Display Style:
Column Style
परिस्थिति अनुकूल जूसा थः हाकनं प्रधानमन्त्री जुइ : नेकपा नायः दाहाल
लहनान्युज | ने.सं. ११३९ बछलागा त्रियोदशि (१ जुन, २०१९)
नेपाल कम्युनिस्ट पार्टी (नेकपा)या नायः पुष्पकमल दाहालं परिस्थिति अनुकूल जूसा थः हाकनं प्रधानमन्त्री जुइगु धयादीगु दु ।
देशया परिस्थिति नापं पार्टीया निर्णयपाखें सहमतिया आधारय् दच्छिया दुने प्रधानमन्त्री जुइगु दाहालया धापू खः ।
थ्व हे झ्वलय् दाहालं पार्टी एकताया इलय् याःगु सहमतिया कार्यान्वयन जुइगु नं विश्वास प्वंकादिल । ‘जिं न्हूगु खँ ल्हानागु मदु, सहमति कार्यान्वयन यायेमाः धकाः न्हापांनिसें धया वयाच्वनागु खः ।’
विराटनगरय् थौं सञ्चरवाः पत्रकारतलिसे खँ ल्हानादिसें दाहालं धयादिल, ‘जि प्रधानमन्त्री जुइगु धइगु पार्टीं क्वःछीगु खँ खः ।
परिस्थिति गुकथं विकास जुजुं वनी, उकी निर्भर जुइ ।’ पार्टी एकताया इलय् याःगु सहमतियात इमान्दारीतापूर्वक कार्यान्वयन याःसा थः प्रधानमन्त्री जुइगु दाहालया धापू खः ।
उपराष्ट्रपति पुन नेपाः लिथ्यन
लहनान्युज | ने.सं. ११३९ बछलागा त्रियोदशि (१ जुन, २०१९)
उपराष्ट्रपति नन्दबहादुर पुन अष्ट्रियाया ८न्हु भ्रमण क्वचायेकाः थौं सञ्चरवाः सनिलय् नेपाः लिहां झायादीगु दु ।
उपराष्ट्रपति पुन अष्ट्रियाया भियनयाय् ग्वसाः ग्वःगु जलवायु सम्बन्धि आर–२० अष्ट्रियन विश्व शिखर सम्मेलनय् ब्वति कायेत वंगु जेष्ठ १२ गते उखे झायादीगु खः ।
भियनाय् च्वनादीगु इलय् उपराष्ट्रपति पुनं अष्ट्रियाया राष्ट्रपति अलेक्जेण्डर भान दर बेलेनलिसे नापलानाः निगू पक्षीय हीत व ग्वाहालिया विषयस सहलह यानादीगु खः ।
अथे हे उपराष्ट्रपति पुनं भियनाय् ग्वसाः ग्वःगु जलवायु सम्बन्धि आर–२० अष्ट्रियन विश्व शिखर सम्मेलनया विशेष सत्रय् तकं सम्बोधन यानादीगु खः ।
भ्रमण दलय् उपराष्ट्रपतिया जहान हस्तमाली पुन व वन तथा वातावरण मन्त्री शक्ति बहादुर बस्नेतलिसें दुगु खः ।
३ न. प्रदेशया नां नेपालमण्डल हे उपयुक्त
लहनान्युज | बछलागा त्रयोदशी ११३९ (जुन १ २०१९)
प्रतिनिधि सभाया सांसद जिवनराम श्रेष्ठं ३ न. प्रदेशया नां नेपालमण्डल हे उपयुक्त जुगु बिचाः तयादिगु दु ।
३ नं प्रदेशया नां या निति नेवाः ताम्सालिङ व गौरीशंकर नांया तयेमाःगु बिषयलय् न चर्चा जुयाच्वंगु खः ।
वःगु शुक्रवाः प्रदेशसभाया सांसदपिं डा.अजयक्रान्ति शाक्य, बसन्त मानन्धर केशव स्थापित, राजेश शाक्य, ज्ञानेन्द्र शाक्य, राजकाजी महर्जन, प्रकाश श्रेष्ठ, उर्मिला श्रेष्ठ कर्माचार्य व सरस्वती बाटीपिंसं सभामुख सानु कुमार श्रेष्ठयात नाप लाना नेपालमण्डल कायम याये माःगु प्रस्ताव तयादिगु खः ।
प्रतिनिधि सभाया सांसद श्रेष्ठं ऐतिहासिक पहिचान दगु प्राकृतिक व मानव निर्मित सम्पदाया भण्डार “ नेपामण्डल“ दकलय् उपयुक्त जुगु धयादिसे जातजाति, भाषाभाषी, बहुधर्म बहुसंस्कृति व भौगोलिक बिबिधता दुगु नाप पहिचान दुगु धयादिसे प्रदेश ३ नां नेपालमण्डल हे बांला धयादिगु खः ।
नेवाः समुदायपाखें मंकाः प्रतिभा ‘नेवाः आइडल’
लहनान्युज | बछलागा द्धादशी ११३९ (मे ३१ २०१९)
नेपाःया ७७ जिल्लाय् व भारतया सिक्किम, दार्जिलिङ, आदि थुज्वःगु थासय् च्वना वयाच्वनादीपिं नेवाःतय्गु सक्रिय सहभागीता दयेकाः नेवाःतय्गु बिस्कं म्हसीका ब्वयेगु ताःतुनाः तःजिगु सांगितिक धेंधें बल्लाः ‘नेवाः आइडल’ या ग्वसाः ग्वयेगु धकाः थौ छगु पत्रकार सम्मेलन याना थुगु खँया जानकारी बिगु खः ।
प्रतिभायात छगू हे दबुलिइ मुंकेमाःगु थौंया माग खः धासे उकिया नापं संगीतया माध्यमं नेवाः संस्कृति, सम्पदाया संरक्षण यायेगु नितिं झीगु थःगु हे बिस्कंगु मौलिक म्हसिका दुगु न्हूगु, पुलांगु लोक, ऋतु, आधुनिक आदि कथंया संगीत, रचनायात पितहयाः न्हूगु पुस्तातक्क थ्यंकेगु लिसें संगीतह्यमिपिन्त न्हूगु श्रृजनाया नितिं प्रेरीत यायेमाःगु धका ज्याझ्वःया कजि मनोज नेवाः खड्गी धयादीगु खः ।
नेवाः समुदायया सकल नेपाःमिया मंकाः प्रतिभा ‘नेवाः आइडल’ मालेगु नितिं न्हय्गुलिं प्रदेशलिसें येँय् विशेष अडिसनया ग्वसाः ग्वयाः देय्न्यंकनं प्रतिभाया मालेज्या याये त्यःगु खः ।
थुगु अडिसनया नितिं प्रदेश १ पाखे झापाय्, प्रदेश २ या जनकपुरय्, ३ चितवन, ४ पोखरा, ५ बुटवल, ६ सुर्खेत व ७ धनगढिइ अडिसन यायेगु जुइसा येँय्विशेष अडिसनया ग्वसाः ग्वयाः न्हापांम्ह नेवाः आइडल मालेज्या जुइ खँ न कनादिगु खः ।
‘नेवाः आइडल’ त्याकामियात गाडी लिसें नगद सिरपाः बीगु जुइसा ल्यू लाइम्हेसित बाइकलिसें नगद सिरपा व लियांल्यू लाइम्हेसित बाइकलिसें नगद सिरपाः बीगु जुइ धका कजि नेवाः न धयादिगु खः ।
थुगु ज्याझ्वः ईमेज च्यानलपाखें प्रसारण जुइत्यंगु खँ नं जानकारी बियादिगु खः ।
ज्याझ्वःया सभाधक्ष्य लहना मिडिया अधक्ष्य नृपेन्द्रलाल श्रेष्ठ संगीतया माध्यम न थौं या ल्याय्म्ह तयेत आकर्षण यायेगु छगु माध्यम जुइगु बिश्वास यानादिगु खः ।
३ या नां ‘नेपालमण्डल प्रदेश’ प्रस्ताव
नृपेन्द्रलाल श्रेष्ठ | बछलागा द्धादशी ११३९ (मे ३१ २०१९)
प्रदेश नम्बर ३ या नां ‘नेपालमण्डल प्रदेश’ तयेमाः धइगु माग यासें प्रदेशसभाया सांसदपिं डा.अजयक्रान्ति शाक्य व बसन्त मानन्धर प्रस्ताव दर्ता याःगु दु । वयकःपिन्सं सभामुख सानु कुमार श्रेष्ठयात उगु प्रस्ताव लःल्हाःगु खः ।
थुगु दर्ता याःगु नेपाल मण्डलया नांया प्रस्तावयात कयाः सांसदपिं केशव स्थापित, राजेश शाक्य, ज्ञानेन्द्र शाक्य, राजकाजी महर्जन, प्रकाश श्रेष्ठ, उर्मिला श्रेष्ठ कर्माचार्य व सरस्वती बाटीपिंसं समर्थन याःगु दु ।
सांसद बसन्त मानन्धरं ‘नेपालमण्डल प्रदेश’ नांया नितिं दर्ता याये धुंकाः थ्व नांया समर्थनया नितिं फुक्क सांसदलिसें सहलह जुयाच्वंगु जानकारी बियादिगु खः ।
३ न. प्रदेशया नां नेवाः ताम्सालिङ व गौरीशंकर प्रदेश जुइमाः धकाः नं सांसदपिन्स दर्ता याये धुकुगु दु ।
