Display Style:
Column Style
महाकवि गिरिजाप्रसादया बुदिंया हन
लहनान्युज | चिल्लागा त्रयोदशी ११३९ (अप्रिल ३ २०१९)
महाकवि गिरिजाप्रसाद जोशीया ८१ क्वःगु बुदिंया लसताय् मंगलवाः नेपालभाषा केन्द्रीय विभाग यल ध्वाकाय् गिरिजाप्रसादया बुदिं हनाः सिरपाः लःल्हायेगु नाप न्यागु गू सफू चिखिफ्यने ज्याझ्वः न जूगु खः ।
उगुु ज्याझ्वलय् मूपाँहा कथं कृष्णगोपाल श्रेष्ठ झायादीगु खः । सत्यहेरा अनुसन्धान सिरपाः त्याकादीपि रविन श्रेष्ठ व राकेश महर्जनयात मूपाँहा कृष्णगोपाल श्रेष्ठं हनापौ व सिरपाया दाता उजेली डंगोलं १० द्वः तका दां लःल्हानादीगु खः ।
अथेहे उगु हे ज्याझ्वलय् न्यागु अनुसन्धानात्मक कृतित त्रिप्रसाद धौभडेलया ‘नसंफाःगु चा उपन्यासया बैचारिक पक्ष’, राकेश महर्जनया ‘भृकुति उपन्यासया ऐतिहासिक तत्व’, किशोर नेपालीया ‘पांगाया सायाः’, पूर्ण कुमार श्रेष्ठया ‘न्हू प्रेष्टि नेपाःया च्वसू सर्वेक्षण’ व रविन्द्रराज ताम्राकारया ‘सन्ध्या टाइम्सया सम्पादकीय’ मू पाहाँ श्रेष्ठ, विषेश पाँहापिं प्रदेश न.३ या सांसद नरोत्तम बैद्य, कृष्ण लाल महर्जन, वल्र्ड नेवाः अर्गनाइजेशनया नायः सिजन श्रेष्ठ, नेवाः देय् दबूया नायः नरेश ताम्राकार, व सिरपाःया दाता डंगोलं मंकाः कथं चिखिफ्य यानादीगु खः ।
विभागया प्रमुख डा. ओमकारेश्वर श्रेष्ठया सभाधक्ष्यताय् जुगु उगु ज्याझ्वलय् दबूया नायः श्रेष्ठं नेपालभाषायात राज्य व नेपाल सरकारं स्थानीयतहलय् छ्यलाबुलाया भाय्कथं मान्यता बीधुंकूगुलिं उकियात कार्यान्वयन यायेमाःगुलि बः बियादिल ।
बुखँ : किपा नेवाः सुचना केन्द्र
वाःफयेनं लाना मदुपिनिगु परिवारयात न्यागु लख बिगु
लहनान्युज | चिल्लागा द्धादशी ११३९ (अप्रिल २ २०१९)
नेपाल कम्युनिस्ट पाटीया अध्यक्ष पुष्पकमल दाहाल प्रचण्डं बारा व पर्साय् वाःफयेनं लाना मदुपिनिगु परिवारयात पार्टीपाखे छगु परिवारयात म्हति ५ लख तक बिगु घोषणा यानादीगु दु ।
थौं बाराया फेटा गाउँपालिका ६ बरैनियाँ थ्यकादीम्ह प्रचण्डं पार्टीपाखे वाःफयेनं लाना मदुपिनिगु परिवारयात म्हति न्यागु लाख बिइगु घोषणा यानादीगु खः।
आइतवाः बहनि वःगु वाः फयेनं बारा व पर्साय् २७ म्हसिया अप्व मनूत मदुगु खः ।
१५ वडाय्‘भूकम्प स्मृति स्तम्भ पार्क’या शिलान्यास
नृपेन्द्रलाल श्रेष्ठ | चिल्लागा द्धादशी ११३९ (अप्रिल २ २०१९)
येँया क्षेत्र न ८ स्थानीय पूर्वाधार विकास साझेदारी ज्याझ्वः कथं येँ महानगरपालिका वडा न १५ य् च्वंगु छाउनीइ २०७२ या तः भुखाचय् लानाः मदुपिनिगु लुमन्तिइ ‘भूकम्प स्मृति स्तम्भ पार्क’या शिलान्यास जूगु दु । उगु पार्कया शिलान्यास प्रतिनिधिसभा सांसद जीवनराम श्रेष्ठं यानादीगु खः ।
उगु ज्याझ्वलय् येँ मनपाया प्रवक्ता नाप येँ मनपा १५ या वडा अध्यक्ष ईश्वरमान डंगोल, येँ मनपा १३ या अधक्ष्य ध्रुवनारायण मानन्धर, १५ वडाया दुजपिं आनन्दराम गौतम, मैंयालक्ष्मी महर्जन व डल्लु आवास सहयोग समितिया नायः राजा शाक्यलिसें पार्क निर्माण उपभोक्ता समितिया नायः राजु महर्जन नापनापं स्थानीय जनसमुदायपिनिगु उपस्थिति दूगु खः ।
ज्याझुवलय् प्रतिनिधिसभा सांसद जीवनराम श्रेष्ठं खुल्ला जग्गाया संरक्षण पार्क निर्माणपाखें भुखाय् व प्राकृतिक प्रकोप जुइबलय् समुदायया नितिं ज्या वइगु व थःम्हं येँय् कंक्रिटया जंगल जूगुु व उकिं जनस्वास्थ्यय् लिच्वः लानाच्वंगु जुयाः थःम्हं सार्वजनिक जग्गाया संरक्षण यायेगु ज्याय् प्राथमिकता बिइगु खँ न्ह्यथनादीगु खः ।
येँया खुसिबुँइ हिदान ज्याझ्वः
नृपेन्द्रलाल श्रेष्ठ | चिल्लागा एकादशी ११३९ (अप्रिल १ २०१९)
मंकाः समाज खुसिबुँ, टाउन प्लानिग १७ वडाया ग्वसालय् समाजया संस्थापक नायः महेन्द्रबिलास जोशीया लुमन्ती हिदान ज्याझ्वः जुल ।
उगु ज्याझ्वलय् ४२म्ह स्वयां अप्वस्यां हिदान यानादीगु खः ।
ज्याझ्वलय् समाजया नायः भाइराजा महर्जनं थौंकन्हय् हिया अभाव जुयाच्वंगु दु धयादिसे समाजं दँय् छक्वः जक थुगु ज्या जुयाच्वंगुली आः दँय् स्वक्वःतक याय्गु ग्वसाः जुयाच्वंगु जानकारी बियादिल ।
ज्याझ्वलय् हिदान यानादीपिन्त १७ वडाया दुजः बाबुराजा महर्जन दसिपौ लःल्हानादीगु खः ।
स्कूलय् ब्बमिपिनिगु ग्राय्जुएशन
लहनान्युज | चिल्लागा एकादशी ११३९ (अप्रिल १ २०१९)
टाइम्स इन्टरनेशनल स्कूलय् ब्बमिपिनिगु ग्राय्जुएशन क्वचाःगु दु ।
उगु ज्याझ्वलय् नुगःखँ तयेगु झ्वलय् विशेष पाहाँ कथं हलिं नेवाः दबूया वरिष्ठ न्वकू दयारत्न शाक्यं थुगु ब्वने कुथिइ चहःपहः, संरचनात स्वयेबलय् अन्तर्राष्ट्रिय स्तरया हे ब्वनेकुथि खनेदु धयादिगु खः ।
अथेहे ज्याझ्वलय् डा. चुन्दा बज्राचार्यं मस्त तय्त आखः ब्वंकेबलय् डाक्टर हे दयेकेगु, बैज्ञानिक दयेकेगु वा इन्जिनियर दयेकेगु धकाः जवर्जस्तीं ब्वंकां मज्यू अज्यागु सफल न जुइ मखु धका धयादीसे मस्त तयेगु स्वभाव स्वयाः इच्छा कथंया शिक्षा बिइफःसा जक उच्च शिक्षा हासिल याके फइ धयादीसें शिपमुलक शिक्षाय् ध्यान वंकेफत धाःसा मस्तयेगु भविष्य बांलाइगु खँय् बः बियादीगु खः ।
ब्वनेकुथिया प्रिन्सिपल पल्पसा महर्जनं लसकुस यानादीगु उगु डा बज्राचार्यं मस्त ब्बमिपिन्त दसीपौ लःल्हानादीगु खःस डिर्नेटर उषा गुरूङं ब्बमिपिनिगु थपूया योजनाबारे नं कनादिगु खः ।
बुखँ–नेवाः सूचना केन्द्र किपा–राजेन्द्र रञ्जित
