Display Style:
Column Style
प्रदेश १य् थप न्याम्ह कोरोना संक्रमण पुष्टि
लहनान्युज | तछलाथ्व नवमी ११४०,जेठ १८ आइतवाः
प्रदेश १य् हाकन कोरोना संक्रमण पुष्टि जुगु दु । थौं आइतवाः झापाय् प्यम्ह व मोरङय् छम्हेसित कोरोना संक्रमण पुष्टि जुगु दु ।
कोसी अस्पताल विराटनगरया प्रयोगशालाय् याःगु परीक्षणय् झापाया गौरीगञ्ज गाउँपालिकाया प्यम्हेसित व विराटनगर महानगरपालिकाया छम्हेति कोरोना पुष्टि जुगु दु धका प्रदेश १ सामाजिक विकास मन्त्रालयं धाःगु दु ।
संक्रमितपि दक्को भारतपाखे वःगु धका धाःगु खः ।
गौरीगञ्ज ६ य् प्राथमिक स्वास्थ्य चौकीइ च्वपि ५१म्ह मध्ये प्यम्ह मिजंयात कोरोना संक्रमण पुष्टि जुगु दु ।
संक्रमित पिनिगु अवस्था सामान्य जुगु धका न धाःगु दु ।
संक्रमित मिसा भारतं वया होम क्वारेन्टाइनय् च्वना च्वपि खः ।
थौं १६६ म्हेसित कोरोना संक्रमण पुष्टि
लहनान्युज | तछलाथ्व नवमी ११४०,जेठ १८ आइतवाः
वःगु २४ घण्टाया दुने थौं आइतवाः थप १६६म्हेसित कोरोना संक्रमण पुष्टि जुगु दु ।
थ्व नाप संक्रमित जुपिनिगु ल्याः १५६७ म्ह थ्यःगु दु धका स्वास्थ्य तथा जनसंख्या मन्त्रालयं धाःगु दु ।
संक्रमित मध्ये १४५० म्ह मिजं व ११७ म्ह मिसा जुगु धका मन्त्रालयया प्रवक्ता डा. विकास देवकोटां जानकारी बियादिगु खः ।
जागरण मञ्चं मानवीय ग्वाहालि भावना जायेकेत आह्वान
लहनान्युज | तछलाथ्व नवमी ११४०,जेठ १८ आइतवाः
लकडाउनया ई ताःहाकः जुयावःगुलि थुकिं विकराल रुप कयाः विविध समस्या न्ह्यःने हयाच्वंगु सन्दर्भय् नेवाः जागरण मञ्चं छगू वक्तव्य पिथनाः नेवाः समुदायनं यायेमाःगु पहलत न्ह्यब्वःगु दु ।
मञ्चया नायः सुजीव वज्राचार्यं थौं आइतवाः पिथंगु छगु वक्तव्यय् लकडाउनया इलय् थवंथवय् मानवीय आर्थिक ग्वाहालि यायेगु भावना जायेकाः व्यक्तिगत व संघ संस्थामार्फत् पहल कायेत इनाप यानातःगु दु ।
अथेहे, लकडाउन धुंकाः पिहांवइगु आर्थिक, व्यापारिक समस्यायात बिचाः यासें कार्ययोजना दयेकेगु अले बहाः पुलेगु समस्या छेँ थुवाः व बालं च्वनीपिनि दथुइ सहलह जुयाः तय जुइमाःगु व थुकी सुयांपाखें अनावश्यक हस्तक्षेप जुइके मबीत सचेत जुइत नं इनाप यानातःगु दु ।
लकडाउन आन्तरिक रुपं पालना याकेगु तर पिनें मनू दुकायेगु थुज्वःगु प्रवृत्तिया विरोध यासें नेवाः जागरण मञ्चं स्वनिगःदुने पिनें मनू दुमकायेगु खँय् सतर्क व सचेत जुयाः प्रशासनयात दबाब बीत नं धाःगु दु ।
लकडाउनया इलय् सरकारपाखें वयेफुगु नेवाः विरोधी विधयेक, थीथी कथंया निर्णय इत्यादि खँय् सतर्क व सचेत जुयाः थवंथवय् थीथी माध्यमं सम्पर्क दयेकाः च्वनेमाःगु धासें मञ्चं कोभिड–१९ या हुनिं जुयाच्वंगु लकडाउनया विषम परिस्थितिइ बेरोजगार मनूत खुँज्या, डकैटी, ठगी थुज्वःगु ज्याय् प्रवृत्त जुयावःगु खनेदुगुलिं सुरक्षाया सवालय् नं सतर्क व सचेत जुइत वक्तव्यय् इनाप यानातःगु दु ।
लिसें, नेवाः जागरण मञ्चं नेवाः ख्यःया समस्याग्रत अभियन्ता, कार्यकर्र्तािपनि पहिचान यानाःग्वाहालि यायेगु पहल जुइधुंकूगु जानकारी नं ब्यूगु दु ।
निदँया मचा कोरोनाया कारण सीगु पुष्टि
लहनान्युज | तछलाथ्व नवमी ११४०,जेठ १८ आइतवाः
बाजुराया निदँ मचा कोरोनाया कारण सीगु पुष्टि जुगु वया माम न संक्रमित जुगु दु ।
निदँया मचा कोरोना भाइरस (कोभिड–१९) या कारण सीगु पुष्टि जुगु दु ।
जिल्ला अस्पताल बाजुराया आइसोलेसनय् उपचार याना च्वम्ह म्हिग शनिवाः चान्ह्य २ बजे सीगु खः ।
प्रदेश २ य् थप ६० म्ह कोरोना पुष्टि
लहनान्युज | तछलाथ्व नवमी ११४०,जेठ १८ आइतवाः
प्रदेश २ य् थौं आइतवाः सुथय् जक ६० म्ह कोरोना संक्रमण पुष्टि जुगु दु । थौं पुष्टि जुपि रौतहटय् २९ म्ह, धनुषाय् २१ म्ह, सर्लाहीइ १० म्हेसित संक्रमित जुगु दु ।
रौतहटय् संक्रमति जुपि दुर्गाभगवती क्वारेन्टिनय् च्याम्ह, मदरसा क्वारेन्टिनय् झीम्ह व गौर क्वारेन्टिनय् ११म्ह ख ।
अथेहे, धनुषाय् संक्रमति जुपि मध्ये मुखियापट्टी मुसहरनिया क्वारेन्टिनय् ११ म्ह, गोपाल धर्मशालाया ९ म्ह व छम्ह गणेशमान चारनाथ नगरपालिकायापि खः ।
अथेतु,सर्लाहीया संक्रमित जुपि मध्ये हरिपुर नगरपालिकाया ७ म्ह व बहम्पुरी गाँउपालिका क्वारेन्टिनया स्वम्ह जुगु दु । इमिगु दक्को स्वाब टेकुस्थित प्रयोगशालाय् परीक्षण याःगु खः ।
