प्रधानमन्त्रीइ एमाले अध्यक्ष लिसे संसदीय दलया नेता केपी शर्मा ओलीया नियुक्ति विरुद्ध तःगु रिट सर्वोच्च अदालतं खारेज याना बिउगु दु।

राष्ट्रपति रामचन्द्र पौडेलं संविधानया धारा ७६ या उपधारा २ कथं प्रधानमन्त्रीइ ओलीयात नियुक्ति याउगु असंवैधानिक खः धका धासे रिट दायर याउगु खः।

प्रधानमन्त्रीइ ओलीयात मखुगु धारा छ्यला नियुक्त याउगु धासे वःगु साउन १४ गते स्वंगू रिट दर्ता याउगु खः। उगु रिटया सुनुवाइया लागि प्रधानन्यायाधीश विश्वम्भर प्रसाद श्रेष्ठया अध्यक्षताय् न्यायाधीशपि प्रकाशमान सिंह राउत, सपना मल्ल प्रधान, कुमार रेग्मी व प्रकाशकुमार ढुंगाना सदस्य दुगु संवैधानिक इजलास गठन याउगु खः।

उगु इजलासं निवेदकतय्गु दाबी मगागु धासे खारेज याना बिउगु खः। निवेदकतय्स उपधारा २ अन्तर्गत नियुक्त प्रधानमन्त्रीं विश्वासया मत काये मफुगुलि उगु उपधारा कथं प्रधानमन्त्री नियुक्त जुइ फइ मखु व उपधारा ३ आकर्षित जुइ धका दाबी याउगु खः।

गोदावरी नगरपालिकाया मेयर गजेन्द्र महर्जन व उपमेयर मुना अधिकारीें भ्रष्टाचार मुद्दाय् सफाइ बिउगु दु।

अख्तियार दुरुपयोग अनुसन्धान आयोगं यलया लेले व नल्लुख ल्ह्वं व फि उत्खनन यायेगु झ्वलय् भ्रष्टाचार याउगु धासे विशेष अदालतय् भ्रष्टाचार मुद्दा दायर याउगु खः।

गु मुद्दाया सुनुवाइ यायेगु झ्वलय् विशेष अदालतं मेयर महर्जन व उपमेयर अधिकारीयात सफाइ बिउगु दु।

प्रधानमन्त्री केपी शर्मा ओलीं ल्याय्म्ह तयेगु निति  उद्यमशीलताया विकास यायेगु सरकारं योजना दयकाच्वनागु दु धका धयादीगु खः।

अन्तर्राष्ट्रिय युवा दिवसया लसताय् जुगु नेपाल युवा सम्मेलन, २०२४ या समापन ज्याझ्वलय् सम्बोधन यानादीसे प्रधानमन्त्री ओलीं यक्को ज्या बिइगु निति चि चि धःगु उद्यमशीलताया ज्याझ्वः नाप विकासया लहर हयेगु ज्या सरकारं बिचाः यानाच्वनागु दु धका जानकारी बियादीगु खः।

देशय् रोजगारी व अवसर बाला मजुगुलि ल्याय्म्हत विदेशय् वनाच्वंगुलि च्युता प्वकादीसे प्रधानमन्त्री ओलीं वइगु दिं नेपालय् ज्येष्ठ नागरिक तय्गु जक देय् जुइगुलि ल्याय्म्ह तय्स थुकिइ बिचाः यायेमाः धका धयादीगु खः। वयकलं थौकन्ह्यः जनसङ्ख्यावृद्धि दर न म्हो जुगु सुन्दर भविष्यया निति नीदँय् इहिपायाना याकन मचा दय्केत इनाप यानादीगु खः।

सम्मेलनं पारित याउगु घोषणापत्रया विषय सरकारं कार्यान्वयनया निति प्रतिबद्धता प्वकादिसे प्रधानमन्त्री ओलीं वइगु असोजय् जुइगु राष्ट्रसङ्घया महासभाय् सम्बोधन यायेगु इलय् घोषणापत्रया विषय प्रतिबिम्बित यायेगु जुइ धका धयादीगु खः।

प्रधानमन्त्री केपी शर्मा ओलीनाप बेलायती राजदूत रब फेनं नापलागु दु।

मंगलवाः सिंहदरवारस्थित प्रधानमन्त्री लिसे मन्त्रिपरिषदया कार्यालय बेलायती राजदूत फेनं प्रधानमन्त्री ओलीयात नापलागु दु। नापलायेगु झ्वलय् निगु देय् दथुइ सम्बन्ध व हितया विषय सहलह जुगु खः।प्रधानमन्त्री ओलीं नेपालय् सङ्घीयता व लोकतन्त्रयात बालाकेगु यकेगुलि सरकारं विकास, नीति निर्माण याना ल्याय्म्हपिन्त दुथ्याकेगु व दिगो विकासया लक्ष्य प्राप्तिइ प्राथमिकताय् तयागु दु धका धयादीगु खः।

प्रधानमन्त्री ओलीं सरकार ‘समृद्ध नेपाल, सुखी नेपाली’ या राष्ट्रिय आकाक्षा पूरा यायेगुलि वनाच्वनागु दु धका धयादीगु खः। वयकलं निगु दल दथुइ जुगु सहकार्यय् सरकार गठन जुगुलि थुगु सरकारं जनताया अपेक्षा पूरा यायेत सरकार प्रतिबद्ध दु धका धयादीगु खः।

राजदूत फेनं सङ्क्रमणकालीन न्यायसम्बन्धी कानुनया विषययात राजनीतिक सहमतिया आधारय् क्वछिउगुलि लसता प्वकादीसे नेपाःया विकास, सुशासन व सङ्घीयताया सबलीकरणलगायत ख्यलय् बेलायत सरकारं यानावया च्वनागु ग्वहालि याना वयाच्वनिइ धका धयादीगु खः। वयकलं नेपाली व्यवसायीपिन्त बेलायतय् वस्तु निर्यातय् ग्वहालि यायेगुलि प्रतिबद्धता प्वकादिल।

लुँया भाः आःतक हे दकलये अप्पो थिके जुगु दु।लुँ तोलां थौ निद्धः व सच्छि अप्पो थहावःगु दु। लुँ तोलां थौ निद्धः व सच्छि थहावना १ लाख ५० हजार ८ तक थ्यःगु दु धका नेपाल सुनचाँदी व्यवसायी महासङ्घं धाःगु दु।

अथे हे, वहः तोलां न नीन्यातका थहावःगु दु। वहः तोलां नीन्यातका थहावना थौ १ हजार ७ सय ४० तका न कारोवार जुगु दु धका महासङ्घं धाःगु दु।