Display Style:
Column Style
डुबानया समस्या ज्यंकेत भारत सरकारलिसे सहकार्य यायेमाःगु
लहना न्यूज | ने.सं. ११३९ गुंलागा पञ्चमि (२० अगष्ट, २०१९), मंगलवाः
नेपाल कम्युनिष्ट पार्टी (नेकपा)का नायः पुष्पकमल दाहालं नेपालय् जुइगु डुबानया समस्या ज्यंकेगु नितिं भारत सरकारलिसे सहकार्य यानाः न्ह्याः वनेमाःगु धयादीगु दु ।
जिल्ला विपद् व्यवस्थान समितिया मुँज्याय् थौं मंगलवाः न्ववानादिसें नायः दाहालं उगु खँ धयादीगु खः । वय्कलं नेपालय् दँय्दसं वर्षाया इलय् वइगु खुसिवाःपाखें तःधंगु जनधनया खति जुइगु नं धयादिल ।
पूर्व प्रधानमन्त्री तक जुयादीम्ह नेकपाया नायः दाहालं लःया समस्या नेपाःया जक मजूसें भारतया तकं जूगुलिं निगुलिं देसया सरकारं समन्वय यानाः न्ह्याःवनेमाःगु धयादिल । थुकिया नितिं नेपाल सरकारं पहल नं याःगु नायः दाहालया धापू दु ।
भारतपाखेया सीमाय् दयेकीगु तटबन्धलिसें बाँधया हुनिं दकलय् अप्वः समस्या प्रदेश २स जुइगु जूगुलिं सरकार थुगु समस्या ज्यंकेगु नितिं गम्भीर दुगु नं धयादिल ।
थुगुसी वःगु खुसिवाःपाखें जुइफइगु तःधंगु जनधनया खति पनेत सम्बन्धित निकायपाखें इलय् हे तदारुकता क्यंगुलिं नायः दाहालं लसता तकं प्वंकादिल ।
उगु मुँज्याय् ब्वति कयादीम्ह पूर्व प्रधानमन्त्री नापं नेकपाया वरिष्ठ नेता माधवकुमार नेपालं विपदयात कयाः राजनीति मयायेत फुक्क पक्षयात इनाप यानादिल । वय्कलं विपद् व्यवस्थापनया नितिं सरकार नेपाल सरकार गम्भीर जूगु खँ धयादिसें थःपिन्सं तकं थुकिया नितिं सरकारयात दबाब बिया वयाच्वनागु जानकारी याकादिल ।
सर्वदलीय मुँज्या बालुवाटारय् न्ह्यानाच्वन
लहना न्यूज | ने.सं. ११३९ गुंलागा पञ्चमि (२० अगष्ट, २०१९), मंगलवाः
प्रधानमन्त्री केपी शर्मा ओलीं सताःदीगु सर्वदलीइ मुँज्या बालुवाटारय् न्ह्यानाच्वंगु दु ।
संसदय् विचाराधीन अवस्थाय् दयाच्वंगु विधेयक क्वःछीत प्रधानमन्त्री केपी शर्मा ओलीया उपस्थितिइ मुँज्या न्ह्याःगु खः ।
मुँज्याय् नेपाल कम्यूनिष्ट पार्टी (नेकपा)पाखें पुलांम्ह प्रधानमन्त्रीलिसें नायः पुष्पकमल दाहाल, झलनाथ खनाल, नारायणकाजी श्रेष्ठ, वामदेव गौतम, बिष्णु पौडेल, ईश्वर पोख्रेल, सुवास नेम्वाङ, रामबहादुर थापा ब्वति कयाच्वनादीगु दु ।
अथे हे, प्रमुख प्रतिपक्षी नेपाली कांग्रेसपाखें पुलांम्ह प्रधानमन्त्रीलिसें सभापति शेरबहादुर देउवा, विजय गच्छदार, पूर्ण बहादुर खड्का, मिनेन्द्र रिजालं ब्वति कयाच्वनादीगु दु ।
समाजवादी पार्टी नेपालपाखें नायःपिं डा. बाबुराम भट्टराई व उपेन्द्र यादव सहभागी जुयादीगु दुसा राष्ट्रिय जनता पार्टी (राजपा)पाखें राजकिशोर यादव व महन्थ ठाकुरं ब्वति कयाच्वनादीगु दु ।
थ्व हे दथुइ, प्रधानमन्त्री ओलीं सःतादीगु सर्वदलीय मुँज्याय् सत्तारुढ नेपाल कम्यूनिष्ट पार्टी (नेकपा)या वरिष्ठ नेता माधवकुमार नेपाल धाःसा अनुपस्थित जुयादीगु दु । पार्टी वरियताय् घटुवा यानाः झलनाथ खनालयात न्ह्यःने तयेवं सर्वदलीय मुँज्याय् नेता नेपालया अनुपस्थिति अर्थपूर्ण जूगु नेतातसें धाःगु दु ।
प्रदेश २ या अध्यक्षपाखे प्रभु साह नं राजीनामा
लहनान्युज | गुंलागा पंचमी ११३९ (अगष्ट २० २०१९)
नेकपाया नेता प्रभु साह नं प्रदेश २ या अध्यक्षपाखे राजीनामा बिउगु दु । पार्टी अध्यक्ष पुष्पकमल दाहाल प्रचण्डयात नापलाना साह न प्रदेश अध्यक्ष पदपाखे राजीनामा बिउगु दु ।
स्थायी कमिटी सदस्यया प्रवल दाबेदार माने याना तम्ह साहया नां कमिटीइ दु मथ्याय् वः असन्तुष्ट जुया च्वंगु खः ।
तर पार्टी एकीकरणयात निष्कर्षय् थ्यकेगु लागि सुम्क च्वना च्वंगु खः ।
महानगरं १५ न्हु दुने सिनेमा हलं मनोरञ्जन कर पुलेत अल्टिमेटम
लहनान्युज | गुंलागा चौथी ११३९ (अगष्ट १९ २०१९)
सिनेमा हलं मनोरञ्जन शुल्क बापत पुले माःगु कर मपुगुलि महानगरया राजस्व बिभागं भाद्र १७ गते तक सूचं बिया स्वापू तयेगु लागि सूचं जारी याःगु दु ।
महानगर दुने ४२ गु सिनेमा घर दु । उकि मध्ये वःगु दँय् (आर्थिक बर्ष २०७५ व ०७६) ४ गु हलं जक कर पुला तःगु दु । राजस्व बिभागया प्रमुख नुरनिधि न्यौपानं टिकट मिइ धुकुगु शुल्क तक महानगरयात मपुगु धका धयादिगु दु ।
वयकलं जिपि गम्भीर जुयागु खः धका धयादिसे वःगु दँय् ४ गु हलपाखे मनोरञ्जन वापतया शुल्क १९ लाख ध्यवा संकलन यानागु दु धका न धयादिगु दु ।
प्रदेश नं. ३ या आर्थिक ऐन २०७६ या व्यवस्था बमोजिम सिनेमा हलं चलचित्र प्रदर्शन यायेगु झ्वलय् छपाः टिकट मिइ वलय् मनोरञ्जन कर बापत ५ प्रतिशत जुइगु ध्यवा मेगु १७ न्हु दुने सरकारयात बुझे यायेमाःगु सुचं न पिथनादिगु दु ।
वयकलं ऐनया दफा ४ (३) बमोजिम जिमिस सिनेमा हलयात बक्यौता रकम तक ज्वना वाः धका सूचं जारी यानागु खः धका धयादिगु दु ।
महेन्द्रगोपालया नेतृत्वय् विराट
लहनान्युज | गुंलागा चौंथी ११३९ (अगष्ट १९ २०१९)
विराट नेपालभाषा साहित्य सम्मेलन गुथि, ख्वपया नीक्वःगु तःमुँज्यापाखें महेन्द्रगोपाल कर्माचार्ययात सर्वसम्मतिं नायः ल्यल ।
अथे हे, चुनावं ल्यःपिं १०म्ह दुजःपिन्त उगु हे दिनस जूगु ज्यासना पुचःया न्हापांगु मुँज्यापाखें न्वकुलिइ कृष्णलाल गोजा, छ्याञ्जेय् पुष्पलाल तिमिला, दांभरिइ रामगोपाल चगुठी, ल्यू छ्याञ्जेय् नविनप्रकाश श्रेष्ठयात ल्यःगु दुसा दुजलय् सुलोचना सैंजु, विजेन्द्र वीर कर्माचार्य, बाबुकाजी सुवाल, बालकृष्ण प्रधान, योगी स्यस्यः व दिनेश कक्षपतियात ल्यःगु दु ।
पदेन दुजःकथं पुलांम्ह नायः कृष्णभक्त बोडेयात च्वनादीगु दु ।स्वदँया नितिं न्हूगु ज्यासना पुचः ल्ययेत नरेन्द्रभक्त हाडा, तुईलालश्रेष्ठ व राम सिख्वःया निर्वाचन कमिटी दय्कूगु खः ।
थिमिइ जूगु विराटया नीक्वःगु तःमुँज्याया उलेज्या वरिष्ठ कवि डा. योगेन्द्र प्रधानं यानादीगु खः । गुथिया नायः कृष्णभक्त बोडेया सभाध्यक्षताय् जूगु न्हापांगु सत्रय् गुथिया न्वकू हिरण्यप्रताप सांगामिं लसकुस यानादीगु खःसा छ्याञ्जे बाबुकाजी श्रेष्ठं सांगठनिक प्रतिवेदन व दांभरिं प्रदीप शाक्यं आर्थिक प्रतिवेदन न्ह्यब्वयादीगु खः ।
झ्वलय् पुलांम्ह नायः त्रिरत्न शाक्यं न्हूगु ज्यासना पुचःया सकलदुजःपिन्त भिंतुना देछानादीगु खः ।
न्हूगु ज्यासना पुचपाखें न्हूम्ह नायः कर्माचार्यं न्हापानिसें यानावयाच्वंगु ज्याझ्वःया नापनापं गुथि छेँ दनेगु, नेपालभाषा स्यनेगु ज्याय् ग्वाहालि याय्त ‘विराट अनलाइन ब्वनेकुथि’ न्ह्याकेगु, भाषा साहित्य विकासया नितिं मंकाः धारणा दय्केत सहलह ज्याझ्वः याय्गुलिसेंया प्रतिबद्धता प्वंकादीगु दु ।
ज्याझ्वलय् गुथिया मदुम्ह संस्थापक दुजः रत्नगोपाल सैंजुया नामं नेपालभाषा स्नातकोत्तर तगिमय् दक्कलय् अप्वः ल्याः हया ताःलाम्हेसित सिरपाःबीगु नितिं वय्कःया म्ह्याय् सुलोचना सैजूं छगू लख तका दां अक्षयकोषया नितिं तय्गु घोषणा यानादिल ।
