हलिमय् गोल्डन टेम्पलकथं नांजाःगु हिरण्यवर्ण महाविहार क्वाःबहाःया बज्राचार्य दुजःपिं मुना आःचागुथि चौलागा दशमी खुन्हु जुइत्यंगु दु । थुगु गुथि हिरण्यवर्ण महाविहार बज्राचार्य गुथिपाखें दँय्दसं न्याय्काः वयाच्वंगु खःसा थुगुसी वैशाख १६ गते सोमबार लाः । गुथिपाखें विहारया आःचाःलुइधुंकूपिं बज्राचार्य दुजःपिन्त आचाःगुथिइ ब्वति कायेत इनाप नं याःगु दु ।

थुगुसीया पाःलाःपिं अथःबहाःया बिकेश बज्राचार्य, सरस्वती ननिया निरोज बज्राचार्य, न्याधःया राजनवीर बज्राचार्य, संजिववीर बज्राचार्य, अमितरत्न बज्राचार्य व अथःबहाःया सरोज बज्राचार्य खः ।

सांस्कृतिक महत्वं जाःगु थुगु आःचागुथिया दिनय् सुथय् क्वाःबहाःया गुरु बज्रसत्व न्ह्यःने बज्राचार्यपिं सकलें च्वनाः गुरु मण्डल पूजा याइसा बज्रसत्वया सफू पाठ यानाः बज्राचार्यपिन्त पिण्डपात्र दान नं याइ । न्याखाचुकया गुरुजुपिन्सं बज्रसत्य द्यःथाय् गुह्य पूजा याइगु थुगु दिंया मेगु महत्व खःसा आःचा गुथिया पाःलाःपिन्सं विहारया गुम्बाया अमोघपास लोकेश्वरथाय् नवग्रह मण्डल पुज्याइ । थुगु दिनय् कुमारी पूजा क्वचायेकालि सकल बज्राचार्य दुजःपिन्त समय् बीगु चलन दुसा समय् बजि लिपा सकल बज्राचार्य दुजःपिन्त भ्वय् नकेगु चलन दु ।

भ्वय् क्वचायेवं चचाम्ये हाली गुकी बज्रनिधोरी, अष्टक्षत्रपाल, नमांमि २, धर्मधातु व गजःमुखः चचाम्ये दुथ्याः । चचाम्ये हाले क्वचायेका ल्हाः म्हुतु सिलाः कलं वानाः उगु दिंया ज्या क्वचाइ ।

कन्हे खुन्हु एकादशीया दिनय् गुथि पाःला व बज्राचार्य आःजुपिन्सं चचाम्ये हाला गुह्यादि पूजा याइ गुगु पूजा क्वचायेका आःजुपिन्त समय् बीगु ज्या जुइसा थुगु ज्या क्वचायेका मेगु दँया नितिं पाःकाइपिन्त ताःचाःपाः लःल्हायेगु याइ ।

हिरण्यवर्ण महाविहार क्वाःबहाः नेपाल सम्वत १६५ पाखें ठकुरी जुजु भाष्करदेव वर्मां दयेकूगु विहार खः ।

 

ललितपुर महानगरपालिका, वडा नं. ८ या थीथी महिला समूहया नितिं थीथी ज्याझ्वः बांलाक यायेगु क्षमता विकासया नितिं जूगु १० न्हुया उद्घोषण व वक्तृत्व विकास तालिम क्वचाल । ललितपुर महानगरपालिका वडा नं. ८ या ग्वाहालिइ जय मनोहर महाविहार मिसा पुचः, सुबहाःया ग्वसालय् जूगु थुगु तालिम २०७५ चैत्र २४ आइतबार न्ह्याःगु खः ।

तालिमय् ग्वसाः खलः जय मनोहर महाविहार मिसा पुचःनाप यलमूल मिसा पुचः, यंगुबहाः मिसा पुचः, सरस्वती मां पुचः, सुबहाः मां पुचः, जागृति महिला समूहया मयजुपिंनाप त्वाःया भाजुपिन्सं नं ब्वति कयादीगु खः । २५ म्हेसिनं ब्वति काःगु थुगु तालिमय् पत्रकार व ज्याझ्वः न्ह्याकामि सुरजवीर बज्राचार्यं प्रशिक्षण बियादीगु खः ।

जय मनोहर महाविहार मिसा पुचःया नायः पञ्चमाया शाक्यया नायःसुइ जूगु समापन ज्याझ्वःया मूपाहां लपुमनपा वडा नं. ८ या  वडा अध्यक्ष हेम महर्जनं दसिपौ लःल्हासें थजाःगु तालिम व मेमेगु ज्याझ्वः निरन्तर यायेत इनाप यानादिल । तालिम व ज्याझ्वःया नितिं वडापाखें माःकथंंया ग्वाहालिया नितिं थः सदां तत्पर जुइ धयादिसें तालिमया उपलब्धिं थः उत्साहित जुयागु खँ मूपाहाँ वडा अध्यक्ष महर्जनं कनादिल । समापन समारोहय् विशेष पाहाँकथं वडाया महिला सदस्य लक्ष्मी महर्जन, प्रशिक्षक सुरजवीर बज्राचार्यं नं थःगु नुगःखँ तयादिलसा जय मनोहर महाविहारया दाफा भजन गुरु नेमराज शाक्यं विहारया ऐतिहासिक व सांस्कृतिक महत्वयाबारे कनादिल ।

समारोहय् विहारया थपाआःजु पुण्यराज शाक्य, वडा सदस्य प्रकाश महर्जन, जय मनोहर महाविहार सुधार समितिया अध्यक्ष सिङ्गराज शाक्य नं पाहाँकथं झायादीगु खः ।

तालिमय् ब्वति कयादीम्ह जय मनोहर महाविहार मिसा पुचःया दुजः अनुषा शाक्यं लसकुस यानादीगु थुगु समारोहय् सुभाय् न्वचु तालिमया हे प्रशिक्षार्थी ग्वसाः खलःया सह–सचिव सुनीता शाक्यं बियादीगु खः । समारोहय् तालिमया अनुभव कनेगु झ्वलय् तालिमं लूगु ज्ञानं थःपिन्त आपालं हःपा जूगु न्ह्यथंसें थजाःगु मेमेगु तालिमया नितिं स्थानीय तहपाखें ग्वाहालि दयाच्वनीगु भलसा प्वंकूगु खः । ग्वसाः खलःया सचिव जेविन शाक्यं न्ह्याकादीगु थुगु समारोहय् तालिमय् ब्वति कयादीपिं ज्ञानीशोभा शाक्य, बालकुमारी शाक्य, रमिला बज्राचार्य, शान्ता शाक्य, अष्टरत्न शाक्य, सुमन शाक्य, पूनम महर्जन, अञ्जना शाक्य, लक्ष्मी शाक्यं थःथःगु अनुभव कनादीगु खः ।