रकार दबूया न्हुपिं कार्यसमितियात भिंतुना देछाल
लहनान्युज | कछलागा सप्तमी ११४० (नोभेम्वर १९ २०१९)
नेवाः पत्रकार राष्ट्रिय दबूया न्हूगु निर्वाचित कार्यसमितियात भिंतुना देछा ज्याझ्वः थौं यलय् जूगु दु । पत्रकार दबू यल कचा व ताम्रकार समाजया मंकाः ग्वसालय् थौं छगू ज्याझ्वःयासे दबूया न्हूगु निर्वाचित ज्यासना पुचःयात भिंतुना देछाःगु खः ।
भिन्तुना देछायेगु झ्वलय् समाजया नायः रविन्द्रराज ताम्रकारं मातृभाषा पत्रकारिता ख्यलय् न व्यावसायिकताया विकास यायेमाःगु खँय् बः बियादीगु खः । ‘नेवाः भासं पत्रकारिता यानाः नं परिवार लहीफइगु लकस दयेके फयेमाल । उकिया नितिं पत्रकार दबू न्ह्यचिलेमाःगु खनेदु’ नायः ताम्रकारया धापू खः ।
अथे हे, पत्रकार दबूया न्हूम्ह नायः सुरजबीर बज्राचार्यं मातृभाषा पत्रकारिता ख्यःयात थकायेत यायेमाःगु ज्या थःपिन्सं याना वनेगु बचं बियादिल।
ज्याझ्वलय् न्हूगु निर्वाचित केन्द्रीय समितियात दबूया यल कचाया पदाधिकारीपिन्सं नेवाः परम्परा कथं धौसगं तिकेगुलिसें ख्येँय् सगं ब्यूगु खः । अथे हे, ताम्रकार समाजया नायः रबिन्द्र ताम्रकारं खादां न्ययेकादीगु खः ।
किपाः प्रेरणा शाक्य
किपू नगरपालिकां “नगर सन्देश” वाःपौ पिदन
लहनान्युज | कछलागा सप्तमी ११४० (नोभेम्वर १९ २०१९)
किपू नगरपालिकापाखे थःगु ख्वाःपौ (बुलेटिन) पिथंगु दु ।
“नगर सन्देश” नामं पिथंगु उगु बुलेटिनया सोमवाः मेयर रमेश महर्जन व उपमेयर सरस्वति खड्का रिजालं छगु ज्याझ्वः दथुइ विमोचन यानादीगु दु ।
उगु ज्याझ्वलय् उपमेयर रिजालं वाःपतिकं सोमवाः खुन्हु पिदनीगु थुगु ख्वाःपौ (बुलेटिन) मद्दिक पिथनेगु जूगुलिं नगरया हरेक ज्याख“त फयांफत्तले कःघायेगु धका धयादिगु खः ।
वयकलं वाः पौलय् न्हापांगु जूगुलिं मगाःमचाः व द्वं विद्वं नं दयेफुगु धयादिसें सकसियां सल्लाह सुझावं भिंकायंकेगु धयादिल ।
नगरपालिकापाखें यानाच्वंगु यक्व हे विकास निर्माणया ज्या लिसें आर्थिक, सा“स्कृतिक व सामाजिक ज्या त यक्व हे नगरय् जुयाच्वंसां नं थजाःगु ज्याख“या उचित प्रसार प्रसार याये मखंगुलिं नगरबासीतय्त इलय् हे सुसूचित यायेगु तातुनां थुगु बुलेटिन पिथनागु न्ह्यथनादिल ।
नगरपालिकाया हरेक ज्याख“ त पारदर्शीढंगं न्ह्यांवनाच्वंगु व पारदर्शीकथं हे न्ह्याकायंकेगुलिइ थुगु “नगर सन्देश” बुलेटिनं सकारात्मक भूमिका म्हितिगु न्ह्यथनादिगु खः । नगरपालिकाया हरेक सुचं त सहित नगरया गतिविधि कःघाइगु थुगु बुलेटिन नगरया हरेक छे“य् छे“य् थ्यंकेगु कुतः जुइगु नं जानकारी बियादिल ।
ज्याझ्वलय् नगरपालिकाया प्रमुख प्रशासकीय अधिकृत ध्रुवराज आचार्य, लेखा अधिकृत मित्र प्रसाद घिमिरे, वरिष्ठ ईन्जिनियर बालकृष्ण महर्जन लगायत शाखा प्रमुखतय्गु समेत ब्वति दुगु खः ।
नेवाः पत्रकारपिन्त वाङमयशताब्दी पुरुष जोशीपाखें हन
लहनान्युज | कछलागा षष्ठी ११४० (नोभेम्वर १८ २०१९)
नेवाः पत्रकार राष्ट्रिय दबूया न्हुगु निर्वाचित जुयादीपिं केन्द्रीय समितिया पदाधिकारी नाप मूदुजःपिन्त वाङमय शताब्दीपुरुष डा.सत्यमोहन जोशीं थःगु छेँय् सःता हनादीगु दु ।
वय्कलं समाजय् ह्यूपाःया नितिं न्ह्याः वनाच्वंपिं देय्न्यंकंया नेवाःपत्रकार पिन्त हनेदयाः थःगु छेँ हे पवित्र जूगु धकाः धयादिगु खः । वय्कलं नेपाः साँस्कृतिक विविधता, नेवाः संस्कृति, सभ्यताया नापं नेपालभाषाया नितिं नं नेवाःपत्रकारपिन्सं महत्वपूर्ण भूमिका म्हिते फयेमाः धकाः भिंतुना देछाना दिगु खः । नेपालय् भाषिक समानता दु, दक्को मातृभाषा नेपाःया राष्ट्रभाषा धकाः सविधानय् न्ह्यथनातःगु जूसां नं राज्यं माःकथंया नीति ज्वना मच्वंगु अवस्थाय् अजाःगु सःतकं पत्रकारपिन्सं हे तयेमाःगु खँय् बःबियादिगु दु ।
उगु हना ज्याझ्वलय् नेवाःपत्रकार राष्ट्रिय दबूया न्हूम्ह नायः सुरजवीर बज्राचार्यं वाङमय शताब्दीपुरुष सत्यमोहन जोशीपाखें गुकथं थःपिन्त हनादिल,उकिं याना न्हूगु उर्जा क्रियाशील जूगु व वय्कःया आशिर्वादपाखें नेवाःपत्रकारपिं सशक्तकथं न्ह्याःवनेफइ धका धयादिल ।
अथेहे, बरिष्ठ न्वकू नृपेन्द्रलाल श्रेष्ठं नं नेवाः पत्रकार राष्ट्रिय दबूया केन्द्रीय समितिया पदाधिकारी व मूदुजः नेवाःपत्रकारपिन्त थुकथं वाडमय शताब्दी पुरुषपाखें न्हापांखुसि हनेज्या याःगुलिं थःपिं तसकं लय्तायागु धयादिसें थुगु ज्याझ्वःथःपिनिगु नितिं तःधंगु भाग्यया खँ जूगु धकां धयादिल । दबूया छ्याञ्जे केके मानन्धरं न्ह्याकादीगु खः ।।
