देयन्यक पश्चिमी व पहाडी भेगय् स्थानीय वायुया सामान्य प्रभाव दुगुलि जल नाप मौसम विज्ञान विभागं गण्डकी व कोशी प्रदेशया पहाडी भागय् भचा ह्यूपाः वःगुलि मेथाय् मौसम सफा जुइ धका धाःगु दु।

नापं तराईया छु भचा थासय् भचा वाः वयेफु धका धाःगु दु। विभागया कथं थौ न्हिनय् कोशी, बागमती, गण्डकी प्रदेशया पहाडी भागय् वा वयेफु मेथाय् मौसम बालाइ धका धाःगु दु।

कोशी व गण्डकी प्रदेशया पहाडी भागय् छगु निगु थासय् भचा वा वयेफु धका धाःगु दु।

दैलेख जिल्लाया भैरवी गाउँपालिका –१ जलजया क्षेत्रय्  पेट्रोलियम पदार्थया अन्वेषणअन्तर्गत ‘ड्रिलिङ’य् ७९ प्रतिशत ज्या क्वचाःगु दु।

४ हजार मिटर क्वय् तक ‘ड्रिलिङ’ यायेमाःगुलि आःतक ७९ प्रतिशत ‘ड्रिलिङ’ या ज्या क्वचाःगु दु धका खानी तथा भूगर्भ विभाग अन्तर्गतया पेट्रोलियम परियोजना महाशाखा प्रमुख गणेशनाथ त्रिपाठीं धाःगु दु। ४ हजार मिटर क्वय् तक ड्रिलिङ याये धुका जक पेट्रोलियम पदार्थ दु वा मदु धइगु सिइ दइ। चीन सरकारं २ अर्ब ५० करोड अनुदानय् पेट्रोलियम पदार्थया अन्वेषण जारी याःगु खः।

महाशाखा, चाइना जियोलोजिकल सर्भे व सिबु ड्रिलिङ इन्जिनियरिङ कम्पनीं ‘ड्रिलिङ’ जारी याःगु खः। अथेहे, कर्णाली प्रदेशया मुख्यमन्त्री यामलाल कँडेलं आयोजनास्थल वना पेट्रोलियम अन्वेषणय् ज्याया प्रगतिबारे जानकारी कयादीगु खः।

प्रदेशया मुख्यमन्त्री बहादुरसिंह लामायात नेपाल कम्युनिष्ट पार्टी (माओवादी केन्द्र) बागमती प्रदेशया संसदीय दलया प्रतिनिधितय्सं सरकारं जनता केन्द्रित ज्या सम्पादन यायेमाः धकाः ध्यानाकर्षण पौ लःल्हागु दु।

थौं मुख्यमन्त्री ज्याकुथि हेटौँडाय् ज्ञापनपत्र लःल्हानाः संसदीय दलया नेता शालिकराम जम्कट्टेलं सरकार गठन जूगु सच्छिन्हु जूगु धासें प्रदेशया फुक्क विकासय् सरकार केन्द्रित जुइमफूगु धयादिल। वय्कलं सरकार सङ्घीयताया मर्म व भावना कथं न्ह्यागू मदु धका धयादीगु खः।

दलया नेता जम्कट्टेलं विकासया आकांक्षा व आवश्यकतायात सम्बोधन यानाः सरकार न्ह्यःने वनेमाःगु नं न्ह्यथनादिल । च्यागू बुँदाया मागनापं थीथी विषयस ज्ञापनपौ लःल्हानाः दलं थी थी इलय् सर्वदलीय बैठकं क्वःछ्यूगु निर्णय याकनं हे कार्यान्वयन यायेमाःगुली ध्याना सालादिल।

ध्यानाकर्षण पौतय् सङ्घीयताया संस्थागत शुद्धीकरण, सुशासन व प्रदेशया विकासय् केन्द्रित जुइमाःगु खँत दु। वंगु असोज ११ व १२ गते वःगु खुसिबाः व चलखं प्रदेशया थी थी जिल्लाय् जनधनया तःधंगु क्षति जूगु न्ह्यथसें पीडितया समस्यायात याकनं संबोधन यायेत माग याःगु खः।

शेयर बजाः थौ न घटे जूगु दु। शेयर बजाः परिसूचक नेप्से थौ १४ दशमलव १२ ल्याखं कुहावया २ हजार ७ सय ३४ दशमलव ८३ विन्दुइ थ्यःगु दु।

थौ विकास बैंक, फाइनान्स, जलविद्युत् व म्युचल फन्ड बाहेक दक्को समूहया शेयर घटे जूगु दु। अथेहे बीमा, उत्पादन, व्यापार समूहया शेयर यक्को ल्याखं थहावंगु दु।

कुथेली बुखारी हाइड्रोपावर कम्पनीया शेयर १० प्रतिशतं कुहावंगु दु। समग्रय् बजाः कुहावंसा सप्तकोशी विकास बैंक, शृजनशील लघुवित्त, मकर जितुमाया सुरी हाइड्रोपावर, पोखरा फाइनान्स व समृद्धि फाइनान्स कम्पनीया शेयर धाःसा १० प्रतिशतं थहावंगु दु।

३०८ गु कम्पनीया १ करोड ५३ लाख कित्ता शेयर ७ अर्ब ९१ करोड तकाया कारोबार जूगु दु। थौ दकलय् अप्पो जानकी फाइनान्स कम्पनीया ३३ करोडया शेयर कारोवार जुगु दु।

प्रधानमन्त्री केपी शर्मा ओलीं कर्णाली स्वास्थ्य विज्ञान प्रतिष्ठानयात अझ प्रभावकारी कथं चले यानाः गुणस्तरीय शिक्षा व स्वास्थ्य सेवा बिइगु प्रतिवद्धता प्वंकादीगु दु।

प्रतिष्ठानया न्हापांगु दीक्षान्त समारोहयात संबोधन यानाः प्रतिष्ठानया कुलपति नापं जुयादीम्ह प्रधानमन्त्री ओलीं कर्णालीया जनतां थःगु थासय् गुणस्तरीय स्वास्थ्य सुविधा कायेफूगुलिं खुसी जूगु कनादिल। वय्कलं धयादिल, “राकम कर्णालीइ सच्छिगू खाताया अस्पताल दयेकेगु प्रक्रिया न्ह्याये धुंकूगु दु।” प्रधानमन्त्री ओलीं प्रतिष्ठानय् माःगु थप सेवासुविधा बिइत सरकार कटिबद्ध दूगु धयादिल।

प्रतिष्ठानया परिकल्पनानिसें हे थःम्हसिनं स्यूगु व हाथ्यातय् दथुइ न्हापा थः प्रधानमन्त्री जूबलय् चिकित्सा शिक्षा आयोगया बैठकं स्वीकृति यानाः प्रतिष्ठानय् चिकित्सा कक्षा चले जुयाः न्हापांगू दीक्षान्ततक थ्यंगुलिं वय्कल लसता प्वंकादिल। “मांबौया लगानी, आशा व भलसा नापं छिकपिनिगु मेहनत व लगावया हुनिं थौं थ्व सफलता चूलाःगु दु। दीक्षित ब्वनामित हरेक थासय् ताःलानाः न्हून्हूगु कीर्तिमान तयेफइगु जिं भलसा कयागु दु।

थ्व ताः लाये धुंका तापाक्क तापाक्क च्वंपिं जनतातय्त नं गुणस्तरीय स्वास्थ्य सेवा बियादिसँ।” दीक्षित जूपिन्त प्रधानमन्त्री ओलीं इनाप यानादिल, “जि तसकं लय्ता याःगु दु, कर्णाली न्ह्यःने वयाच्वंगु दु। कर्णाली व सुदूरपश्चिमनापं १३ गू जिल्लाया जनतां थनं स्वास्थ्य सेवा दइगु असम्भव थें तायेकाच्वंगु म्हगसः पूवंगु दु। आः थुकियात अझ प्रभावकारी कथं चले यायेगु झीपिं सकसिगुनं दायित्व खः।”

संयुक्त राज्य अमेरिकाया हार्वड मेडिकल कलेज सेन्टर फर प्राइमरी केयर व सिस्टम स्ट्रेन्थेनिङया निर्देशक प्रा डा क्रिस्टिन मसेङ्गर मू पाहाँ जुयादीगु उगु ज्याझ्वलय् जनस्वास्थ्य, नर्सिङ व चिकित्साशास्त्र विषयस स्नातक व स्नातकोत्तर तहलय् अध्ययन पूवंकूपिं ५८ म्ह विद्यार्थीत दीक्षित जूगु प्रतिष्ठानया प्रशासकीय अधिकृत अमृतबहादुर भण्डारीं न्ह्यथनादिल।

उगु ज्याझ्वलय् स्वास्थ्य नापं जनसङ्ख्यामन्त्री प्रदीप पौडेल, चिकित्सा शिक्षा आयोगया उपाध्यक्ष प्रा डा अञ्जनीकुमार झालिसें मेमेपिंसं ब्वति कयादीगु खः।.(रासस)