Display Style:
Column Style
परियत्ति शिक्षायात मनपाया ग्वाहालि
लहनान्युज | पोहेलाथ्व एकादशी ११४० (जनवरी ६ २०२०)
येँ महानगरपालिकां बौद्ध परियत्ति शिक्षा प्रवद्र्धनया लागिं आर्थिक ग्वाहालि लःल्हाःगु दु । आइतवाः येँया विश्वशान्ति विहारय् जूगु जूगु छगू ज्याझ्वःया दथुइ येँ महानगरपालिकाया मेयर भाजु विद्यासुन्दरं परियत्ति शिक्षा सञ्चालन याना वयाच्वंगु निकाय अखिल नेपाल भिक्षु महासंघया नायः भिक्षु मैत्री महास्थविरयात २३ लाख ६५ हजार तकाया चेक लःल्हानादिल ।
ज्याझ्वलय् न्ववासें मेयर शाक्यं भगवान बुद्धया आधारभूत परियत्ति शिक्षायात येँ महानगरपालिका अन्तर्गत लाःगु स्कूलय् नं नैतिक शिक्षाया रुपय् समावेश याना यंकेमाःगु खँय् बः बियादिल । परियत्ति शिक्षायात बियागु थ्व ग्वाहालि शुरुवात जक खः धासें वय्कलं लिपा थुकियात बढे यानाः यंके फइगु खँ नं कनादिल ।
अखिल नेपाल भिक्षु महासंघया नायः भिक्षु मैत्री महास्थविरया सभापतित्वय् जूगु उगु ज्याझ्वलय् अनगारिका ञाणवति गुरुमांनं परियत्ति शिक्षाया महत्व बारे कनाबिज्याःगु खःसा परियत्ति शिक्षाया परीक्षा नियन्त्रक भिक्षु वोधिज्ञान महास्थविरं मनपाया थ्व ग्वाहालिपाखें परियत्ति शिक्षाया विस्तारय् तःधंगु ग्वाहालि जुइगु खँ कनादिल ।
थौंकन्हय् नेपाःन्यंकं २२ गू जिल्लाय् ११४ गू परियत्ति शिक्षा केन्द्र सञ्चालन जुयाच्वंगु दुसा दँय् न्याद्वः परिक्षार्थीपिंसं थुकिया परीक्षा बीगु यानाच्वंगु दु । कपिलवस्तु जिल्लाया देवदह नगरपालिकां थौंकन्ह थःगु नगर अन्तर्गत लाःगु फुक्क हे स्कूलय् ६, ७ व ८ तगिमय् नैतिक शिक्षाया रुपय् परियत्ति शिक्षा ब्वंकेगु यानाच्वंगु दु ।
मेलम्चीइ मिखाया शल्यक्रिया ज्याझ्वः
बाबुकाजी श्रेष्ठ | पोहेलाथ्व एकादशी ११४० (जनवरी ६ २०२०ं
सिन्धुपाल्चोकया मेलम्ची नगरपालिका, तिलगंगा सामुदायिक आँखा केन्द्रया परिसरय् बृहत स्वास्थ्य शिविर जुल ।
वंगु पौष ४ गतेनिसें स्वास्थ्य चौकी दुवाचौर, एकीकृत स्वास्थ्य सेवा केन्द्र पिपले, ईन्द्रावती जनसेवा समिति टिपेणी, हेलम्बू गाउँपालिका किउल, चिलाउनेघारी स्वास्थ्य केन्द्र हेलम्बू, स्वास्थ्य चौकी तीनधरे बाडे गाउँ, स्वास्थ्य चौकी सिपाघाट यानाः च्यागू थासय् मिखाया परीक्षण शिविर न्ह्याकूगु खः ।
थ्व हे झ्वलय् शल्यक्रिया याय्माःमिपिं मोतियाविन्दु ल्वगिपिं ११५म्हेसिगु तिलगंगा आँखा प्रतिष्ठानया वरिष्ठ मिखा ल्वय्या विशेषज्ञ डा. सृजना अधिकारींया नेतृत्वय् सफल शल्यक्रिया जूगु खः ।
ज्याझ्वलय् बृहत स्वास्थ्य शिविर यासें मस्तय्गु ल्वय्, जनरल, छातीलिसें गंल्वय्, हाडजोर्नी व खै परीक्षण यानाः वासः नं सितिकं इनेगु ज्या जूगु खः । थ्व हे झ्वलय् शारीरिककथं अशक्त जूपिं ५गू थान ह्विलचियर नं लःल्हाय्गु ज्या जूगु खः ।
सक्वय् श्री माधवनारायण मेला न्ह्याइगु
लहनान्युज | पोहेलाथ्व एकादशी ११४० (जनवरी ६ २०२०ं
नेवाःतय्गु ऐतिहासिक वस्ती सक्वय् दँय्दसं थें श्री माधवनारायण स्वस्थानी ब्रतलिसें माघ कुम्भ मेला थ्व हे पौष २५गते निसें न्ह्याइगु जूगु दु ।
श्री माधवनारायण स्वस्थानी ब्रत तथा शालीनदी सुधार समितिं वंगु सञ्चरवाः छगू पत्रकार सम्मेलन यानाः उगु मेलाया व्यवस्थापन पक्ष फुक्कं तयारी जुइधुंकूगु जानकारी ब्यूगु दु ।
समितिया निवर्तमान नायः राजुभाइ मानन्धरं थगुने थ्यंमथ्यं स्वीगू लख भक्तजनपिं दर्शन याःवःगुलिं उकियात ध्यानय् तयाः लँ दय्केगुलिसें ७५गू प्रतिशत लँ पीच जुइधुंकूगुलिं थुगुसी अप्वः भक्तजनपिं वइगु अपेक्षा यानादीगु दु ।
सम्मेलनय् शंखरापुर नगरपालिकाया प्रमुख सुवर्ण श्रेष्ठं मेलाया नितिं शान्ति सुरक्षा, स्वास्थ्य, सार्वजनिक यातायातया व्यवस्थापनया तयारी पूवनेधुंकूगु जानकारी बियादिल । वय्कलं छुं छुं थासय् लँ मछिनाच्वंगुलिं उगु थासय् अल्पकालीनकथं जूसां लँ दय्काः भक्तजनपिन्त अःपुकेगु नितिं तीब्र गतिं ज्या यानाच्वंगु धयादिल ।
तसकं थाकुगुकथं कयातःगु थुगु स्वस्थानी ब्रतय् ब्रत च्वनीपिनिगु नितिं विशेष व्यवस्था यासें पुजाज्वलं, च्वनेगु थाय्, म्वः ल्हुइगु, चःविनिसें भक्तजनपिन्त होटलं यःयःथे धेबा काःगुलिं उकियात
ध्यानय् तयाः होटल, खाजाघरय् अनिवार्यकथं मूल्यसूची तय्माःगु व उकिया अनुगमन याइगु नं समितिं जानकारी ब्यूगु दु ।
थ्व हे झ्वलय् शालीनदी क्षेत्रय् प्यंगु शंखाकारया पुखू व स्तम्भलिसेंया व्यवस्थित पार्क दय्कीगु नं जानकारी ब्यूगु दु ।
वँय् सु ? नाटक सफू पितब्बज्या
नृपेन्द्रलाल श्रेष्ठ | पोहेलाथ्व सप्तमी ११४० –जनवरी २ २०२०)
मेरो साप्ताहिक पत्रिकाया ग्वसालय् पत्रकार रत्नकाजी ‘मन’ या नाटक मुना सफू ‘वँय् सु ?’ येँ महानगरपालिकाया मेयर विद्या सुन्दर शाक्यं छगु ज्याझ्वः दथुइ पितब्वज्या यानादीगु दु ।
च्वमि रत्नकाजी ‘मन’या सभानायःसुइ तेज महर्जनं न्ह्याकादीगु ज्याझ्वलय् विजय सिंह लसकुस न्वचू तयादिलसा नेवाः मिडिया क्लबया नायः सन्त कुमार महर्जनं सफूया समालोचना यानादीगु खः ।
अथेहे उगु ज्याझ्वलय् विशेष पाहाँकथं च्वमिंया मां रत्न देवी महर्जन व अबु भाइकाजी महर्जन, येँ मनपा १८ वडाध्यक्ष न्हुच्छेकाजी महर्जन, १५ वडाध्यक्ष ईश्वरमान डंगोल, नेवाः पत्रकार राष्ट्रिय दबूया केन्द्रीय नायः सुरजवीर बज्राचार्य व येँया नायः अरबिन्द्र मान सि झायादीगु खः ।
कन्हयनिसें भुइख्यलय् स्वयम्भु साँस्कृतिक ज्याझ्वः जुइगु
नृपेन्द्रलाल श्रेष्ठ | पोहेलाथ्व पंचमी ११४० (दिसेम्वर ३१ २०१९)
‘स्वयम्भू वने, नेपाल पर्यटन दँ हने’ नारालिसें येँ महानगरपालिका वडा १५ व महानगरीय प्रहरी वृत्तया मंकाः ग्वसालय् कन्हयनिसें छवाःयंक स्वयम्भूइ साँस्कृतिक ज्याझ्वः लिसें महोत्सव जुइत्यंगु दु ।
बिश्व सम्पदा क्षेत्र स्वयम्भूइ ऐतिहासिकता, मौलिकता, धार्मिक सहिष्णुता व स्थानीय जातीय बिधिधताया प्रचार प्रसार यायेगु आज्जुं कन्हयनिसें सप्ताहव्यापी सांस्कृतिक ज्याझ्वः यायेगु ग्वसाः खलकं न्ह्यथंगु दु ।
थौं जूगु पत्रकार सम्मेलनय् येँ महानगरपालिका वडा १५ या अध्यक्ष लिसें येँ महानगरपालिकाया प्रवक्ता ईश्वरमान डंगोलं वडा कार्यालयलिसें महानगरीय प्रहरी वृत्त स्वयम्भू, महानगरीय ट्राफिक प्रहरी वृत्त स्वयम्भू, सामुदायिक प्रहरी सेवा केन्द्र स्वयम्भूलिसे जानाः कन्हय् बुधबाःनिसें छवाःयंक महोत्वस न्ह्याकेत्यनागु धयादिल ।
पर्यटन प्रवद्र्धनया आज्जुं जुइत्यंगु महोत्सव होटल व्यवसायी, विद्यालय व १५ वडाया थीथी संघसंस्थालिसे सहकार्य व स्थानीयया हे सहभागिताय् सञ्चालन जुइगु जानकारी नं वडाध्यक्ष डंगोलं बियादिल ।
समुदाय प्रहरी साझेदारी अवधारणा अन्तर्गत न्ह्याइगु थुगु ज्याझ्वलं समाजय् घरेलु हिंसा, यौन हिंसा थेंजाःगु सामाजिक अपराधया ख्यलय् सचेतना हयाः शान्ति सुरक्षा कायम यायेत ग्वाहालि जुइगु बिश्वास डंगोलं प्वंकादिल ।
नुगः खँ तयेगु झ्वलय् महानगरीय प्रहरी वृत्त स्वयम्भूया प्रहरी नायव उपरीक्षक लालध्वज सुवेदीं थुगु ज्याझ्वलं समुदायलिसे सम्बन्ध अझ क्वात्तुयावनीगु बिश्वास प्वंकादिल ।
संस्कृति पर्यटन तथा नागरिक उड्डयन मन्त्री योगेश भट्टराईं कन्हय् सुथय् भुइख्यलय् महोत्सवया औपचारिक उलेज्या यायेगु ज्याझ्वः दुसा कामपा प्रमुख बिद्यासुन्दर शाक्यं सभाध्यक्षता यानादी ।
