राष्ट्रपति रामचन्द्र पौडेलं ऐतिहासिक कालनिसें हे नेपाःमितय्गु धार्मिक, सांस्कृतिक व सामाजिक जीवनलिसे सतिनाच्वंगुु नेपाल संवत् झीगु देय्या राष्ट्रिय व मौलिक संवत् खः धकाः धयादीगु दु।

समाज सुधारक शङ्खधर साख्वाःयात राष्ट्रिय विभूति घोषणा याःगु २५ दँ दूगु लसताय् थौँ राष्ट्रपति भवनय् जूगु ज्याझ्वलय् वय्कलं थःगु देय्या नामं नीस्वंगु हलिमय् छगू जक संवत् जूगुलिं नेपाल संवत् सकल नेपाःमितय्गु गौरवमय राष्ट्रिय सम्पदा नं खः धकाः धयादिगु दु।

राष्ट्रपति पौडेलं धयादिल, “बहुभाषिक, बहुसांस्कृतिक, बहुजातीय देय् नेपाःया सांस्कृतिक विविधतायात छवाः यायेत नेपाल संवत्या तःधंगू भूमिका दु धइगु जिं तायेका।” राष्ट्रपति पौडेलं शङ्खधर साख्वालं थःम्हेसिनं कमे याःगु सम्पत्तियात समाजय् च्वंपिं गरीब व उत्पीडित समुदायया हितय् छ्यःगु हलिमय् हे छगू दसू जूगु ज्या धासें उगु लोककल्याणया ज्या उगु ईया नेपाःया समाजया निंतिं थःथवय् हे छगू क्रान्तिकारी पलाः जूगु धयादिल।

बागमती प्रदेशया पर्यटन संस्कृति मन्त्री विमल ठकुरीया अध्यक्षताय् जूगु ज्याझ्वलय् बागमती प्रदेश प्रमुख दीपकप्रसाद देवकोटा, मुख्यमन्त्री बहादुरसिंह लामा, प्रदेश सरकारया मन्त्रीत च्वनादीगु खः। उगु झ्वलय् येँ महानगरपालिका, यल महानगरपालिका व मध्यपुर ठिमी नगरपालिकायात हंगु खः। (रासस) 

प्रधानमन्त्री केपी शर्मा ओलीविरुद्ध भ्रामक प्रचार याःगु द्धपनय् ज्वनातम्ह दुर्गा प्रसाईयात वीर अस्पतालय् यकूगु दु।

थौ सुथय् वयागु छेँय् ख्पपय् प्रसाईयात प्रहरीं स्वास्थ्य जाँचया निति अस्पताल यकूगु दु। वयात प्रधानमन्त्री नाप एमाले अध्यक्ष ओली लगायतविरुद्ध भ्रामक प्रचार याःगु द्धपं दु।

प्रसाईं न कीर्ति भ्वँ दयका प्रधानमन्त्री ओलीयात गम्भीर द्धपं ब्युगु खः।

भूमि व्यवस्था, सहकारी नापं गरिबी निवारणमन्त्री बलराम अधिकारीं थौँ भद्रकालीइ च्वंगु राष्ट्रिय समाचार समिति (रासस) केन्द्रीय ज्याकुथिया अवलोकन यानादिगु दु।

अवलोकन याये धुंकाः मन्त्री अधिकारीं नापी नापं मालपोत व भूमि व्यवस्थालिसे स्वाःगु पुलांगु ऐन, कानुन, कार्यविधि व क्वपुलांगु मानसिकताया हुनिं ज्या यायेत थाकुइगु धासें पुलांगु व मिलेमजूगु ऐन, नियम, कानुन हिलेगु व भिंकेगु प्रक्रियाय् आः मन्त्रालय दूगु खँ कनादिल।

धरान, भैरहवा, वीरगन्ज, जनकपुर, कृष्णनगर थेंजाःगु महत्वपूर्ण सहर व व्यापारिक केन्द्रलिसें देय्न्यंकं हे जग्गाया स्वामित्व, भोगचलन व छ्यलेगु बारे विवाद नापं झंझंत दूगु धासें वय्कलं भूमि व्यवस्थालिसे स्वापू दुगु समस्या ज्यंकेत माःगु नीतिगत व्यवस्थानापं सुशासनयात प्राथमिकता बिइगु कथं मन्त्रालयं ज्या यानाच्वंगु धयादिल।

उगु झ्वलय् मन्त्री अधिकारीं राससया समाचार सम्पादन शाखाया निरीक्षण यासें समाचार मुंकेगु, सम्पादन नापं सम्प्रेषणया विषयय् न्यनेकने यानादिइगु खः।राससया कार्यकारी अध्यक्ष धर्मेन्द्र झा व महाप्रबन्धक सिद्धराज राईं मन्त्री अधिकारीयात राससय् लसकुस यानादीगु खः।(रासस)

श्री चन्द्रविनायक व श्री भैरवनाथ रथयात पशुपतिनाथ मू देगः लागाय् चाःहिइकूगु दु। चन्द्रविनायकयात पशुपतिनाथया काय् खः धैगु धार्मिक मान्यता नं दु।

थ्व हे मान्यताया आधारय् चन्द्रविनायक जात्रायात पशुपतिनाथ देगः चाहिइकेगु चलन जूगु येँ महानगरपालिका–७ या नायः विमलकुमार होडां धयादीगु दु। चन्द्रविनायकयात अबु अथे धैगु भगवान् पशुपतिनाथया दर्शन याकेधुंकाः पशुपतिपाखें चुच्चेपाटीतकया मू चुकय् चाःहिइकूगु जात्रा समन्वय समितिया दुजः राजु भारतीं न्ह्यथनादिल। थ्व जात्रा पशुपतिनाथपाखें चुच्चेपाटीतक तसकं महत्व बियाः न्यायेकी।

पशुपतिनाथ अमालकोट कचहरीकाद्वारे रामकृष्ण डङ्गोलं कात्तिक शुक्ल पुन्हिकुन्हु शुक्रबाः सुथय् चन्द्रविनायक देगलय् विशेष पुजा यानाः जात्रा न्ह्याकूगु खः। उकुन्हु बहनी देगःया लागाय् मिँ पनेगु ज्या जुल। मिँ च्याकेत पशुपतिनाथ अमालकोट कचहरीं सिँ बिइगु परम्परा दु। मार्गशीर्ष कृष्ण प्रतिपदा कुन्हु निगुलिं रथयात देगः जःखः चाः हिइकाः गङ्गाहिटीइ यंकाः म्वः ल्हुइकूगु खः।

म्वःल्हुइके धुंकाः निगुलिं खःत उकुन्हु बहनी हे चारुमती विहारय् यंकूगु खः। जात्रा थौँ स्वयां थ्यं मथ्यं ३५० दँ पुलां धैगु विश्वास यानातःगु दु। नेपाल संवत् ८०१ य् जुजु भूपालेन्द्र मल्लं थ्व जात्रा न्ह्याकूगु स्थानीयतय् धापू दु। श्री चन्द्रविनायक व भैरवनाथया रथयात्रा कात्तिक शुक्ल पुन्हि अथे धैगु शुक्रबाःनिसें न्ह्याःगु खः।

जात्राया न्हापांगु न्हिकुन्हु ‘मरःजा नकेगु’ कुमार कुमारीया पुजा यानाः विनायकया प्रसाद नकूगु खः। चन्द्रविनायक स्वनिगःया प्यम्ह विनायकमध्ये छम्ह खः। कार्तिक शुक्ल पुन्हि कुन्हु न्ह्याःगु जात्रा मार्गशीर्ष कृष्ण तृतीया कुन्हु अमालकोट कचहरीया द्वारें श्री चन्द्रविनायक व भैरवनाथयात सिन्हः लःल्हायेधुंकाः मार्ग शीर्ष कृष्ण तृतीया कुन्हु क्वचाइगु परम्परा दु।

जात्रा बांलाक क्वचाःगुलिं लसताय् चाबहिल लागाय् सिन्हःजात्रा यायेगु परम्परा दयाच्वंगु न्ह्यथनादिल। जात्रा कात्तिक शुक्ल पुन्हि कुन्हु चाबहिल लागाय् न्ह्याःगु खः। दँय्दसं कात्तिक शुक्ल पुन्हिनिसें मार्ग शीर्ष कृष्ण तृतीया तक प्यन्हु पशुपति, जयबागेश्वरी, मित्रपार्क, चाबहिल व चुच्चेपाटी लागाय् चन्द्रविनायक जात्रा तसकं लसतां न्यायेकीगु परम्परा भूपालेन्द्र मल्लया इलंनिसें जुयावयाच्वंगु खँ न्ह्यथनादिल।(रासस)

पूर्वसभामुख दमननाथ ढुङ्गानायात पशुपतिनाथया आर्यघाटय् राजकीय सम्मान बिया अन्त्येष्टि याःगु दु। उगु झ्वलय् नेपाली सेनाया छगू टुकडीं मदुम्ह ढुङ्गानाया हनाबनाय् सलामी लःल्हाःगु खः।

ढुङ्गानाया सीम्हय् वय्कःया काय् पिंसं मि तःगु खः। पूर्वसभामुख ढुङ्गानाया हनाबनाय् १७ क्वः तोपया सलामीतकं ब्यूगु खः। स्येँया ल्वचं छुं ईनिसें वासः याकाच्वंम्ह पूर्वसभामुख ढुङ्गाना पुलांगु बानेश्वरया फ्रन्टलाइन अस्पतालय् ८३ दँया वैसय् म्हिगः आइतबाः न्हिनय् मदुगु खः।

पूर्वसभामुख ढुङ्गानायात बिचाः हायेकेत सभामुख देवराज घिमिरे, राष्ट्रियसभाया नायः नारायणप्रसाद दाहाल, प्रधानन्यायाधीश प्रकाशमानसिंह राउत, उपसभामुख इन्दिरा राना, पूर्वप्रधानमन्त्री नाप नेपाली कांग्रेसया सभापति शेरबहादुर देउवा, उपप्रधानमन्त्री, मन्त्रीपि, थीथी राजनीतिक दलया नेता नापं कार्यकर्तात, सांसदपि नाप सर्वसाधारण आर्यघाटय् वंगु खः।