राष्ट्रपति रामचन्द्र पौडेलं जलवायु समस्या व गरिबी निवारण ज्याझ्वःयात मंकाःकथं सम्बोधन यायेमाः धका धयादीगु दु। अजरबैजानया बाकुइ सोमबाःनिसें न्ह्याःगु कोप–२९ सम्मेलनया झ्वलय् किर्गिस्तानं थौं जूगु उच्चस्तरीय सत्रयात सम्बोधन यानाःदीसे जलवायु ह्यूपाःया हुनिं पीडितजूपिंत न्याय बिइगु खःसा इमिसं भोगे याःगु समस्यायात मुक्कं सम्बोधन यायेमाः धका धयादीगु दु।

“जलवायु ह्यूपाया हुनिं गुँ लागाया ल्याय्म्हत विदेशय् वंबलय् गरिब, मिसा, मस्त व ज्याथःजिथिःपिं अझ अप्वः प्रभावित जूगु दु, इमित न्याय बिइगु खःसा इमित जूगु जलवायु समस्यानाप गरिबी निवारण ज्याझ्वःयात मंकाः कथं सम्बोधन यायेमाः”, राष्ट्रपति पौडेलं धयादिल। गुँ लागाया नागरिकतय्त जूगु जलवायु समस्या इमित थःपिनिगु हुनिं जूगु मखुसे तसकं याकनं प्राकृतिक स्रोतया दोहन यानाः धनी जूपिं विकसित देय्तयसं याःगु कार्बन उत्सर्जनया हुनिं खः धैगु वय्कःया धापू खः। “इमित जलवायु न्याय बिइकेत कोप–२९ ताःलाइ धइगु जिगू भलसा दु”, राष्ट्रपति पौडेलं धयादिल।

जलवायु ह्यूपाःया प्रभाव दँय् दसं अप्वया वनेगु झ्वलय् दूगु व उकिं न्हूगु ‘रेकर्ड’ दयेकाः यंकूगु धासें उकिया कारणं गुँ लागा मेगु थाय् स्वयां अप्वः जोखिमय् लाः धैगु वय्कःया धापू खः। वंगु अगस्तय् नेपाःया सगरमाथा लागाय् हिमताल तज्यानाः सोलुखुम्बुया थामेगांया ३५ म्ह स्वयां अप्वः छेँखा प्वंनाः करौडं मल्याक नोक्सानी सहयाये माःगु खँ कसें वय्कलं वंगु मनसुन ‘सिजन’य् वःगु खुसिबालय् नेपाःया न्यासः स्वयां अप्वः मनूत सीगु न्ह्यथनादिल। “थ्व घाः आःतक नं मलंनि, वइगु दिं थ्व समस्या अझ अप्वया वनी व तःच्वःगु अवस्था दयेकीतिनि धैगु आकलन आः हे मयात व माःगु सावधानी मकाल धाःसा कन्हय् अझ अप्वः हानिनोक्सानी सहयायेमाली”, राष्ट्रपति पौडेलं धयादिल।

वय्कलं नेपाः व किर्गिस्तान निगुलिं हे गुँ देय्त जूगुलिं झीसं भोगे यानागु जलवायु ह्यूपाया लिच्वः नं उत्थें हे च्वं धकाः धयादिल। नापं, नेपाः व किर्गिस्तानं न्हापान्हापा हिउँ चितुवा संरक्षणय् मंकाःज्या यानागु अनुभव वय्कलं लुमंकादिल।उगु ज्याझ्वलय् किर्जिकिस्तानया राष्ट्रपति, मङ्गोलियाया राष्ट्रपति, अजरबैजानया विदेश मामिलामन्त्रीपिंसं नं थःगु खँ तयादिल।

अजरबैजानया बाकु सहरय् थ्वहे कात्तिक २६ गतेनिसें न्ह्याःगु जलवायु ह्यूपासम्बन्धी संयुक्त राष्ट्र सङ्घीय संरचना महासन्धि पक्ष देय्तय्गु २९ गूगु सम्मेलन (कोप–२९)अन्तर्गत मङ्गलबाः राष्ट्रपति पौडेलं उच्चस्तरीय सत्रया ‘विश्व नेतात जलवायु कार्य शिखर सम्मेलन’यात सम्बोधन यानादीगु खः।(रासस) 

राष्ट्रपति रामचन्द्र पौडेलं हिमालया सुरक्षा धइगु हे पृथ्वीया सुरक्षा खः धैगु खँ लुमंकेत विश्व समुदाययात इनाप यानादीगु दु। अजरबैजानया बाकु सहरय् थ्व हे कात्तिक २६ गतेनिसें न्ह्याःगु जलवायु ह्यूपाः सम्बन्धी संयुक्त राष्ट्रसङ्घीय संरचना महासन्धि पक्ष देय्तय्गु २९ गूगु सम्मेलन (कोप–२९) य् विश्व नेतातय्गु उच्च स्तरीय सत्रयात मङ्गलवाः संबोधन यानाः राष्ट्रपति पौडेलं अथे इनाप यानादीगु खः।

राष्ट्रपति पौडेलं धयादिल, “च्वापुगुँया निति सुरक्षा धइगु हे पृथ्वीया सुरक्षा खः धइगु खँ सकसिनं मनन याये, गुँ देय्या तुयूगु च्वापुगुँ हाकुगुँइ परिणत जुइगु झ्वलय् उगु देसय् जक मखु क्वय्च्वंगु तटीय देय्तय्त नं सङ्कट जुइ धइगु वास्तविकता विश्वं ल्वःमंके मज्यू।” वय्कलं थुकिया लागि च्वापुगुँनिसें समुद्रतकया मुक्कं व समष्टिगत अनुकूलन अवधारणायात औपचारिक खँल्हाबल्हाया विषय दयेकेत तकं उगु सम्मेलनय् प्रस्ताव तयादिल।

नापं, नेपालपाखें थ्व हे अवधारणाया लिधंसाय् सगरमाथा खँल्हाबल्हा ज्याझ्वः न्ह्याकेत कुतः यानाच्वन धकाः वय्कलं न्ह्यथनादिल। राष्ट्रपति पौडेलं थः जलवायु न्याय व क्षतिपूर्तिया सः ज्वनाः थुगु सम्मेलनय् ब्वति काः वयागु खः धकाः कनाः धयादिल, “गोलाबारुदय् खर्च जुयाच्वंगु तःधंगु स्रोतसाधन जलवायु ह्यूपाःया नकारात्मक लिच्वः म्ह्वः यानाः मानव सभ्यतायात बचे यायेत उपयोग जुइमाः।”

जलवायु ह्यूपाःया समस्यां पृथ्वी हे सङ्कटय् लानाच्वंगु वय्कलं धयादिल । विशेष यानाः गरीव, अल्पविकसित, विकासशील व चिचिधंगु टापु देय्त थुकिया स्याःचालं अप्वः प्रभावित जूगु वय्कःया धापू दु। “तसकं म्ह्वः कार्बन उत्सर्जन यायेगु, तर अप्वः नकारात्मक असर जूगु विरोधाभासपूर्ण अवस्थाय् नेपाः लानाः च्वंगु दु”, राष्ट्रपति पौडेलं धयादिल। उगु सत्रय् अजरबैजानया राष्ट्रपति इलहाम अलियेपंm लसकुस यानादिल धाःसा संयुक्त राष्ट्र सङ्घया महासचिव एन्टेरियो गुटरेसलिसें विश्वका थी थी देय्या राष्ट्र प्रमुख व सरकार प्रमुखतय्सं संबोधन यानादीगु खः।(रासस)

येँय् ज्वम्ह गण्डकी प्रदेशया पूर्वमन्त्री दीपक मनाङेयात प्रहरीं केन्द्रीय अनुसन्धान ब्यूरो (सीआईबी) न अदालतय् यकूूगु दु।

अदालतय् उपस्थित याये धुका वयात कारागारय् यकेगु तयारीइ दु। येँया सानोभ¥याङय् कम्फर्ट हाउजिङं वयात ज्वंगु खः। सीआईबीया पुचलं थौ सुथय् ज्वंगु खः। मनाङेयात सर्वोच्च अदालतं कात्तिक २० गते मनू स्याइगु उद्योगय् दोषी ठहर याःगु खः।

न्यायाधीश डा. नहकुल सुवेदी व टेकप्रसाद ढुंगानां इजलासं थ्व स्वया न्ह्यः तत्कालीन पुनरावेदन अदालत (आःया उच्च अदालत) यलं याःगु फैसलायात सदर यासे २०६९ सालय् न्यादँया कैद सजाय न्यकूगु खः।

प्रेस काउन्सिल नेपालं आचारसंहिता अःखः ज्या यागू धासे थीथी प्यंगू सञ्चारमाध्यमयात हाकू धलखय् लाकूगु दु।

काउन्सिलं आचारसंहिता अनुगमन उपसमितिया आइतवाः च्वंगु बैठकं काउन्सिलया निर्देशन माने मयागु, छगु पक्षीय व तथ्यगत पुष्ट्याइँबेगर सूचं सामग्री सम्प्रेषण यापि सञ्चारमाध्यमयात कारबाही यायेगु निर्णय याःगु खः।

अथहे थीथी न्ह्यय्गू सञ्चारमाध्यमयात विशेष अनुगमन यासे छानबिन न्ह्याकेगु काउन्सिलं जारी याःगु प्रेस विज्ञप्तिइ उल्लेख यागू दु। काउन्सिलया कथं छगू साप्ताहिक, छगू टेलिभिजन व निगु अनलाइन सञ्चारमाध्यमयात हाकू धलखय् तःगु दु। काउन्सिलं हाकू धलखय् तःगुलि सञ्चारमाध्यमया जानकारी सूचना व प्रसारण विभाग, विज्ञापन बोर्ड व सम्बन्धित प्रदेशया सञ्चार रजिस्ट्रारया कार्यालयं ब्यूगु दु।

थ्व स्वया न्ह्यः न काउन्सिलं स्वगू सञ्चारमाध्यमयात हाकू धलखय् तःगु खः। हाकू धलखय् लागू सञ्चारमाध्यम त्रिनेत्रपोष्ट साप्ताहिक, योहो टेलिभिजन, कोशीपोष्ट डटकम, खोजतलास अनलाइन डटकम खः। काउन्सिलं भ्रामक सूचं सम्प्रेषण याःगु छगु युट्युब च्यानलयात माःगु अनुसन्धानया निति नेपाल प्रहरीया साइबरब्युरोय् छ्वःगु दु। अथेहे आचारसंहिताया हे विषयय् गम्भीर न्ह्यसः वयेवं कारबाहीया निति काउन्सिलं न्ह्यगू सञ्चारमाध्यमयात विशेष अनुगमनय् तया छानबिन याःगु दु।

उकिइ दियोपोष्ट डटकम, मोटिभेटन्यूज डटकम, एवननेपालन्युज डटकम, अनलाइनटिभिनेपाल डटकम, राइटसञ्चार डटकम, ताजाखबर टिभि व विजीटिभी (युट्युब च्यानल) खः।

बैठकय् काउन्सिल अध्यक्ष बालकृष्ण बस्नेत, सदस्यपि ठाकुर बेल्वासे, लालबाबु शेष, विजयराज अधिकारी, शरदप्रसाद अधिकारी, नेपाल पत्रकार महासंघया कार्यवाहक अध्यक्ष बाला अधिकारी, नेपाल बार एशोसिएसनया महासचिव अन्जिता खनाल, काउन्सिलया मुख्य अधिकृत झविन्द्र भुसालपिनिगु ब्बति दुगु खः।

प्रधानमन्त्री केपी शर्मा ओलीं बिपी कोइराला स्वास्थ्य विज्ञान प्रतिष्ठान, धरानया १३ क्वःगु दीक्षान्त समारोहय् थौ ६५७ म्ह विद्यार्थीतय्त दीक्षित यानादीगु दु।

प्रतिष्ठानय् सन् २०१० निसे २०१७ व्याचया एमबिबिएस, बिडिएस, एमडी, एमएस, एमडिएस, डिएम, एमसिएच बिएससी नर्सिङ व २०१२ निसे २०१८ तक एएससी नर्सिङ, बिएमएलटी, बिएमआइटी, एपिएस व पिएडी उपाधि हासिल यापि विद्यार्थी तय्त कुलपति ओलीं दीक्षित यानादीगु खः।

भारतया शिक्षाविद् प्राडा.ज्योतिर्मोय पलँ मूपाहा जुयादीगु उगु ज्याझ्वलय् सहकुलपति नाप स्वास्थ्य लिसे जनसङ्ख्यामन्त्री प्रदीप पौडेलपिनिगु ब्बति दुगु खः।उगु ज्याझ्वलय् प्रतिष्ठानं थीथी उत्कृष्ट विद्यार्थी तय्त सिरपाः न देछाउगु खः।