Display Style:
Column Style
सुवालया ‘बौद्ध म्येचाः व सफू’ विमोचन
लहनान्युज | बछलाथ्व नवमी ११३९ (मे १३ २०१९)
येँ महानगरपालिका–१२ वडाय् च्वंगु महिला बौद्ध समूहया नायः श्रीमिला सुवालं च्वयादीगु बौद्ध म्येया सीडीचाः ‘शरणागत प्रभु’ व सफू ‘सजिलो बुद्ध पूजा विधि’ छगू ज्याझ्वःया दथुइ विमोचन जूगु दु ।
भिक्षु ज्ञानेन्द्र स्थविरया मूपाहाँकथं बिज्यानादीगु उगु ज्याझ्वलय् समूहया २७क्वःगु वार्षिकोत्सवलिसें २५६३ क्वःगु बुद्ध जयन्तीया लसताय् जूगु विशेष ज्याझ्वलय् मूपाहाँ भिक्षु ज्ञानेन्द्र स्थविर, विशेष पाहाँलिसें येँ महानगरपालिकाया प्रमुख विद्यासुन्दर शाक्य, उप–प्रमुख हरिप्रभा खड्गी श्रेष्ठ, बौद्ध विद्वान प्रा. सुवर्ण शाक्यपिन्सं मंकाःकथं सीडी व सफू विमोचन याःगु खः ।
ज्याझ्वलय् पिहाँवःगु सफूया समीक्षा यानादिसें प्रा. शाक्यं बौद्ध जगतय् थेरवादी परम्पराकथं बुद्ध पुजायात सरलीकत ढंगं न्ह्यब्वःगुलिं जनसाधारणं थुइकेत अःपुइगु बिचाः तयादिल । वय्कलं सीडी दुथ्यानाच्वंगु म्येयात कयाः नं समीक्षा यानादीगु खः ।
येँ महानगरपालिकाया प्रमुख शाक्य व उप प्रमुख खड्गीं न्ववानादीगु उगु ज्याझ्वलय् सीडी व सफू तयार याय्त ग्वाहालि यानादीपिन्त सुभाय् देछाकथं मतिनाया चिं लःल्हाःगु खःसा सीडीया संगीतकार अनिल तुलाधरयात विशेष सम्मान याःगु खः ।
समूहया नायः सुवालया सभाध्यक्षताय् जूगु उगु ज्याझ्वलय् न्वकू तारा शाक्यं लसकुस यानादीगु खः। ज्याझ्वः समूहया छ्याञ्जे सुनिता महर्जनं न्ह्याकादीगु खः ।
सोमवाः यलय् सार्वजनिक विदा
नृपेन्द्रलाल श्रेष्ठ | बछलाथ्व पंचमि ११३९ (मे ९ २०१९)
यल महानगरपालिकां आ वइगु सोमवाः सार्वजनिक विदा बिइगु निर्णय याःगु दु ।
वाङमय शताब्दी पुरुष नाप संस्कृतिविद् सत्यमोहन जोशीया बुदिया शताब्दी महोत्सव माने यायेगु नितिं उगु दिं विदा बिइगु निर्णय यानागु खः धका महानगरपालिकां छगु विज्ञप्ति बिगु खः ।
संस्कृतिविद जोशीया सोमवाः वैशाख ३० गते ९९ दँ पुरा जुया सच्छि दँ थ्यनिगु खः। उगु अवसरय् महानगरपालिका , नाप दक्को वडा ज्याकू, महानगर दुनेया शैक्षिक संघसंस्था (कक्षा १२तक )लगायतया संघसंस्थाय् विदा बिइ त्यःगु खः ।
उगु न्हि सत्यमोहन जोशीयात रथारोहणयाना ¥याली याये त्यःगु खः । उगु ¥याली लगंख्यः , जावलाख्यः जुया पुल्वःय् महानगरपालिकाया ज्याकुथि विशेष ज्याझ्वः याना जोशीयात सम्मान
यायेत्यःगु खः ।
उगु ज्याझ्वलय् मूपाँहा कथं राष्ट्रपति विद्यादेवी भण्डारी झायदीगु ज्याझ्वः दु ।
सर्वरत्न पद्मरन्त सफू पितब्बज्या
नृपेन्द्रलाल श्रेष्ठ | बछलाथ्व पंचमि ११३९ (मे ९ २०१९)
नेवाः न्हयलुवाः पद्मरन्त तुलाधरया जीवनी व थीथी ब्यक्तिपिन्सं तुलाधरया ब्यक्तित्वयात कयाः पत्रकार जितेन्द्र रसिकं खसभाषं च्वयादीगु सर्वरत्न पद्मरन्त सफू थौं छगु ज्याझ्वः दथुइ मूपाँहा
नेपाल कम्युनिष्ट पार्टीया नायः लिसें पुलाम्ह प्रधानमन्त्री पुष्पकमल दाहाल प्रचण्डं पितब्बज्या यानादीगु खः ।
उगु ज्याझवलय् गौरी प्रधानया लसकुस याना न्ह्यागु थुगु ज्याझ्वलय् च्वमि रसिकं नेवाः न्हयलुवाः पद्म नाप खल्हाबल्हा यानागु व वयकःया बिषयलय् थीथी ब्यक्तित्व लिसे खँ ल्हानगु बिषयलय् उगु सफू तयार यानागु धका धयादीगु खः ।
सफूयात नाप पद्मरत्नया ब्यक्तित्वतया कया मूपाँहा प्रचण्ड, नेवाः न्ह्यलुवा मल्ल के सुन्दर, दमननाथ दुङ्गाना व स्टेला तामाङ्गं थःथःगु बिचाः तयादीगु खः ।
च्याम्ह पत्रकारयात सम्मान
नृपेन्द्रलाल श्रेष्ठ | बछलाथ्व चौंथी ११३९ (मे ८ २०१९)
राष्ट्रिय पत्रकारिता दिवसया लसताय् सरकारपाखे नागरिक खबरया प्रधानसम्पादक डण्ड गुरुङ नाप च्याम्ह पत्रकारयात सम्मान याःगु दु ।
राष्ट्रपति भवन शितल निवासय् जुुगु उगु ज्याझ्वलय् राष्ट्रिय पत्रकारिता दिवस नाप पुरस्कार वितरण समारोहय् राष्ट्रपति विद्यादेवी भण्डारीं गुरुङ नाप च्याम्ह पत्रकारयात सम्मान याःगु खः ।
नागरिक खबर डटकमया प्रकाशक नेपालश्री मल्टिमिडिया प्रालिया अध्यक्ष नाप गुरुङ राष्ट्रिय पत्रकारिता पुरस्कार–२०७५ पाखे सम्मानित जुगु खः । गुरुङ नाप खुम्ह पत्रकारयात छगु लाख राशीया पुरस्कारपाखे सम्मानित जुगु खः।
उगु ज्याझ्वलय् वरिष्ठ पत्रकारिता सम्मान–२०७५ पाखे बद्रीबिनोद प्रतीक व तीर्थ कोइराला न सम्मानित जुगु खः । वरिष्ठ पत्रकारिता सम्मान नाप निम्हेसित निगु लाख नगद राशी दुगु खः ।
राष्ट्रिय पत्रकारिता पुरस्कारपाखे खिलबहादुर भण्डारी, उमिद वागचन्द, माधव विद्रोही, निर्मला शर्मा व माला कर्ण पुरस्कृत जुगु खः ।
सर्वरत्न पद्मरन्त सफू थौं पितब्बज्या
नृपेन्द्रलाल श्रेष्ठ | बछलाथ्व चौंथी ११३९ (मे ८ २०१९)
नेवाः न्हयलुवाः पद्मरन्त तुलाधरया जीवनी व थीथी ब्यक्तिपिन्सं भाजु तुलाधरया ब्यक्तित्वयात कयाः पत्रकार जितेन्द्र रसिकं खसभाषं च्वयादीगु सर्वरत्न पद्मरन्त सफू थौं छगु ज्याझ्वः दथुइ पितब्बज्या जुइगु ज्याझ्वः दु ।
उगु सफुया उलेज्या थौं नेपाल कम्युनिष्ट पार्टीया नायः लिसें पुलाम्ह प्रधानमन्त्री पुष्पकमल दाहाल प्रचण्ड याइगु जुगु दु ।
उगु सफूति पत्रकार रसिकं नेवाः न्हयलुवाः पद्मरन्त तुलाधर नाप प्रधानमन्त्री केपि शर्मा ओली, पुलाम्ह प्रधानमन्त्री पुष्पकमल दाहाल प्रचण्ड, जककवि दुर्गालाल श्रेष्ठ, मल्लके सुन्दर नाप थीथी ब्यक्तित्वपि नाप खल्हाबल्हाया आधारय् थुगु सफु तयार यानादीगु खः धका पत्रकार रसिक लहनान्युजयात जानकारी बियादीगु खः ।
थौं येँया क्षेत्रपाटी पार्टी प्यालेसय् हिनय्सिया २ः०० ताः इलय् उगु सफू पितब्बज्या जुइत्यःगु खः ।
