Display Style:
Column Style
मध्यपुर स्काउटयात ग्वाहालि
लहनान्युज | ञंलागा चर्तुदशी ११३८ ( अक्टुवर ८ २०१८ )
नेपाल स्काउट, स्थानीय परिषद, मध्यपुर थिमिया छेँ दय्केगु नितिं ई.जी. पाईनियर स्कुलया प्रिन्सिपल विजेन्द्रलाल ध्वँजुं १गू लख ११ द्वः सच्छि झिंछतका दां ग्वाहालि याःगु दु ।
नेपाल स्काउट स्थानीय परिषद मध्यपुरया स्थानीय आयुक्त हरिबहादुर श्रेष्ठयात चेक लःल्हानादिसें प्रिन्सिपल ध्वँजुं नेपाल स्काउट, मध्यपुर थिमि स्थानीय परिषद् नेपालय् हे थःगु छेँ दय्केत ताःलाःगु न्हापांगु परिषद् जूगुलिं स्काउटया विकासय् योगदान बीत थःम्हेस्यां फूकथं ग्वाहालि याय्गु धयादिल ।
ई.जी. पाइनियर स्कुलया स्वर्ण जयन्तिया झ्वलय् याःगु उगु ज्याझ्वलय् स्काउट प्रकाशराज पाण्डेयात नं हंगु खः ।
स्कूलया व्यवस्थापन समितिया नायः सुचित्र सैंजुया सभाध्यक्षताय् जूगु उगु ज्याझ्वलय् ख्वपया पुलांम्ह जिल्ला शिक्षा अधिकारी नैनसिंह धामी मूपाहांकथं झायादीगु खः ।
यलय् गोल्डेन डायमण्ड मेला शुरु
नृपेन्द्रलाल श्रेष्ठ | ञंलागा चर्तुदशी ११३८ ( अक्टुवर ८ २०१८ )
गोल्डेन डायमण्ड एण्ड ज्वेलरींया ग्वसालय् स्वक्वःगु “गोल्डेन डायमण्ड दशैं तिहार मेला” वंगु विहिवाःनिसें न्ह्यःगु दु । उ
गु ज्याझ्वःया उलेज्या यासें नेपाल सुनचाँदी व्यवसायस महत्वपूर्ण योगदान बियादीपिं स्वम्ह ब्यक्तित्वपिं नेपाल सुनचाँदी व्यवसायी महासंघया पुलांम्ह नायः तेजरत्न शाक्य, वंगु ७०दँ निसें सुनचाँदी व्यवसायी संलग्न जुयाच्वनादीम्ह भाइ बज्राचार्य व पृथ्वीमान शाक्ययात हनेगु ज्या जूगु खः ।
वय्कःपिन्त प्रदेश नं ३या सांसद शोभा शाक्यं हनापौ व ज्वेलरीया नायः ज्ञानुराज शाक्यं दोसल्लां न्यय्काः हनादीगु खः ।
न्हू न्हूगु डिजाइनया तिसाज्वलं छगू हे थासं सुपथ भावय् उपलब्ध याकेगु तातुनां उगु मेला यानागु ग्वसाः खलःया नायः ज्ञानुराजा शाक्यं जानकारी बियादीगु खः ।
नेपाल सुनचाँदी व्यवसायी महासंघया न्वकूतकं जुयादीम्ह शाक्यं उगु मेलाय् न्हूगु नापं यइपुस्सेच्वंगु लुँ व हिराया तिसाज्वलं प्रदर्शनीइ तयातःगु खःसा तिसाज्वलं न्याइपिं ग्राहकपिनिगु नितिं निःशुल्क स्वास्थ्य विमाया प्याकेज नं उपलब्ध याकूगु खः ।
यलया मंगलबजाःया हःखाय् न्यान्हुतक न्ह्याःगु उगु मेलाय् नेपाल सरकारया पुलांम्ह मुख्य सचिव तीर्थमान शाक्य, यल महानगरपालिकया उपप्रमुख गीता सत्याल, यल महानगरपालिका वडा नं. १६या नायः निर्मलरत्न शाक्य, ललितपुर सुनचाँदी व्यवसायी संघया नायः किरणभाइ बज्राचार्यपिन्सं थःथःगु नुगःखँ तयादीगु खः ।
नेपाः चीन मेला न्ह्यानाच्वन
नृपेन्द्रलाल श्रेष्ठ | ञंलागा चर्तुदशी ११३८ ( अक्टुवर ८ २०१८ )
यलया नांजाःगु पाटन दरबार लागाय् वंगु शुक्रवाःनिसें नेपाः चीन मेला शुरु जूगु दु । अरनिको सांस्कृतिक तथा व्यावसायिक प्रबद्र्धन समाजं नेपाः व चीन दुथइ जनस्तरया स्वापू क्वातुकेगु कथं उगु मेला शुरु जूगु छगू पत्रकार सम्मेलनय् नं जानकारी ब्यूगु खः ।
थुगु मेला ऐतिहासिक ल्वहंहितिया न्ह्यःने व भण्डारखाल बगैंचाय् जुयाच्वंगु दु ।
न्यान्हुयकं न्ह्याइगु थुगु मेलाय् छगु ज्याझ्वः दथुइ पर्यटन मन्त्री प्रदिप ज्ञवाली यानादगिु खः ।
उगु मेलाय् नेपालय् उत्पादन जूगु थीथी हलंज्वलंया प्रबद्र्धनया नापनापं निगू देशया संस्कृति, संगीत, व्यवसायिक ज्ञान व सीपया कालबिल जुइकथंया सच्छिगू स्टल दुगु खःसा उकि मध्ये चीनय् उत्पादन जूगु हलंज्वलंया ख्वीगू स्टल दु ।
अथे हे उगु मेलाय् लाखेप्याखं, चचा प्याखं नं न्ह्यब्वय्गु ज्या जुयाच्वंगु दु । मेलाय् लुभुया टेक्सटायल उद्योगपाखें उत्पादन जुयाच्वंगु ढाका व सुतिपाखें दय्कातःगु यइपुस्सेच्वंगु थीथी डिजाइनया फेशन शोतकं जुयाच्वंगु दु ।
न्यान्हुतक न्ह्याइगु थुगु मेलाय् निगूलख स्वयां अप्वः मनूतसें अवलोकन याइगु समाजया दावी दु ।
रंजना लिपिया कार्यशाला गोष्ठी
लहनान्युज | ञंलागा त्रयोदशी ११३८ ( अक्टुवर ७ २०१८ )
नेपाल लिपि गुथि व येँ महानगरपालिकाया मंकाः ग्वसालय् पाटन क्याम्पसया सभाकक्षय् रंजना लिपि कार्यशाला गोष्ठी जुगु दु । उगु गोष्ठीया प्रदेश नम्बर ३ येँया क्षेत्र न. ८ क या सांसद राजेश शाक्यं उलेज्या यानादिगु खः ।
उगु गोष्ठीइ प्राध्यापक काशीनाथ तमोटं रंजना लिपिया ऐतिहासिक पक्षयात कया कार्यपत्र पेश यानादीगु खःसा उगु कार्यपत्रय् इतिहासकार डा. नयनाथ पौडेलं टिप्पणी यानादीगु खः ।
गुथिया प्राज्ञ शरद कसाः नं रंजना लिपाया आकारया विषयस कार्यपत्र न्ह्यब्वयादीगु खःसा उगु कार्यपत्रयात कया सह–प्राध्यापक डा. मिलनरत्न शाक्यं टिप्पणी यानादीगु खः ।
अथेहे मेगु स्वंगूगु कार्यपत्र रंजना लिपाया म्हसीका नेपालभाषा केन्द्रीय शिक्षण विभागया प्रमुख डा. ओमकारेश्वर श्रेष्ठं न्ह्यब्वयादीगु खःसा प्रा.डा. निर्मलमान तुलाधरं टिप्पणी यानादीगु खः ।
उगु गोष्ठीइ लिपांगु कार्यपत्र केन्द्रीय विभागया उप–प्राध्यापक राजनलाल जोशीं रंजना लिपिया सांस्कृतिक पक्षयात कयाः कार्यपत्र न्ह्यब्वयादीगु खःसा उगु कार्यपत्रय् प्रा.डा. चन्दा बज्राचार्यं टिप्पणी यानादीगु खः ।
ज्याझ्वलय् नेवाः न्ह्यलुवाः मल्ल के. सुन्दरं, गुथिया नायः निरञ्जनरत्न ताम्राकार व न्वकू अनिल स्थापितं थःथःगु तयादीगु खः ।
ज्याझ्वः गुथिया छ्याञ्जे पवित्र कसाः नं न्ह्याकादीगु खःसा दुजः निर्मल बज्राचार्यं संयोजन यानादीगु खः ।
ज्या व पृथुप्याख्यान सफू पितब्वज्या
लहनान्युज | ञंलागा त्रयोदशी ११३८ ( अक्टुवर ७ २०१८ )
न्यःदँ न्ह्यः पन्ना प्रसाद जोशीयागु जीवनीया लिधंसाय् शताब्दी पुरुष सत्यमोहन जोशीं च्वया तःगु ‘बैद्य बाः’ दबू प्याखं क्यनेगु व रंजित मल्लं च्वया तःगु ‘पृथुप्याख्यान’ नांयागु सफू सुनीता राजभण्डारीं अभिलेख सम्पादन यागु शताब्दी पुरुष सत्यमोहन जोशीया छेँय् छगु ज्याझ्वःयासें पितब्वज्या जूगु दु ।
लोक साहित्य परिषदया ग्वसालय् राजित बहादुर श्रेष्ठं व्यवस्थापनया नापनापं न्ह्याकादीगु उगु ज्याझ्वलय् परिषदया नायः प्रा. प्रेम शान्ति तुलाधरं लसकुस न्वचु तयादीगु खःसा डा. ज्योति तुलाधरं सफू पितब्वज्या यानादीगु खः ।
दबू प्याखनय् ब्वतिकयादीपिं प्याखंम्वःत व ग्वाहालि यानादीपिन्त शताब्दी पुरुष जोशीं सुभाय् पौ लःल्हानादीगु खः ।
बुखँ नेवाः सूचना केन्द्र किपाः राजेन्द्र रञ्जित
