Display Style:
Column Style
ख्वपय् सम्यक महादान तःजिक न्याय्कीगु
लहनान्युज | पोहेलागा द्धितिया ११४० (जनवरी १२ २०२०)
ख्वपय् दँय्दसं माघ १ गते न्याय्का वयाच्वंगु सम्यक महादान पर्व थुगुसी नं तःजिक न्याय्कीगु जूगु दु ।
सम्यक महादान व्यवस्थापन समिति व नेवाः पत्रकार राष्ट्रिय दबू, ख्वप कचां ग्वसाः ग्वःगु पत्रकारत नापलाय्गु ज्याझ्वलय् उकथंया जानकारी ब्यूगु खः ।
थ्व हे झ्वलय् समितिया छ्याञ्जे रविकिरण बज्राचार्यं माघे संक्रान्तिया दिनस हनीगु थुगु सम्यक महादान पर्वय् दान याःसा दुःख नाश जुयाः पूण्य दइगु व बोधिज्ञानया मार्गय् प्रतिष्ठित यासें निर्वाणतक थ्यंकीगु लिसें राग, द्वेष, लोभ आदि मदया वनीगु जनविश्वास दुगु धयादिल ।
नेपाल सम्बत् ७९४निसें न्ह्याना वयाच्वंगु थुगु सम्यक महादान पर्व ख्वपया थथुबहिलीइ च्वंगु जयकीर्ति महाविहारय् याइगु खःसा ख्वपया न्याम्ह दीपंकर बुद्धयात दँय्दसं जयकीर्ति महाविहारय् बिज्याकाः सम्यक महादान न्याय्कीगु चलन दु ।
बोधि टेलिभिजन स्वदँय्
लहनान्युज | पोहेलागा तृतिया ११४० (जनवरी १२ २०२०)
नेपाःया न्हापांगु व छगूयां छगू बौद्ध टेलिभिजन ‘बोधि टेलिभिजन’या स्वदँ क्यंगु व बोधि बचत तथा ऋण सहकारी संस्था लिमिटेड झिदँ क्यंगु लसताय् यलय् छगू ज्याझ्वः जुल ।
संघ उपनायक बोधिसेन महास्थविरं शील प्रार्थना यानाः न्ह्याःगु ज्याझ्वलय् टेलिभिजनया नायः बौद्ध समाजसेवी मोतिलाल शिल्पकारं लसकुस यानादिसें भगवान बुद्धं बोधिज्ञान ४५दँतक निरन्तर देसंदेय् चाःहिलाः प्रचार प्रसार याना बिज्याःगु धयादिल ।
थ्व हे झ्वलय् वि.सं. १९८०स तिब्बतं क्यान्छे लामां स्वयम्भुइ बियादीगु बुद्धधर्मया देशनां स्थानीय मनूतय्त तःधंगु प्रभाव लाःगु व लिपा महाप्र्रज्ञा व प्रज्ञानन्द महास्थविरया थेरवाद पुनःस्थापनाया तःधंगु योगदान दुगु न्ह्यथनादिल ।
ज्याझ्वलय् पुलांम्ह प्रधानमन्त्री झलनाथ खनाल, पुलांम्ह रक्षामन्त्री भीमसेनदास प्रधानलिसेंया पाहाँपिन्सं भिन्तुना न्वचु बियादीगु खः ।
अथे हे बोधि टेलिभिजनपाखें भिक्षु कौण्डन्य महास्थविरं शान्ति व बुद्धधर्मया प्रचार विश्वन्यंकं याय्गु नितिं बोधि टेलिभिजन स्याटलाइटय् वनेमाःगुलिं थुकी ग्वाहालि यानादीत इनाप यानाबिज्यात । बोधिग्राम व सहकारीया नायः संजीव तुलाधरं बोधिग्राम, टेलिभिजन व सहकारीया अवस्थाया बारे न्ववानादिल ।
थ्व हे झ्वलय् टेलिभिजनयात ग्वाहालि यानादीपिं थीथी व्यक्तित्वपिन्त नं हनेगु ज्या जूगु खः ।
ललितपुर सुनचाँदी ब्यवसायी संघया रजत जयन्तीया समापन थाैं
सुरज, लहनान्युज | पोहेलागाः पारू ११४० (जनवरी ११ २०२०) |
यलया ललितपुर सुनचाँदी ब्यवसायी संघ पलिस्था जूगु २५ क्यंगु लसताय् संघं हंगु रजत बर्षया समापन थौं जुइत्यंगु दु । यलया शंखमूलय् च्वंगु यल दरवार पार्टी प्यालेसय् थुगु समारोह जुइत्यंगु खः । वाङ्मय शताब्दि पुरुष सत्यमोहन जोशीया मूपाहाँसुइ जुइगु थुगु ज्याझ्वलय् मूपाहाँ जोशीं संघया न्हय्क्वःगु साधारण सभा व स्वक्वःगु अधिवेशनया उद्घाटन नं यानादी ।
थुगु ज्याझ्वलय् वाङ्मय शताब्दी पुरुष जोशीयात विशेष हना देछाइसा नेपाल बार एशोसियशनया नवनिर्वाचित अध्यक्ष चन्देश्वर श्रेष्ठ, ललित हस्तकला प्रदर्शनीइ उत्कृष्ट शरद शाक्य, नेवाः पत्रकार राष्ट्रिय दबूया नवनिर्वाचित नायः सुरजवीर बज्राचार्ययात नं हनीगु ज्याझ्वः दु ।
दच्छि न्ह्यः बाणिज्य तथा आपुर्ति मन्त्री मातृका यादबं थुगु रजत बर्ष समारोहया उद्घाटन यानादीगु खः ।
थाैं जुइगु समापन समाराेहया जानकारी बीत म्हिगः छगू पत्रकार सम्मेलन नं याःगु खःसा बहनी दिपावली नं याःगु ख ।
२०५१ साल पुस ३० गते शनिवार ज्ञानुराज शाक्यया अध्यक्षताय् नेपाल सुनचाँदी ब्यवसायी संघ, ललितपुर शाखाया स्थापना जूगु खःसा २०६९ साल पौषया २५ गते ललितपुर सुनचाँदी ब्यवसायी संघ बिधिवत जिल्ला प्रशासन कार्यालयय् दर्ता यानाः छगू स्वतन्त्र संघकथं थुकिया स्थापना याःगु खः । (किपाः लक्ष्मी श्रेष्ठ)
कन्ह्यनिसे मौसम सफा जुसा सोमवानिसे हाकन वाः वइ
लहनान्युज | पोहेलाथ्व चतुर्दशी ११४० (जनवरी ९ २०२०)
छु न्ह्यनिसे निभा मत्वया वाः वया च्वंगु इलय कन्ह्य निसे मौसम बाला जुसा हाकन सोमवाः निसे न्हुगु प्रणाली दुहा वया वाः वइगु सम्भावना दु धका मौसम पूर्वानुमान महाशाखा धागु दु ।
पश्चिमी वायु दुहा वया न्यूनचापीय प्रणालीया कारण छु दिं हाकन स्वनिगः दुने थीथी थासय् वाः वइ नाप हिमाली भागय् हिमपात व तराई शीतलहर वइ धका न धागु दु ।
सुदूरपश्चिमय् मौसमय् छु सुधार वःसा कन्ह्य निसे देय् या मध्य व पूर्वय् मौसम बालाइ धका धाउगु दु ।
हिउँद इलय् ५–६ गु मौसम प्रणाली हिलिइ ।
थुगु दँय् मेगु दँया स्वया याकन हे मौसम प्रणाली दुहा धका मौसमविद् तयेस धाःगु दु ।
येँ महानरया मेयर बिद्यासुन्दर शाक्यं वडा न १० निरीक्षण
सुरेन्द्रभक्त श्रेष्ठ | पोहेलाथ्व चतुर्दशी ११४० –जनवरी ९ २०२०)
येँँ महानगरपालिकाया मेयर विद्यासुन्दर शाक्यं महानगर दुने जुयाच्वंगु विकास निर्माण व सेवा प्रवाहया स्थलगत अनुगमनयात निरन्तरता बियाच्वंगु दुु ।
थथेहे मेयर शाक्यं वडा नम्बर ७, ९, १६ व २६ या स्थलगत अनुगमन याये धुकुगु दुसा वडा नम्बर १० वना थीथी थासय् स्थलगत अनुगमन न याउगु दु ।
मेयर शाक्यं थः निर्वाचित जुइ धुका नीदँया दुने वडा वडाय् गुकथं विकास निर्माण व ज्या जुयाच्वंगु प्रत्यक्ष जानकारी कायेगु लागि अनुगमन याना वयाच्वंगु खः ।
येँ महानगरया मेयर शाक्यं वडा १० या वडाध्यक्ष रामकुमार केसी, वडा सदस्यपिं सतिस तण्डुकार, सुनिता भित्रकोटी, रोहिनी श्रेष्ठ नाप बुद्धनगर, नयाँ बानेश्वर, गंगादेवी मन्दिर, सहभागिता मार्ग, पुजा–प्रतिष्ठान मार्ग, युएन पार्कय् निरिक्षण यानादिगु खः ।
मेयर शाक्यं ‘येँ महानगर दुने जुयाच्वंगु ज्याया अवलोकन नाप बाँकी दुगु ज्याया कार्ययोजना दयेका योजनाबद्ध रुपं न्ह्यने वनेत थःम्ह प्रत्येक वडाय् निरिक्षण यानागु खः धका धयादिगु खः’ बुद्धनगरया स्थानीय मतदाता नापलाना मेयर शाक्यं ‘एकीकृत विकाश यायेगु लागि जनताया चाहना कथं थःपिं लगे न्ह्यावनाच्वनागु दु धका धयादिसे गन गन मेलम्ची लः हयेगु लागि सडक विभागं गाः म्हुयाच्वगुया कारणं समस्या जुयाच्वंगु धका न धयादिगु खः ।’
मेयर शाक्यं ‘वडा नम्बर–१० या लागि थुगु आर्थिक दँ दुने जक तीन करोडया वजेत विनियोजन यानागु दु धका धयादिसे, ‘हाकन थप एक करोड ५० लाखया ब्यवस्या यानागु दु धयादिगु खः । अथेहे मेयर शाक्यले सिद्धेश्वर महादेव द्यया न्ह्यने निखा छेँय् सतक मिचे याना दयेकुगयात तत्काल हटे यायेत वडा सदस्ययात निर्देशन बियादिगु खः ।
वडा सदस्य सतिस तण्डुकारं नगर प्रहरी लगे याना तत्काल हटे यायेगु प्रतिवद्धता व्यक्त यानादिगुु खःसा वडा सदस्य तण्डुकारं वडा–१० या दुने करीब १ सय ३२ रोपनी सार्वजनिक जग्गा दुगु आः १२–१५ रोपनी जक पत्ता लगे जुगु दु धयादिसे दक्को सार्वजनिक जग्गा मालेगु ज्या जुयाच्वंगु न कनादिगु खः ।
