Display Style:
Column Style
मंकाः खलः यलया सहलह मुँज्या
नृपेन्द्रलाल श्रेष्ठ | चौलागा त्रयोदशी ११३९ ( मे २ २०१९)
‘नेपालभाषा मंकाः खलः यल न्ह्यावनेगु लँपु’ विषयस छगु सहलह ज्याझ्वः जूगु दु ।
उगु ज्याझ्वलय् डा. पुष्प राज राजकर्णिकारं नेपालभाषा मंकाः खलः आ गुकथं न्ह्यावेमाली धइगु कार्यपत्र न्ह्यब्बयादीगु खः ।
उगु कार्यपत्रय् ज्यापु समाज यलया नायः चन्द्र महर्जन, रुप रत्न शाक्य, मांभाय् पुचःया भनायः हिरारत्न शाक्य, लिधंसा पासा पुचःपाखें शरण गोपाल महर्जन, शान्त राज शाक्य, दिपक नरसिंह श्रेष्ठ, वदन शर्मा, भुवनेश्वर जोशी, जुलुम चित्रकार, रामहरि कपाली, केदार श्रेष्ठ, नरेन्द्र श्रेष्ठ, सरिता महर्जन, शिल्भीया राजोपाध्याय, शाक्य सुरेन, विपिन चित्रकार व सुरेश प्रधानपिसं उगु कार्यपत्रयात कया न्ववानादीगु खः ।
३ न. प्रदेश सभाया सांसद ज्ञानेन्द्र शाक्य पाँहा कथं झायादीगु खःसा मंकाः खलः यलया नायः ऋषि प्रसाद श्रेष्ठया सभाधक्ष्यताय् उगु ज्याझ्वः जुगु खः ।
ज्याझ्वः हिरा काजी महर्जनं न्ह्याकादीगु खः ।
संस्थागत मूल्यमान्यता अःखः नेवाः देय् दबू
लहनान्युज | चौलागा द्धादशी ११३९ (मे १ २०१९)
ने.सं. ११३९ चिल्लाथ्व दुतिया व तृतिया कुन्हु सुदूरपश्चिम धनगढीइ नेवाः देय् दबूया प्यक्वःगु केन्द्रीय मुँज्या लिपा विवादया चाकलय् लाःगु दु । विशेष यानाः उगु दबूया दांभरि अञ्जिता
खड्गी व केन्द्रीय दुजः रश्मिला प्रजापतिया जिम्मेवारी हेरफेर याःगु खँयात कयाः थुकथं विवादय् लाःगु खः ।
थुकियात कयाः नेवाः देय् दबूया दांभरि अञ्जिता खड्गीं वंगु चौलाथ्व बुधवाः प्रेस विज्ञप्ति पिथसें दबूया नायः नरेश ताम्रकारलिसे दबुल् आर्थिक अपचलन जुयाच्वंगु व हिसाव किताव पारदर्शी मखुगु खँयात कयाः कचवं जूगुलिं थःम्हेस्यां जिम्मेवारी कयातयागु कार्यभारपाखें चीकेगु ज्या जूगु खःधकाः द्वपं बियादीगु दुसा व हे लिधंसाय् जिल्ला प्रशासन कार्यालयस उजुरी बीधुंकाः ‘कोषाध्यक्षअञ्जिता खड्गीलाई संस्थाको विधानको कुनदफा उपयोग गरी हटाइ केन्द्रीय सदस्य बनाएको हो सो को यथार्थ विवरण’ न्ह्यब्वय्त जिल्ला प्रशासन ज्याकुथिया प्रशासकीय अधिकृत सुजन फागो लिम्बुपाखें देय् दबूयात स्पष्टिकरण न्यनेगु ज्या जूगु दु ।
दांभरि खड्गीयात कार्यभारं चीकूगु खँयात कयाः विवाद जुइवं थ्व सम्बन्धय् दबूया नायः ताम्रकारं मिति २०७४ जेठ १२गते च्वंगु न्हापांगु मुँज्यां याःगु क्वःछिना कथं विधानया दफा १४, उपदफा ४या व्यवस्था कथं नेवाः देय् दबूया कार्यविभाजन याःगुलिइ आः उगु कार्य विभाजन हेरफेर याय्गु सर्वसम्मतं निर्णय जूकथं हे खड्गीयात केन्द्रीय दुजः कथं जक जिम्मेवारी बियागु धयादीगु दु । वय्कःया कथं खड्गी निक्वः तक सचिवालयया मुँज्याय् अनुपस्थित जूगु व उगु मुँज्याय् हिसाव किताव न्ह्यब्वय्गु ज्या मजूगुलिं खड्गी थःगु जिम्मेवारी मकाःगु स्पष्ट जूगुलिं हे थुकथं सर्वसम्मतं निर्णय याःगु खः ।
जिम्मेवारी बहन मयाःगु खःसा न्हापां स्पष्टिकरण काय् माःगु खँयात कयाः न्ह्यसः तःगु इलय् वय्कलं निक्वः तक मुँज्याय् अनुपस्थित जुयाः हिसावकिताव न्ह्यमब्वगुलिं हे नं वय्कः थःगु जिम्मेवारीपाखें लिच्यूगु खः व थुकियात कयाः सर्वसम्मतं निर्णय याःगुलिं नं थुुकी छुं नं विवाद मदुगु धयादिल । तर न्ह्याग्गु हे थःगु तर्क बीगु ज्या याःसां नं मुँज्याय् स्वक्वः तक उपस्थित मजूसा स्पष्टिकरण काय्गु व उकिया नितिं ७न्हु तक म्याद बियाः उकी नं स्पष्टिकरण मब्यूसा जककार्यभारं चीके फइगु व्यवस्था दुगु दांभरि अञ्जिता खड्गीं धयादीगु दु ।
दांभरि खड्गीया कथं नेवाः तय्गु राष्ट्रिय संगठन कथं कयातःगु नेवाः देय् दबुली नायः पाखें यकः तिकथं ज्या यानाच्वंगु खः ।
छु नं संगठनयात ग्वाहालि बीमाःसा उकियात सचिवालयया मुँज्यां अनुमोदन मयाय्कं हे ग्वाहालि याय्गु व उकियात कयाः रेकर्ड तय्गु नितिं पर्याप्त प्रतिवेदन व भ्वंतक नं न्ह्यम ब्वःगु दांभरि खड्गीया द्वपं खः । वय्कलं झिद्वः तका ग्वाहालि याय्गु प्रावधान दुगु खःसा नं उगु ग्वाहालि थः यत्थे छ्यलाच्वंगु धयादीगु दु । गन नं भाषा, लिपि कक्षावा छु नं कथंया ज्याया नितिं ग्वाहालि ब्यूगु खःसा नं उकिया छुं नं रेकर्ड मदुगु व उकियात कयाः वेवास्ता याःगुलिं हे थजाःगु समस्या वःगु खँ धयादिल । अझ थुकियात कयाः सचिवालय मुँज्यापाखें पारित याय्माः धयाबलय् थुकि यात कयाः नायः ताम्रकारं थजाःगु चिचीधंगु खँयात कयाः विवाद याय् मज्यू धइगु आशयं उपेक्षा याना वयाच्वंगु नं धयादिल ।
थजाःगु हे जिम्मेवारी हेरफेरयात कयाः नेवाः देय्् दबूया निर्वाचित केन्द्रीयदुजः रश्मिला प्रजापतिं नं विरोध याःगु दु । प्यक्वःगु केन्द्रीय मुँज्याया निर्णय ६ कथं ‘सचिवालय पुनःगठन गरियो’ धकाः केन्द्रीय दांभरि अञ्जिता खड्गीया थासय् शान्त श्रेष्ठ व सचिवालय दुजः रश्मिला प्रजापतिया थासय् बदन शर्मा राजोपाध्यायया नां तया तःगुलिं नेवाः देय् दबूया खुक्वःगु तःमुँज्यापाखें निर्वाचितजूम्ह केन्द्रीय दुजःया हैसियतं थुकथं जिम्मेवारीया हेरफेर याय् माःगुया कारण छु खः धकाः तकं न्ह्यसः तयादिल, प्रजापतिं । वय्कलं नं दबूया नायः नं याना वयाच्वंगु ज्यायात कयाः असहमति प्वंकूसें देय् दबूया ज्या विधान सम्मत मजूगु विशेष यानाः आर्थिक ग्वाहालि बीधुंकाः सचिवालय् मुँज्याय् पारित याय्त हइगु खँयात कयाः सः थ्वय्कूगुलिं हे जिम्मेवार हेरफेरया मू कारण खःला? धकाः न्ह्यसः छु नादीगु दु ।
थ्व हे झ्वलय् विधानया दफा १४, उपदफा ४ या व्यवस्था कथं पदाधिकारीपिनिगु जिम्मेवारी हेरफेर यानागु धकाः निर्णय याःगु धाःसां नं पदाधिकारीयात स्पष्टिकरण हे मकासें नायःया प्रस्तावय् कार्यविभाजन हेरफेर याय्गु गुलितक पाय्छि खः? थुकियात कयाः महासचिवलिसें फुक्क् केन्द्रीय दुजः पिंन्सं लिसः बीमाःगु खःवा मखु ? मेगु मितिं २०७४ जेठ १२ गते च्वंगु न्हापांगु मुँज्यां केन्द्रीय समिति गठन लिपा नायःया प्रस्तावय् केन्द्रीय समितिया क्वःछिनापाखें निर्वाचित दुजःपाखें महासचिव नियुक्त याय् फइ व कार्यविभाजन केन्द्रीय दुजःपाखें याय् फइ धाःसां नं थ्व पटक पटक याय्फइ, थुकिया कार्यावधि व चीकेमाःगु मनासिव कारणयात कयाः न्ववाना मतःगुलिं थ्व छगू कथं नायःया अधिनायकवाद ज्या जक मजूला धइगु न्ह्यसः नं ब्वलंगु दु ।
थथे जुइ बलय् नायःयात चित्त बुझे मजुइवं हरेक पटक थुकथं स्पष्टिकरण बीगु हे ह्वःताः मब्यूसे कार्यभार हेरफेर याय्गु ज्यां संगठनय् नायःया हैसियत छु खः धइगु स्पष्ट जूगु जक मखु कि थुकिं संगठनयात गजाःगु लिच्वः लाकि धइगु बिचाः याय् माःगु खनेदु । नायः ताम्रकारया भासं धाय्गु खःसा थ्व हेरफेर धइगु ‘प्रधानमन्त्रीं मन्त्रीमण्डलय् मन्त्री तय्गु ज्या खँयात कयाः चित्तबुझे मजूगुलिं ज्यायात कयाः हेरफेर जकयानागु खः ।’ धइगु धापुतिं संगठन दुने अधिनायकवाद दुगु स्पष्ट क्यनाच्वंगु दु ।
नेवाः तय्गु राष्ट्रिय संगठन कथं स्थापित जुयाच्वंगु नेवाः देय् दबुलीवःगु थुगु विवादं यानाः नेवाः संगठनय् जक मखु, नेवाः जातियात कयाः मेमेगु जाति, संगठनं स्वइगु दृष्टिकोण हे पाना वनीगु खनेदु । विशेष यानाःआदिवासी जनजातिया ज्याखँय् वा थःगु पहिचानया नितिं न्ह्यज्याय् माःगु अवस्थाय् तकं नेवाः देय् दबुलिं थःगु उपस्थिति क्यने मफूगु व नेवाःतय् दथुइ थःगु ‘छवि’ स्यना वनाच्वंगु अवस्थाय् नेवाः देय् दबूया थजाःगु प्रबृत्तिं दूरगामी लिच्वः लाकीगु खनेदु ।
पत्रकार जितेन्द्र महर्जनयात त्वःतल
नृपेन्द्रलाल श्रेष्ठ | चौलागा एकादशी ११३९ (अप्रिल ३० २०१९)
पत्रकार तयेगु चौतर्फी दवाव लिपा न्हुग ज्वजलपा वाःपौया प्रकाशक व सम्पादक महर्जनयात थौं त्वःतुगु दु ।
छु दिं न्ह्यः नेवाः पत्रकार राष्ट्रिय दबूया नेतृत्वय् नेपाल पत्रकार महासंघ, नेपाल आदिवासी जनजाति पत्रकार महासंघ, क्रान्तिकारी पत्रकार महासंघ, क्रान्तिकारी पत्रकार संगठन, प्रेस सेन्टर माईतीघर मण्डलाय् घर्ना ज्याझ्वः जुगु खः ।
पत्रकार महर्जनयात रिहाइ लिपा संवाद दवली छगु अभिनन्दन ज्याझ्वः न याःगु खः । उगु ज्याझ्वलय् नेपाल पत्रकार महासंघया जन्मदेव जैसी, नेवाः पत्रकार राष्ट्रिय दबू न्वकु नृपेन्द्रलाल श्रेष्ठ महासचिव सुनिल महर्जन नाप क्रान्तिकारी पत्रकार महासंघ व क्रान्तिकारी पत्रकार संगठनपिनिगु उपस्थिति दुगु खः ।
कन्ह्य सुथय् ७ः०० ताः इलय् नेपाल पत्रकार महासंध बबर महल छगु घर्ना ज्याझ्वः यासे बानेश्वर छगु सभा याइगु ज्याझ्वः न तया तःगु दु ।
पत्रकार महर्जन पत्रकार दबूया येँ जिल्लाया दुजः ।
सत्यमोहन जोशीया सच्छि दँ तःजिक हनिगु
नृपेन्द्रलाल श्रेष्ठ | चौलागा एकादशी ११३९ (अप्रिल ३० २०१९)
वाङमय शताब्दीपुरुष संस्कृतिविद् सत्यमोहन जोशी वैशाख ३० गते ९९ र्दँ पुरा जुया १०० दँय् कुन्हु यल महानगरपालिकां दच्छि यकं थी थी ज्याझ्वः याना जन्म शताब्दी महोत्सव याइगु त्यःगु दु ।
यल महानगरपालिकाया नगर सभां कथं थ्व हे वइगु वैशाख ३० गते निसे २०७७ साल वैशाख ३० गते तक जन्म शताब्दी महोत्सव यायेगु निर्णय याःगु खः ।
सत्यमोहन जोशीया जन्म शताब्दी महोत्सवया नितिं यल महानगरपालिकाया मेयर चिरीबाबु महर्जनया संयोजकत्वय् सच्छि व ११ म्ह दुजः दुगु गठन याःगु खः । उगु समितिइ राष्ट्रियसभाया सांसदपिं, प्रतिनिधिसभाया सांसदपिं, प्रदेशसभाया सांसदपिं, येँै महानगरपालिकाया मेयर छिमेकी नगरपालिकाया मेयरपिनिगु न सहभागिता दइ ।
वाङमय शताब्दीपुरुष सत्यमोहन जोशी जन्म शताब्दी महोत्सव ज्याझ्वःया व्यवस्थापन मूल समिति माघ २५ गते च्वंगु मुज्यां कार्यसम्पादनयात सहज दयेकेत यल महानगरपालिका वडा नं ३ या वडा अध्यक्ष श्रीगोपाल महर्जनया संयोजकत्वय् सत्यमोहन जोशी जन्म शताब्दी महोत्सव कार्यक्रम कार्यसम्पादन समिति गठन याःगु खः ।
वाङमय शताब्दीपुरुष संस्कृतिविद् सत्यमोहन जोशीया जन्म शताब्दी महोत्सवया लसताय् वैशाख ३० गते निसे दछि यकं जुइगु ज्याझुवः थुकथ दु ः–
वाङ्मय शताब्दीपुरुष सत्यमोहन जोशीया शताब्दी महोत्सवया न्हांपागु दिं मंगलबजारनिसे लगनख्यः, जावलाख्यः निसे सांस्कृतिक जन्मोत्सव ¥याली याना बाजं नाप नगर परिक्रमा याना राष्ट्रपतिया मूपाँहासुइ महानगरपालिया ज्याकुथिं विशेष ज्याझवः याइगु ।
बैशाख ३० गते सुथय् हिदान ।
बैशाख ३० गते महानगरपालिका दुने स्थायी बसोवास दुपि १०० दँ पूरा जुपिन्त नागरिक सम्मान ।द्ध बैशाख ३० गते महानगरपालिका स्थानीय सार्वजनिक विदा ।
महानगरपालिकापाखें नेपाल एम्बुलेन्स सेवालिसे सहकार्य
नृपेन्द्रलाल श्रेष्ठ | चौलागा दशमी ११३९ (अप्रिल २९ २०१९)
अस्पताल वनेन्ह्यः स्वास्थ्य सेवाया अभावय् जुइगु मृत्युजन्य क्षति म्हो याय्गु तातुनां येँ महानगरपालिकां नेपाल एम्बुलेन्स सेवालिसे सहकार्य न्ह्याकूगु दु ।
येँया राष्ट्रिय सभागृहस येँ महानगरपालिकाया प्रमुख विद्यासुन्दर शाक्य व नेपाल एम्बुलेन्स सेवाया नायः रञ्जित आचार्यं मंकाः व्यवस्थापनय् एम्बुलेन्स सेवा(–अस्पताल वने न्ह्यः आकस्मिक स्वास्थ्य सेवा) सञ्चालन व व्यवस्थापनया नितिं सम्झौता पतिइ ल्हाःचिं तयाः उगु ज्याया शुरुवात यानादीगु खः ।
सम्झौतालिपा येँय् दुगु ६गः एम्बुलेन्सय् महानगर प्रमुख व उपप्रमुखं ‘महानगरया सहकार्यस न्ह्याःगु एम्बुलेन्स सेवा’ च्वयातःगु स्टिकर तिकाः उगु सहकार्यया सुरु यानादीगु खः ।
थुगु सहकार्यपाखें आः ल्वगितसें एम्बुलेन्स वय्धुंकाः दक्ष जनशक्ति व प्रारम्भिक स्वास्थ्य उपचारया नितिं वासः व उपकरण प्राप्त याइगु जूसा थुकिया नितिं आकस्मिक सेवाया माःगु प्रविधि, वासः व उपकरणलिसेंया एम्बुलेन्सय् आकस्मिक सेवाय् तालिम कयातःपिं दक्ष स्वास्थ्यकःमित परिचालन जुइ ।
अथे हे जनशक्ति व उपकरणलिसेया एम्बुलेन्स विरामीपिन्थाय् थ्यनेवं वासः याय्गु ज्या न्ह्याइ । थथे जुइबलय् छेँ व अस्पतालया दथुइ उपचारया अभावं सीपिं ल्वगिपिनिगु ल्याः म्हो जुइगु विश्वास यानातःगु दु ।
