Display Style:
Column Style
परियत्ती बक्तृत्वकला कासा जुल
लहनान्युज | तछलाथ्व पारु ११३९ (जुन ४ २०१९)
परियत्ती बक्तृत्वकला सञ्चालन समितिया ग्वसालय् नापिचन्द्र परियत्ती केन्द्र, इखाछेँ, यलया व्यवस्थापनय् ३३क्वःगु परियत्ती बक्तृत्वकला प्रतियोगिता समितिया नायः मोलिलाल शिल्पकारया सभाध्यक्षताय् न्ह्याःगु जुल ।
उगु ज्याझ्वलय् मूपाहाँकथं वोधिज्ञान महास्थविर बिज्याःगु खः । ज्याझ्वलय् समितिया न्वकू ज्ञानबहादुर शाक्यं लसकुस यानादीगु खःसा छ्याञ्जे देवेन्द्र शाक्यं नुगः खँ तयादीगु खः ।
ज्याझ्वलय् बौद्ध सम्बन्धि झिगू विषयस बक्तृत्वकला न्ह्यब्वय्त स्वनिगःया झिंनिगू परियत्ती केन्द्रपाखें ब्वति काःगु मध्ये न्हाप सिरपाः शाक्यसिंह बौद्ध परियक्ति केन्द्र, थैनाया अनिशा श्रेष्ठ, ल्यू सिरपाः दीपावती बौद्ध परियत्ती केन्द्र, गुइत त्वाःया आर्यन बिसी व लियांल्यू सिरपाः जयमंगल विहा, चंकित्वाःया नेग्मा शाक्यं त्याकादीगु खः ।
कासा त्याकादीपिन्त समितिया नायः लिसें मूपाहाँपाखें शिल्ड, ट्रफि व सिरपाः लःल्हानादीगु खः ।
ज्याझ्वलय् नापिचन्द्र बौद्ध परियत्ती केन्द्रपाखें सन्दिरा बज्राचार्यं सुभाय् देछानादीगु खः । उगु ज्याझ्वः सुनीता बज्राचार्यं न्ह्याकादीगु खः ।
नेकपाया सांसद ज्यान जोगाई पाउँ धकाः ध्यानाकर्षण यात
लहनान्युज | बछलागा चर्तुदशी ११३९ (जुन २ २०१९)
सत्तारुढ नेपाल कम्युनिस्ट पार्टीया सांसद खगराज अधिकारीं थौं प्रतिनिधिसभा बैठकय् हल च्वंगु मेचं प्यकः तकः दगुलि थःगु ‘ज्यान जोग. याना बिइत’ सभामुखया ध्यानाकर्षण याःगु दु ।
उगु खँया ध्यानाकर्षण थौं आइतवाः च्वंगु प्रतिनिधिसभाया बैठकय् शुरुइ हे थःगु त्वःधुगु उगु मेच क्यसे थः प्यकः तकः दये धुकुगु दु धयादिसे सभामुख कृष्णबहादुर महरायात जानकारी बियादिगु खः ।
नाप सासद अधिकारीं ‘आःतक दुर्घटना मजुनि तर ग्वःकः धाये मालिगु खः ? संसद सचिवालयं वइगु दिं थज्यागु मेच मतेय त इनाप यासे ‘ज्यान जोगाई पाउँ धइगु अवस्था वल ।’ सभामुख कृष्णबहादुर महरां उगु विषयलय् गम्भीर रुपं ध्यानाकर्षण जुगु धका धयादिगु खः ।
जैशीदेवल क्लवया नेतृत्वय् राजेश प्रजापति
नृपेन्द्रलाल श्रेष्ठ | बछलागाः चतुंर्दशी ११३९ (जून २ २०१९)
जैशीदेवल युथ क्लवया १७ क्वःगु साधारण सभां राजेश प्रजापतिया अध्यक्षताय् ११ म्ह कार्यसमिति निर्वाचित जुगु दु ।
उगु कार्यसमिटि उपाध्यक्ष रोजन्द्र महर्जन, महासचिव चन्द्रगोपाल प्रधान, सचिव हितेश कारंजित, कोषाध्यक्ष गिरीधर मान श्रेष्ठ च्वनादिगु दु ।
अथेहे दुजलय् प्रमेश बहादुर श्रेष्ठ, प्रविन कर्माचार्य, राजेन्द्र मानन्धर, भरत कारंजित, ज्ञानिक मान दिपंकर व तिर्थ राईपिं च्वनादिगु दु ।
क्लवं समाजय् थीथी ख्यलय् हिंदान, स्वास्थ्य शिविर, सरसफाई, स्थानीय जात्रा, संस्कृति, सम्पदा संरक्षण लगायत ज्या यानाच्वनागु दु धका क्लवया दुजः राजेन्द्र मानन्धरं जानकारी बियादिगु खः ।
क्लवया सल्लाहकार मधुसुदन प्रधानया संयोजकत्वय् राजेश शर्मा व हरिश्वरमान रंजित सदस्य दुगु निर्वाचन समितिं क्लवया न्हुगु नेतृत्व ल्यःज्या यानादिगु खः ।
अमेरिकाय् भिसाया लागि सामाजिक सञ्जालया विवरण न्ह्यब्बय माः
लहनान्युज | बछलागा चर्तुदशी ११३९ (जुन २ २०१९)
अमेरिकाय् भिसा कायेत आः सामाजिक सञ्जालया थःगु गतिविधि विवरण अनिवार्य रुपय् बुझे याये माःगु दु ।
अमेरिकया स्टेट डिपार्टमेन्टं भिसा आवेदकया लागि विद्यमान व्यवस्थाय् परिमार्जन यासे सामाजिक सञ्जालया गतिविधि आवेदनय् न्ह्यथने माःगु न्हुगु नियम लागू याःगु दु ।
ट्रम्प प्रशासनं सन् २०१८ या मार्चय् थुगु प्रस्ताव हःगु खः । थुगु व्यवस्थां झण्डै एक करोड ४७ लाख मनूत प्रभावित जुइगु अनुमान याना तःगु दु ।
खास याना ज्या यायेगु व ब्बनेगु लागि अमेरिका वनेत सामाजिक सञ्जाल, फोन नम्बर, इमेलया विवरण अनिवार्य रुपं बुझे याये माःगु व्यवस्था याःगु खः।
अथेहे निश्चित कूटनीतिज्ञ व औपचारिक भिसाय्का आवेदकया हकय् धाःसा थ्व नियम जुइ मखु । नाप सामाजिक सञ्जालया विवरण पेश मयासे भिसा काये फइगु ब्यवस्था याःगु दु ।
रामशेखरया लुमन्तिइ साहित्य गोष्ठी
लहनान्युज | बछलागा त्रयोदशी ११३९ (जुन १ २०१९)
नेपाःया नां दंम्ह हास्यव्यंग्य साहित्यकार नापं वरिष्ठ कलाकार रामशेखर नकःमिया लुमन्तिइ ख्वपया भोलाछेँय् त्वालय् साहित्य गोष्ठी जूगु दु ।
उगु ज्याझ्वः रामशेखर लुमन्ति दबूया ग्वसालय् जुगु खः ।
ज्याझ्वलय् पाहाँ कथं वरिष्ठ हास्य कालाकार आशाकाजी थकूं, तिलक प्रकाश कायस्थ, महन्त मल्लपिं झायादीगु खः । वरिष्ठ हास्य कालाकार थकू नं रामशेखर नापया जुयागु इलय् थम्हं यानागु अनुभव व वयकलं कनादीगु न्ह्यैपुगु खँ त कनादिसे अन्तिम इलय् नापलाःबलय् जूगु अतिकं नुगः चिये मफुगु खँ कसे भावविह्वल जुयादिगु खः ।
उगु ज्याझ्वलय् ध्रुव मधिकःमिं न्ह्यब्वःगु साहित्यया संक्षिप्त रुपं समीक्षा यानादीगु खः ।
श्याम आशा कायस्थ, राजुराम मुनकःमि, सौरभ शाक्य, सुलोचना सैंजु, सुनिल बज्राचार्यं, नरेश अमात्य, महेन्द्र गोपाल कर्माचार्य, त्रिरत्न शाक्य, दिब्या ताम्राकार, सुधिर ख्ववि, कृष्ण भक्त कवांग, नविन प्रकाश श्रेष्ठ, तेजकृष्ण महर्जन, ज्ञानी राजा मानन्धर, बसन्त नकःमिपिसं थःथःगु च्वसू ब्वनान्यंकादीगु खः ।
गोविन्द मान श्रेष्ठया सभाधक्ष्यताय् जुगु उगु ज्याझ्वः प्रदिप रत्न शाक्यं न्ह्याकादीगु खः ।
बुखँ– नेवाः सूचना केन्द्र किपा – राजेन्द्र रञ्जित
