Display Style:
Column Style
६६ क्वःगु राष्ट्रिय क्षयरोग नियन्त्रण दिवस हन
बाबुकाजी श्रेष्ठ | थिंलाथ्व द्धितिया ११४० (नोभेम्वर २८ २०१९)
६६ क्वःगु राष्ट्रिय क्षयरोग नियन्त्रण दिवस ख्वपय् तःजिक हःगु दु ।
नेपाल क्षयरोग निवारण संस्था ख्वप शाखाया ग्वसालय् “क्षयरोग बारे जनचेतना जगाऔं, क्षयरोग नियन्त्रणमा हामी सबै जुटौं” धइगु नारा ज्वना थी थी सरकारी, गैरसरकारी संघसंस्था व ब्बनेकुथिइ वना पर्चा व व्याच वितरण ज्या जुगु दु ।
संस्थाया सभापति राम सिख्वः, निवर्तमान सभापति बाबुकाजी श्रेष्ठ, सचिव राजेश्वरी शिल्पकार, सहसचिव लक्ष्मण सुजखु, सदस्य रत्नलाल सांद, कर्मचारी हिरण्यप्रचाप सांगामी व शर्मिला शिल्पकारपिनिगु न सहभागी दुगु खः ।
सभापति राम सिख्वलं उगु ज्याझ्वलय् आ.व. २०७५÷७६ सकसिगु मंकाः कुतलं क्षयरोगी ल्वगिपिनिगु म्हो जुगु धका न धयादिगु खः ।
हिमालय इङ्गलिस स्कूल ख्वपय् क्षयरोग सम्वन्धी जनचेतनामूला प्रशिक्षण ज्याझ्वः याउगु खः । उगु प्रशिक्षणय् संस्था सचिव राजेश्वरी शिल्पकारं क्षयरोग व एचआईभी÷एड्स सम्बन्धी जानकारी बियादिगु खः ।
गद्य गुरू पं निष्ठानन्दया लुमन्ति ज्याझ्वः जुइगु
सुरज, लहनान्युज | थिंलाथ्व तृतिया ११४० (नोभेम्वर २९ २०१९)
नेपालभाषा पुनर्जागरणया न्ह्यलुवाः प्यंगः थां मध्ये छगः गद्यगुरू पं. निष्ठानन्द बज्राचार्यया जन्म जयन्तीया लसताय् बज्राचार्य क्लबपाखें दीप प्रज्वलन ज्याझ्वः याइगु जुगु दु । थाैं (शुक्रवाः) सनिलया ६ ताः इलय् पं. निष्ठानन्दया जन्मत्वाः ओमबहाःया नःबहिइ थुगु ज्याझ्वः जुइत्यंगु खः ।
ने.सं. ९७८ थिंलाथ्व चौथी खुनु जन्म जूम्ह पं. निष्ठानन्दं पद्य शैलीया चलन जुयाच्वंगु उगु इलय् गद्य शैलीं साहित्य श्रृजना न्ह्याकादीगु खः । थुगु याेगदानयात लुमंकूसें वयकःयात गद्यगुरुकथं हनातःगु दु । थःगु जीवन धर्म, भाषाया सेवाय् समर्पित पं बज्राचार्यं अनुवादक, सम्पादकनापं नुगलय् थीक न्वंवानादीम्ह वक्ता नं खः । उबले वयकलं अनुवाद यानादीगु सफू छापे यायेत नेपालय् प्रेस मदुगुलिं थःहे कलकत्ताय् वनाः सफू थायेगु सयेकाः, थासा आखः ज्वना वयाः थम्हं हे कम्पोज यानाः, करेक्सन यानाः सफू छापे यानाः नं पिकयादिल ।
बौद्ध ग्रन्थ ललितविस्तर वय्कःयागु च्वसां ने.सं. १०२९स पिदंगु खः । वयां लिपा बोधिचर्यावतार व आर्यभद्रचरी अनुबाद प्रकाशित यानादीगु खः । वय्कः ने.सं. १०५५ या थिंलाथ्व चौथी खुनु हे मदुगु खः ।
थुगु ज्याझ्वःया ग्वसाखलः बज्राचार्य क्लबं वर्ल्ड बज्राचार्य अवार्ड २०१९ या घाेषणा नं याःगु दुसा उकिया फाराम दुथ्याकेगु ज्या थुगु इलय् जुयाच्वंगु दु । फाराम व मेगु जानकारीया नितिं https://bajracharyaclub.org.np/ य् दुस्वयेफइगु जानकारी नं ग्वसाः खलकं ब्यूगु दु ।
नेपाल बाल अधिकारया यात्रा ३० दँ पुरा
लहनान्युज | थिंलाथ्व द्धितिया ११४० (नोभेम्वर २८ २०१९)
मस्त नाप ज्या याना च्वंगु सस्थापिनिगु मंकाः पुचः कन्सोटियम नेपालया निक्वःगु साधारण सभां युबा बाल अधिकारकःमि किरण थापायात अध्यक्षय् ल्यःगु दु ।
अथेहे, उपाध्यक्षय् मोहन दङ्गाल, महासचिव सन्तोष महर्जन, सचिब प्रदीप कुमार लामिछाने, कोषाध्याक्ष देबि रेग्मीयात ल्यःगु दु ।
नाप दुजलय् बृजमोहन कुशबाह, उषा बिक, अनिता पाण्डे, गङ्गा गुरुङ ,प्रकाश खतिवडा व शालिकराम पाण्डेयात ल्यःगु खः ।
उगु साधारण सभां ले प्रदेश न १ य् स्वास्तिका पोख्रेल २ पाखे कोपिला कुमारी तिमल्सिना, ३ पाखे प्रकाश बःसी, गण्डकी प्रदेशय् दिपक शर्मा, प्रदेश ५ पाखे बद्री प्रसाद सुबेदी, कर्णाली प्रदेशय् लक्ष्मी भट्टराई व सुदुर पश्चिम् प्रदेशपाखे जयबहादुर बिश्वकर्मायात ल्यःगु दु ।
सागया उलेज्या व समापन कुन्हु जोर विजोर लागू याइगु
लहनान्युज | थिंलाथ्व द्धितिया ११४० (नोभेम्वर २६ २०१९)
१३ क्वःगु दक्षिण एसियाली खेलकुद कासा (साग) या उलेज्या व समापनया दिं कुन्हु सवारी साधनय् जोर विजोर प्रणाली लागू याइगु जुगु दु ।
थौं बिहीवाः तयारी समितिया पत्रकार सम्मेलनय् प्रहरी महानिरीक्षक सर्वेन्द्र खनालं मंसिर १५ गते उलेज्या कुन्हु विजोर नम्बर व मंसिर २४ गते समापनया दिं कुन्हु जोर नम्बरया गाडी जक चले यायेत इनाप याउगु दु ।
१३ क्वःगु दक्षिण एसियाली खेलकुद (साग) या इलय् पुलागु गाडी चले मयायेत ट्राफिक प्रहरी इनाप याउगु दु ।
महानगरीय ट्राफिक प्रहरी महाशाखां येँय् साग खेलकुद सञ्चालन जुइगु इलय् ट्राफिक व्यवस्थापन चुस्त दुरुस्त, व्यवस्थित व सुरक्षित दयेकेत ८ बुँदे विशेष अनुरोध न जारी याउगु खः ।
पत्रकारपिन्त बौद्ध विहार संघं भिन्तुना देछाल
लहनान्युज | थिंलाथ्व द्धितिया ११४० (नोभेम्वर २८ २०१९)
बौद्ध बिहार संघ यल व लायकु एफएम पुचःया ग्वसालय् नेवाः पत्रकार राष्ट्रिय दबु केन्दिय कमिटी व यल कचाःया न्हूगु ज्यासना पुचःयात भिन्तुना देछायेगु ज्याझ्वः जूगु दु ।
अक्षयश्वर महाविहारय् जूगु उगु ज्याझ्वलय् संघया नायः नानीकाजी शाक्यया सभाध्यक्षताय् न्ह्याःगु खःसा संघया निवर्तमान नायः पुष्परत्न शाक्य, वरिष्ठ उपाध्यक्ष करुणा बज्राचार्य, अक्षयश्वर महाविहार संघया नायः राजेश शाक्य पिन्सं भिन्तुना देछाना दीगु खः ।
अथेहे नाइस टेलिभिजनय् प्रसारण जुइत्यंगु नेवाः ज्याझ्वः झीगु सःया घोषणा नं जूगु खः । झीगु सः ज्याझ्वःया कजि विजयरत्न असंबरें थ्व ज्याझ्वः ने सं ११४० थिंलाथ्व दशमी , मंसीर २० गते शुक्रवाःया सनिलया ६ः३०इलय् प्रसारण जुइगु खँ कनादिगु खः ।
संघया ग्वसालय् जूगु उगु ज्याझ्वलय् नाइस टेलिभिजनया नायः आशीर्वाद पुन मगरं थःगु च्यानलं मेमेगु नेवाः ज्याझ्वः न्ह्याकायंकेगु खँ कनादिल ।
ज्याझ्वलय् दबुया केन्द्रिय महासचिव सुनिल महर्जन, दबुया यल कचाया न्वकु प्रशान्त माली व दबुया केन्द्रिय नायः सुरजबीर बज्राचार्य पिन्सं नं नुगःखँ तयादीगु खः । यल कचाःया दांभरींलिसें लायकु एफएम पुचःया लिउछ्यान्जे सुनिल बज्राचार्यं न्ह्याकुगु उगु ज्याझ्वलय् ग्वसाखलःपाखें मन्जु बज्राचार्यं सुभाय् न्वचु तयादीगु खः ।
