यलय् थुगुसि मतयाः जात्रा लोककीर्ति महाविहार नकबहिलिं जुइत्यःगुु दु ।

दँय्दसं गुलांगा दुतिया कुन्हु जुइगु मतयाः जात्रा यलया झिगू त्वालं पाः कयाः न्ह्याका वयाच्वंगु कथं थुगुसी नकबहीयात पाः लाःगु दु। न्यकू जात्रा मतयाः संचालन मूल समारोह समिति क्षेत्र नं. १ नकबहिलिं म्हिगः छगू पत्रकार सम्मेलनय यासें जानकारी बिउगु दु।

थ्व हे वइगु भदौ ५ गते बुधवाः सुथसिया ४ बजे नकबहिली मुनाः मतयाः न्ह्याकेगु जानकारी बिउगु खः। झिंप्यसःदँ न्ह्यः लिच्छवि जुजु बालार्चन देवं ज्येष्ठवर्ण महाविहार तंगःबहाः स्थापना याःगु लसताय् मतयाः जात्रा न्ह्याकूगु व थुगु जात्रा निरन्तर रुपं न्ह्याना वयाच्वंगु खँ समितिया महासचिव आशारत्न शाक्यं कनादीगु दु।

मदयेधुंकूपिं थः छेँजःपिनि आत्माशान्ति व निर्वाण कामना यासें मतयाः वनेगु चलन दु । मतयाः वनेबलय् द्यःथाय् पतिकं धुं, धुपाँय्, कपू, ध्यबा, मरिचरि आदि छायेगु चलन दु।

शेयर बजारय् थौ झण्डै ३० अर्ब तका ऐतिहासिक कारोबार जूगु दु। थ्व स्वया न्ह्यः वंगु सोमवाः २७ अर्ब २४ करोड तकाया कारोबार जुगु खःसा थौ २९ अर्ब ९५ करोड तका स्वया अप्पो कारोबार जूगु दु।

६ करोड ८९ लाख ८० हजार कित्ता शेयर २९ अर्ब ९५ करोड ८५ लाख तकाया कारोबार जूगु खः। दकलय् अप्पो हिमालयन रि इन्सुरेन्स कम्पनीया ९१ करोड ३३ लाख तकाया शेयर कारोवार जुगु दु। नेप्सेय् थौ ३ हजार विन्दुइ थ्यःगु दु।

नेप्से थौ ४३ दशमलव शून्य ५ ल्याखं थहावना ३ हजार दशमलव ८१ विन्दइ थ्यःगु दु। न्हिनय् २ बजे शेयर बजाः ३ हजार ३६ विन्दुइ तक थ्यःगु दु। बन्द जुइगु इलय् धासा ३ हजार विन्दइ थ्यःगु खःसा नेप्से थौ स्वदँलिपा दकलय् अप्पो विन्दुइ थ्यःगु खः।

स्वगू कम्पनीया थौ शेयर थौ १० प्रतिशत स्वया अप्पो थहावंगु खः। समग्र बजाः थहावंगु दिं नेपाल फाइनान्सया शेयर धासा १० प्रतिशतले कुहावंगु खः।

नेपाल आयल निगमं पेट्रोल, डिजेल व मचिकंया भाः क्वकाःगु दु। थौ बिहवाः बहनी च्वंगु आयल निगमया संचालक समितिया बैठकं पेट्रोलया भाः लिटरं न्यातका, डिजेल व मचिकं लिटरं स्वतका क्वकाःगु दु।

न्हुगु भाः थौ बिहीवाः चान्ह्यः १२ बजे निसें लागू जुइ। अथेहे चराली, विराटनगर, जनकपुर, अमलेखगंज, भलबारी, नेपालगंज, धनगढी व वीरगंज क्षेत्रय् पेट्रोल लिटर १६२, डिजेल व मचिकं १५२ कायम जुइ।

सुर्खेत व दाङय् पेट्रोल १६४, डिजेल व मचिकं १५४ तका क्वःछ्यूगु दु। स्वनिगः, पोखरा व दीपायलय् पेट्रोल लिटर १६५ व डिजेल व मचिकं लिटरं १५५ क्वःछ्यूगु दु धका निगमं जानकारी ब्यूगु दु।

ओली प्रधानमन्त्री केपी शर्मा ओलीं प्रधानमन्त्री वा उच्च पदया नामय् मखु जनताया नामय् ज्याझ्वः तयेत निर्देशन बिउगु दु।

प्रधानमन्त्री नाप मन्त्रिपरिषदया कार्यालयय् थौ जुगु बैठकय् मन्त्री, सचिव तय्त निर्देशन बिइगु झ्वलय् प्रधानमन्त्री थे जाःगु तधःगु पद स्वया जनताया नामय् ज्याझ्वः तय्त निर्देशन बिउगु दु।

“प्रधानमन्त्रीया नामय् रोजगारी ज्याझ्वः थे जाःगु तधःगु पदया नामय् तल। थ्व हे ज्याझ्वः कथं प्रदेशय् मुख्यमन्त्रीयाना नामय् न ज्याझ्वः तयेगु ज्या जुल। थज्यागु ज्याझ्वः हिला जनताया नामय् रोजगार थे जाःगु ज्याझ्व तय्त निर्देशन बिउगु दु। न्हुगु पहःया ज्याझ्वः यानादीस”, धका वयकलं धयादीगु दु। प्रधानमन्त्री ओलीं किपूलि त्रिभुवन विश्वविद्यालयया क्रिकेट मैदान बालाकेगु निति दक्को ई बिया ज्यायाय्त निर्देशन न बियादीगु दु।

वयकलं पुँजीगत खर्च बेरुजु मजुइगु कथं शतप्रतिशत खर्च यायेत, झीक्वःगु राष्ट्रिय कासायात बालक्क व प्रभावकारी दयकेमाःगु प्रस्ताव हयेत निर्देशन बिउगु दु। बैठकय् वयकलं देशय् खाद्यान्नय् आत्मनिर्भर दयकेगु, बजारय् बालागु नयेगु उपलब्ध जुइगु वातावरण दयकेत व कृषि उपजया निर्यात जुइगु कथं आधार दय्के निर्देशन बियादीगु दु।

“ कानुन गरिबयात क्यना जक जुइ मखु, उमित केन्द्रय् तया विकासया ज्याझ्वः तयेफत धाःसा जक बालाइ”, प्रधानमन्त्री ओलीं धयादीगु दु।

विशेष अदालतय् भ्रष्टाचार मुद्दाया सफाइ बिइवं यलया गोदावरी नगरपालिकाया मेयर गजेन्द्र महर्जन व उपमेयर मुना अधिकारी थौनिसे नगरपालिकाय् ज्याय् लिहावनिइगु जुगु दु।

निला न्ह्यः अख्तियार दुरुपयोग अनुसन्धान आयोगय् भ्रष्टाचारया मुद्दा दर्ता यायेवं मेयर महर्जन व उपमेयर अधिकारी निलम्बनय् लागु खः।

विशेष अदालतं म्हिगः मेयर व उपमेयर नाप १४ म्हेसित भ्रष्टाचार मुद्दाय् सफाइ बिउगु खः। लहनान्युजयात खँ ल्हानदीसे मेयर महर्जनं थौनिसे नगरपालिकाया ज्याय् निरन्तरता बिइगु धका धयादीगु दु।