Display Style:
Column Style
थप ६७१म्ह कोरोना संक्रमण, संक्रमितपि ७८४८ थ्यः
लहनान्युज | तछलागा द्धादशी ११४०,असार ४ बिहीवाः
वःगु २४ घण्टाया दुने थप ६७१म्हेसित कोरोना भाइरस (कोभिड(१९) या संक्रमण पुष्टि जूगु दु ।
थ्व नाप संक्रमितपि आः ७८४८म्ह थ्यःगु दु ।
उकि मध्ये २२म्ह सीगु दु ।
अथेहे आः तक ११८६म्ह डिस्चार्ज जुइ धुकुगु दु ।
थौं स्वनिगलय् खुम्ह कोरोना संक्रमित
लहनान्युज | तछलागा द्धादशी ११४०,असार ४ बिहीवाः
थौं स्वनिगलय् खुम्हेसित कोरोना संक्रमण खने दुगु दु ।
स्वास्थ्य तथा जनसंख्या मन्त्रालयया कथं स्वपय् स्वम्ह, येँ निम्ह व यलय् छम्हेसित कोरोना संक्रमण खने दुगु दु ।
ख्वपय् व्यासी च्वम्ह २४दँ दुम्ह मिजंम्ह, टीकाथलीइ ५० दँ दुम्ह मिजंम्ह व ख्वप नगरपालिका १६य् च्वम्ह २२ दँ दुम्ह मिजंम्ह कोभिड १९ पोजेटिभ खने दुग धका स्वास्थ्य मन्त्रालयं धाःगु दु ।
अथेह, येँया कपन बालुवाखानीय् च्वम्ह ४५दँ दुम्ह मिजंम्ह व येँया तीनकुनेय् च्वम्ह ३४दँया मिसाम्ह मिसाम्हेसित संक्रमण पुष्टि जूगु दु ।
स्वास्थ्य मन्त्रालयया प्रवक्ता जागेश्वर गौतमं स्वनिगलय् च्वपि संक्रमितपिनिगु थाय् खुले मजूगु दु ।
स्वनिगलय् खने दुपि खुम्ह संक्रमित मध्ये प्यम्हसित पाटन अस्पताल यकूगु दु सा छम्हसित टेकुया शुक्रराज ट्रपिकल तथा सरुवा रोग अस्पतालय् तया तःगु दु ।
येँ महानगरया नीति तथा कार्यक्रम सार्वजनिक
नृपेन्द्रलाल श्रेष्ठ | तछलागा द्धादशी ११४०,असार ४ बिहीवाः
थौं जूगु येँ महानगरपालिकाया आर्थिक वर्ष २०७७÷०७८ या नीति तथा कार्यक्रम सार्वजनिक याःगु दु । थौं राष्ट्रियसभा गृहय् येँ महानगरपालिकाया मेयर बिद्यासुन्दर शाक्यं आर्थिक वर्ष ७७÷०७८ या नीति तथा कार्यक्रम सार्वजनिक यानादिगु दु । थौं न्ह्यब्बःगु नीति तथा कार्यक्रय २५९ बुँदा दुगु नीति तथा कार्यक्रमय् जनस्वास्थ्य सेवा सुधार, विद्यालय शिक्षा सुधार, खाद्य सुरक्षा, उद्यमशीलता तथा रोजगारी प्रबद्र्धन, आवागमन ब्यबस्थापन लगायतया विशेष केन्द्रित जूगु खः ।
येँ महानगरपालिकायाथःगु नीति तथा कार्यक्रमय् कोभिड–१९ प्रतिकार्य योजना तयार याना येँ महानगरय् लागु याना स्वनिगःया मेगु नगरपालिका नाप सहकार्य याना स्वनिगःव्यापी रुपय् कार्यान्वयन याना यंकगु पहल यायेगु उल्लेख याना तःगु दु ।
अथेहे थौं न्ह्यब्बःगुु नीति तथा कार्यक्रमय् कोभिड–१९ या कारण व्यापार व्यवसायय् वःगु अप्रत्याशित मन्दीयात ध्यानय् तया महानगर दुनेया होटेल, रेष्टूराँ, सपिङ्गमल, डे÷नाइट मार्केट लगायत अन्य व्यापार व्यवसायय् विशेष सहुलियत प्रदान यायेगु नीति काःगु दु । ‘स्थानीय समुदाय, निजी क्षेत्र, सुरक्षा निकाय, यातायात व्यवसायीनाप सहकार्य याना आर्थिक तथा पर्यटन क्षेत्रय् योगदान बिइगु निश्चित क्षेत्रय् चान्ह्यय् सञ्चालन यायेगु लागि आवश्यक नीतिगत तथा पूर्वाधारया ब्यबस्था मिले यायृ त्यःगु दु,’ नीति तथा कार्यक्रम सार्वजनिक यानादिसे मेयर शाक्यं, ‘उद्योगी, व्यवसायी तथा स्थानीय समुदाय व सहकार्यय् थीथी अवसरय् स्वदेशी उत्पादनया व्यापार प्रबद्र्धन मेला आयोजना यायेगु निति हःगु दु । ‘आर्थिक समृद्धिय् पर्यटन’ धइगु मूलमन्त्रयात आत्मसात याना पर्यटन प्रबद्र्धनया माध्यमपाखे स्थानीय जनताया जीवनस्तर थःकायेगु पर्यटन पूर्वाधारया संरक्षण, सम्बद्र्धन व बिस्तारय् तिबः बिइगु नीति काइगु जुगु दु ।’
कोभिड–१९ या महामारीपाखे प्रभावित करदातापिन्त उचित छुट सहुलियत
येँ महानगरपालिकाया आन्तरिक श्रोत साधनया प्रभावकारी परिचालन यायेत प्रगतिशील कर प्रणालीया विकास, सक्षम कर प्रशासनया निर्माण, करया दायरा बिस्तार, करया दर पुनरावलोकन, करया क्षेत्र विस्तार व राजश्व चुहावट नियन्त्रणयात प्रभावकारी दयेकेगु लक्ष्य काःगु दु । करदातापिन्त कर प्रणालीइ स्वेच्छिक रुपं ब्बति काये केगु समग्र राजस्व प्रशासनयात करदातामैत्री दयेकेगु व महानगरपालिकां नीति काःगु दु ।
कर तथा गैरकर राजस्व अनुगमन कार्ययात कडाइया साथ लागु यायेगु विशेष अनुगमन टोली गठन याना परिचालन यायेगु, येँ महानगरपालिकां दक्को करदाता तयेगु तथ्याङ्क संकलन याना अभिलेख अध्याबधिक यायेगु, शहरया सौन्दर्य व सुरक्षाय् आँच वयेकेगु विज्ञापन सामाग्री तयेगु ज्यायात पूर्णतः निषेध यायेगु नीति न महानगरपालिकां काःगु दु ।
आ.व.२०७७÷०७८ यात करदातापिनिगु अभिलेखन वर्ष घोषणा याना बैज्ञानिक व एकिकृत करदाता अभिलेख तयार यायेत आवश्यकता कथं व्यवस्थापनय् स्नातक÷स्नातकोत्तर अध्ययनरत जनशक्ति परिचालन यायेगु, कोभिड–१९ या महामारपाखे प्रभावित करदातापिन्त उचित छुट सहुलियत बिइगु नीति महानगरपालिकां काःगु दु ।
ख्वपय् छम्ह प्रहरी नाप स्वम्हेसित कोरोना
लहनान्युज | तछलागा त्रयोदशी ११४०,असार ४ बिहीवाः
महानगरीय प्रहरी परिसर भक्तपुरय् कार्यरत प्रहरी जवानयात कोरोना संक्रमण पुष्टि जूगु दु । प्रहरी जवानयात कोरोना संक्रमण पुष्टि लिपा सन्चार कक्ष सिल याःगु दु । प्रहरी जवानया सम्पर्कय् दुपि १२म्ह प्रहरीयात न क्वारेन्टिनय् तःगु दु ।
बुधवाः चाँगुनारायण नगरपालिका छेँय् दुम्ह परिसरया सञ्चार कक्षय् कार्यरत ३२ दँ दुम्ह छम्ह प्रहरी नाप ख्वपय् स्वम्हसित कोरोना भाइरस संक्रमण पुष्टि जूगु खः । स्वम्हसित म्हिगः बुधवाः शुक्रराज ट्रपिकल तथा सरुवा रोग अस्पताल टेकुइ उपचारया लागि छ्वःगु दु ।
सन्चार कक्षय् ज्या याइम्ह प्रहरीयात मुसु वःगुलि वःगु जेठ ३१ गते स्वाब संकलन याना पीसीआर परीक्षण याःगु इलय् बुधवाः वयागु रिपोर्ट पोजेटिभ वःगु खः ।
अथेहे, ख्वप नगरपालिका–६ गोल्मढीया २२दँ दुम्हेसित न कोरोना संक्रमण पुष्टि जूगु । पीसीआरया लिच्वः लिपा उम्ह मनूयात संक्रमण पुष्टि जुगुलि वया सम्पर्कय् दुपिन्त, च्वंगु थाय् नाप जःखः थासय् सिल याःगु दु सा सम्पर्कय् दुपिन्त पीसीआर परीक्षण यायेगु तयारी याना च्वंगु दु ।
मनाङय् छम्ह कर्मचारी नाप गण्डकी प्रदेशय् ४२ कोरोना संक्रमित
लहनान्युज | तछलागा त्रयोदशी ११४०,असार ४ बिहीवाः
मनाङया चामे गाउँपालिकाय् छम्ह कर्मचारी नाप गण्डकी प्रदेशय् ४२म्ह कोरोना संक्रमित जूगु दु ।
स्वास्थ्य निर्देशनालय पोखरा बिहीवाः बिःगु जानकारी कथं पूर्वी नवलपरासीय् १८म्ह, तनहुँय् १२म्ह, गोरखा् ११म्ह व मनाङय् छम्ह नाप कोरोना संक्रमण पुष्टि जूगु दु ।
हिमाली जिल्ला मनाङय् कोरोना संक्रमण थ्व न्हापागु पटक खः । गण्डकी प्रदेशय् आः मुस्ताङ बाहेक १०गू जिल्लाय् कोरोना संक्रमित लूगु दु ।
४२ म्ह थपे जूगुलि गण्डकी प्रदेशय् कोरोना संक्रमण पुष्टि लिपा आः २८९म्ह थ्यःगु दु ।
गण्डकी प्रदेश कोरोना नियन्त्रण तथा रोकथाम कार्यक्रमया निर्देशक डा. विनोद विन्दु शर्माया कथं मनाङया चामे गाउँपालिकाय् कार्यरत छम्ह कर्मचारीयात न कोरोना पुष्टि जूगु दु ।
उम्ह मनू स्थायी ठेगाना दुम्ह कपिलवस्तुको बाँणगंगा–१४ च्वम्ह धका शर्मां जानकारी बिःगु दु ।
