Display Style:
Column Style
लुँया भाः थौं झींन्यासः थहा वन
लहनान्युज | गुंलाथ्व सप्तमी ११३९ (अगष्ट ७ २०१९)
लुँया भाः थहा वनेगु क्रम थौं न न्ह्या वना च्वंगु दु । थौं लुँ छगु तोलाय् झींन्यासः थहा वःगु दु ।
थौं बुधवाः बजारय् लुँ छगु तोलाया ६९ द्धः व न्यासः थ्यंगु नेपाल सुनचाँदी व्यवसायी महासंघं धाःगु दु । लुँया भाः आतक हे दकलय् अप्वोगु खः ।
अन्तर्राष्ट्रिय बजारय् लुँया भाः छगु औँसया २७ डलर थिके जुगु खः । म्हिगः मंगलवाः छगु औँसय् झीप्यसः ५९ डलरय् कारोबार जुगु खः सा थौं बुधवाः छगु औँसया भाः झीप्यसः व ८६ डलर थ्यंगु खः ।
भारत व पाकिस्तान दथुइ तनाव जुया भारतीय ध्यवा कमजोर जुया डलर मजबुत जुगुनि लुँया भाः थहा वःगु खः ।
यात्रु ठगेयापिं ट्याक्सी चालकत कारबाही
लहनान्युज | गुंलाथ्व सप्तमी ११३९ (अगष्ट ७ २०१९)
ट्राफिक प्रहरीं थीथीे बहाना दयेका स्वनिगलय् यात्रु तयेत ठगे याउगु द्धपनय् १२ द्धः व ७४९ गः ट्याक्सी चालक तयेत कारबाही याउगु दु ।
महानगरीय ट्राफिक प्रहरी महाशाखां आर्थिक वर्ष ०७५–७६ य् कानून विपरीत ज्या याउग, मिटरय् वने माने मजुगु, मिटर स्यकुगु, भाडाय् यःयःथे याउगु, अप्वो भाडा कया ट्याक्सी चले याइपि चालक तयेत कारबाही याउगु दु ।
महाशाखां आव ०७४ व ७५ य् ८ द्धः व १२० गः ट्याक्सी चालकयात कारबाही याउगु खः ।
मिटरय् वने माने मुउगु, ट्याक्सीया मिटर स्यकेगु व स्यंगु मिटर इलय् मदेकुगु पि ट्याक्सी चालकयात न्यासः निसे द्धःछि तक जरिवाना याउगु दु ।
महाशाखां अप्वो भाडा काइपि ट्याक्सी चालक तयेत कारबाहीया न्हिः ३० निसे ५० ट्राफिक प्रहरी उपत्यकाय् थी थी थासय् खते याना तःगु दु ।
३४ जिल्लाय् ४२ पालिकाया ४७ पद खाली
लहनान्युज | गुंलाथ्व सप्तमी ११३९ (अगष्ट ७ २०१९)
नेपाःया ३४ जिल्लाय् ४२ पालिकाया ४७ पद खाली जुयाच्वंगु दु ।
सुनसरीया धरान उपमहानगरपालिकाया प्रमुख तारा सुब्बा, सङ्खुवासभा मकालु गाउँपालिकाया अध्यक्ष खङ्गबहादुर कटुवाल, महोत्तरी पिपरा गाउँपालिकाका अध्यक्ष विनोद चौधरी, हुम्लाया खार्पुनाथ गाउँपालिकाया उपाध्यक्ष सिन्धु हमाल शाही, फागुनन्द गाउँपालिकाया अध्यक्ष अमरकुमार नेम्बाङ मदुगु नि अन खाली जुयाच्वंगु खः ।
अथेहे दकलय् अप्वो महोत्तरीइ प्यम्ह पदाधिकारी, प्यूठान, पाँचथर व बैतडीइ स्वम्ह पदाधिकारी खाली जुयाच्वंगु खः ।
बैतडीया पुर्चौडी नगरपालिका, सुर्नया गाउँपालिका व दोगडाकेदार गाउँपालिका वडाध्यक्ष न खाली जुयाच्वंगु खः । पाँचधरया फिदिम नगरपालिका, फागुनन्द गाउँपालिका, हिलिहाड गाउँपालिकाय् छम्ह छम्ह खाली जुया च्वंगु खः । प्यूठानया ऐरावती गाउँपालिका वडा नं १ व २ नाप प्यूठान नगरपालिकाय् छम्ह वडाध्यक्ष खाली जुया च्वंगु खः ।
अथेहे चितवनया खैरहनी नगरपालिका वडा नं ४ व वडा नं ५, सङ्खुवासभाया खाँदबारी नगरपालिका व मकालु गाउँपालिकाय् न वडाध्यक्ष खाली जुया च्वंगु खः ।
ग्यासया भाः कुहावल, डिजेल व पेट्रोलया भाः थहा वन
लहनान्युज | गुंलाथ्व षष्ठी ११३९ (अगष्ट ६ २०१९)
नेपाल आयल निगमं पेट्रोल व डिजेल नाप मचिकंया भाः थकाःगु दु । पेट्रोल लिटरय् छतका, डिजेल व मचिकंलय् ५० पैसा थकाःगु दु ।
अथेहे एलपी ग्यासया भाः प्रतिसिलिन्डर २५ तका क्वः काःगु दु । आः पेट्रोलया भाः प्रतिलिटर १०९ थ्यःगु दु सा डिजेल व मचिकं ९७ तक थ्यंगु दु ।
भाः कुहा वया आः छगः सिलिन्डर ग्यासया लागि द्धःछि व ३७५ तका थ्यंगु दु ।
हवाई ईन्धनया हकय् न्हापाया भाः यथावत हे तःगु दु ।
महर्जनया सफू व सिडि पिदन
लहनान्युज | गुंलाथ्व षष्ठी ११३९ (अगष्ट ६ २०१९)
रीता महर्जनया खसभाषाया सिडि म्येचाः व नेपालभाषाया चिनाखँया सफूया छगु ज्याझ्वः दथुइ पितब्वज्या जूगु दु ।
श्री सीता स्मृति संगीत, किपूया ग्वसालय् जुगु उगु ज्याझ्वलय् गोल्डेनभ्वाइस अफ नेपाल प्रेमध्वज प्रधान, साहित्यकार नारायणदेवी श्रेष्ठ, वरिष्ठ च्वमि यादव खरेल, शम्भुजीत बास्कोटा, किरण खरेल, सितारवादक तारावीरसिंह तुलाधर, कवि रत्नसमशेर थापापिसं कवयित्री महर्जनं च्वायदिगु सफू ‘अन्तः मनया मौन अभिव्यक्ति’ व ‘यो साँझको मधुरिम छटामा’ सिडि म्येचाः मंकाः कथं पितब्वज्या यानादिगु खः ।
अथेहे उगु ज्याझ्वलय् बरिष्ठ म्येहालामि योगेश वैद्यया च्वसा पिदंगुगु थ्व म्येचाः वय्कःया बुदिंया लसताय् पितब्वज्या यागु खः । थुगु सिडिइ गुपु म्ये दुथ्यानाच्वंगु दु ।
उगु ज्याझ्वलय् सितारवादन तारावीर सिंह तुलाधरयात अभिनन्दन नं याःगु खः ।
अथेहे उगु ज्याझ्वलय् म्येहालामि योगेश वैद्यया बुदिं हना ज्याझ्वः नं जूगु खः । थःगु जीवनय् थथे तःजिगु व अजूचायापुगु बुदिं जूगुलिं अतिकं लसतां जाःगु खँ बैद्यं कनादिल ।
इन्द्र मालीं महर्जनया चिनाखँय् भाव, मतिनाया पीडा नापं सुमधुर संगीतया समिश्रण दुगु खँ धयादिल । स्वास्थ्यया हुनिं वय्कः ज्याझ्वलय् ब्वतिकयादी मफुगुलिं वय्कलं भिडिओ सन्देश मार्फत उगु खँ न्ह्यब्वयादीगु खः ।
कवयित्री प्रतिसरा सायमिं न्ह्याकादीगु उगु ज्याझ्वलय् कवि रत्न समशेर थापाया सभाधक्ष्यताय् जुगु खःसा निता रञ्जितं सुभाय् न्वचू तयादीगु खः ।
