Display Style:
Column Style
विसि क्याप्सया झिक्वःगु अभिभावक दिवस
नृपेन्द्रलाल श्रेष्ठ | सिल्लाथ्व द्धादशी ११३९ (मार्च १८ २०१९)
विसि क्याप्स मन्टेश्वरी स्कूलया झिक्वःगु अभिभावक दिवस येँया राष्ट्रिय नाचघरय् जूगु दु ।
स्कूलया निर्देशक राजु महर्जनया सभाध्यक्षताय् न्ह्याःगु उगु ज्याझ्वलय् येँ महानगरपालिकाया महानगरीय सहकारी विभागया प्रमुख सुमन अधिकारी विशेष पाहाँकथं झायादीगु खः ।
ब्वनेकुथिया संयोजक तुलसा ढुंगानां लसकुस यानाः न्ह्याकूगु ज्याझ्वलय् स्कूलया प्रिन्सिपल बिमा महर्जनं सुभाय् देछायादीगु खः ।
स्कूलया ब्वँमिपिन्सं थीथी म्ये, हुलाप्याखंलिसें क्यारिकेचर आदि न्ह्यब्वःगु उगु ज्याझ्वः रुद्र धमलां न्ह्याकादीगु खः ।
समीतपाखें तल वल्र्ड रेकर्ड
लहनान्युज | सिल्लाथ्व द्धादशी ११३९ (मार्च १८ २०१९)
गुरुकुल पब्लिक स्कूलया समीत तिमिल्सिनां छगू मिनेटय् सच्छिम्ह स्वयां अप्वः मनूतय्त घय्पुयाः वल्र्ड रेकर्ड तःगु दु ।
येँया तारकेश्वर नगरपालिका, नेपालटारय् च्वंगु गुरुकुल पब्लिक स्कूलया च्यागू तगिमय् ब्वनाच्वंमह १४दँ दुम्ह तिमिल्सिनां छगू मिनेटया दुने ११३म्ह मनूतय्त घय्पूगु खः ।
पुलांम्ह रक्षामन्त्री भीमसेनदास प्रधान मूपाहाँलिसें तारकेश्वर नगरपालिकाया प्रमुखया विशेष पाहाँकथं झायादीगु उगु ज्याझ्वलय् तिमिल्सिनां उगु रेकर्ड तय्त ताःलाःगु खः । थ्व स्वयां न्ह्यः
अमेरिकाया जसोन राइटरं सन् २०१७ अक्टोबलय् ८६म्हेसित घय्पुयाः तःगु वल्र्ड रेकर्डयात समीतं त्वाःथःगु दु ।
ज्याझ्वलय् समीतया सफलताया नितिं विद्यालय परिवार, वय्कःया अभिभावकलिसें विशिष्ट पाहाँपिन्सं भिन्तुना देछासें देय् व ब्वनेकुथिया प्रतिष्ठा थकाय्गु नितिं महत्वपूर्ण योगदान ब्यूगुलिं लसता प्वंकूगु दु ।
सः छगू फरक साहित्यिक ज्याझ्वः
लहनान्युज | एकादशी ११३९ (मार्च १७ २०१९)
साहित्यया बिकासया नितिं प्यक्वःगु ज्याझ्वः सः छगू फरक अभिव्यक्तिया ग्वसालय् शनिवाः इखालखु, यलय् स्वम्ह बाखं च्वमी पाखे चिबाखं ब्वने ज्या जूगु दु ।
उगु ज्याझ्लय् बाखंच्वमिपिं गोविन्द मान श्रेष्ठं (क्या फसाद, पुस्तान्तरण, छिगु गन्तव्य, धौ खुँ नेताजु न्हूगु नेपाः), प्रेम कृष्ण निडरं (त्वःता तःपिं दोहंत, खिचाच, सः, भुत ल्वहं, इज्जत), रत्न कोजुं (पालिका बुल्डोजर, घाः व भुजिं, हाकुम्ह भौ, हाइब्रीड वा पुसा तुती ख्वः मदुगु खाता याना न्यापु न्यापु चिबाखं ब्वनाः न्यंकादीगु खः ।
ज्याझ्वलय् बाखच्वंमिपिन्त कवि सुधिर ख्वविं मतिनायाचिं लःल्हानादीगु खःसा ब्वति कयादीपिं मध्ये लुमन्तिचिं धन लक्ष्मी महर्जनं सुनिल महर्जनयात लःल्हानादीगु खः । नर्मदेश्वर प्रधानं उगु ज्याझ्वः न्ह्याकादीगु खः ।
बुखँ – नेवाः सूचना केन्द्र किपा – राजेन्द्र रञ्जित
फोनिज ३ नम्बर प्रदेशया अध्यक्षय् पेमा
नृपेन्द्रलाल श्रेष्ठ | एकादशी ११३९ (मार्च १७ २०१९)
नेपाल आदिवासी जनजाति पत्रकार महासङ्घ(फोनिज) ३ नं प्रदेश नुवाकोटय् जुगु न्हांपागु महाधिवेशय् पेमा लामायात अध्यक्षय् ल्यःगु दु । शुक्रवाः चान्हय क्वचाःगु अधिवेशनय् लामाया अध्यक्षताय् २० म्हसिया कार्यसमिति निर्विरोध ल्यःगु खः ।
उगु कार्यसमिति उपाध्यक्ष युवराज श्रेष्ठ, मिसा उपाध्यक्ष अन्जु डिम्दोङ, महासचिव सुरजकुमार भुजेल, सङ्गठन सचिव पूर्णिमा स्याङ्बा, संस्थागत सचिव श्याम रानामगर, कोषाध्यय् पूर्णभक्त दुवालयात सर्वसम्मत ल्यःगु खः ।
अथेहे दुजलय् बाबुकाजी श्रेष्ठ, विनोद श्रेष्ठ, सहिला तामाङ, रामशरण माझी, लक्ष्मी शाक्य, सम्झना श्रेष्ठ, कुन्जला पुलामी, डोल्मा शेर्पा, राजेश रुम्बा तामाङ, जीवन लिम्बू, नवीन रानामगर, राजेश बज्राचार्य, पुष्पा राई हाययात न सर्वसम्मत ल्यःगु खः ।
उगु अधिवेशनं दिलबहादुर लामाया संयोजकत्वय् स्वम्हेसियाःगु अनुशासन समिति न ल्यःगु दु । समितिया दुजलय् राजकुमार शाक्य व रिदेन महर्जनयात ल्यःगु खः ।
नवनिर्वा्चित कार्यसमितिले शुक्रबार नै पद तथा गोपनियताको शपथ लिएका छन् । शनिवाः छगु ज्याझः यासे न्हुपि निर्वाचित पिन्त प्रमाण पत्र लःल्हाना पद व गोपनियताया शपथ नकुगु खः ।
शुक्रवाः जुगु उगु अधिवेशनय् ३ नं प्रदेशया १३ जिल्लाया १२० प्रतिनिधि व पर्यवेक्षकपिन्सं ब्बति काःगु खः ।
उगु अधिवेसनय् दोलखाया पत्रकार राजेन्द्र मानन्धर, फोनिज जिल्ला समिति रासस जिल्ला प्रतिनिधि नवदीप श्रेष्ठ व कान्तिपुर टेलिभिजनया जिल्ला संवाददाता राजकृष्ण श्रेष्ठयात न हने ज्या याःगु खः ।
सांसद भूमिकायात जनतां युगयुग तक लुमंकी : जनकवी श्रेष्ठ
नृपेन्द्रलाल श्रेष्ठ | एकादशी ११३९ (मार्च १७ २०१९)
सङ्घीय समाजवादी फोरमया सहअधक्ष्य लिसें प्रतिनिधिसभाया सांसद राजेन्द्र प्रसाद श्रेष्ठयात वय्कलं पहिचान व संघीयताया आन्दोलनलिसें नेवाः आन्दोलनय् यानादीगु योगदानयात कदर यासे येँया लाय्कुलिइ छगू तःजिगु ज्याझ्वः याना थीथी नेवाः संस्थातपाखें मंकाः कथं हंःगु दु ।
वयकलं ताः ई न्ह्यवंनिसें जुयाच्वंगु नेपालभाषा आन्दोलनया मागयात देय्या संघीय संसदय् सः तयेगु लिसें सरकारं हःगु विधेयकय् मांभासं आखः ब्वनेगु खःसा सम्बन्धित जातिं हे स्कूल चायेके माः धकाः हःगु विधेयकया विरोध यासे संघीय व्यवस्थाय् मां भाषं आखः ब्वंकेगु जिम्मेवारी सरकारं हे कायेमाः धकाः संशोधन प्रस्ताव तयाः पारित याकेत ताः लाःगु ख ।
सङ्घीय गणतन्त्रय् समेत नेपाल कम्युनिष्ट पार्टी नेतृत्वया सरकारं मांभासं आखः ब्वंकेगु निंतिं दायित्व कायेगु पल्सा संस्कृत शिक्षायात अलग विधा जुइगु यानाः विधेयक दर्ता याःगुलि वयकलं भाषिक उत्पीडनं मुक्तिया निंतिं विधेयकय् संशोधन दर्ता यानाः संस्कृत शिक्षायात शिक्षाया अलग विधा कथं स्थानीय तहलं चाय्कीगु स्कूलय् तकं महत्त्व बिया हःगु विधेयकं संस्कृत विधा लिकायेकेत विशेष भुमिका म्हिता दीगु खः ।
अथे हे भविष्यय् मुआब्जा ब्युसां जिइगु यानाः सतक विस्तारया नामय् नेवाःतय्त विस्थापित यायेछिंक सरकारं हःगु आवास सम्बन्धी विधेयकयात न राज्यया अधिनायवादी सोच धकाः विरोध याःसे वय्कलं संशोधन दर्ता याकाः पीडिततय् पक्षय् विधेयक संशोधन याकेत ताःलाःगु खः ।
ज्याझ्वलय् मूपाहां जनकवि दुर्गालाल श्रेष्ठजुं सांसद भाजु राजेन्द्र श्रेष्ठं जातीय मुक्ति आन्दोलनय् तःधंगु भूमिका म्हितूगु दु, मांभासं आखः ब्वंके दइ कथं कानुन दय्केत गुगु ऐतिहासिक भूमिका म्हितल व जनतां युगयुग तक लुमंकी धयादिसें मेपिं सांसदतसें न वय्कःया अनुकरण यायेमाः धया दिल ।
उगु हना ज्याझ्वलय् थःगु नुगः खँ न्ह्यब्वसे सांसद राजेन्द्र श्रेष्ठं नेवाःतय्गु लागां त्याका वंपिं अप्वःधइथें जनप्रतिनिधित ‘छेँय् धुं पिने छुं’ जुयाच्वंगु धासें झीगु न्ह्यनय् जि नेवाः खः, जिं थ्व याये व याये धाइगु तर थासय् थ्यन कि थःगु पार्टीं छुं धाइला धका जातीय उत्पीडनया विरुद्ध सः तय्त ग्याःगु खँ कना दिल । वय्कलं ’छुं’ प्रवृत्तिया मनूतसें समाजया निंतिं छुं हे यायेफइमखु धया दिल ।
नेता श्रेष्ठं पहिचान विरोधीतय्पाखें पहिचानया आशा याइपिंत संकेत यासे जनजाति मुख्यमन्त्री जुयाच्वंथाय् हे गण्डकी नां छुनाः पहिचानया आन्दोलनयात धोका बिउगु खँ कना दिल । वयकलं झीगु न्ह्यनय् माकक्क खँ ल्हाइपिन्त मखु उत्पीडित जनताया अधिकारया निंतिं सः तइपिन्त तिबः बिइ फयेके माः धासें थौंकन्हे ३ नम्बर प्रदेश नेवाःताम्सालिङ वा नेपालमण्डल जुइमाः धकाः हालां छु याये, ‘गोम्प ज्वना धम्प जाइमखु’ धया दिल ।
नेवाः न्ह्यलुवा श्रेष्ठं थःम्हं छुं तःधंगु ज्या मयानागु धासे नेपालभाषा आन्दोलनया कार्यकर्ता व नेवाः जुयागुया कर्तब्य जक पूवंकागु खँ कंसे संघीयता वये धुंका न्हापाथें फुक्क तगिंया शिक्षा केन्द्रया ब्वहलय् मजूसे प्रदेशया ब्वहलय् प्रदेश विश्वावद्यालय व उच्च शिक्षा अले स्थानीय तहया ब्वहलय् १२ गू कक्षा तकया माध्यमिक शिक्षा दुगु खँ कना दिल । वयकलं आः १२ गू कक्षा तक ब्वंकेगु लागि स्थानीय तहलं मांभासं आखः ब्वंकेगु स्कूल चायेकेत संघीय कानुन दयेके धुंगु खँ कना दिसे स्थानीय तहयात न्ह्यलं चायेकेगु ज्या यायेत न इनाप याना दिल ।
मंकाः ग्वसाः खलःया कजि भाजु श्रीकृष्ण मानन्धरया नायःसुइ जूगु उगु ज्याझ्वलय् नेवाः राजनीतिक अभियानया संरक्षक डा. महेशमान श्रेष्ठ, नेपालभाषा मिसा खलःया नायः मंगला कारंजीत, नेपालभाषा मंका खलः यलया नायः ऋपि प्रसाद श्रेष्ठ लगायतया वक्तापिसं न सांसद श्रेष्ठया भूमिकायात च्वछाया दिइगु खः । ज्याझ्व अभियानया छ्याञ्जे विद्या चित्रकारं न्ह्याकादीगु खःसा शिक्षा गुथिया नायः विष्णु चित्रकारं लसकुस यानादीगु खः ।
