Display Style:
Column Style
क्यानेडियन नेवाः गुथिपाखें ईही ज्याझ्वः
लहनान्युज | चिल्लाथ्व सप्तमी ११४०
क्यानेडियन नेवाः गुथिया ग्वसालय् न्हापांखुसी मंकाः ‘ईही’ ज्याझ्वः ब्राम्प्टनय् च्वंगु पशुपतिनाथ नेपाली देगलय् क्वचाःगु दु ।
ज्याझ्वलय् ईही संस्कारया महत्वयात कयाः न्ववानादिसें मू गुर्जुलिसें बौद्ध विद्वान प्रा. डा. नरेशमान बज्राचार्यं ईही संस्कार धइगु बौद्ध परम्पराकथं ईहीयात बोधिचित्तकथं कयातःगु व मिसामस्तय्के नं उगु गुण दय्माः धइगु हेतुं ईही छ्यःगु धयादिल ।
ईही संस्कार झिगू संस्कारमध्ये छगू व पुरुषप्रधान समाजय् मिजंपिन्त याइगु कय्तापूजाथें ईही मिसामस्तय्त याइगु सामाजिक समानताया छगू संस्कार जूगु बिचाः नं प्वंकादिल ।
ज्याझ्वलय् उत्तम माकजु, बिमल श्रेष्ठ, तारक जोशी, नवराज खड्कापिन्सं धिमेया नापनापं होलि म्ये व नेवाः भजन न्ह्यब्वय्गु ज्या जूगु खः ।
मखनय् मंकाः इहि क्वचाल
शोभा श्रेष्ठ | चिल्लागा चतुर्थी ११४०
मखंया तारणी बहालय् मिसा मचातय् मंकाः इहि क्वचाःगु दु ।
तानादेवी संरक्षण समिति मखंया ग्वसालय् मंका इहि याःगु खः । ज्याझ्वलय् २०म्हं मल्याकः मिसा मचातय्त इहि याःगु खः ।
उगु इहिस मखंया द्यःबाज्या पुरुषोत्तम राजोपाध्यायं गुरु पुरोहित कथं इहि कर्म याकादीगु खः ।
समितिया नायः भरतलाल प्रधानं समितिं मंकाः इहि लगायत नेवाः समाज दुने थीथी गतिबिधि याना वयाच्वनागु धयादिल ।
नेवाः समाजय् मिसा मचातय्त ब्याः नांया छगू कथंया सि (फल)यात कन्यादान बियाः इहि यायेगु चलन दु । ब्यालय् लुँ छकू तिकाः कन्यादान बीगु जूगुलिं थुकियात सुवर्ण कुमार विवाह नं धायेगु याः ।
लुँ धयाम्ह नारायणद्यः कथं काइगु जूगुलिं नारायणद्यःयात हे कन्यादान ब्युगु कथं काइ ।
इहि यानातःपिं मिसात नारायणद्यःयात हे कन्यादान बियातयेधुंकूगु जूगुलिं लिपा वनाः नं गबलें हे विधुवा मजुइगु मान्यता समाजय् दु ।
पुष्पराज राजकर्णिकारया याकः चिबाखं मुँज्या जुल
लहनान्युज | चिल्लाथ्व पंचमी ११४०
सः छगू फरक अभिव्यक्तिया ग्वसालय् थौं छगु ज्याझ्वः दथुइ डा. पुष्प राज राजकर्णिकारया याकः चिबाखं ब्वने ज्या जुगु दु ।
उगु ज्याझ्वलय् डा.राजकर्णिकारं मुक्कं झिंन्यापु चिबाखं ब्वनाः न्यंकादीगु खः ।
सुनिल बज्राचार्यं न्ह्याकादीगु उगु ज्याझ्वलय् नरेश अमात्यं लसकुस यानादीगु खः ।
सुधीर खव्बिं मतिनाया चिं लःल्हानादीगु खःसा मोक्ष बहादुर अमात्यं डा. राजकर्णिकारयात खादा न्यकादिगु खः ।
ज्याझ्वलय् नरसागर श्रेष्ठं बाखंया समिक्षा यानादीगु खः ।
बुखँ व किपा नेवाः सूचना केन्द्र, राजेन्द्र रञ्जित
आनन्द सिद्धिया ‘लिजः’ सफू पिदन
अमिरमैंया रंजित | सिल्लागा पंचमी ११४०
समाज सुधारक भाजु आनन्द सिद्धि तुलाधरया लुमन्ति, बाखं व चिनाखं मुना ‘लिजः’ थौं शनिवा पकनाज्वलय् छगु ज्याझ्वः दथुइ मूपाहाँ चन्द्रानन्द नेवाःनं पितब्वज्या यानादीगु दु ।
नेपालभाषा परिषदया ग्वसालय् वरिष्ठ कवयित्री प्रतिसरा साय्मिं न्ह्याकादीगु उगु ज्याझ्वलय् च्वमि तुलाधर ‘अकुपाइ तिनख्यः’ नांया चिनाखं वय्कःया म्ह्याय् नापं नेपालभाषा साहित्यकार दिब्या ताम्राकारं न्यंकादीगु खःसा नेवाः न्ह्यलुवा मल्ल के सुन्दर व परिषदया नायः प्रा. सुवर्ण शाक्य उगु सफू वारे न्वनादिगु खः ।
किपाः राजेन्द्र रंजित
भक्तराज रञ्जितया आत्मबृतान्त पिहावल
अमिरमैंया रंजित | सिल्लागा पंचमी ११४०
साहित्यकार भक्तराज रञ्जितया आत्मबृतान्त सफू ‘उक्लिएको मान्छे’ छगु ज्याझ्वः दथुइ बरिष्ठ पत्रकारपि भैरब रिसाल, टंक पन्त, समाजसेवी रामकृष्ण कर्माचार्य, सिर्जना ढकाल, कुमार रञ्जित, अमिर मैया रञ्जित, दिपक रञ्जित, भीम कुमारी रञ्जित, कृतिकार भक्त राज रञ्जितपिसं मंकाः कथं पितब्वज्या यानादिगु दु ।
गोरखापत्र संस्थानयात लक्ष्मी व सरस्वतीया रुपं स्वयादीम्ह च्वमि भक्तराज रञ्जितं गोरखापत्र संस्थानयात आधुनिकीकरण यायेगु झ्वलय् संस्थानय् जुइगु चुहावटयात चुनौतीपूर्ण ढंगं कजय् कयागु अनुभव कनादिल ।
समाजय् जुयाच्वंगु थीथी हताः, बेजाति इहिपास जुइगु विभेद, अति धनी व अति गरिबीया दथुया फरक ज्यंकाः गरिबी निमूल यायेत यायेमाःगु कुतःया विषययात कःघानाः च्वयातःगु सफूयात च्वछासे मूपाहाँ रिसालं कृत्रिम कथंया च्वछायेगु ज्या जुइमज्यूगु खँ कनादिना दिगु खः ।
च्वमि रञ्जितया आत्म बृतान्त व थःगु न्ह्यःगुपुस्ता तक्कया रञ्जित परिवार वंशावली दुथ्याःगु उगु सफूया समालोचना व समीक्षा कुमार रञ्जित, सरस्वती लक्ष्मी तुलाधर व अमिर मैया रञ्जितं यानादीगु खः ।
किपाः राजेन्द्र रंजित
