Display Style:
Column Style
येँय् रोजगार मेला जुइगु
नृपेन्द्रलाल श्रेष्ठ | सिल्लाथ्व तृतिया ११४० (जनवरी २७ २०२०)
बालाजु स्कूलं अफ इन्जिनियरिङ्ग एन्ड टेक्नोलोजिं निक्वःगु रोजगार मेला याइगु जूगु दु । स्कूलं थ्व हे वइगु माघ १४ गते मंगलबार व १५ गते बुधबार निन्हुयंक निक्वःगु रोजगार मेला यायेत्यंगु खः ।
स्कूलं आइतबाः येँय् पत्रकार सम्मेलन यासें मेलाया ग्वसाः ग्वयेत्यनागु जानकारी बिल ।
पत्रकार सम्मेलनय् स्कूलया निमित्त प्रमुख वैकुण्ठ श्रेष्ठं स्कूल परिसरय् जुइगु मेलाय् प्राविधिक क्षेत्रय् दक्ष जनशक्तियात रोजगार मालेगु व लुइकेगु लकस बीगु धयादिल । २५ स्वयां आपाः प्रतिष्ठित उद्योगया उपस्थिती दइगु मेलाय् रोजगार मालाः वइपिं मनूतय्सं सिभि (व्यक्तिगत विवरण) तकं अन हे तुं दयेकाः बी फइगु धयादिल ।
सिभि दयेकेगु नितिं तकं अलग्ग हे स्टल दइगु वय्कलं धयादिल ।
स्कूलया उपप्रमुख शंकरमान श्रेष्ठं २०१८ सालनिसें थुगु स्कूलपाखें दक्ष प्राविधिक जनशक्ति उत्पादन यानावःगु जानकारी बियादिल ।
अथे हे, जब प्लेसमेन्ट एन्ड काउन्सिलिङ यूनिटया टिम लिडर शिव कारञ्जितं सिभिल, मेकानिकल, अटोमोबाइल, इलेक्ट्रिकल व स्यानिटरी विषयमा करीब १ हजार विद्यार्थीतय्सं मेलाय् ब्वति काइगु दावी यानादिल ।
प्रमुख शाक्ययात श्री गणेश श्री भैरव संरक्षण समितिपाखें हना
लहनान्युज | सिल्लाथ्व तृतिया ११४० (जनवरी २७ २०२०)
येँ महानगरया प्रमुख विद्यासुन्दर शाक्ययात वर्तमानलिसें भूतपूर्व जीवित श्री गणेश श्री भैरव संरक्षण समितिपाखें हन ।
महानगरया वडा ल्याः २१या तःबहालय् जूगु उगु हना ज्याझ्वलय् जीवन्त व राजकीय संस्कृतिकथं हनीगु यँयाःबलय् विशेष आराधना याइपिं म्वाःपिं द्यःपिंमध्ये श्री गणेश व श्री भैरव जुया बिज्याय्धुंकूपिं पूर्व गणेश व भैरवया जीविकोपार्जनया नितिं अभिभावकत्व कयादीगुलिं प्रमुख शाक्ययात हंगु समितिं न्ह्यथंगु दु ।
थःपिं मचाबलय् श्री गणेश व भैरव जुयाबिज्याःपिं म्वाःपिं द्यःपिनिगु महत्वयात थुइकाः थुकिया संरक्षण, विकास व निरन्तरताया नितिं महानगरपाखें मासिक भत्ता व्यवस्था व अमूर्त संस्कृतिया संरक्षणय् योगदान बियादीगुलिं हनेगु ज्या जूगु खः । प्रमुख शाक्ययात लःल्हाःगु हनापतिइ न्ह्यथनातःगु दु ।
महानगरपालिकां आर्थिक वर्ष २०७०÷०७१ निसें पुलांपिं कुमारीयात लच्छिइ झिद्वःतका व पुलांपिं गणेद्यः व भैरवयात लच्छिइ च्याद्वःतका भत्तालिसें सम्मान याय्गु ज्या जूगु खः ।
स्थानीय तगिमय् जनप्रतिनिधि वय्धुंकाः २०७५ सालनिसें साविक धेबाय् तनाः झिंन्याद्वःतका व गणेद्यः व भैरवयात झिंनिद्वःतका भत्ता लःल्हाना वयाच्वंगु दु ।
छत्रपाटी चिकित्सालयया दँमुँज्या जुल
नृपेन्द्रलाल श्रेष्ठ | सिल्लाथ्व तृतिया ११४० (जनवरी २७ २०२०)
वि.सं. २०१३ सालनिसें समुदायपाखें न्ह्याना वयाच्वंगु छत्रपाटी निःशुल्क चिकित्साल अस्पतालया दँमुँजया जुल ।
चिकित्सालयया नायः डा. मनोजमान श्रेष्ठया सभाध्यक्षताय् जूगु उगु मुँज्याय् दांभरि अधिबक्ता सजनी जोशीपाखें आर्थिक वर्ष २०७५÷७६या आर्थिक प्रतिवेदन न्ह्यब्वयादीगु खःसा मूछ्याञ्जे राजेन्द्र प्रसाद मानन्धरं वार्षिक प्रगति प्रतिवेदन न्ह्यब्वयादीगु खः । उगु प्रतिवेदन सर्वसम्मतिं पारित जूगु खः ।
थुगुसी चिकित्सालयपाखें मुक्कं ९१,४०५म्हेसित चिकित्सा सेवा बीगु ज्या जूगु खःसा उकी मध्ये ३,९०६म्हेसित १०,४३,०४५÷५० तका बराबरया विशेष छुटलिसें निःशुल्क उपचार सुविधा ब्यूगु खः ।
अथे हे ४०९म्ह ल्वगिपिन्त १,१५,०७६÷७१ तका बराबरया सितिकं वासः बीगु ज्या जूगु नं उगु दँमुँज्याय् जानकारी ब्यूगु खः । दँमुँज्याय् न्वकू कुमारदेव मानन्धरं लसकुस यानादीगु खः ।
प्राज्ञ सम्मान व ‘मत–४’ सफू पितब्वज्या
लहनान्युज | सिल्लाथ्व तृतिया ११४० (जनवरी २७ २०२०)
नेपाल साहित्य मन्दीर, ख्वपया ग्वसालय् गपलीइ डा. जनकलाल वैद्ययात नेपालभाषा एकेडेमिया चान्सलर चित्तरञ्जन नेपालीं दोसल्लां न्यय्काः हनापौ लःल्हानादिसे प्राज्ञ सम्मानकथं हंगु दुसा ‘मत–४’ सफू पितब्वज्या याःगु खः ।
तिलक प्रकाश कायस्थया सभाध्यक्षताय् न्ह्याःगु उगु ज्याझ्वलय् विशेष पाहाँकथं मानव अधिकारवादी नेवाः न्ह्यलुवा मल्ल के सुन्दरं पितब्वज्या जूगु सफूयात कयाः कुलादीगु खः ।
हर्षलाल उझांथाछेँ स्मृति कोषया संरक्षक कृष्णलाल उझांथाछेँ, आर.बि. जोशी फाउण्डेशन ट्रष्ट प्राज्ञ सिरपाःया संरक्षक राजाराम जोशी, नेपाल साहित्य मन्दीरया संस्थापक भाषा शिरोमणी रमापतिराज शर्मा, तेजेश्वरबाबु ग्वंगःपिं पाहाँकथं झायादीगु खः ।
पशुपतिमान पःमां नं लसकुस यानादीगु उगु ज्याझ्वलय् सुमा श्रेष्ठं सुभाय् देछानादीगु खः ।
किपू नगरपालिकाया नियमित पत्रकार सम्मेलन
नृपेन्द्रलाल श्रेष्ठ | सिल्लाथ्व तृतिया ११४० (जनवरी २७ २०२०)
किपू नगरपालिकाया नियमित पत्रकार सम्मेलन जूगु दु । उगु ज्याझ्वलय् नगरपालिकाया उप–प्रमुख सरस्वती खड्कां लसकुस यानादीगु खःसा सूचना अधिकृत परशुराम चौलागाईं नगरपालिकाया फुक्क शाखाया २०७६ पुष महिनातकया प्रगति प्रतिवेदन न्ह्यब्वयादीगु खः ।
पत्रकारपिन्सं न्यंगु न्ह्यसःया लिसः बियादिसें शिक्षा शाखा प्रमुख टंकलाल गैरें किपू नगरपालिकाया मौलिक ज्याझ्वः छेँछेँय् सिंहदरबार अन्तरगत प्राविधिकपाखे उच्च शिक्षा हासिल याय्त सहुलियत दरय् नगरपालिकापाखें शैक्षिक कर्जा बीगु ज्या जुयाच्वंगुलिइ आःतक न्हय्म्हेस्यां उगु कर्जाया नितिं प्रकृया न्ह्याकूगुलिइ निम्हेस्यां कर्जा काय्धुंकूगु व न्याम्हेसिगु प्रकृया अन्तिम चरणय् थ्यंगु जानकारी बियादिल ।
नगरपालिकाया उप–प्रमुखलिसें प्रवक्ता खड्कां पत्रकारपिन्सं न्यनादीगु न्ह्यसःया लिसः बियादिसें न्हापा यानागु प्रतिबद्धताकथं हे नगरपालिका क्षेत्र दुनेया लँय् दयाच्वंगु गाः ल्हाकेत प्यम्ह कर्मचारीं ज्या यानाच्वंगु जानकारी बियादिल ।
