Display Style:
Column Style
किपुलिइ न्ह्यम्ह विशिष्ट ब्यक्तिपिन्त हनीगु
नृपेन्द्रलाल श्रेष्ठ | गुंलागा तृतिया ११३९ (अगष्ट १८ २०१९)
उस्ताद गोविन्द किपू फाउण्डेशनं थीथी विधाय् विशेष योगदान यानादीपिं न्ह्यम्ह ब्यक्तित्वपिन्त छगू हे दबुलिइ हनीगु जूगु दु ।
थ्व हे वइगु भाद्र ६ गते शुक्रवाः कुन्हु सनिलया ४ बजे किपूया कुतिसाः त्वालय् फाउण्डेशनं छगू ज्याझ्वःयासें अथे हनेत्यंगु खः । ख्यालि जुजु मदनकृष्ण श्रेष्ठया मूपाहांसुइ जुइगु उगु हना ज्याझ्वलय् नापं थीथी कलाकारपिन्सं सांस्कृतिक ब्वज्या नं यानादी धाःगु दु ।
उगु ज्याझ्वलय् थनि स्वंगु दशक न्ह्यःनिसें गितार बादक जुया देशय् नापं विदेशय् तकं थःगु प्रतिभा न्ह्यब्वया वयादीम्ह सुल्तान अफ स्ट्रीङ येँया अनिल शाही, नेवाः बाजाया गुरु जुयादीम्ह यलया हरिलाल श्रेष्ठ, पत्रकारिता ख्यःपाखें समाजय् हिउपाःया नितिं ज्वःमदुगु योगदान यानादीम्ह किपूया पत्रकार श्रीकृष्ण महर्जन, कलाकार पल्पसा डंगोल, सुरेन्द्र मानन्धर व विनय महर्जनयात हनेज्या यायेत्यंगु खः ।
ज्याझ्वलय् कुतिसाः त्वाःया ज्याथः ज्याथीपिन्त हनेज्या नाप नापं सांस्कृतिक ब्वज्या नं जुइ जुइ धकाः उस्ताद गोविन्द किपू फाउण्डेशनया नायः दिलिप किपू महर्जनं जानकारी बियादीगु दु । ज्याझ्वलय् प्रदेश नम्बर ३ या सांसद पुकार महर्जन नं पाहां कथं सहभागी जुयादी धाःगु दु ।
दिक्तेल समाजया गुक्वःगु दँमुँज्या
लहनान्युज | गुंलागा तृतिया ११३९ (अगष्ट १८ २०१९)
येँय् दिक्तेल समाजया गुक्वःगु दँमुँज्या झःझः धायेक क्वचाःगु दृु ।
उगु ज्याझ्वलय् नवराज सैंजु नायः, ढाकम कुमार श्रेष्ठ न्वकू, रोशन कुमार बजिमय मूछ्याञ्जे, मणिराम सैंजु दांभरिं ल्यःगु दुसा दुजःत पुलांपिंहे सर्वसमतिं ल्यःगु खः ।
ज्याझ्वलय् समाजया दुजः ऋषि राजभण्डारी नेपाल सरकारया सचिव तगिमय् दुतिंगुलिं वय्कःयात हने ज्या याःगु खः ।
ब्वनेगु लागि व जागिर नयेगु झ्वलय् दिक्तेल खोटाङवासीत बसाई सराई जुयाः यें बसोबास यानाच्वंपिसं थःपिनिगु संस्कृति म्वाका तयेगु नितिं लाखे प्याखं ल्हुइका क्यंगु खः ।
बुखँ–किपा ः अमिर मैया रञ्जित
लोकसेवा विज्ञापन विरुद्ध प्रदर्शनय् प्रहरी नाप झडप
लहनान्युज | गुंलागा द्धितिया ११३९ (अगष्ट १७ २०१९)
लोकसेवा विज्ञापन विरुद्ध प्रदर्शनय् थौं प्रहरी नाप झडप जुगु दु ।
‘आरक्षण बचाऔँ आन्दोलन’ या नामं भृकुटीमण्डपपाखें थौं शनिवाः न्हिनय् पिहा वःगु जुलुस पुतलीसडक थ्यंगु इलय् प्रहरीनाप अथे झडप जुगु खः ।
उगुु झडपय् नेपाल आदिवासी जनजाति महासंघया अध्यक्ष जगत बराम लगायत आधा दर्जन प्रदर्शनकारी घाइते जुगु दु । प्रहरीं दर्जन स्वया अप्वो प्रदर्शनकारीसभासद कौसर साह ,नेपाल
मगर संघ प्रदेस समिती प्र.नं. ३ नेवास्ताम्सालिङ्ग मगरातको मुख्यसचिव सबिन पुलामी मगर ‘साकार’ ,दलमर्दन कामी ,नेपाल मगर संघ जिल्ला समन्वय समिती उपाध्यक्ष रघु थापामगर ,अर्जुन सेर्मा,तेज बहादुर केरुङ्ग ,याम लिम्बु ,ङावङ ,सोनाम सेर्पा ,पुर्खा्जित राई ,मिङमार लामा,सुरज राई,गणेश तिरुवायात नियन्त्रण्य् काःगु दु ।
आन्दोलनकारीं न्हिन सिया ४ बजे लाठी जुलुस पिकाइगु ज्याझ्वः तया तःगु खः । यक्को प्रहरी परिचादित यासे प्रदर्शनकारी तयेगु कथि भृकुटीमण्डप हे लाका काःगु खः ।
लोकसेवा आयोगया विज्ञापन रद्द यायेगु माग यासे आदिवासी जनजाति, मधेसी, महिला, मुस्लिम, उत्पीडित क्षेत्र, आपंगता जुपिं मनू तयेसं चरणबद्ध आन्दोलन याना वया च्वंगु खः ।
इमिसं संविधान व कानुनय् दुगु आरक्षणया व्यवस्था विपरीत लोकसेवाया विज्ञापन पिकागु धका उगु बिज्ञापन खारेजीया माग याना वयाच्वंगु खः ।
राजा शाक्यया ‘लंगुर बुर्जा’ बाखं सफू पिहावल
लहनान्युज | गुंलागा द्धितिया ११३९ (अगष्ट १७ २०१९)
नेपालभाषया लोकंह्वाःम्ह वरिष्ठ बाखं च्वमि राजा शाक्यया ‘लंगुर बुर्जा’ बाखं मुना सफू पितब्वज्या जूगु दु ।
बाखं च्वमिया छ्यपिं डा. जलाश्री बाज्राचार्य, ई. शिरिष रत्न बज्राचार्य, लूजः शाक्यपिसं मंकाः कथं उगु सफूया चिखिफ्यनादीगु खः ।
उगु सफूया बारे समालोचक पूर्णकाजी ताम्राकारं समालोचना यानादिसे थुगु सफुतिइ च्वमिं उपमा क्वातुक्क छ्यला तःगुलिं बाखं भाषा नं काव्यमय जुयाच्वंगु खँ कनादिल । च्वमि शाक्य मेपिं बाखंच्वमिपिं स्वयाः बिस्कं खनेदुगुलिं वय्कःया बाखं नं मेमेपिनिगु बाखं स्वयाः बिस्कंहे खनेदुगु नं कनादिगु खः ।
हिसिलिना शाक्यं न्ह्याकादीगु उगु ज्याझ्वलय् हनेबहःपिं नेवाः न्ह्यलूवा साहित्यकारपिं समाज सेवी हितकर वीर सिंह कंसाकार, जनकवि दुर्गालाल श्रेष्ठ, उपन्यासकार मथुरा सायमि, मल्ल के. सुन्दर लगायत आपालं भाषाह्यःमि, पत्रकारपिनिगु ब्वतिदुगु खः ।
पिदंगु सफूया प्रकाशक कुतःपिकाकः कजि बिमल ताम्राकारं सफुतिइ दुथ्यानाच्वंगु बाखंया बारे जानकारी बिसें लसकुस न्वचू तयादीगु खः ।
बुखँ – नेवाः सूचना केन्द्र
किपा – राजेन्द्र रञ्जित
बुद्ध विहार दयेकेत महानगरं १ करोड ग्वाहालि
नृपेन्द्रलाल श्रेष्ठ | गुंलागा द्धितिया ११३९ (अगष्ट १७ २०१९)
येँं महानगरपालिकां भृकुटीमण्डपय् च्वंगु बुद्ध विहार पुनःनिर्माणया लागि १ करोड अनुदान बिउगु दु ।
विहार पुनःनिर्माण ज्या न्ह्याना च्वंगुलि महानगरपालिकाें उगु ध्यवा उपलब्ध याउगस खः । थीथी दातापिनिगु ग्वाहालि वःगु दँय् निसे विहारया पुनःनिर्माण ज्या जुया च्वंगु खः ।
थौं शनिवाः येँ छगु ज्याझ्वः दथुइ येँ महानगरपालिकाया मेयर विद्यासुन्दर शाक्यं पुनःनिर्माण समितिया अध्यक्ष भिक्षु कौण्डन्य व कोषाध्यक्ष सुरेश महर्जनयात छगु करोडया चेक हस्तान्तरण यानादिगु खः ।
महानगरपालिकाया नगरसभां उगु बिहारयात ग्वाहालि यायेगु प्रस्ताव पारित याये धुकुगु खः । थौंया ज्याझ्वलय् संघीय सांसद्, प्रदेश सांसद् सहित उपप्रमुख हरिप्रभा खड्गी व वडाअध्यक्ष पिनिगु न उपस्थिति दुगु खः ।
उगु ज्याझ्वलय् महानगरपालिकाया मेयर शाक्यं महानगरपालिका दुने याये माःगु जीर्ण, क्षतिग्रस्त सतः, फल्चाः, बहाःबही, विहार, महाविहार, क्वापाद्यः, गुथि छेँ, आँगः छेँ लगायत दक्का हे सम्पदा थःगु कार्यकालय् पुनःनिर्माण यायेगु प्रतिबद्धता क्यनादिगु दु ।
महानगरपालिकां सम्पदा संरक्षण ज्याझ्वः प्राथमिकताय् तयाःगु दु , थुगु ज्या सफल व प्रभावकारी दयेकेत सकसिगु ग्वाहालि माः , छिकपिनिगु ग्वाहालि बिना मेयर याकचा चाहे जःसा बिचाः याःथे ज्या जुइ मखु धका न धयादिगु खः ।
प्रमुख शाक्यं संस्कृति, सम्पदा संरक्षणय् ध्यवा मदु धका चिन्ता कायेम्वाः योजना हया महानगरपालिकाय् जानकारी बिल धाःसा माःगु ग्वाहालि यायेगु बचं न बियादिगु दु ।
उगु ज्याझ्वलय् येँं क्षेत्र नं ६ या सांसद् नाप पूर्वमन्त्री भिमसेनदास प्रधान, प्रदेश सभा सदस्य जीवन डंगोलं विहार निर्माणया लागि माःगु ग्वाहालि यायेगु प्रतिबद्धता प्वकादिगु खः ।
दँच्छि न्ह्यः विहारया शिलान्यास समारोहय् प्रतिबद्धता व्यक्त यानादिगु कथं अनुरुप महानगरपालिकापाखे यथोचित ग्वाहालि यानादिगु खँय् लसता प्वकादिसे समितिया अध्यक्ष भिक्षु कौण्डन्य महास्थविरं थुगु ज्यां बुद्ध धर्मया विकास व विस्तार, ध्यान व ज्ञानपाखे सर्वसाधारण लाभान्वित यायेगु ज्याय् प्रभावकारी जुइगु विश्वास प्वकादिगु खः । महानगरपालिकाया ग्वाहालिं ढुक्क जुया विहार पुनःनिर्माण यायेगु धका विश्वास न भिक्षु कौण्डन्यं बियादिगु खः ।
समितिया सहसचिव सुनील महर्जनं कर्मचारी संयन्त्रं सुस्त गति, प्रक्रियामुखी प्रवृति व संघ व प्रदेशया कानून अभावया बाबजुद न सरोकारवालापिन्स संवेदनशीलतायात थुइका महानगरपालिकां उच्च मनोबलया साथ संस्कृति व सम्पदा क्षेत्रय् छु उदाहरणीय ज्या याउगु धका थःगु बिचाः तयादिगु खः ।
