राष्ट्रपति रामचन्द्र पौडेल न्ह्यःने प्रजातान्त्रिक समाजवादी गणतन्त्र श्रीलङ्काया निंतिं नेपाःया नवनियुक्त आवासीय राजदूत पूर्णबहादुर नेपालीं राष्ट्रपतिया ज्याकुथिइ थौं ग्वसाः ग्वःगु विशेष समारोहय् पद व गोपनीयताया शपथ कयादीगु दु।

उगु झ्वलय् नेपाल सरकारया उच्च पदस्थ अधिकारीतय्गु नं ब्वति दूगु राष्ट्रपति ज्याकुथिं पिकाःगु विज्ञप्तिइ धयातःगु दु।

पुल्चोक इन्जिनियरिङ क्याम्पसया स्ववियुलय् स्वतन्त्र उम्मेदवार स्वयं श्रेष्ठ निर्वाचित जूगु दु। श्रेष्ठं १ हजार १०२ मत हया विजयी जूगु दु धका सहायक क्याम्पस प्रमुख राम एकवाल यादवं धाःगु दु।

श्रेष्ठया प्रतिद्वन्द्वी माओवादी निकट विद्यार्थी संगठनया उम्मेदवार रसिक लम्सालं ७१० मत हःगु खः। स्नातक सिभिल इन्जिनियरिङ अध्ययनयाना च्वम्ह श्रेष्ठ निर्वाचित जूगु खः।

सचिवय् अखिल क्रान्तिकारीया दिवस सापकोटां १०६४ मत हया निर्वाचित जूगु खःसा कोषाध्यक्षय् अनेरास्वियुया अल्बर्ट ढकालं १०४२ मत हया निर्वाचित जूगु खः।

प्रधानमन्त्री नापं काठमाडौँ विश्वविद्यालयया कुलपति केपी शर्मा ओलीया न्ह्यःने उगु विश्वविद्यालयया नवनियुक्त उपकुलपति प्राडा अच्युुतप्रसाद वाग्लें थौं पद नापं गोपनीयताया शपथ कयादीगु दु।

प्रधानमन्त्री नापं मन्त्रिपरिषदया ज्याकुथिइ ग्वसाः ग्वःगु ज्याझ्वलय् उपकुलपति डा वाग्लें शपथ कयादीगु खः। कुलपति ओलीं विश्वविद्यालयया खालिगु उपकुलपति ल्ययेत गठित खोज नापं सिफारिस समितिया सिफारिसया आधारय् डा वाग्लेयात उगु विश्वविद्यालयया ऐन, २०४८ या दफा १३ (४) कथं सोमबाः नियुक्त यानादीगु खः।

प्रधानमन्त्री ओलीं उपकुलपति नियुक्ति यायेत लिबाःगु सन्दर्भयात तकं ध्यान बियाः आः वइगु इलय् सजग जुयाः सम्बन्धित फुक्क पक्षया मंकाः विश्वविद्यालय दयेकेगु कथंया ज्या न्ह्याकेत भिंतुना बियादिल। उगु ज्याझ्वलय् शिक्षा, विज्ञान नापं प्रविधिमन्त्री विद्या भट्टराई, प्रधानमन्त्रीया मुुख्य सल्लाहकार विष्णुप्रसाद रिमाल, मुख्यसचिव एकनारायण अर्याल, शिक्षा मन्त्रालयया सचिव डा दीपक काफ्लेलिसेंया ब्वति दूगु खः।

नवनियुक्त उपकुलपति प्राडा वाग्ले थ्व स्वयां न्ह्यः उगु विश्वविद्यालयया कार्यवाहक उपकुलपति नापं रजिष्ट्रार जुया च्वनादीगु खः।

थनया रत्नाकर महाविहारय् सिजःया पौ तइगु जूगु दु। रत्नाकर महाविहार उपभोक्ता समितिं उगु ऐतिहासिक महाविहारया पौ हिलेत्यंगु खः।

उपभोक्ता समितिया नायः करुणाकर बज्राचार्यया कथं यलय् १६ गू महाविहार दु। रत्नाकर महाविहार ४०० दँ न्ह्यः राजा सिद्धिनरसिंह मल्लं यल लाय्कू लागाया कृष्ण मन्दिरपाखें यल महानगरपालिका–१६ य् तयेहःगु इतिहास दु। वय्कलं धयादिल, “रत्नाकार महाविहार ऐतिहासिक सम्पदा खः।

विसं २०३८ साल न्ह्यःया किपा कथं महाविहाय् जस्ता पाताया पौ खनेदु। व लिपा आँय्पा पौ तःगु खः। आँय्पा पौ पुलां जुजूवनाः याकनं लः ज्वइगु व माकलं अःपुक स्यंकीगु जूगुलिं आः सिजःया पौ तयेत्यनागु दु।” आः २८ लाख ९८ हजार ८७९ तका लाय् नं वइगु वैशाखया दुने ज्या सिधयेकेगु कथं पौ हिलेगु ज्या न्ह्याकूगु दु।

थुकी बागमती प्रदेश, संस्कृति पर्यटन नापं सहकारी मन्त्रालय, पर्यटन विकास आयोजना अन्तर्गत २५ लाख ९६ हजार १५१ तका बजेट दूसा सम्पदा संरक्षणया निंतिं रत्नाकर महाविहार उपभोक्ता समितिं स्वंगू लख निद्वः व ७२७ ध्यबा फ्याःगु दु।

यलया अप्वो यानाः ऐतिहासिक सम्पदाय् दँय् दसं बुंगद्यःया खः सालेगु झ्वलय् खिपः चबुनाः क्षति याइगु व आँय्पाया पौ पुलांगु जुजूंवनाः लः ज्वइगु समस्या फयेमालाच्वंगु रत्नाकार महाविहार संरक्षण समितिया छ्याञ्जे किरण बज्राचार्यं धयादिल। नेवाः तजिलजि कथं गुठी अन्तर्गतया थी थी ज्याझ्वःत महाविहारय् यानावयाच्वंगु दु।

नेवाः समुदायया परम्पराकथं महाविहारय् मनूत नापलायेगु व भ्वय् याइगु याइ।

त्रिभुवन विश्वविद्यालय (त्रिवि) या आङ्गिक व सम्बन्धन कयातःगु क्याम्पसय् स्वतन्त्र विद्यार्थी युनियन (स्ववियु) निर्वाचन न्ह्याःगु दु।

थौं सुथसिया ८ ताः ई निसें ४६ आङ्गिक व निसः व ५० सम्बन्धन कयातःगु क्याम्पसय् निर्वाचन न्ह्याःगु स्ववियु निर्वाचन केन्द्रीय अनुगमन नापं समन्वय समितिया सदस्य सचिव पशुपति अधिकारीं धयादिल। वयकलं अधिकांश क्याम्पसय् मतदान न्ह्याये धुंकूगु धयादिल। वय्कःया कथं मतदान न्हिनसिया ४ ताः ई तक जुइत्यं दु।

मतदान सिधयेवं क्याम्पसय् नीस्वनातःगु निर्वाचन समितिं मतगणना थौं हे सनिलय् निसें जुइगु धाःगु दु। त्रिविं निदँया छक्वः स्ववियु निर्वाचन यानावयाच्वंगु दु। निर्वाचनया निंतिं राजनीतिक दल सतिगु विद्यार्थी सङ्गठनत अनेरास्ववियु, नेपाल विद्यार्थी संघ, अनेरास्ववियु (क्रान्तिकारी), अनेरास्ववियु, स्वतन्त्र विद्यार्थी पुचःलिसें तय्सं ब्वति काःगु दु।

स्ववियु निर्वाचन २०६५ सालनिसें धाःसा नियमित जुइफयाच्वंगु मदु। छक्वलं २०७३ चैत १५ गते निर्वाचन जूगु खः। व लिपा २०७९ चैत ५ गते देय्न्यंकं छुं क्याम्पस बाहेकं निर्वाचन जूगु खः। त्रिविस २०१८–१९ निसें प्रत्यक्ष प्रणालीपाखें निर्वाचन जुया वःगुलिइ २०३० साल तक दँय् दसं व २०३६ सालनिसें निदँया छक्वः निर्वाचन जुयावःगु खः।