Display Style:
Column Style
येँय् प्यन्हु यक ‘अन्तरराष्ट्रिय मेयर सम्मेलन’ जुइगु
सुरेन्द्रभक्त श्रेष्ठ | सिल्लाथ्व षष्ठी ११४० (जनवरी ३१ २०२०)
इगु २०७७ असोज २१ निसे २४ गते तक येँय् प्यन्हु यक ‘अन्तरराष्ट्रिय मेयर सम्मेलन’ जुइगु दु ।
थौं छगु येँय् जुगु वेभसाइटया उलेज्या नाप पत्रकार भेटघाट ज्याझ्वलय् ‘अन्तरराष्ट्रिय मेयर सम्मेलन — २०२०’ सम्मेलनया बिषयया जानकारी बिउगु खः ।
उगु ज्याझ्वलय् येँ महानगरया प्रमुख एवं उपत्यका नगरपालिका फोरमया अध्यक्ष बिद्यासुन्दर शाक्यं डब्लुडब्लुडब्लु डट आएमसि २०२० डट ओआरजि डट एनपि वेभसाइट सार्वजनिक यानादिगु खः ।
थुगु वेभ पेज नेपाली भाषां सार्वजनिक यानादिगु खःसा लिपा मेमेगु अंग्रेजी नाप न्ह्यगु भाषा न याइगु ज्याझ्वः दु ।
थौंया पत्रकार सम्मेलनय् थिमिया गठ्ठाघरय् फोरमया सचिवालय स्थापना याये धुनागु धका मध्यपुर थिमी नगरया प्रमुख एवं फोरमया सचिव मदनसुन्दर श्रेष्ठं सम्मेलन आपसी ज्ञान व सीप अभिवृद्धि यायेत फाइदा जुइ धका धयादिगु खः ।
सम्मेलनय् स्वनिगः दुनेया नगर सरकार नाप भगिनी सम्बन्ध दुगु अन्तरराष्ट्रिय शहर, सार्क तथा दक्षिण पूर्वी एशियाया राजधानी लगायत प्रमुख सहर, युनेस्को तथा बिश्व सम्पदा सहरया संगठनय् आवद्ध सम्पदा सहरया नगर प्रमुखपिन्त ब्बना तःगु खः ।
शहीद धर्मभक्तया नामय् पार्क उलेज्या
लहनान्युज | सिल्लाथ्व पञ्चमी ११४० (जनवरी ३० २०२०)
येँ महानगरपालिका वडा नं. २३ स्थित यंगाः त्वालय् शहीद धर्मभक्त माथेमाया लुमंतिइ दयेकूगु पार्क कामपा प्रमुख विद्यासुन्दर शाक्यपाखें उलेज्या जुल । माघ १६ गते शहीद दिवस कुन्हु छगू ज्याझ्वःया दथुइ मेयर शाक्यं शहीद धर्मभक्त पार्क लिसें अन दुने धस्वाकातःगु शहीद धर्मभक्त माथेमाया झ्वाता नं उलेज्या यानादीगु खः ।
ज्याझ्वलय् न्ववासें मेयर शाक्यं शहीदपिनि सम्मानय् येँ महानगरपालिकापाखें राणा सरकारं मृत्युदण्ड ब्यूपिं प्यम्हं शहीदपिनि पूर्ण कदया झ्वाता धस्वाकेगु ज्या जूगु खँ कनादिल ।
शहीदपिंसं समृद्ध नेपाः व सुखी नेपालीया म्हगस खंकाः हे ज्यान बलिदान याःगु खँ कँसें मेयर शाक्यं धयादिल, ‘वर्तमान सरकार समृद्ध नेपाःया लक्ष्य ज्वनाः न्ह्याः वनाच्वंगु दु, शहीदपिनि म्हगस नं थ्वहे खः ।’
धर्मभक्तया काय्चा लिसें शिक्षाविद् डा. केदारभक्त माथेमां ओमबहाः त्वाः धइगु २००७ साल क्रान्तिया ‘इपिसेन्टर’ खः धासें धर्मभक्तं थ्वहे त्वाःयात केन्द्र दयेकाः अबले राजनीतिक गतिविधि याःगु खँ कनादिल । उगु थासय् धर्मभक्तया झ्वाता नापनापं पार्क दयेकाः खुल्ला क्षेत्रया सदुपयोग याःगु खँय् वय्कलं लसता नं प्वंकादिल ।
येँ मनपा वडा २३ या अध्यक्ष मचाराजा महर्जनं थन धर्मभक्तया झ्वाता व पार्क जक मखुसें पार्कया क्वय् ३० हजार लिटर लः न्ह्यंगु छगू ट्यांकी नं दयेकागु खँ कँसें वडाय् दमकल दुहां वने मफइगु छुं नं थासय् छेँ मिं नल धाःसा वहे लः छ्यलाः मेशिनपाखें मि स्याये फइगु जानकारी बियादिल ।
पुलांम्ह मन्त्री प्रयागराज सिं सुवालं शुक्रराज जोशीयात यखानाः स्याःबलय् सिमाय् यगानाच्वंगु लाश थःपिं नं स्वः वनागु खँ कनादिल । पुलांम्ह वडा अध्यक्ष पवित्र वज्राचार्यं शहीद दिवस न्यायेगु खःसा शहीदया म्हगस पूवंकेगुपाखे नं झीगु ध्यान वनेमाःगु बिचाः तयादिल । मचा साहित्यकार शान्तदास मानन्धर नेपाली राजनीतिया आजुअजा धइपिं हे थ्व प्यम्ह शहीद जूगुलिं वय्कःपिंत झीसं सदां लुमंकेमाः धयादिल ।
शहीद धर्मभक्त माथेमा २३ वडास्थित ओमबहाः त्वालय् हे जन्म जूम्ह खः । वय्कलं ओमबहाःया हे जोरगणेशस्थित थः निनिया छेँय् छगू गोप्य भेला यासें नेपाःया न्हापांगु राजनीतिक संगठन नेपाल प्रजापरिषद् गठन यानादीगु खः ।
शंखधर पार्क निर्माणया येँ महानगरं १ करोड अनुदान
सुरेन्द्रभक्त श्रेष्ठ | सिल्लाथ्व पञ्चमी ११४० (जनवरी ३० २०२०)
येँ महानगरपालिकां मध्यपुर थिमी नगरयात अन्तरनगर साझेदारी ज्याझ्वः अन्तर्गत १ करोड अनुदान रकम लल्हाःगु दु । नगरया ४ न. वडाया शंखधर पार्क निर्माणया लागि उगु ध्यवा अनुदान बिइगु लागि येँ महानगरया प्रमुख बिद्यासुन्दर शाक्यं थिमी नगर प्रमुख मदनसुन्दर (जगुलु) श्रेष्ठयात उगु ध्यवा लल्हाःगु खः ।
नगर प्रवेशद्वार न्ह्यने जुगु उगु सम्झौता तथा रकम हस्तान्तरण ज्याझ्वः लिपा मेयर शाक्यं पार्क निर्माणया शिलान्यास यानादिगु खः ।
उगु ज्याझ््वलय् येँ महानगरया प्रमुख शाक्यं थुज्यागु साझेदारि ज्याझ्लं येँ जिल्लां पिने च्वपिं नाप थ्व हे न्हापांगु ज्या खः धका धयादिगु खः । येँ जिल्ला दुने लागु दक्को नगरयात सार्वजनिक जग्गा संरक्षण यायेत, हरियाली दयेकेत नाप पार्क निर्माण यायेत १ १ करोड ध्यवा अनुदान बिउगु खः ।
अथेहे, मध्यपुर थिमीया प्रमुख मदनसुन्दर श्रेष्ठं महानगर पाखे उपलब्ध याउगु अनुदान ध्यवां निर्माण जुइ त्यःगु पार्कपाखे नगरबासीयात यक्को फाइद जुइ धका धयादिगु खः ।
पार्क निर्माणया लागि १७ करोड ध्यवाया गुरुयोजना तयार याउगु खः । न्हापा १७ रोपनी क्षेत्रफलपाखे ज्या न्ह्याइगु खःसा लिपा ५३ रोपनी जग्गाय् पार्क बिस्तार यायेगु नगरया योजना दु ।
न्यय् च्याक्वःगु नर्सिङ दिवस हन
पुर्णिमा शाक्य | सिल्लाथ्व पञ्चमी ११४० (जनवरी ३० २०२०)
दँय् दसं माघया १५ गते हना वयाच्वंगु नेपाल नर्सिङ संघया ५८ क्वःगु बुदिं थुगुसि नं तःजिक हने ज्या जुगु दु ।
उगु ज्याझ्वलय् मूपाँहा कथं माननीय स्वास्थ्य मन्त्री भानुभक्त ढकाल झायादिगु खः । “गुणस्तरीय नर्सिङ् सेवा जेष्ठ नागरिकया स्वास्थ्यय् टेवा “धैगु नारा लिसें नेपाल नर्सिङ्ग दिवस, लाजिम्पातया नर्सिङ संघया हे प्राङ्गनय् तःजिक हंगु खः।
देँय् न्यंकया सकल नर्सतय्गु संगठन नेपाल नर्सिङ्ग संघया ५८ क्वःगु बुदिं थुगुसि जेष्ठ नर्सपिन्स याना वया नर्सिङ्ग पेशायात सम्मान यासे ७५ दँ पुले धुकुपि बिष्णु राई, सानुकेशरी तुलाधर, द्वारीका श्रेष्ठ, सावित्री सिंहपि लिसे मेपि स्वीम्हेसित न हःगु खः ।
ज्याझ्वःया संयोजक मय्जु हेमकला लामां स्वाँमाः क्वखायेकाः, संघया नायः मन कुमारी राई नं दोसल्लां न्ययेका व मूपाहाँ माननीय स्वास्थ्य मन्त्री ढकालं सम्मान पत्र लःल्हासे हंगु खः।
संघया बरीष्ठ उपाध्यक्ष रमेश सुब्बां लसकुस न्वचु बियाः न्ह्याकुगु उगु ज्याझ्वलय् थी थी हनेबहःपिन्सं थःथःगु न्वचू बिसे भिंतुनेगु ज्यालिसें बर्तमान अवस्थाया नर्सिङ पेशां राज्यय् फयावयाच्वंगु बिसंगति तय्गु खँ स्वास्थ्यमन्त्रिया न्ह्यने न्ह्यब्वसे समाधानया नीति नं खँ छुइगु ज्या जुल।
ज्याझ्वया उलेज्या मूपाहाँपाखें स्वाँ पिनातःगु गमलाय् लः बियाः, गमलाया जः खः तयातःगु नेपाःया न्हापांपिं नेपामि नर्स, डा. उमादेबि दास व लामू अमात्यपिनीगु किपातय् स्वाँमाः क्वखायेका जूगु खः ।
सहिद धर्मभक्तया पूर्ण कदया शालिक प्रतिस्थापन यात
लहनान्युज | सिल्लाथ्व तृतिया ११४० (जनवरी २७ २०२०)
सहिद धर्मभक्त माथेमां अमरत्व प्राप्त याउगु थाय् सिफलय् पूर्ण कदया शालिक प्रतिस्थापन याउगु दु ।
थौं सहिद सप्ताहया झ्वलय् माथेमा अमरत्व प्राप्त याउगु थाय् छगु ज्याझ्वः दथुइ येँ महानगरपालिकाया प्रमुख नाप सहिद सप्ताह मूल समारोह समितिया संयोजक बिद्यासुन्दर शाक्यं उगु शालिक अनावरण यानादिगु खः ।
उगु ज्याझ्वलय् थःगु खँ तयादिसे महानगरया मेयर शाक्यं व्यक्तिगत उन्नति स्वया च्वय् च्वना सामुहिक समृद्धिया लागि सहिद धर्मभक्त माथेमा ज्यानया बाजी तया खँ कनादिगु खः । वयकः याउगु थुगु लँयात झीस न नालाकायेगु स्वयेमाः धका धयादिगु खः ।
उगु ज्याझ्वलय् मनपाया उपप्रमुख हरिप्रभा खड्गी श्रेष्ठ, वडा नं. ७ या वडाध्यक्ष शुद्धकुमार डंगोल,ं शिक्षाबिद् एवं त्रिभुवन बिश्वबिद्यालयका पूर्व उपकुलपति केदारभक्त माथेमा, माथेमा
गुठीया अध्यक्ष नरेशरामभक्त माथेमा न थःथःगु खँ तयादिगु खः ।
उगु शालिक कलाकार महेश तुलाधरं दयेका दिगु खः ।
