Display Style:
Column Style
जगतसुन्दर ब्बनेकुथिया २८ क्वःगु बुदिं हन
नृपेन्द्रलाल श्रेष्ठ | सिल्लाथ्व नवमी ११३८ (फ्रेब्रुअरी २४ २०१८)
जगतसुन्दर ब्बनेकुथिया २८ क्वःगु बुदिंया लसताय थौं छगु तःजिक ज्याझ्वः जुगु दु ।
थौं जुगु ज्याझ्वलय् समाजसेवि गह्येश्वरीराज मानन्धर मूपाँहा कथं झायादीगु खः । उगुु ज्याझ्वलय् ब्बनेकुथिइ दँच्छि यक ग्वाहालियापिन्त लहना मिडयाया ब्यवस्थापक सुरेन्द्रभक्त श्रेष्ठ नाप थीथी संस्थायात सुभाय् पौ नं लःल्हाना दीगु खः ।
उगु ज्याझ्वलय् ब्बनेकुथि एसइइ तगिमय् यक्को ल्याः हपि निम्ह ब्बमि पिन्त निगु सिरपा बिरिञ्जि मोति स्मृति सिरपा व शान्ति सिरपा रीकेश श्रेष्ठ व सुजिना तामाङ्गयात लःल्हागु खः ।
ब्बनेकुथि सञ्चालक समितिया दुजः डा. चुन्दा बज्राचार्य लशकुुस यानादीगु उगु ज्याझ्वलय् मूपाँहा गह्येश्वरीराज मानन्धर शान्ति सिरपाया दुजः ज्ञानेन्द्र मानन्धर, पुलाम्ह पिन्सिपल माया मानन्धरं लगायत थःथःगु नुगः खँ तयादीगु ख
लोककवि राजभाइ जकःमिं मचाम्ये न्यकादीगु उग्ु ज्याझ्वः ब्बनेकुथि सञ्चालक समितिया नायः लक्ष्मीदास मानन्धरया सभाधक्ष्य जुगु खः ।
थौं जुगु उगु ज्याझ्वलय् नेपालभाषाय् पौढ शिक्षाया आवश्यकया महशुस यासें पौढ शिक्षाया लागि गह्येश्वरीराज मानन्धर ५० द्धः व लक्ष्मीदास मानन्धर ५० द्ध तका यागु अक्षयकोष स्थापना नं जुगु दु ।
येँ महानगरपालिका सूर्तिजन्य पदार्थ मुक्त शहर घोषणा
लहनान्युज | ने.सं. ११३८ चिल्लाथ्व अष्टमि (२३ फेब्रुअरी २०१८)
येँ महानगरपालिकायात धुम्रपान नापं सूर्तिजन्य पदार्थ मुक्त सहर घोषणा याःगु दु ।
येँ महानगरपालिकाया प्रमुख विद्यासुन्दर शाक्यं थौं शुक्रवाः छगू पत्रकार सम्मेलनय् महानगरयात ‘स्वस्थ शहर’कथं विकास यायेत धुम्रपान नापं सूर्तिजन्य पदार्थ मुक्त सहर घाषणा यानागु जानकारी बियादिल । धुम्रपान नापं सूर्तिजन्य पदार्थ मुक्त सहर घोषणापाखें मानव स्वास्थ्य नापं वातावरणय् लानाच्वंगु लिच्वःयात न्यूनीकरण याना यंकेगु अपेक्षा यानातःगु दु ।
महानगरपालिकां सूर्तिजन्य पदार्थ आयात यायेगु, उत्पादन नापं मीगु व नयेगु/त्वनेगु ज्यायात न्यूनीकरण, नियन्त्रण व नियमन यायेगु तातुनां बुलुम्बर्ग फिलानट्रोपिजया ग्वाहालिइ उगु अभियान न्ह्याकूगु खः ।
प्रमुख शाक्यं नुगःचुया ल्वय्, क्यान्सर, ब्लड सुगर (मधुमेह) थेंजाःगु प्राणघातक ल्वचं बचे यायेत नं थजाःगु अभियान न्ह्याकेमाःगु स्पष्ट यानादिल । विश्व स्वास्थ्य संगठनया तथ्याङ्ककथं हलिमय् नेपाःया मिसापिं दकलय् अप्वः धुम्रपान याइपिं खः ।
नेपाल सरकारं धुम्रपान नियन्त्रण याना यंकेगु ग्वसाःकथं २०४९ सालनिसें हे सार्वजनिक थासय् धुम्रपान यायेगु निषेध याःगु खः । थुगु अभियानपाखें महानगरपालिकाय् धुम्रपान नापं सूर्तिजन्य पदार्थ नयेगु/त्वनेगु ज्या म्हो वइगु विश्वास यानातःगु दु ।
प्रम ओलींया प्रमुख राजनीतिक सल्लाहकारय् विष्णु रिमाल
लहनान्युज सिल्लाथ्व अष्टमी ११३८ (फेबु्रअरी २३ २०१८)
प्रधानमन्त्री केपी शर्मा ओलीं प्रमुख राजनीतिक सल्लाहकारय् विष्णु रिमाल नियुक्त याःगु दु ।
थौं सुथय् च्वंगु मन्त्रिपरिषदया बैठकं एमाले पोलिटव्यूरो दुजः रिमालयात प्रमुख सल्लाहकारय् नियुक्त यायेगु निर्णय याःगु खः ।
रिमाल थ्व स्वया न्ह्यः न ओलीेया कार्यकालय् राजनीतिक सल्लाकार जुयादीं धुकुगु खः ।
बंगलादेश राजदुताबासय् कवि गोष्ठी
लहनान्युज | चिल्लाथ्व सप्तमी ११३८ (फेब्रुअरी २२ २०१८)
विश्व मातृभाषा दिवसया लसताय् बंगलादेश राजदुताबास व नेपालभाषा परिषद्या मंकाः ग्वसालय् १९ क्वःगु अन्तरराष्ट्रिय मातृभाषा दिवस बंगलादेश राजदुतावासया प्राङ्गणय् बहुभाषिक कवि गोष्ठी जूगु दु ।
थीथी देय्या महामहिम व बरिष्ठ पाहाँपिसं ब्वति काःगु उगु ज्याझ्वलय् बंगलादेशया महामहिम मासेफे विन्त श्यामं लसकुस न्वचू तयादीगु खःसा बंगलादेशया बरिष्ठ संगीतकार पाखें बंगाली म्य न्यंकाः ज्याझ्वः झःझः धायेक हंगु दु ।
नापं बहुभाषिक कवि गोष्ठी नं जूगु दु । थुगु कवि गोष्ठीइ नेपालभाषा, नेपाली, अवधि, तामाङ्ग, गुरुङ्ग, राई भाषाया चिनाखँ ब्वनेगु ज्यानं जूगु खः । ज्याझ्वलय् कविपिं नां प्रतिसरा साय्मि, रजनी मिला, नारद बज्राचार्य, सुधिर ख्वबी, बंशीधर बज्राचार्य, दिब्या ताम्राकार लगायतयापिसं चिनाखँ ब्वनाः न्यंकादीगु खःसा । नेपालभाषा परिषद्या छ्याञ्जे नविन चित्रकारं ज्याझ्वः न्ह्याकादीगु खः ।
ज्याझ्वलय् महामहिम राजदुत मासेफे पाखें ज्याझ्वलय् ब्वतिकयादीपिं सकलसित लसतापौ लःल्हानादीगु खः । अन्तय् महामहिम पाखें परिषद्या छ्याञ्जे चित्रकारयात बोकेन लःल्हानादिसें नेपालभाषा परिषदं नेपालभाषा ख्यलय् यानाच्वंगु योगदानया नं तसकं प्रसंसा यानादिल ।विश्व मातृभाषा दिवसया लसताय् साहित्यिक ज्याझ्वः
लहनान्युज | चिल्लाथ्व सप्तमी ११३८ (फेब्रुअरी २२ २०१८)
विश्व मातृभाषा दिवसया लसताय् येँया जनबहाःलय् नेपालभाषाया साहित्यिक व सांस्कृतिक ज्याझ्वः जूगु दु ।
केलत्वाःया नेपाःमिपिनिगु ग्वसालय् भाषानिभाः प्रेमबहादुर कसाःया सच्छि दँ व महाकवि सिद्धिदास महाजुया १५० गूगु बुदिंया नापं विश्व मातृभाषा दिवसया दिंया लसताय् ज्याझ्वः जूगु खः ।
शरद कसालं न्ह्याकादीगु उगु ज्याझ्वलय् साहित्यकारपिं राजा शाक्य, डा. पुष्पराज राजकर्णिकार, भुषणप्रसाद श्रेष्ठ, लाभरत्न तुलाधर, शाक्य सुरेन, शशिकला मानन्धर, शरद कसाः, सुरेश किरण मानन्धर, रजनी मिला, कृष्णभक्त बोदे, महर्जन, राजभाई जकःमि, रामेश्वर मिश्रण श्रेष्ठ, अर्जुन नेपाःमि, रेणु श्रेष्ठ, सुरेशकिरण मानन्धर, आशाकाजी महर्जन, किरण साय्मि लागायतपिन्सं थःथःगु साहित्यिक च्वसु ब्वनाः न्यंकादीगु खः ।
अथेहे, उगु ज्याझ्वलय् भृगुराम श्रेष्ठ, जुजुकाजी रञ्जित, सुरज वीर बज्राचार्य, सरिता शाही, कृष्ण महर्जनपिन्सं म्य हालाः न्यंकादीगु खः ।
ज्याझ्वलय् आनन्दसिद्धि तुलाधरं भाषानिभाः प्रेमबहादुर कसाःया संघर्षशील जीवनया विषयस थःगु नुगःखँ तयादीगु खःसा पवित्र कसालं सुभाय् न्वचू तयादीगु खः ।
बुखँ ः नेवाः सूचना केन्द्र
किपा ः राजेन्द्र रञ्जित
