Display Style:
Column Style
यलय् तालिमं महिला समूह उत्साहित
सुरज, लहनान्युज | बछलाथ्व तृतीया ११३९ (मे ७ २०१९)
ललितपुर महानगरपालिका, समाज कल्याण महाशाखां थीथी महिला समूहया नितिं न्ह्याकूगु छवाःया उद्घोषण व वक्तृत्व विकास तालिम क्वचाल । महिला समूहया पदाधिकारीपिनिगु नितिं नुगःखँ तयेगु व ज्याझ्वः दयेकेगु, न्ह्याकेगु नितिं अःपुइमा धकाः थुगु स्यनेज्याया ग्वसाः ग्वःगु खः । तालिम २०७६ वैशाख १६ गते सोमबारनिसें न्ह्याःगु खः ।
पत्रकार, ज्याझ्वः न्ह्याकामि सुरजवीर बज्राचार्यं बियादीगु प्रशिक्षणय् २३ म्हसिन कयादीगु खः । वयकलं न्वँवायेगु गुण जक मखःसे छगू ज्याझ्वः ताःलाक ग्वसाः ग्वयेगु बारे नं स्यनादीगु खः ।महाशाखाया प्रमुख बाबुराजा महर्जनया सभापतित्वय् जूगु समापन समारोहय् मूपाहाँं सामाजिक विकास समितिया दुजः व यल महानगरपालिका ५ वडाया अध्यक्ष विकासमान श्रेष्ठं ब्वतिकयादीपिन्सं माग याःगु एडभान्स कोर्स ग्वसाःया नितिं थःम्हं पहल यायेगु बचं बियादिल ।
दसिपौ लःल्हासें वयकलं छवाःया तालिमं ब्वति काःपिंके विकास जूगु गुण व आत्मविश्वासं थः अतिकं लयतायागु खँ कनादिल । ज्याझ्वलय् विशेष पाहाँकथं महाशाखाया महिला विकास कार्यक्रम अधिकृत ज्ञानीशोभा महर्जनया ब्वति दुगु खः ।तालिम काःगु पुचःपाखें पुचःया थकालिम्ह मयजु लक्ष्मी ब्यञ्जनकारं ग्वसाः खलः महाशाखा व स्यनामि बज्राचार्ययात दोहलपा देछासें हनादिल । तालिम कयादीम्ह नारी जागृति समूहया विष्णुमाया थापां लसकुस यानादीगु थुगु ज्याझ्वलय् सुभाय् न्वचु नं तालिम कयादीम्ह हाम्रो कुसुन्ती महिला समूहया उर्मिला सुवेदीं बियादीगु खः ।
ज्याझ्वलय् रत्नाकर उद्यमी महिला समूहया सहिना बज्राचार्य, दिब्यनगर महिला समूहया मथुरा सापकोटा डोटेल व देवनगर महिला समूहया गोमा खरेलं तालिमया अनुभव व उपलब्धिबारे कनादिल । वयकःपिन्सं तालिमं थःपिं अतिकं उत्साहित जुयागु धासें अझ यक्वः सयेकेगु, अभ्यास यायेगु मन दुगुलिं थःपिनिगु नितिं एडभान्स कोर्सया ग्वसाः ग्वयादीत महानगरपालिकायात इनाप यानादीगु खः ।
तालिमय् सानेपा हाइट महिला समूह, शान्तिविहार महिला समूह, दिब्यनगर महिला समूह, रत्नाकार उद्यमी महिला समूह, नारी जागृत्ति महिला समूह, दिदीबहिनी हात्तेमालो महिला समूह, कुसुन्ती महिला समूह, शंखमूल महिला समूह, देवनगर महिला समूह, पञ्चेश्वर महिला समूहपाखें पदाधिकारीपिन्सं ब्वति कयादीगु खः ।
रिद्धिमान मखंबहाःया न्हूम्ह चक्रेश्वर
नृपेन्द्रलाल श्रेष्ठ | बछलाथ्व द्धितीया ११३९ (मे ६ २०१९)
रत्नकीर्ति महाबिहार मखंबहाःया न्हूम्ह चक्रेश्वर श्रद्धेय ८८दँया रिद्धिमान बिलास वज्राचार्य जुयादीगुु दु ।
मखंबहाःया सर्वेसंघं मुकुटाभिषेक यासे बौद्ध परम्पराकथं दकलय् थकालिम्ह वज्राचार्ययात न्हूम्ह चक्रेश्वर स्थापना याःगु खः ।
साहित्यकार कृष्ण देवी बज्राचार्य मन्त
लहनान्युज | बछलाथ्व दुतिया ११३९ (मे ६ २०१९)
नेवाः न्ह्यलुवा पबित्र बज्राचार्यया मां साहित्यकार कृष्ण देवी बज्राचार्य ८८ दँय् थौं सुथसिया २ः०० ताः इलय् काठमाण्डैं मोडल अस्पतालय् मन्त ।
मदुम्ह कृष्ण देवी बज्राचार्य वःगु बिहिवाः १९ गते वासः याकेगु झ्वलय् काठमाण्डैं मोडल अस्पतालय् भर्ना जुयादीगु खः ।
मदुम्ह बज्राचार्ययात अन्तिम श्रद्धाञ्जलीया लागि ९ः०० ताः निसे १२ः०० ताः ई तक ओम बहाःया नबहीलय् तइगु धका परिवारया जःपाखे जानकारी लहनान्युजयात धाःगु दु । थौं १२ः०० बजे टेकुया जम्वोदीपय् यका दाहसंस्कार याइगु जुगु दु ।
मदुम्ह बज्राचार्यया निम्ह काय्पि नेवाः न्ह्यलुवा पबित्र बज्राचार्य व नेपाःया नांजाम्ह संगीतकार न्ह्यु बज्राचार्य खःसा म्हाय् नांजाम्ह कलाकार नगीना जोशी खः। अथेहे छय् नां जाम्ह कलाकार भिंतुना जोशी खः ।
नेवाः संस्कारय् अन्त्येष्टि विधि व पितृमोक्ष पितब्वज्या
लहनान्युज | बछलाथ्व पारु ११३९ ९मे ५ २०१९०
पूर्णराम मुनकःमिया सम्पादनय् नेवाः संस्कारय् अन्त्येष्टि विधि व पितृमोक्ष ख्वपया याछेँय् छगु ज्याझ्वःया दथुइ पितब्वज्या जूगु दु ।
मुनकःमि समाजया ग्वसालय् जूगु उगु ज्याझ्वलय् ख्वपया एकान्त कुमारी माजुया ल्हातं चिखिफ्यने ज्या जूगु खः ।
शिव प्रसाद मुनकःमिया सभाधक्ष्यताय् जुगु उगु ज्याझवः सरिता राजोपाध्यायनं न्ह्याकादीगु ।
नेवाः संस्कारया मौलिकतां जाःगु थुगु सफूया पिथनां नेवाः संस्कार ज्याय् एकरुपता वइगु बिश्वास प्वकुगु दुसा नाप गलत प्रवृतिया पुरोहित तय्त विस्थापित यानावने फइगु सम्भावना दु धका भलसा कयादीगु दु ।
नेवाः संस्कारय् अन्त्येष्टिया विषयलय् जुयाच्वंगु विवादं मुक्तयाना नेपाःया थीथी थासय् च्वनाच्वंपिं सकल नेवाःतय्त छगु हे ब्यवहारय् थुगु सफूतिं धका बिश्वस न प्वंकूगु दु ।
थुगु सफुतिं पुरोहित थ्यंके मफुथाय्नं थःपिसंहे अन्त्येष्टिया विधि पूवंके फइगु नं विश्वास कायेफइगु न्वचू तःपिनिगु धापू दु ।
बुखँ – नेवाः सूचना केन्द्र किपा – राजेन्द्र रञ्जित
यलय् निसः व ३८ म्ह ज्येष्ठ नागरिक सम्मान
नृपेन्द्रलाल श्रेष्ठ | चौलागा आमै ११३९ (मे ४ २०१९)
यलया १६ वडां छगु ज्याझ्या दथुइ निसः व ३८ म्ह ज्येष्ठ नागरिक सम्मान याःगु दु । उगु ज्याझ्वलय् ‘ज्येष्ठ नागरिकया सम्मान, सभ्य समाजया स्वाभिमान ’ धइगु नारां ज्वना याःगु खः ।
नेवाः परम्परा अनुसार ७७ दँ दतकि न्हापांगु ज्याजंकु, ८२ दँय् निक्वःगु जंकु व ८८ दँय् स्वक्वःगु जंकु याइ धकाः ज्येष्ठ नागरिक सम्मान ज्याझ्वःया कजि नाप वडा सदस्य पञ्चबज्र बज्राचार्यं जानकारी बियादीगु खः ।
उगु ज्याझ्वलय् मूपाँहा कथं यल महानगरपालिकाया प्रमुख चिरिबाबु महर्जनं स्वामा,१६ वडाया अध्यक्ष निर्मलरत्न शाक्यं दोसल्ला न्ययेका ज्येष्ठ नागरिकपिन्त सम्मान याःगु खः ।
उगु ज्याझुवलय् भिक्षु कौण्डन्यं शील सदाचारं बुढेशकालया सुखप्रदायक जुइगु धारणा तयादीगु खः । ज्याझ्वलय् ज्येष्ठ नागरिक मैत्री वातावरण दयेकेत चर्चित गायक स्वयम्भुराज शाक्यं बुद्ध भजन, भाष्कर वर्ण महिला समूहं ज्ञानमाला भजन न्ह्यब्बःगु खः ।
अथेहे प्रा. बज्रराज शाक्यं ज्येष्ठ नागरिकयात उत्प्रेरित यायेत स्वस्थ, निरोगी जुया सकारात्मक सोचया साथ सक्रिय जीवन न्ह्याके माःगु बिचाः तयादीगु खःसा १६ या वडाअध्यक्ष निर्मलरत्न शाक्यं ज्येष्ठ नागरिकया ज्ञान, सीपयात कदर यासे वनेगु नीति कथं आ वइगु दँय् परम्परागत बाजागाजाया गुरुपिन्त न सम्मान याना वनेगु प्रतिबद्धता प्वकादीगु खः ।
