Display Style:
Column Style
स्वम्ह नेवाः मिसा पत्रकार सगरमाथाय्
लहनान्युज | अनलाथ्व नवमी ११३८ ( मे २३ २०१८ )
छवाःया दुने स्वम्ह नेवाः मिसा पत्रकारपिं विश्वया दक्ले तजाःगु च्वापुगुँइ थ्यंगु दु । वय्कःपिं खः गोरखा जिल्लाय् छेँ जुया थौंकन्हय् कारोबार न्हिपौया फोटो पत्रकार पुर्णिमा श्रेष्ठ, यल जिल्लाय् छेँ जुया मेघा टेलिभिजनय् ज्या यानादीम्ह पत्रकार कल्पना महर्जन व येँय् छेँ जुया नेपाल टेलिभिजनया पत्रकार रोजिता बुद्धाचार्य ।
वय्कःपिं मध्ये दक्ले न्हापां पुर्णिमा श्रेष्ठ सगरमाथाय् थ्यंगु खः । सगरमाथाय् दक्ले न्हापां थ्यंम्ह फोटो पत्रकार नं वय्कः हे खः । वंगु शनिवाः श्रेष्ठ सगरमाथाया च्वकाय् थ्यंगु खः ।
वय्कलं अन नेपाःया मां धकाः मिसापिनिगु किपाः ब्वज्या तकं यानादीगु खः । उगु हे कथं कल्पना महर्जन व रोजिता बुद्धाचार्य बुधवाः सुथय् सगथमाथाया च्वकाय् थ्यंगु खः ।
वय्कःपिं सगरमाथाया बेसक्याम्पंनिसें हे नेपाल टेलिभिजनपाखें प्रत्यक्ष प्रशारण यायां हे वानादीगु खः ।
कल्पना व रोजिता नापं वय्कःपिनिगु पुचलय् मुक्कं याना खुम्ह मिसापिं पत्रकारत दुथ्याःगु खः ।
न्यान्हुया दुने स्वम्ह मिसापिं पत्रकारपिं सगरमाथाया च्वकाय् थ्यंगु थ्व छगू कथंया न्हूगु रेकर्ड जुयाबिउगु दु ।
सम्पदा पुनःनिर्माणयात कयाः संस्कृति मन्त्रीया च्यूताः
नृपेन्द्रलाल श्रेष्ठ | अनलाथ्व सप्तमी ११३८ ( मे २१ २०१८ )
पाटन दरबार क्षेत्रय् जुयाच्वंगु सम्पदा पुनःनिर्माण व अनया अमूर्त सम्पदा संरक्षणयात कयाः संस्कृति, पर्यटन तथा नागरिक उड्डयन मन्त्री रविन्द्र अधिकारीं च्यूताः प्वंकादीगु दु ।
थ्व हे झ्वलय् विश्व प्रशिद्ध कृष्ण देगः पुनःनिर्माण ज्या निलाया दुने क्वचाइगु कोषया नायः राहित रञ्जितं मन्त्री अधिकारीयात जानकारी याकादीगु खः । अथे हे प्यम्ह नारायण द्यःया देगः झिंछलाया दुने पुनःनिर्माण क्वचाइगु नं जानकारी याकादिल ।
थीथी देय्या ग्वाहाली जुयाच्वंगु सम्पदा पुनःनिर्माणया ज्यायात कयाः मन्त्री अधिकारीं सन्तोष प्वंकादिसें थुकिया संरक्षण व पुनःनिर्माणय् मन्त्रालयं मांकथं ग्वाहालि याय्गु प्रतिबद्धता प्वंकादिल ।
नापं मन्त्री अधिकारीं पुनःनिर्माण जुयाच्वंगु प्यम्ह नारायण द्यः, हरिशंकर देगः, कृष्ण देगःया नापनापं सुन्दरीचोकया काष्ठकला, प्रस्तरकला, भण्डारखाल बगैंचाय् भुखाचं क्षति जूगु काष्ठकलाया पाटन संगहालयया अवलोकन यानादीगु खः ।
अवलोकन भ्रमणया झ्वलय् यल महानगरपालिकाया प्रमुख चिरीबाबु महर्जन, उपप्रमुख गीता सत्याल, वडा ल्याः ९या नायः राजु महर्जन, वडा १२या नायः नारायणलाल अवाले, वडा १६या नायः निर्मलरत्न शाक्यया लिसें पुरातत्व विभागया महानिर्देशक भेषनारायण दाहालपिन्सं नं सम्पदा संरक्षणयात कयाः थःथःगु नुगःखँ तयादीगु खः ।
वंगु २०७२ साल बैशाख १२गतेया विनाशकारी भुखाचं क्षतिग्रस्त जूगु ऐतिहासिक सम्पदात काठमाण्डौं उपत्यका संरक्षण कोषया अग्रसरताय् पुनःनिर्माणया ज्या जुयाच्वंगु दु ।
चिकित्सक तालिम ज्याझ्वः
नृपेन्द्रलाल श्रेष्ठ | अनलाथ्व सप्तमी ११३८ ( मे २१ २०१८ )
अरनिको समाजया ग्वाहालिइ नेपाःया नीप्यम्ह डाक्टरपिं चीनया छन्तु चएया वेस्ट मेडिकल युनिभर्सिटीइ ‘चिकित्सक तालिम काय्गु’ ज्याझ्वः जुल ।
उगु तालिम क्वचाय्का वःगु पुचःपाखें येँ छगू ज्याझ्वः यासे उगु तालिममाखें थःपिन्त आपालं फाइदा जूगु तालिमय् सहभागीपिन्सं धयादीगु खः ।
अरनिको समाजया नायः डा. सवोत्तम श्रेष्ठ, बरिष्ठ उपाध्यक्ष डा. मनोजमान श्रेष्ठ,महासचिव डा. शुशील प्रजापति व अरनिको सांस्कृतिक व ब्यवसायी समाजया नायः अजरमान जोशीयागु नं सहभागी दुगुु खः।
सर्लाहीइ नेपालभाषाया रेडियो ज्याझ्वः
लहनान्युुज | अनलाथ्व सप्तमी ११३८ (मे २१ २०१८)
शान्ति व सद्भावया नितिं सामुदायिक रेडियो एकता ९२.४ मेगाहर्जय् नेपालभाषाया ज्याझ्वः “लोकंह्वाःगु म्ये” न्ह्याःगु दु । सर्लाहीया थुगु रेडियोपाखें नेपालभाषा लोकंह्वाःगु म्ये न्यंकेगु थुगु ज्याझ्वः रमा बज्राचार्यं न्ह्याकादीगु दु । शुक्रवाःपत्तिं न्हिनसिया १२ः१५ ताः इलय् थ्वइगु थुगु ज्याझ्वः ४५ मिनेटया ज्याझ्वः खः ।
थुगु ज्याझ्वःया नितिं म्ये दुथ्याकादीत ज्याझ्वः न्ह्याकामि बज्राचार्यं इनाप यानादीगु दुसा मेमेगु जिल्लाय् नं थुकथं ज्याझ्वः न्ह्याकावनेगु विषय सहलह जुयाच्वंगु नं वय्कलं कनादीगु दु ।
ज्याझ्वः न्यनाः सर्लाहीया नेवाःत व नेवाः म्ये ययेकीपिं अतिकं उत्साहित जूगु नं रेडियो ब्यवस्थापनं धाःगु दु । आः याकनं हे लिस्नर्स क्लब स्थापना यानाः थुगु ज्याझ्वःयात गुकथं तिबः बीफइ धइगु विषयय् नेवाः समाजं च्यूताः तःगु खँ नं रेडियो ब्यवस्थापनं न्ह्यथंगु दु ।
थुगु ज्याझ्वः रेडियो एकता ९२.४ रेडियोया वेभपेज http://www.radioekata.com.np/ (क्लिक यानादिसँ) पाखें न्यनादीफइ ।
इनाखाय् हिदान ज्याझ्वः
लहनान्युज | अनलाथ्व चौथी ११३८ (मे १९ २०१८)
इनाखा युवा क्लब व भोटेबहाल तयारी पोशाक उत्पादक तथा विक्रेता संघया मंकाः ग्वसालय् २५६२ क्वःगु बुद्धजयन्तीया लसताय् शनिवाः हिदान ज्याझ्वः जूगु दु ।
क्लबया नायः बबी रञ्जितया नायःसुइ जूगु उगु ज्याझ्वलय् मूपाहाँ येँ महानगर पालिकाया मेयर बिद्यासुन्दर शाक्यं मुँज्या नायः रञ्जितयात हितयेगु म्हिचा लःल्हासे ज्याझ्वः न्ह्याकूगु खः ।
नुगःखँ तयेगु झ्वलय् शाक्यं थःगु त्वाःबाः फोहर मजुइकेगु खःसा मेपिसं वयाः सफा याना बिइ धकाः आशा च्वनां सदांया नितिं सफा जूइमखु यदि सदांया नितिं त्वाःबाः सफायाना स्वस्थ्य जीवन हनेगु खःसा त्वाःया स्थानीय पिनिगु नापनापं व्यापारीतय्सं न्ह्यःनेलाःथाय् फोहर वांछ्वयेगु मयासे कन्टेनरं फोहर काःवइगु इलय् जक फोहर व्यवस्थित रुपं वांछ्वयेगु यातधाःसा सदां त्वाःबाः सफा जुयाच्वनीगु खँय् बःबियादिल ।
मिसा व मिजं हिदाता याना मुकं ८८ म्ह हिदातापिसं हिदान याःगु दु ।
उगु ज्याझ्वलय् चन्द्र लामिछानें लसकुस न्वचु तयादीगु खःसा विष्ण प्रसाद गौत्तमं ज्याझ्व न्ह्याकादीगु खः ।
किपा नेवाः सुचना केन्द्र
बुखँ राजेन्द्र रंजित
