Display Style:
Column Style
नेवाः अधिकार सिरपा लःल्हात
लहनान्युज | चिल्लागा चौथी ११३९ (मार्च २४ २०१९)
नेवाः तय्गु हकहित, अधिकारया नितिं संघर्ष याना वयाच्वंपिं व्यक्ति वा संस्थायात हःपा बिइगु तातुना डा. महेश मान श्रेष्ठ व मोहिनी श्रेष्ठया इहिपाया न्यय्दँ पुवंगु लसतांनिसें नीस्वंगु नेवाः अधिकार सिरपाः लःल्हागु दु ।
उगु ज्याझ्वलय् मूपाहाँ शताब्दी पुरुष सत्यमोहन जोशीं वरिष्ठ समालोचक नापं बामपन्थी बुद्धिजीवि प्रा. माणिक लाल श्रेष्ठ, जनकवि दुर्गालाल श्रेष्ठ व नेवाः न्ह्यलुवाः मानव अधिकारवादी मल्ल के. सुन्दर स्वम्हेसित हना दीगु खःसा डा. महेश मान श्रेष्ठं हनापौ व मोहिनी श्रेष्ठं नगद न्यय्द्वः तका दां लल्हानादीगु खः ।
सिरपा समितिया नायः डा महेशमान श्रेष्ठया सभापतित्वय् जुगु उगु ज्याझ्वय् समितिया दुजः डा. मनोजमान श्रेष्ठं सुभाय् देछानादिगु खः । गुथिया दुजः सुजिव बज्राचार्यं न्ह्याकादीगु खःसा ज्याझ्वलय् विशेष पाहाँ कथं येँ महानगर पालिकाया मेयर बिद्या सु्न्दर शाक्य झायादीगु खः ।
ज्याझ्वलय् लसकुस न्वचु सिरपाः गुथिया दुजः प्रेमशान्ति तुलाधर बियादिगु खःसा नेवाः अधिकार सिरपा पाखें सम्मानित जुयादिपिनीगु म्हसिका सिरपा समितिया मेम्ह दुजः शाक्य सुरेनं न्हयब्वयादिगु खः ।
बुखँ – राजेन्द्र रञ्जित
रञ्जना लिपिया वर्णमाला पितब्वज्या
लहनान्युज | चिल्लागा चौथी ११३९ (मार्च २४ २०१९)
नेपाल लिपि गुथिया ग्वसालय् रञ्जना लिपि बर्णमाला पित ब्वज्या जुगु दु ।
छगु ज्याझ्वः दथुइ मूपाहाँ येँ महानगरपालिकाया मेयर विद्यासुन्दर शाक्यं उगु रञ्जना लिपि बर्णमाला पितब्वज्या यानादीगु खः ।
आधुनिक युगया प्रविधियात नालाकासे हलिं न्यंक लिपि छ्यलाः ई कथं न्ह्याःवनेमाःगु वाःचायेका नेपाल लिपि गुथिं विकास याःगु रञ्जना लिपिया आय्प्स विशेष पाहाँ जनकवि दुर्गालाल श्रेष्ठं सार्वजनिक यानादीगु खः ।
नेपाल लिपि गुथिया न्वकू अनिल स्थापितं लसकुस न्वचु तयादीगु ज्याझ््वलय् वय्कलं रञ्जना लिपिया विकास न्यागूगु शताब्दी पाखे हे जूगु जानकारी बियादीगु खः ।
नुगः खँ तयेगु झ्वलय् नेवाः न्ह्यलुवाः मल्ल के सुन्दरं रञ्जना लिपिया महत्व व उकिया थपूया नितिं त्वाः बहाः, बही ननी चुकथें जाःगु थाय्बाय्या नां व पसलय् साइनबोर्ड रञ्जना लिपिं तल धाःसा ताः ई तक्क उगु लिपिया संरक्षण व संवद्र्धन जुइ गुथें जाःगु थीथी पक्षयात कयाः थःगु धारणा तयादीगु खः ।
उगु ज्याझ्वः निरञ्जन रत्नया सधाधक्ष्यताय् जुगु खःसा महेशमान लँजुवालं न्ह्याकादीगु खः ।
बुखँ÷किपा – राजेन्द्र रञ्जित
प्रधान सम्पादक पुष्कारलाल श्रेष्ठया स्वास्थ्य गम्भिर
लहनान्युज | चिल्लागा पारु ११३९ (मार्च २१ २०१९)
कामना न्युज पब्लिकेसनया प्रधान सम्पादक पुष्कारलाल श्रेष्ठ यलया भैंसेपाटी च्वंगु नेपाल मेडिसिटी अस्पतालया सघन उपचार कक्षय् छु दिं न्ह्य निसे वास याका वयाच्वगु खः ।
वःगु प्यला न्ह्यः न्हासय् समास्या वया बयोधाय् न्हासयु व ब्लुक्रसय् जँलास्येय् पत्थरीया शल्यक्रिया याःगु खः । जँलास्येय् पत्थरीया शल्यक्रिया लिपा वयकःया स्वास्थ्य थीथी समस्या वःगु खः । स्वास्थ्य थीथी समस्या कारणं थापाथली च्वंगु नर्भिक इन्टरनेसनल अस्पतालय् वासः याकेत भर्ना जुयादीगु खः ।
नर्भिक अस्पतालय् छु दिं वासः याका चिकित्सकपिनिगु सल्लाह कथं वयकःयात Guillain-Barré syndrome (GBS) virus यो संक्रमण जुगु आशंकां थप उपचारया निम्ति नर्भिकं भारतया हरियाणा च्वंगु मेदान्त अस्पताल रिफर याःगु खः । मेदान्त अस्पतालय् करिब निलाया उपचार लिपा उगु भाइरसया संक्रमणपाखें मुक्त यासे छेँय् लित हःगु खः ।
येँय् हयेधुंकाः छुं ई नर्भिक अस्पतालय् हे तयाः वासः याःगु लिसें फिजियोथेरापी लिसेंया विधिपाखें वासः याःगु खःसा स्वास्थ्य अवस्था सामान्य जुयावःगु स्थितिइ छेँय् हे तयाः फिजियोथेरापी लिसेंया विधिं वासः यायेफइगु चिकित्सकपिनिगु परामर्श कथं भैंसेपाटीइ च्वंगु निवासय् तःगु खः ।
थथे प्रधानसम्पादक श्रेष्ठया नियमित वासः यायेगु प्रक्रिया न्ह्यानाच्वंगु इलय् हाकनं वय्कःयात तच्वकं स्वास्थ्य समस्या खने दये धुंकाः आइतवाःनिसें नेपाल मेडिसिटी अस्पताल यंकाः सघन उपचार कक्षय् वासः याका वयाच्वंगु खः । वय्कःया नेपाल मेडिसिटी अस्पतालया सघन उपचार कक्षय् वासः याकाःच्वंसां नं वय्कःया स्वास्थ्य स्थिति जटिल व स्थिर अवस्थाय् हे दूगु वासः यायेगुलिं दुथ्याःपिं चिकित्सकपिन्सं जानकारी ब्यूगु दु ।
थ्वहे झ्वलय् श्रेष्ठया स्वास्थ्य स्थितिप्रति संचारकःमि, पासापिं, थःथितिपिं, राजनीतिक व्यक्तित्व, उद्योगी व्यवसायीलिसें फुक्क शुभेच्छुपिन्सं च्यूताः तसें वय्कःया स्वास्थ्य लाभया कामना यानाच्वंगु कामना प्रकाशनं विज्ञप्तिपाखें जानकारी ब्यूगु दु ।
आर्शिवाद, शुभेच्छा व कामनाय हुनिं प्रधान सम्पादक पुष्करलाल श्रेष्ठयाके ल्वय् प्रतिरोधात्मक क्षमता अप्वयाः हाकनं सक्रिय पत्रकारिता यायेगुलि सक्षम जुइगु अपेक्षा कामना प्रकाशनं तःगु दु ।
विसि क्याप्सया झिक्वःगु अभिभावक दिवस
नृपेन्द्रलाल श्रेष्ठ | सिल्लाथ्व द्धादशी ११३९ (मार्च १८ २०१९)
विसि क्याप्स मन्टेश्वरी स्कूलया झिक्वःगु अभिभावक दिवस येँया राष्ट्रिय नाचघरय् जूगु दु ।
स्कूलया निर्देशक राजु महर्जनया सभाध्यक्षताय् न्ह्याःगु उगु ज्याझ्वलय् येँ महानगरपालिकाया महानगरीय सहकारी विभागया प्रमुख सुमन अधिकारी विशेष पाहाँकथं झायादीगु खः ।
ब्वनेकुथिया संयोजक तुलसा ढुंगानां लसकुस यानाः न्ह्याकूगु ज्याझ्वलय् स्कूलया प्रिन्सिपल बिमा महर्जनं सुभाय् देछायादीगु खः ।
स्कूलया ब्वँमिपिन्सं थीथी म्ये, हुलाप्याखंलिसें क्यारिकेचर आदि न्ह्यब्वःगु उगु ज्याझ्वः रुद्र धमलां न्ह्याकादीगु खः ।
समीतपाखें तल वल्र्ड रेकर्ड
लहनान्युज | सिल्लाथ्व द्धादशी ११३९ (मार्च १८ २०१९)
गुरुकुल पब्लिक स्कूलया समीत तिमिल्सिनां छगू मिनेटय् सच्छिम्ह स्वयां अप्वः मनूतय्त घय्पुयाः वल्र्ड रेकर्ड तःगु दु ।
येँया तारकेश्वर नगरपालिका, नेपालटारय् च्वंगु गुरुकुल पब्लिक स्कूलया च्यागू तगिमय् ब्वनाच्वंमह १४दँ दुम्ह तिमिल्सिनां छगू मिनेटया दुने ११३म्ह मनूतय्त घय्पूगु खः ।
पुलांम्ह रक्षामन्त्री भीमसेनदास प्रधान मूपाहाँलिसें तारकेश्वर नगरपालिकाया प्रमुखया विशेष पाहाँकथं झायादीगु उगु ज्याझ्वलय् तिमिल्सिनां उगु रेकर्ड तय्त ताःलाःगु खः । थ्व स्वयां न्ह्यः
अमेरिकाया जसोन राइटरं सन् २०१७ अक्टोबलय् ८६म्हेसित घय्पुयाः तःगु वल्र्ड रेकर्डयात समीतं त्वाःथःगु दु ।
ज्याझ्वलय् समीतया सफलताया नितिं विद्यालय परिवार, वय्कःया अभिभावकलिसें विशिष्ट पाहाँपिन्सं भिन्तुना देछासें देय् व ब्वनेकुथिया प्रतिष्ठा थकाय्गु नितिं महत्वपूर्ण योगदान ब्यूगुलिं लसता प्वंकूगु दु ।
