लहना न्यूज | ने.सं. ११३९ गुंलाथ्व त्रयोदसि (१३ अगष्ट, २०१९), मंगलवाः

नेपाल विद्युत प्राधिकरणं वंगु आर्थिक दँय् ७गू अर्ब २०गू करोडतका खुद नाफा कमेयाःगु दु ।

 

नेपालय् मतया उत्पादन नापं वितरणय् यकःति अधिकार दुगु प्राधिकरणं थगुनेया तुलनाया १४९गू प्रतिशतं नाफा अप्वः कमेयाःगु खः ।

 

आर्थिक दँ २०७४/७५य् २गू अर्ब ९०गू करोडतका नाफा कमेयाःगु प्राधिकरणं २०७५/०७६य् ७गू अर्ब २०गू करोडतका कमेयाःगु खः । प्राधिकरणया नाफा दच्छिइ हे ४गू अर्ब ३०गू करोडं अप्वःगु खः ।

 

थगुने प्राधिकरणं चुहावट नं म्हो यानागु दावी याःगु दु । प्राधिकरणयाकथं थगुने मुक्क मतया आपूर्तिइ १५गू प्रतिशत जक चुहावट दुगु खः । गुगु थगुने २०गू प्रतिशत दुगु खः ।

 

वंगु स्वदँय् चुहावट १०गू प्रतिशतं म्हो जूगु प्राधिकरणं जानकारी ब्यूगु दु । थगुने प्राधिकरणं सरकारया धुकुतिइ १५गू अर्ब ५९गू करोडतका मुंकाब्यूगु दु । प्राधिकरणं सावां, ब्याज व रोयल्टी यानाः मुक्कं १५गू अर्ब ५९गू करोडतका लःल्हाःगु खः ।

 

थगुने नेपाःया ४५गू लख जनसंख्याय् मतया पहुँच थ्यंगु खः । मतया पहुँच नं १०गू प्रतिशतं अप्वःगु प्राधिकरणं जानकारी ब्यूगु दु ।

 

अथे हे, थगुनेतक नेपालय् मतया उत्पादन ७गू अर्ब ५५गू करोडतका युनिट अर्थात किलोवाट आवर दुगु खः । थुकी प्राधिकरणं ३४गू प्रतिशत, निजी उत्पादकया २९गू प्रतिशत व भारतपाखें आयात याःगु मतया हिस्सा ३७गू प्रतिशत दुगु खः । प्राधिकरणं थगुने ३७गू अर्ब १६गू करोडया मत न्याःगु खः । थुकी भारतपाखें जक २३गू अर्ब ३गू करोडतकया मत न्याःगु खः । ल्यंदुगु नेपाःया हे निजी उत्पादकपाखें न्याःगु खः ।

लहनान्युज | गुंलाथ्व त्रयोदशी ११३९ (अगष्ट १३ २०१९)

लुँया भाः आः तक हे दकलय् अप्वो जुगु दु ।

 

 

थौं मंगलवाः लुँ छगु ७१ द्धः थ्यंगु दु । 

 

 

थौं नेपाल सुनचाँदी व्यवसायी महासंघ म्हिगः सोमवाः लुँ छगु तोलाष ७० द्धः न कारोबार जुगु खःसा थौं ७१ द्धः न कारोवार जुगु धकाः धाःगु दु ।

 

 

महासंघया कथं अन्तर्राष्ट्रिय बजारय् खुदँ लिपा हे दकलय् अप्वो जुगु धकाः धकाःगु दु ।

 

नृपेन्द्रलाल श्रेष्ठ | गुंलाथ्व द्धादशी ११३९ (अगष्ट १२ २०१९)

नेपाल खड्गी सेवा समिति १९ वडा कचाया खुक्वःगु तःमुँज्यापाखें युवराज शाहीया नेतृत्वय् झिंछम्हेसिगु ज्यासना पुचःया ल्यज्या जुल ।

 

 

वडा समितिया नायः विजय शाहीया सभाध्यक्षताय् न्ह्याःगु उगु ज्याझ्वलय् सेवा समितिया केन्द्रीय संरक्षक मनोज नेवाः खड्गी मूपाहाँ व समितिया केन्द्रीय नायः अञ्जिता खड्गी विशेष

पाहाँकथं झायादीगु खः ।

 

 

अथे हे, पाहाँकथं महानगरीय प्रहरी बृत्त जनसेवाया डिएसपी बासुदेव खतिवडालिसेंया थीथी ब्यक्तित्वपिं झायादीगु खः । ज्याझ्वलय् मूपाहाँ मनोज नेवाः नं १९वडा कचाया न्हूपिं पदाधिकारीपिन्त भिन्तुना देछानादिसें नाय्, खड्गी, शाही जातिया उत्थानया नितिं ज्या याय्फय्मा धयादिल ।

 

 

नेपाल खड्गी सेवा समितिया न्हय्क्वःगु तःमुँज्या वइगु माघ महिनाय् सिन्धुलीइ जुइत्यंगु हुनिं स्वनिगःलिसें थीथी जिल्लाय् न्हूधाः जुयाच्वंगु दु ।

 

लहना न्यूज | ने.सं. ११३९ गुंलाथ्व द्वादसि (१२ अगष्ट, २०१९), सोमवाः

सरकारं येँया ट्राफिक जाम जुइगु मूमू थासय् ओभरहेड ब्रिज दय्केगु घोषणा याःगु दु ।

 

 

भौतिक पूर्वाधार तथा यातायात मन्त्री रघुवीर महासेठं येँया कोटेश्वर, गौशाला, न्हू बानेश्वर, चावहिल, थापाथली व कालिमाटी चुकय् ओभरहेड ब्रिज दयेकेगु घोषणा याःगु खः । उकिया नितिं माःगु डिजाइनया ज्या न्ह्यायेधुंकूगु मन्त्री महासेठया धापू दु ।

 

 

थौं सोमवाः येँय् ग्वसाः ग्वःगु साक्षात्कार ज्याझ्वलय् न्ववानादिसें मन्त्री महासेठं न्ह्यानाच्वंगु आर्थिक वर्षया दुने येँया सतकय् स्मार्ट लाइट व्यवस्थापन यायेगु योजना नं न्ह्यब्वयादिल । वय्कलं उकिया नितिं सरकारं माःकथंया बजेटया तकं व्यवस्था यायेधुंकूगु जानकारी बियादिल । 

 

 

मन्त्री महासेठं सरकारं येँयात दच्छिया दुने बांलाःगु सहरकथं विकास जुइकथं पूर्वाधार दयेकेगु ज्या क्वचायेकेगु लक्ष दयेकागु नं दावी यानादिल । 

 

 

वय्कलं देशय् रेल सेवा सञ्चालनया नितिं रेलमार्ग दयेकेगु ज्या नं न्ह्याकूगु धयादिल ।

गुंलाथ्व द्धादशी ११३९ (अगष्ट १२ २०१९)

नेवाः पत्रकार राष्ट्रिय दबू चितवनया अध्यक्षय् कमलमान श्रेष्ठयात ल्यःगु दु ।

 

 

म्हीगः आइतवाः नारायणगढय् च्वंगु उद्योग वाणिज्य संघया सभाहलय् जूगु न्हापांगु अधिवेशनपाखें कमलमानया अध्यक्षताय् झिंस्वम्ह दुजः दुगु न्हूगु ज्यासना पुचः ल्यःगु खः । उगु पुचलय् सन्तकुमार श्रेष्ठ न्वकू, सृजना ताम्रकार छ्याञ्जे, राजु श्रेष्ठ दांभरि व राजेन्द्र श्रेष्ठ सहसचिवकथं ल्यःगु खः । अथे हे, दुजलय् मनिषा श्रेष्ठ, उमेश श्रेष्ठ, विनोद श्रेष्ठ ‘ए’, साया प्रधान, निशा श्रेष्ठ, अनुज जोशी, विनोद श्रेष्ठ ‘बी’, सुनिल कुमार श्रेष्ठ च्वनादीगु दु ।

 

 

दबुया न्याम्ह दुजः दुगु सल्लाहकार समिति नं नीस्वनेगु ज्या जुल, गुकी अमरदेव प्रधान, ईश्वर जोशी, सन्दीप कुमार श्रेष्ठ, दिनेश कुमार श्रेष्ठ व सुबोध श्रेष्ठ च्वनादीगु दु । नापं उगु मुँज्यां न्हय्म्ह केन्द्रीय पार्षद नं ल्यःगु दु ।

 

 

मुँज्याया उलेज्या सत्रय् मूपाहां नेवाः पत्रकार राष्ट्रिय दबूया केन्द्रीय नायः श्रीकृष्ण महर्जन, नेपाल पत्रकार महासंघया केन्द्रीय दुजः सृजना अर्याल, जिल्ला नायः राधेश्याम खतिवडा, नेवाः पुचः नारायणगढया नायः ज्ञानेन्द्रमान शाक्य, नेवाः पत्रकार राष्ट्रिय दबूया केन्द्रीय दांभरि सुरेन्द्रभक्त श्रेष्ठ, नेपाल आदिवासी जनजाति पत्रकार महासंघ (फोनिज)या संघीय दुजः राजु चौधरी, प्रेस यु्नियन चितवनया नायः अनिल ढकाल, फोनिज चितवनया नायःलिसें नेवाः पत्रकार राष्ट्रिय दबूया केन्द्रीय दुजः सन्दीपकुमार श्रेष्ठपिन्सं थःथःगु नुगःखँ तयादीगु खः ।

 

 

ज्याझ्वलय् फोनिज चितवनया छ्याञ्जे तुलमान गुरुङ, थारु पत्रकार संघ चितवनया नायः सुमित्रा महतो, तामाङ पत्रकार संघ चितवनयानायः ज्ञानेन्द्र तामाङ, संचारिक समूहया सविता श्रेष्ठपिनिगु उपस्थिति दुगु खः ।

 

 

Pages