Display Style:
Column Style
निःशुल्क चिकित्सालयया ६३ दँमुँज्या हन
नृपेन्द्रलाल श्रेष्ठ | सिल्लाथ्व त्रयोदशी ११४० (फ्रेअवरी ७ २०२०)
क्षत्रपाटी निःशुल्क चिकित्सालयया ६३ दँ मुँज्या येँ महानगरपालिकाया मेयर बिद्यासुन्दर शाक्यया मूपाहाँसुइ तःजिक क्वचाःगु दु ।
उगु ज्याझ्वलय् चिकित्सालयय् यात कुमारदेव मानन्धर स्वंगु लख, सुर्यमान सिंह बानियाँ व प्राणदेवि बानियाँ न्यागु लख व अमृतराज शाक्यं छगु लख आर्थिक ग्वाहालि यानादिगुलि मूपाहाँ मेयर शाक्यं दोसल्ला न्ययेका हनादिगु खः ।
अथेहे, उगु हे ज्याझ्वलय् श्यामबहादुर गुरुङ्गं छगु लख, ठमेल पर्यटन बोर्डया न्वकु गिता गुरुङ्ग न्यय् द्धः, मोनिका स्थापितपाखे झीन्याद्धः व रमेश श्रेष्ठं न्याद्धः तका ग्वाहालि यानादिगु खः ।
अथेतु, उगु ज्यााझ्वलय् निःशुल्क चिकित्सालय् नीदँ तक्क मदिक्क सेवा यानादिपि मिखाँ ल्वयु बिशेषज्ञ डा.केशवराज भट्टराई, बालरोगया बिशेषज्ञ डा. सरिता श्रेष्ठ (ताम्राकार), अनमी बिमला राजभण्डारी, हेल्पर चमेली गुरुङ्ग व हेल्पर कृष्ण महर्जनयात नगद नाप हनापौ येँ महानगरपालिकाया मेयर बिद्यासुन्दर शाक्य व उपमेयर हरिप्रभा श्रेष्ठ खड्गीं लल्हानादिगु खः ।
उगु ज्याझ्वलय् मेयर बिद्यासुन्दर शाक्य निःशुल्क चिकित्सालय् न ज्यायात प्रशांसा यानादिसे ये महानरगपालिका न सहकार्य याना वने तयार दु धयादिसे निःशुल्क चिकित्सालया न्हुगु भवण दयेकेगु लागि ग्वाहालि यायेगु बचं न बियादिगु खः ।
चिकित्सालयया नायः डा. मनोजमान श्रेष्ठया सभाधक्ष्यताय् जुगु खः । मेयर शाक्यं क्षत्रपाटी निःशुल्क चिकित्सालयया निरिक्षण न यानादिगु खः ।
धम्महल भवन दयेकेत महानगरं ३ करोड अनुदान लल्हात
लहनान्युज | सिल्लाथ्व एकादशी ११४० (फ्रेअवरी ५ २०२०)
येँं महानगरपालिकां अन्तरराष्ट्रिय बौद्ध भावना केन्द्रया धम्महल भवन दयेकेत ३ करोड १ लख ६९ द्धः २ निसः अनुदान ध्यवा थौं छगु ज्याझ्वः यासे लल्हाःगु दु ।
थौं बुधवाः छगु ज्याझ्वःया दथुइ महानगरया प्रमुख बिद्यासुन्दर शाक्यं केन्द्रया अध्यक्ष प्रतीकरत्न ताम्राकारयात उगु चेक लल्हाःगु खः। उगु ज्याझवलय् उपप्रमुख हरिप्रभा खड्गी श्रेष्ठ, १८ या वडाध्यक्ष न्हुच्छेकाजि महर्जन, २५ या वडाध्यक्ष नीलकाजी शाक्य नाप कार्यपालिया सदस्यपि, वडा सदस्यपि व कर्मचारीपि न सहभागि दुगु खः ।
उगु ज्याझ्वल् थःगु खँ तयादिसे महानगरया प्रमुख शाक्यं येँ महानगरपालिकां भौतिक पूर्वाधार बिकास, सहरी सेवा व्यवस्थापन व सम्पदा पुननिर्माण नाप थःगु लागा दुने सम्भावनाया प्रवर्धनया लागि ज्या याना च्वनागु दु धका धयादिगु खः ।
उगु ज्याझ्वलय् थःगु खँ तयादिसे केन्द्रया अध्यक्ष प्रतीकरत्न ताम्राकार महानगर उपलब्ध याउगु ग्वाहालि ध्यवां थुगु केन्द्रया बिकासया लागि तधःगु ग्वाहालि जुइ भलसा कयादिसे केन्द्रया छेँय्या कर मिनाहा यायेत न आग्रह यानादिगु खः । सामाजिक सेवा व बौद्ध दर्शनया प्रवर्धनया लागि ज्या याना च्वनागु दु धयादिगु खः ।
२०४२ सालय् स्थापना जुगु थुगु भावना केन्द्र करीब ७ रोपनी ६ आना ३ पैसा क्षेत्रफलय् दु । थुगु केन्द्रं बौद्ध परियन्ती शिक्षा अध्यापन याका वया च्वंगु खः ।
येँ महानगरया मेयर शाक्ययात स्कल्पचर सम्बन्धि प्रतिवेदन लल्हात
सुरेन्द्रभक्त श्रेष्ठ | सिल्लाथ्व एकादशी ११४० (फ्रेअवरी ५ २०२०)
नेपाल ललितकला प्रज्ञा प्रतिष्ठानया कुलपति के. के. कर्माचार्यया संयोजकत्वय् गठन जुगु स्कल्पचर तथा कलाकृति प्रतिस्थापन निर्देशक समितिं थौं बुधवाःयेँ महानगरया प्रमुख बिद्यासुन्दर शाक्ययात प्रतिवेदन लल्हाःगु दु ।
येँया सार्वजनिक थासय् च्वंगु मूर्ति, चित्र नाप मेमेगु आकृतिया म्हसिका याउगु प्रतिस्थापन यायेगु अध्ययन यायेत गठन याउगु समितिं तत्काल अगलय् च्वयेगु ज्याया कला प्रदर्शन याये फइगस शिफारिस नाप प्रतिवेदन पेश याउगु खः ।
उगु प्रतिवेदन लल्हाना कयादिसे येँ महानगरया मेयर शाक्यं ‘स्थानीयबासीया भावना व येँया म्हसिका दइगु कला थःगु हे कार्यकालय् प्रतिस्थापन यायेगु ज्या जुइ धका धयादिसे थुकिया लागि महानगरं १० करोडया बजेट छुटे याना तयागु दु धका धयादिगु खः ।’
ताम्रकार समाजपाखें मंकाः बाह्राः
नृपेन्द्रलाल श्रेष्ठ | सिल्लाथ्व दशमी ११४० (फ्रेअवरी ४ २०२०)
ताम्रकार समाजया ग्वसालय् मंकाःकथं बाह्राः तय्गु ज्या जूगु दु ।
नेवाः परम्पराकथं जूगु उगु ज्याझ्वलय् ब्वति कयादीपिं नीन्हय्म्ह मचाल्यासेपिन्त बाह्राःया महत्वलिसें थुगु उमेरय् जुइगु शारीरिकलिसें मानसिक विकासया थीथी पक्षयात कयाः ज्ञान बीगु नं ज्या जूगु खः ।
समाजया नायः रविन्द्रराज ताम्रकारं नेपाःया संस्कृति, संस्कार, विधि व्यवहार वप सम्पदाया संरक्षणया नापनापं सम्बद्र्धनया ज्या याना वयाच्वंगु समाजं बाह्राः तय्गु ज्या व्यक्तितगकथं याय्बलय् थीथीकथंया समस्या दयाच्वंगुलिं हे मंकाःकथं याय्गु अवधारणा हःगु खँ धयादिल ।
ताम्रकार समाज भवनय् जूगु स्वक्वःखुसिया उगु ज्याझ्वः जूगु खः ।
जैशीदेगलय् सिसि क्यामेरा तल
लहनान्युज | सिल्लाथ्व दशमी ११४० (फ्रेअवरी ४ २०२०)
जैशीदेवल युथ क्लबया सक्रियता व येँ महानगरपालिका २१ वडा कार्यालयया आर्थिक ग्वाहालिइ जैसीदेगःया सुरक्षाया नितिं अन सिसिटिभि क्यामेरा तःगु दु । सञ्चरवाः छगू ज्याझ्वःया दथुइ येँ महागरपालिकाया प्रमुख विद्यासुन्दर शाक्य व २१ वडाध्यक्ष चुडामणि बज्राचार्यं सिसिटिभि क्यामेरालिसें जैसीदेवल यूथ क्लबया न्हूगु हलया उलेज्या यानादिल ।
ज्याझ्वलय् क्लबया मू छ्यान्जे चन्द्रगोपाल प्रधानं तेक्वान्दो प्रशिक्षणया नितिं हल दय्कागु धयादिसें उकिया नितिं २१ वडापाखें ग्वाहालि जूगु जानकारी बियादिल ।
उगु हे ज्याझ्वलय् येँ महानगरपालिकाया प्रमुख विद्यासुन्दर शाक्यं जैशीदेवल यूथ क्लबय् तेक्वान्दो तालिम कयाच्वंपिं मस्तय्त डोवोको लःल्हानादीगु खः । नुगःखँया झ्वलय् मेयर शाक्यं मस्तय्त थुकथंया प्रशिक्षणं स्वास्थप्रति चेतना थनीगुलिसें अनुशासित नं याइगु धयादिल ।
समाजय् आपराधिक व असामाजिक ज्याखँ नियन्त्रण यायेत मू मू दक्वं थासय् सिसि क्यामरा तय्गु ज्यायात अभियानकथं हे न्ह्याकागु व थ्यंमथ्यं ५गू करोड तकाया बजेट सिसि क्यामराया नितिं फ्यानागु खँ शाक्यं कनादिल । २१ वडाया नायः चुडामणि बज्राचार्यं त्वाःबहाःया संरक्षण व सम्बद्र्धनया लिसें बांलागु छुं नं ज्याया योजनाय् सहकार्य याय्त २१ वडा कार्यालय तयार दुगु प्रतिबद्धता प्वंकादिल ।
ज्याझ्वलय् क्लबया सल्लाहकारलिसें नेपाल चलचित्र संघया नवनिर्वाचित नायः मधुसुदन प्रधान, नेपाल तेक्वान्दो संघ वागमती प्रदेशया नायः केशव पुरी व न्वकू प्रकाश खड्गी, भारत मैत्री समाजया प्रेम लस्करलिसेंया उपस्थिति दुगु खः ।
