नेपाल आदिवासी जनजाति पत्रकार महासंघ (फोनिज) या च्याक्वःगु महाधिवेशन लुम्बिनीइ जुइत्यःगु दु। थ्व हे वइगु चैत २९ व ३० गते लुम्बिनीइ महाधिवेशन जुइ धका फोनिजया महासचिव समीर बलामीं जानकारी ब्यूगु दु।

फोनिजया महासचिव बलामी ब्यूगु जानकारी कथं थ्व हे चैत ८ गते बुटवलय् च्वंगु फोनिजया बैठकं व्यवस्थापन उप समिति गठन याना महाधिवेशनया ज्या न्ह्याये धुकुगु दु सा अथेहे थीथी थ्व स्वया न्ह्यः न उपसमिति दयका ज्या जुयाच्वंगु दु धका धयादीगु दु।

थ्व स्वया न्ह्यः फोनिजया महाधिवेसन चैत्र १५, १६ व १७ गते यायेगु निर्णय जुगुलि माध्यमिक शिक्षा परीक्षा (एसएइई) लगायत कारणं लिछ्याय् माःगु धका महासचिव बलामी धयादीगु दु।फोनिजया जिल्ला, प्रदेश व प्रवास समिति दु।

ओली प्रधानमन्त्री केपी शर्मा ओलीें नेपाली जनतां ल्वाना हयागु अधिकार लाका कायेगु तागत सूयाके दइमखु धका धयादीगु दु।

राष्ट्रिय युवा सङ्घ नेपालं थौ बुधवाः याःगु ज्याझ्वलय् राष्ट्रिय स्वयंसेवक भेला, २०८१ यात सम्बोधन यानादीसे नेकपा (एमाले) या अध्यक्ष तक जुयादीम्ह प्रधानमन्त्री ओलीं युवा सङ्घयाके गुलि तागत दु धइगु आँकलन मयागु खःसा देश व जनताया निति माल धाःसा थुकिइ प्रतिगामी शक्तियात गुलिमा उलि हे मुकाविला यायेत सक्षम जुया क्यनेमाः धका धयादीगु दु ।

“झीसं ल्वाना हयागु अधिकार लाका कायेगु तागत सु याके मदु। थुगु खँ अझ बालाक्क ल्याय्म्ह तयेस धाये फु। देशय् सुयात मछिकेगु स्वत धाःसा युवा सङ्घं धुँ थे झम्टे यायेफु”, धका प्रधानमन्त्री ओलीं धयादीगु खः।

उगु ज्याझ्वलय् एमालेया महासचिव शङ्कर पोखरेल, जनसङ्गठन समन्वय संयन्त्रया प्रमुख भानुभक्त ढकाल, पोलिटब्यूरो सदस्य महेश बस्नेत, सङ्घया अध्यक्ष क्षितिज थेबेपिन्स राष्ट्रिय स्वयंसेवक अभियान मदय्क मगाः धका धयादीगु खः।

चीनया तिब्बत क्षेत्रय् थौ बुधवाः बहनि भुखाय् ब्बःगु दु।

राष्ट्रिय भूकम्प मापन केन्द्रया वरिष्ठ भूकम्पविदया कथं नेपाःया ई ६ बजे जुया २७ मिनेतय् ५.५ म्याग्निच्युडया भुखाय् ब्बःगु खः। नेपाःया उत्तरपूर्वी सीमान नापं सिजाङ स्वशासित क्षेत्रया डिङ्गयी काउन्टी केन्द्र जूया उगु भुखाय् ब्बःगु खः।

उगु भुखाय् नेपालय् तक महसुस जुगु खः।

उपप्रधानमन्त्री नापं अर्थमन्त्री विष्णुप्रसाद पौडेलं लुम्बिनी लागा लगानीया निंतिं महत्त्वपूर्ण गन्तव्य जूगु धयादीगु दु।

वय्कलं सरकारं लगानी अनुकूल वातावरण दयेका वनीगु न्ह्यथनादिसें लुम्बिनीइ लगानी यायेत निजी ख्यःया उद्योगी–व्यवसायी तय्त इनाप यानादिल। कान्तिपुर मिडिया ग्रुपं रुपन्देहीइ थौं ग्वसाः ग्वःगु छगू ज्याझ्वलय् अर्थमन्त्री पौडेलं लुम्बिनी तसकं चकंगु व निजी ख्यःया निंतिं महत्त्वपूर्ण थाय् जूगुलिं सम्भावनायात व्यवसायलिसे स्वाकेत इनाप यानादिल।

उपप्रधानमन्त्री पौडेलं लुम्बिनीपाखें नेपाःया मुक्कं अर्थतन्त्रयात च्वन्ह्याके फइगु सामथ्र्य दूगुलिं सहरी पूर्वाधार, शिक्षा, स्वास्थ्य, औद्योगिक ख्यःया ल्याखं लुम्बिनीयात दकसिबे न्हाप लाकेगु कथं जुयाच्वंगु कुतलय् सकसिगु नं साथ आवश्यक जू धकाः धयादिल।

“बुद्ध बूगु थाय् लुम्बिनीलिसें थन बुद्धया जीवन नापं स्वना च्वंगु महत्त्वपूर्ण सम्पदालिसें थन बाबांलाःगु व स्तरीय होटल नं दु”, वय्कलं धयादिल, “बर्दिया राष्ट्रिय निकुञ्ज नं लुम्बिनी प्रदेशय् हे लाः। लुम्बिनीइ यक्व सम्भावना व स्रोत दु।”उपप्रधान नापं अर्थमन्त्री पौडेलं गौतमबुद्ध अन्तरराष्ट्रिय विमानस्थल याकनं पूर्ण क्षमताय् सञ्चालन जुइ धकाः धयादिल।

वय्कलं निर्माणाधीन नारायणगढ–बुटवल सतकब्व बर्खान्ह्यः हे छखेरं सवारी सञ्चालन याये जिइ कथं क्वचाइगु जानकारी नं बियादिल।

वीरजञ्ज महानगरं न्ह्यानाच्वंगु आर्थिक दँया च्यालाया दुने ३३ क्वति ५६ लख ८७ द्वः न्हय्सः व ७८ तका राजस्व संकलन याःगु दु।

महानगरं वंगु आवया थ्व हे अवधिया तुलनाय् ३६ लख ४१ द्वः १६१ तका अप्वो राजस्व संकलन याःगु खः। वीरजञ्ज महानगरपालिका राजस्व महाशाखा प्रमुख मनोज कर्णं न्ह्याना च्वंगु आवया च्यालाय् वार्षिक आज्जुया थ्यं मथ्यं ४० प्रतिशतया ल्याखय् राजस्व संकलन जुइ धुंकूगु धयादिल।

महानगरं सम्पत्ति करपाखें १२ क्वति ११ लख ९७ द्वः व पूर्वाधार सेवाया कर उपभोगय् लगे जुइगु करपाखें छगू क्वति ६८ लख दां मुंकूगु खः।