Display Style:
Column Style
उदयपुरय् मस्जिदय् विराटनगरया कोरोना विषेश अस्पतालय्
लहनान्युज | चौलागा एकादशी ११४०, बैसाख ६ शञ्चवाः
उदयपुरय् मस्जिदय् १२ म्ह मनू तयके खने दुगु कोरोना संक्रमितपिन्त विराटनगरया कोरोना विषेश अस्पतालय् तःगु दु ।
शुक्रवाः संक्रमण खने दुपि छम्ह नेपाली व ११ म्ह भारतीय नागरिकयात प्रदेश १ सरकारं निर्माण याःगु कोरोना विषेश अस्पतालय् भर्ना याःगु दु । संक्रमित नेपाली मोरङयाम्ह खः ।
संक्रमित नाप वःपि ४ म्ह मोरङया टाडीइ क्वारेन्टाइनय् तया तःगु दु । उदयपुरया मस्जिदय् च्वना च्वपि १६ म्ह मध्ये १२ म्हसित कोरोना संक्रमण पोजेटिभ खने दुगु खः । उदयपुरया स्थानीय प्रशासनं १६ म्हसित विराटनगर छ्वःगु खः ।
कोशी अस्पताल विराटनगरं स्वयगुे कथं कोरोना विषेश अस्पताल दयेकुगु खः ।
लकडाउन इलय् स्वनिग मत्वःत्येत इनाप : उपत्यका नगरपालिका फोरम
नृपेन्द्रलाल श्रेष्ठ | चौलागा एकादशी ११४०, बैसाख ५ शुक्रवाः
लकडाउनया बाबजुद न न्यासि वना छेँय् लिहा वःगु थीथी बुखँ पिहा वयेवः उपत्यका नगरपालिका फोरमं स्वनिगः मत्वतेत इनाप याःगु दु ।
थौं उपत्यकाया १८ गु नगरपालिकाया मेयर, उप– मेयरपि दुथ्याःगु नगरपालिका फोरमं संघीय मामिला तथा सामान्य प्रशासन मन्त्री हृदेयश त्रिपाठी व उद्योग, बाणिज्य तथा आपूर्ति मन्त्री लेखराज भट्टनाप सहलह यायेगु झ्वलय् अथे इनाप यानादिगु खः ।
‘कोरोना संक्रमण रोकथाम व नियन्त्रणया लागि सरकारं लकडाउन जारी याःगु खः । जिमिसं थ्व लकडाउनया पूर्ण समर्थन यानाच्वना,’ नगरपालिका फोरमया अध्यक्ष येँ महानगरपालिकाया मेयर बिद्यासुन्दर शाक्यं हथे धयादिगु खः, ‘लकडाउनया इलय् छगु प्रदेशं मेगु प्रदेश, छगु जिल्लां मेगु जिल्ला व छगु स्थानीय तहपाखे मेगु स्थानीय तहलय् वनेगु प्रतिवन्द जुगु इलय् छिकपि गन ख अनहे सुरक्षित जुया च्वनादिसँ धका धयादिगु दु ।’
प्रमुख शाक्यं स्वनिगलय् च्वपि अतिविपन्न, असाहय व न्हिया न्हिथं ज्या याना नइपि मजदुरतयेत जिमिस नकेगु प्रतिवद्धता प्वका च्वना । ‘आ न्हि दर्जनौँ मनूत नये मखगुलि स्वनिगः त्वता वःगु धइगु बुखँ थीथी सञ्चार माध्ययमपाखे सम्पे्रषित जुयाच्वगु दु ।
उगु बुखँय् जिमिगु ध्यान वःगु दु,’ मेयर शाक्यं धयादिगु दु, ‘नगरपालिका फोरमया अध्यक्ष व येँ महानगरपालिकाया प्रमुखया हैसियतं स्वनिगलय् च्वपिन्त वयकल छिकपिन्त छु न समस्या दु सा स्वनिगलय् च्वपिनिगु दक्को नगरपालिकाया वडा कार्यालयय् स्वापू तयादिसँ राहतको व्यवस्था यायेत जिपि तयार दु, सु न नये मखगु अवस्थाय् टोल फ्री न. ११८० व ११३१ य् जानकारी बिल धाःस जिमिस समाधान यानाबिइ ।’
वयकलं स्वनिगलय् पिनेच्वपिन्त लकडाउनया इलय् स्वनिलय् दुहा मवयेत न इनाप यानादिगु दु । ‘छिकपि गन दु अन हे सुरक्षित जुया च्वनेत न इनाप यानादिगु दु,’ मेयर शाक्यं ‘झी दक्को मिले जुया लकडाउनया पूर्ण पालना याये फत धाःसा कोरोना नियन्त्रण व रोकथाम याये फइ धका धयादिगु दु ।
लकडाउनया इलय् हिदान
नृपेन्द्रलाल श्रेष्ठ | चौलागा एकादशी ११४०, बैसाख ५ शुक्रवाः
लकडाउनया इलय् हि याःगु अभावया ध्यान तया ज्वलेन्स् बचत तथा ऋण सहकारी संस्थां थौं शुक्रवाः गाःबहालय् हिदान ज्याझ्वः याःगु दु ।
उगु ज्याझ्वःयात सोलुसन समाजं ग्वाहालि यागु खः । यल महानगरपालिका– १६ या वडाअध्यक्ष निर्मलरत्न शाक्यं बल्डबैकंया हि तयेगु प्याकेट लल्हासे शुरु जुगु खः ।
थौं सुथसिया ८ः३० निसे १०ः३० बजे तकया इलय् ४० म्हसिया हिदान यानादिगु दु धकाः संस्थाया महासचिव सुविन बज्राचार्य जानकारी बियादिगु दु ।
थज्यागु बिस्कया इलय् थःथःथु थास छु यायेफु उगु ज्या याये माः धका संस्थाया अध्यक्ष किरणभाई बज्रचार्य धयादिगु दु ।
हिदान ज्याझ्वः यायेगु लागि समाजसेवी मोतिशान्ति शाक्य ग्वाहालि यानादिगु खः ।
नेपालय् छक्वल हे १४म्ह कोरोना संक्रमित पिहावल
लहनान्युज | चौलागा एकादशी ११४०, बैसाख ५ शुक्रवाः
नेपालय् छन्हु हे १४ म्ह कोरोना भाइरस (कोभिड(१९) या संक्रमित थपे जुगु दु । उदयपुरय् १२ म्ह व चितवनय् निम्ह नेपालीयात कोरोना संक्रमण पुष्टि जुगु दु ।
थौं शुक्रवाः थपे जुपि मध्ये १२ म्ह उदयपुरयापि खः । उकि मध्ये छु भारतयापि खः । संक्रमित जुपि दक्को मिजंत खः ।
संक्रमित जुपि उदयपुर नगरपालिका ३ य् भुल्कया मस्जिदय् नाप लाप लापि खः । मस्जिदय् न्हुपि मनू खने दयेव स्थानीयपिन्स खबर याना बिःगु खः । स्थानीय प्रशासन व जनप्रतिनिधिपिन्स न्यने कने याःगु इलय् इपि दिल्लीं झीं निम्ह भारतीय नागरिक व मोरङपाखे ४ प्यम्ह नेपाली यात परीक्षण याःगु खः ।
सुरुर्इ यापिड टेष्टय् सकसिगु रिपोर्ट नेगेटिभ वःगु खःसा कोशी अस्पतालय् बिहीवाः सनिलय् याःगु परीक्षणय् ८ म्हसिगु ‘प्रिजम्टिभ पोजेटिभ’ वःगु खः । टेकुइ जनस्वास्थ्य प्रयोगशालाय् परीक्षण याःगु इलय् १२ म्हसित संक्रमण पुष्टि जुगु खः ।
अथेहे थौं निम्ह संक्रमितजुपि चितवनय् पिहावःगु खः । थ्व नाप नेपालय् कोरोना संक्रमित जुपिनिगु ल्याः ३० म्ह थ्यःगु दु ।
नेपालय् कोरोना सङ्क्रमितया १६ म्ह जक खः
लहनान्युज | चौलागा एकादशी ११४०, बैसाख ५ शुक्रवाः
नेपालय् कोरोना भाइरस सङ्क्रमितया ल्याः १६ म्ह जक खः । हल्लाय् लिउने मवनेत सरकार इनाप याःगु दु ।
स्वन्हु लिपा कोरोना भाइरसका न्हुपि खने मदुनि धका स्वास्थ्य मन्त्रालय न धाःगु दु ।
मन्त्रालयया प्रवक्ता डा. विकास देवकोटां नेपालय् आतक सङ्क्रमित जुपिनिगु ल्याः १६ म्ह जक ख धका स्पष्ट यानादिगु दु ।
सङ्क्रमित बढे जुगु धका हल्लाया लिउने मवनेत इनाप याःगु दु ।र्
यापिड टेष्ट किटय् पोजेटिभ खने दुसा उकिगु लिच्वः मान्य मजुइगुलि पीसीआर विधिपाखे वइगुलि लिच्वः जक माने यायेत इनाप यानादिगु दु ।
झींखुम्ह मध्ये छम्ह वास याका छेँय् लिहा वने धुकुगु दु धका न धयादिगु दु ।
येँया टेकु, यलय् पाटन अस्पताल व बाग्लुङय् निम्ह निम्ह वास याका च्वंगुु अथहे धनगढीइ प्यम्ह व वीरगञ्जय् न्याम्ह वास याका च्वंगु दु ।
