Display Style:
Column Style
ऐतिहासिक शान्ति सम्झौता थौं १३ दँ थ्यन
लहनान्युज | कछलागा नवमी ११४० (नोभेम्वर २१ २०१९)
तत्कालीन नेकपा माओवादीं न्ह्याकुगु १० दँया सशस्त्र संघर्ष औपचारिक रूचं अन्त्य जुगु थौं १३ दँ थ्यंगु दु ।
२०६३ मंसिर ५ गते तत्कालीन प्रधानमन्त्री गिरिजाप्रसाद कोइराला व विद्रोहीया पाखे तत्कालीन माओवादी अध्यक्ष प्रचण्डं विस्तृत शान्ति सम्झौताय् ल्हाःचिं तयादिगु खः ।
छगु दशक तःहाकगु द्वन्द्व अन्त्य यायेगु सहमति यासे तत्कालीन सरकार व विद्रोहीपाखे शान्तिपूर्ण राजनीतिकया लँपु न्ह्याकेगु सहमति याउगु खः ।
उगु सम्झौताय् ल्हाःचिं तम्ह छम्ह कोइराला मदेय् धुकुगु दुसा तत्कालीन विद्रोही समूहया प्रचण्ड एमालेनाप पार्टी एकीकरण याना नेकपाया अध्यक्ष जुगु दु ।
न्हुपिं मन्त्रीपिनिगु पद व गोपनीयताया शपथ
लहनान्युज | कछलागा नवमी ११४० (नोभेम्वर २१ २०१९)
राष्ट्रपति विद्यादेवी भण्डारीं थौं ११ बजेय् राष्ट्रपति कार्यालय शीतलनिवासय् न्हुपि मन्त्रीपिन्त शपथ नकिगु ज्याझ्वः दु ।
प्रधानमन्त्रीया सिफारिसय् राष्ट्रपति विद्यादेवी भण्डारीं बुधवाः मन्त्रिपरिषद् हेरफेर याउगु ख । न्हुपि मन्त्रीपिन्त राष्ट्रपतिं शपथ याकेगु संवैधानिक व्यवस्था दु ।
न्हुपिं मन्त्रीपिं नेकपाया सांसदपिं वसन्त नेम्वाङ, घनश्याम भुसाल, हृदयेश त्रिपाठी, पार्वत गुरुङ, लेखराज भट्ट उद्योग व रामेश्वर राय यादव खः ।
नेम्वाङयात भौतिक पूर्वाधार तथा यातायात मन्त्रालय, भुसालयात कृषि मन्त्रालय, हृदयेश त्रिपाठीयात संघीय मामिला तथा सामान्य प्रशासन व पार्वत गुरुङयात महिला बालवालिका तथा जेष्ठ नागरिक मन्त्रालयया जिम्मेवारी बिउगु दु । रामेश्वर राय श्रम व लेखराज भट्ट उद्योगमन्त्रीया जिम्मेवारी बिउगु खः ।
च्याम्ह मन्त्रीयाते बर्खास्त याउगु खः । बर्खास्त जुपि मन्त्री भौतिक पूर्वाधार मन्त्री रघुवीर महासेठ, संघीय मामिलामन्त्री लालबाबु पण्डित, श्रममन्त्री गोकर्ण विष्ट, महिला बालबालिका तथा जेष्ठ नागरिकमन्त्री थममाया थापा खः।
अथेहे पर्यटन राज्यमन्त्री धनबहादुर बुढा, कृषिमन्त्री चक्रपाणि खनाल, उद्योगमन्त्री मात्रिका यादव व कृषि राज्यमन्त्री रामकुमारी चौधरीपिं खः ।
कालभैरवया बुसादँ क्वचाल
विकाश | कछलागा अष्टमी ११४०
थौं कछलागा अष्टमी येँया हनुमानध्वाखा लायकुलिइ दुगु कालभैरवया विधि कथं पूजा यासें कालभैरवया बुसादँ याःगु दु ।
थौंया दिं भैरवाष्टमी कथं कायेगु याः । भैरवाष्टमीया दिनयात हनुमानध्वाखाय् दुगु कालभैरव स्थापना याःगु दिंकथं नं कायेगु याः । व हे कथं थौंया दिंयात कालभैरवया ६सः व ५९क्वःगु स्थापना दिवस कथं नं हंगु दु ।
कालभैरवया बुसादँया झ्वलय् न्याम्ह गुरुपिनिपाखें तान्त्रिक विधिकथं होम नं याःगु खःसा निम्ह दुगु नं बलि ब्यूगु खः ।
तान्त्रिक विधि कथं कालभैरवया पूजा लिसें होम याःसा शनि, राहु, व केतु लिसेंया ग्रहदशाा चिलावनीगु जनविश्वास समाजय् दयाच्वंगु दु ।
काल भैरवयात महाःद्यःया उग्ररुप कथं नं कायेगु याः ।
थुगु कालभैरवया मुर्ति मल्लकालय् यमितयसं नागार्जुन पहाड उत्खनन यानाच्वंबलय् लुयावयाः येँया वसन्तपुलिइ हयाः स्थापना याःगु धयातःगु दु ।
मल्लकालया उत्तरार्धपाखे थुगु मूर्तियात तत्कालीन नेपाःया न्यायालय कथं काइगु खः । उगु इलय् थुगु कालभैरवया मुर्तिया न्ह्यःने अपराधीयात अपराध कबुले याकेगु याइगु खः ।
उम्ह संदिग्धं मखूगु लिसः बिल धाःसा थ्व हे मूर्तिया न्ह्यःने हि ल्ह्वयाः सी धइगु विश्वास थौंतक्क नं समाजय् ल्यं दनि ।
सत्तारुढ नेकपाय् प्रचण्ड कार्यकारी नायः
विकाश | कछलागा अष्टमी, ११४०
सत्तारुढ दल नेपाल कम्युनिष्ट पार्टी नेकपां पार्टी नायः पुष्पकमल दाहालयात कार्यकारी नायःया भाला ब्यूगु दु । प्रधानमन्त्री निवास बालुवाटारय् बुधबाः च्वंगु नेकपा सचिवालय बैठकं नायःद्वय केपीशर्मा ओली व पुष्पकमल दाहालया भाला इंगु खः ।
न्हूगु कार्यविभाजन कथं नायः केपी शर्मा ओली पूवंक कार्यकाल प्रधानमन्त्री जुइसा दाहालं पार्टीया नेतृत्व याइ ।
वंगु साउन लिपांगु वालय् निम्ह नायः दथुइ छम्हेसिनं सरकारया नेतृत्व यायेगु व मेम्हं पार्टीया नेतृत्व यायेगु सहमति जूगु खः । उगु सहमति कार्यान्वयन मजूगु धासें दाहालं असन्तुष्टि प्वंकावःगु खः ।
कार्यविभाजनलिसें आः दाहालं पार्टीया कार्यकारी नायःया ज्या अर्थात पार्टीया आन्तरिक बैठकया अध्यक्षता याइ ।
तत्कालिन एमाले व माओवादी केन्द्र दथुइ एकता याःबलय् निम्ह नायः दथुइ पालंपाः सरकारया नेतृत्व यायेगु गोप्य सहमति जूगु खः ।
सचिवालय बैठक च्वने न्ह्यः नायःद्वय ओली व दाहाल दथुइ मन्त्रीमण्डल पुनर्गठनबारे सहलह जूगु खः । सहलह धुंकाः निम्हेसिनं नं राष्ट्रपति विद्यादेवी भण्डारीलिसे नं सहलह याःगु खः ।
मन्त्रिपरिषद पुनर्गठन यायेगु तयारी
लहनान्युज | कछलागा अष्टमी ११४० (नोभेम्वर २० २०१९)
मन्त्रिपरिषद पुनर्गठन यायेगु लागि प्रधानमन्त्री केपी शर्मा ओली व नेकपा अध्यक्ष पुष्पकमल दाहाल प्रचण्डं राष्ट्रपति विद्यादेवी भण्डारीयात नाप लाय्ग दु ।
थौं बुधवाः सुथय् ओली व प्रचण्ड शितल निवास वाना राष्ट्रपति भण्डारीयात परामर्श काःगु दु ।
राष्ट्रपतियात नापलाय्् न्ह्यः ओली व प्रचण्ड बालुवाटारय् सहलह यासे निम्ह अध्यक्ष शितलनिवास वःगु खः ।
प्रधानमन्त्री ओलीं थौं हे मन्त्रिपरिषद हेरफेर यायेगु तयारी याना च्वंगु दु ।
