Display Style:
Column Style
सांसद भूमिकायात जनतां युगयुग तक लुमंकी : जनकवी श्रेष्ठ
नृपेन्द्रलाल श्रेष्ठ | एकादशी ११३९ (मार्च १७ २०१९)
सङ्घीय समाजवादी फोरमया सहअधक्ष्य लिसें प्रतिनिधिसभाया सांसद राजेन्द्र प्रसाद श्रेष्ठयात वय्कलं पहिचान व संघीयताया आन्दोलनलिसें नेवाः आन्दोलनय् यानादीगु योगदानयात कदर यासे येँया लाय्कुलिइ छगू तःजिगु ज्याझ्वः याना थीथी नेवाः संस्थातपाखें मंकाः कथं हंःगु दु ।
वयकलं ताः ई न्ह्यवंनिसें जुयाच्वंगु नेपालभाषा आन्दोलनया मागयात देय्या संघीय संसदय् सः तयेगु लिसें सरकारं हःगु विधेयकय् मांभासं आखः ब्वनेगु खःसा सम्बन्धित जातिं हे स्कूल चायेके माः धकाः हःगु विधेयकया विरोध यासे संघीय व्यवस्थाय् मां भाषं आखः ब्वंकेगु जिम्मेवारी सरकारं हे कायेमाः धकाः संशोधन प्रस्ताव तयाः पारित याकेत ताः लाःगु ख ।
सङ्घीय गणतन्त्रय् समेत नेपाल कम्युनिष्ट पार्टी नेतृत्वया सरकारं मांभासं आखः ब्वंकेगु निंतिं दायित्व कायेगु पल्सा संस्कृत शिक्षायात अलग विधा जुइगु यानाः विधेयक दर्ता याःगुलि वयकलं भाषिक उत्पीडनं मुक्तिया निंतिं विधेयकय् संशोधन दर्ता यानाः संस्कृत शिक्षायात शिक्षाया अलग विधा कथं स्थानीय तहलं चाय्कीगु स्कूलय् तकं महत्त्व बिया हःगु विधेयकं संस्कृत विधा लिकायेकेत विशेष भुमिका म्हिता दीगु खः ।
अथे हे भविष्यय् मुआब्जा ब्युसां जिइगु यानाः सतक विस्तारया नामय् नेवाःतय्त विस्थापित यायेछिंक सरकारं हःगु आवास सम्बन्धी विधेयकयात न राज्यया अधिनायवादी सोच धकाः विरोध याःसे वय्कलं संशोधन दर्ता याकाः पीडिततय् पक्षय् विधेयक संशोधन याकेत ताःलाःगु खः ।
ज्याझ्वलय् मूपाहां जनकवि दुर्गालाल श्रेष्ठजुं सांसद भाजु राजेन्द्र श्रेष्ठं जातीय मुक्ति आन्दोलनय् तःधंगु भूमिका म्हितूगु दु, मांभासं आखः ब्वंके दइ कथं कानुन दय्केत गुगु ऐतिहासिक भूमिका म्हितल व जनतां युगयुग तक लुमंकी धयादिसें मेपिं सांसदतसें न वय्कःया अनुकरण यायेमाः धया दिल ।
उगु हना ज्याझ्वलय् थःगु नुगः खँ न्ह्यब्वसे सांसद राजेन्द्र श्रेष्ठं नेवाःतय्गु लागां त्याका वंपिं अप्वःधइथें जनप्रतिनिधित ‘छेँय् धुं पिने छुं’ जुयाच्वंगु धासें झीगु न्ह्यनय् जि नेवाः खः, जिं थ्व याये व याये धाइगु तर थासय् थ्यन कि थःगु पार्टीं छुं धाइला धका जातीय उत्पीडनया विरुद्ध सः तय्त ग्याःगु खँ कना दिल । वय्कलं ’छुं’ प्रवृत्तिया मनूतसें समाजया निंतिं छुं हे यायेफइमखु धया दिल ।
नेता श्रेष्ठं पहिचान विरोधीतय्पाखें पहिचानया आशा याइपिंत संकेत यासे जनजाति मुख्यमन्त्री जुयाच्वंथाय् हे गण्डकी नां छुनाः पहिचानया आन्दोलनयात धोका बिउगु खँ कना दिल । वयकलं झीगु न्ह्यनय् माकक्क खँ ल्हाइपिन्त मखु उत्पीडित जनताया अधिकारया निंतिं सः तइपिन्त तिबः बिइ फयेके माः धासें थौंकन्हे ३ नम्बर प्रदेश नेवाःताम्सालिङ वा नेपालमण्डल जुइमाः धकाः हालां छु याये, ‘गोम्प ज्वना धम्प जाइमखु’ धया दिल ।
नेवाः न्ह्यलुवा श्रेष्ठं थःम्हं छुं तःधंगु ज्या मयानागु धासे नेपालभाषा आन्दोलनया कार्यकर्ता व नेवाः जुयागुया कर्तब्य जक पूवंकागु खँ कंसे संघीयता वये धुंका न्हापाथें फुक्क तगिंया शिक्षा केन्द्रया ब्वहलय् मजूसे प्रदेशया ब्वहलय् प्रदेश विश्वावद्यालय व उच्च शिक्षा अले स्थानीय तहया ब्वहलय् १२ गू कक्षा तकया माध्यमिक शिक्षा दुगु खँ कना दिल । वयकलं आः १२ गू कक्षा तक ब्वंकेगु लागि स्थानीय तहलं मांभासं आखः ब्वंकेगु स्कूल चायेकेत संघीय कानुन दयेके धुंगु खँ कना दिसे स्थानीय तहयात न्ह्यलं चायेकेगु ज्या यायेत न इनाप याना दिल ।
मंकाः ग्वसाः खलःया कजि भाजु श्रीकृष्ण मानन्धरया नायःसुइ जूगु उगु ज्याझ्वलय् नेवाः राजनीतिक अभियानया संरक्षक डा. महेशमान श्रेष्ठ, नेपालभाषा मिसा खलःया नायः मंगला कारंजीत, नेपालभाषा मंका खलः यलया नायः ऋपि प्रसाद श्रेष्ठ लगायतया वक्तापिसं न सांसद श्रेष्ठया भूमिकायात च्वछाया दिइगु खः । ज्याझ्व अभियानया छ्याञ्जे विद्या चित्रकारं न्ह्याकादीगु खःसा शिक्षा गुथिया नायः विष्णु चित्रकारं लसकुस यानादीगु खः ।
जनार्दन शर्मां संविधानपाखें लँ मालेत सुझाब
लहनान्युज | चिल्लाथ्व अष्टमी ११३९ (मार्च १४ २०१९)
पुलाम्ह गृहमन्त्री नाप नेकपायाा नेता जनार्दन शर्मां सरकारया प्रतिबन्ध व विप्लवया हिंसात्मक निम्हेसियाःगु ज्या गलत खः धयादीगु दु ।
सरकारं छु दिं न्ह्यः जक विप्लवया नेकपा पार्टीयात सरकारं प्रतिबन्ध तःगु खः । सरकारया थुगु निर्णया नेकपा दुने हे मतभिन्न जुया च्वंगु इलय् नेता शर्मां थःथे बिचाः तयादीगु खः ।
नेता शर्मां निम्हेसिनं संविधान पाखें समाधानया लँ मालेत सुझाब न बियादीगु खः ।
बोइङ ७३७ म्याक्स मोडलया जहाज उदानय् रोक
लहनान्युज | चिल्लाथ्व अष्टमी ११३९ (मार्च १४ २०१९)
अमेरिकी विमान निर्माता कम्पनी बोइङं थःगु ७३७ म्याक्स मोडलया दक्को जहाज ब्बकेगुलि दिकगु दु । कम्पनी मेगु निर्णयम मजुतले ३७१ गु बोइङ ७३७ म्याक्स विमान ब्बकेगु दिकगु दु ।
इथियोपियनया राजधानी अदिस अबाबापाखे केन्याया राजधानी नैरोबीया लागि ब्बःगु बोइङ ७३७ म्याक्स विमान दुर्घटना जुगु खः गुकिइ १५७म्ह मनू दुर्घटना जुया मदुगु खः।
नागरिक समाजपाखे बिरोध प्रदर्शन
लहनान्युज | चिल्लाथ्व सप्तमी ११३९ (मार्च १३ २०१९)
सरकार व सिके राउत दथुइ ११ बुँदे सम्झौताया बिरोध यासे नागरिक अगुवा कृष्ण पहाडिपिन्सं सिंहदरबारया पश्चिम गेटय् प्रदर्शन याःगु दु । सिके राउतनाप याःगु सम्झौतायात ‘अपराजध जन्य सहमति’ धया बिरोध प्रदर्शन याःगु खः ।
थौं जुगु प्रदर्शनय् मानव अधिकार व शान्ति समाजया पूर्वसभापति कृष्ण पहाडी, सभापति उत्तम पुडासैनी, सल्लाहकार डा. गंगाधर अधिकारी, सचिव बलबहादुर गाहा मगर, कोषाध्यक्ष रामकृष्ण बराल, केन्द्रीय सदस्यपिं नम्रता खरेल, गीता तिमल्सिना, अधिकारकःमि ईश्वर पुडासैनी, विपी पौडेल, बाबुराम न्यौपाने, विनित अर्याल, नानीकाजी गिरी, भगवान पुडासैनी, अर्जुन लामिछाने, भक्त लिम्बु, नामबहादुर पुन नाप १६ म्हेसित प्रहरीं नियन्त्रणय् काःगु खः ।
नेवाः न्ह्यलुवा राजेन्द्र श्रेष्ठयात हनिगु
नृपेन्द्रलाल श्रेष्ठ | चिल्लाथ्व सप्तमी ११३९ (मार्च १३ २०१९)
नेवाः राजनीतिक अभियानं नेवाः न्ह्यलुवा नाप सांसद राजेन्द्र श्रेष्ठयात थ्व हे वइगु चिल्लाथ्व दशमी शनिवाः कुन्हु हनेज्या याये त्यःगु दु ।
शिक्षा ऐन पारित यायेगु लागि बिशेष पहल याःगु नि थःथे हने ज्या याये त्यःगु खः ।
