अर्यालं मुख्यसचिव पदपाखे राजीनामा ब्यूगु दु। राष्ट्रिय योजना आयोगया मुख्य सचिवसरहया जिम्मेवारी तोके यानातःम्ह डा. वैकुण्ठ अर्यालं थौ पदपाखे राजीनामा ब्यूगु दु धका प्रधानमन्त्री कार्यालयं धाःगु दु।

वंगु कात्तिक १४ गते भ्रष्टाचारया मुद्दाय् अदालतं सफाइ बिउम्ह अर्याल म्हिगः जक राष्ट्रिय योजना आयोगय् हाजिर जूगु खः। तर थौ अर्यालं राजीनामा ब्युगु दु। राजीनामा स्वीकृत यायेगु व मयायेगु धका मन्त्रीपरिषद् न निर्णय याइ।

प्रधानमन्त्री केपी शर्मा ओलीं प्रतिनिधिसभाया मदुम्ह पूर्व सभामुुख दमननाथ ढुुङ्गानायात राष्ट्रिय ध्वाँय् न्यका अन्तिम सम्मान यानादीगु दु।

ढुुङ्गानायात श्रद्धाञ्जली बिइत थौ हे सीम्ह तयातःगु थाय् सानो गौचरणय् वना प्रधानमन्त्री नाप नेकपा (एमाले) या अध्यक्ष ओलीं ध्वाँय् न्यका स्वां देछानादीगु खः।

श्रद्धाञ्जलीसभाय् नेपाली काङ्ग्रेसका सभापति नाप पूर्व प्रधानमन्त्री शेरबहादुर देउवा, पूर्व प्रधानमन्त्री डा बाबुराम भट्टराई, मन्त्रीगण, थीथी पार्टीया नेता कार्यकर्ता व सामाजिक ख्यःया मनूत सहभागी जुगु खः।

प्रधानमन्त्री निवास बालुवाटारय् थौ च्वंगु मन्त्रिपरिषदया बैठकं दमननाथ ढुङ्गानायात राष्ट्रिय सम्मान बिया अन्त्येष्टि यायेगु व थौ सोमवाः सार्वजनिक बिदा बिइगु निर्णय याःगु दु।

सरकारं पूर्वसभामुख ढुङ्गानायात राष्ट्रिय सम्मानया नापं अन्त्येष्टि यायेगु व बिदा बिइगु निर्णय जूगु दु धका सञ्चार लिसे सूचना प्रविधि मन्त्री नाप सरकारया प्रवक्ता पृथ्वी सुब्बा गुरुङं धाःगु दु।

“पूर्वसभामुख ढुङ्गानाया सम्मानय् थौ सार्वजनिक बिदा बिइगु व स्वदेश नापं विदेशस्थित दक्को कार्यालयय् थौ न्हिच्छि राष्ट्रिय ध्वाँय् बच्छि झुके यायेगु निर्णय जूगु दु”, प्रवक्ता गुरुङं धयादीगु दु, “राष्ट्रिय सम्मान व्यवस्थापनया जिम्मेवारी गृह मन्त्रालययात ब्यूगु दु।”

मदुम्ह पूर्वसभामुख दमननाथ ढुंगानाया सीम्ह श्रद्धाञ्जलीया निति सानोगौचनय् तयातःगु दु।

सरकारी उच्च पदस्थ मनूत, राजनीतिक दलया नेतापि सानोगौचरनय् वना श्रद्धाञ्जली ब्यूवंगु दु।

श्रद्धाञ्जली बिइगु निति प्रधानमन्त्री केपी शर्मा ओली, नेपाली कांग्रेसया सभापति शेरबहादुर देउवा, नेकपा माओवादी केन्द्रया अध्यक्ष पुष्पकमल दाहाल प्रचण्ड, नेकपा एकीकृत समाजवादीया अध्यक्ष माधवकुमार नेपालनापं विशिष्ट व्यक्तित्वपिन्स श्रद्धाञ्जली ब्यूवंगु दु।

थौ हे ढुंगानायात राष्ट्रिय सम्मानं पशुपति आर्यघाटय् अन्त्येष्टि याइगु जुगु दु।

राष्ट्रपति रामचन्द्र पौडेलं थीथी प्यंगू देय् या निति राजदूत जूपिन्त पद व गोपनीयताया शपथ काय्कूगु दु।

राष्ट्रपति कार्यालयय् छगु ज्याझ्वः दथुइ रीता धिताल (इस्लामिक गणतन्त्र पाकिस्तान), रमेशचन्द्र पौडल (कतार), प्रा धनप्रसाद पण्डित (इजरायल) व प्राडा कृष्णप्रसाद ओली (जनवादी गणतन्त्र चीन)या निति न्हुपि राजदूततय्त शपथ ग्रहण याकूगु दु धका राष्ट्रपति कार्यालयं धाःगु दु।

उगु ज्याझ्वलय् नेपाः सरकारया उच्चपदस्थ अधिकारीपिनिगु न ब्बति दुगु खः। राष्ट्रपति पौडेलं थीथी खुगु देय्या निति राजदूत नियुक्त जुगु खः। नेपाःया संविधान कथं मन्त्रिपरिषदं सिफारिस डा शैल रुपाखेतीयात जर्मनी, जङ्गबहादुर चौहान रुसी महासङ्घ, चन्द्रकुमार घिमिरेयात संयुक्त अधिराज्य, डा नरेशविक्रम ढकालयात साउदी अरेबियाया निति राजदूत नियुक्त याःगु दु।

अथेहे थाइल्याण्डया नित आवासीय राजदूत धनबहादुर ओलीयात क्याम्बोडिया व गणतन्त्र सिङ्गापुरया निति गैरआवासीय नेपाली राजदूत नियुक्त याःगु दु धका राष्ट्रपति कार्यालयं धाःगु दु।