Display Style:
Column Style
पुथ्वी नारायण राष्ट्रिय एकताया प्रतिक मखु –आहुति
नृपेन्द्रलाल श्रेष्ठ | पोहेलाथ्व सप्तमी ११३९ (जनवरी १३ २०१९)
नेवाः ग्वाहालि पुचलं थौं छगु ज्याझ्वः दथुइ न्हुदँ ११३९ या लसताय् म्हिगः शनिवाः भिंतुना कालबिल ज्याझ्वः यागु दु ।
उगु ज्याझ्वःया मूवक्ता कथं च्वमि नाप बिचारक बिश्वभक्त दुलालं (आहुति) पुथ्वी नारायण राष्ट्रिय एकताया प्रतिक मखु धयादीसे म्हिगः शाहा जुजुुपिन्स थःगु पक्षय् इतिहास च्वका तःगुनि धाःथे राष्ट्रिय एकताया प्रतिक खःथे च्वःगु खः धका धयादीगु खः । पुथ्वी नारायण शाहनं थःत गुबलय् नेपाःमि धका मधासे गोर्खाली धका धायेगु याना च्वंगुनि थ्व नेपाः एकिकरण मजुसे गोर्खा राज्य बिस्तार खः धका थःगु खँ तयादीगु खः ।
अथेहे मूवक्ता आहुतिं थन स्वनिगः दुने नेवाः तयेगु कला संस्कृति मथुपिन्स शासन यान च्वगुनि थःपि गयेयाना सम्पति मुकिगु जक ध्यान तया च्वंगुनि सतक बिस्तारया नामय् नेवाः तयेगु कला संस्कृतिया स्यंका च्वंगु न धयादीगु खः ।
उगु ज्याझुवलय् मूपाँहा कथं गजल च्वमि भुषणप्रसाद श्रेष्ठं वल्र्ड बडि बिल्डिङ्ग च्यापियन महेश्वर महर्जनयात हनापौ लःल्हासे सम्मान यानादीगु खः । ज्याझ्वलय् सतक बिस्तार पिडिकया संयोजक सुमन साय्मि न थःगु नुगः खँ तयादीगु खः ।
हलिं नेवाः दबूया तःमुँज्या स्थगित
नृपेन्द्रलाल श्रेष्ठ | पोहेलाथ्व षष्ठी ११३९ (जनवरी १२ २०१८)
नेवाः तय्गु अन्तरराष्ट्रिय संगठन हलिं नेवाः दबू (वर्ल्ड नेवाः अर्गनाइजेशन), नेपाः देय् मू कवःया निक्वःगु तःमुँज्याय् संघीय समाजवादी फोरमया सह अधक्ष्य लिसें प्रतिनिधिसभाया दुजः राजेन्द्र प्रसाद श्रेष्ठयात वय्कलं नेवाः आन्दोलनय् यानादीगु योगदानयात कदर यासे थांैं सम्मान याःगु दु ।
हलिं नेवाः दबूया दुजः नापं जुयाच्वाना दीम्ह श्रेष्ठं मांभासं शिक्षा, आवास सम्बन्धी हक लगायतया कानुन निर्माणय् उत्पीडिततय्गु पक्षय् संशोधन याकाः पारित यायेत मूवंगु भूमिका म्हिता दीगु लिसें पहिचान व सङ्घीयताया आन्दोलनय् नेतृत्वदायी भूमिका म्हिता दीगु खः ।
सङ्घीय गणतन्त्रय् समेत नेपाल कम्युनिष्ट पार्टी नेतृत्वया सरकारं नेपाली व अंग्रेजी भासं जक आखः ब्वंकेगु व संस्कृत शिक्षायात अलग विधा जुइगु यानाः विधेयक दर्ता याःगुलि वयकलं भाषिक अधिकारवादीतय्गु पक्षय् विधेयकय् संशोधन दर्ता यानाः मांभासं शिक्षाया निंतिं कानुन दय्केगु ज्याय् विशेष भुमिका म्हिता दीगु खः ।
अथे हे भविष्यय् मुआब्जा ब्युसां जिइगु यानाः सतक विस्तारया नामय् नेवाःतय्त विस्थापित यायेछिंक ओली सरकारं हःगु आवास सम्बन्धी विधेयकयात न राज्यया अधिनायवादी सोच धकाः विरोध याःसे वय्कलं संशोधन दर्ता याकाः पीडिततय् पक्षय् विधेयक संशोधन याकेत ताःलाःगु खः ।
दबूया कार्यवाहक नायः शाक्य सुरेनया सभाधक्ष्यताय् जूगु तःमुँज्याया उलेज्या सत्रय् शताब्दी पुरुष सत्यमोहन जोशीं नेवाःतय्गु न्हूगु पुस्तां भाय् त्वःतावंगु अले उमि मांबौया नं थः मस्तय्
मांभाय् मल्हाःसा जिउ धइगु चिन्तनं संसारय् तःगु भाय् थें नेवाःभाय् नं तनावनीगु अवस्था वयाच्वंगुलिं चिन्ता व्यक्त यानादिल । वय्कलं नेवाः जातिया उत्थानया निंतिं मांभासं आखः ब्वंकेमाःगु खँय् बः बिया दिल ।
सांसद राजेन्द्र श्रेष्ठं नेवाःतय्गु आन्दोलन यक्व न्ह्यःनिसें न्ह्यानावयाच्वंसां न्हापा भाषिक जागरण व साहित्य सेवा पाखेजक केन्द्रित जूगुलिं राजनीतिक परिवर्तन उलिमछि जुलं नं नेवाःतय्सं उकिया लबः कायेमखंगु खँ कनादिल ।
वय्कलं ओली नेतृत्वया वर्तमान सरकारं पृथ्वी नारायण शाह न याःगु थःगु सामन्ती साम्राज्य विस्तारयात पञ्चायती शैलीइ राष्ट्रिय एकता दिवस धकाः घोषणा याःगुयात कुँखिउसे नेकपाया अध्यक्ष लिसें प्रधानमन्त्री ओली पुनर्उत्थानवादी जूगु द्वपं बिया दिल । वय्कलं आः नेकपा राप्रपाय् दुब्यूसां जिल धया दिल ।
दबूया मूछ्याञ्जे रश्मिला प्रजापतिं न्ह्याकादीगु उगु ज्याझ्वलय् न्वकू गणेशराम लाछिं लसकुस यानादीगु खः ।
तःमुँज्याय् नेवाः देय् दबूका अध्यक्ष नरेश ताम्राकार, दबूया नेपाः देय् मूकवःया संस्थापक नायः नरेन्द्रभक्त हाडा, नेवाः न्ह्यलुवा डा. महेशमान श्रेष्ठ लगायतया वक्तापिसं न भिंतुना न्वचु बियादीगु खः ।
थौं जुगु उगु तःमुँज्या बिशेष कारणं थौं न्हुगु नेतृत्व ल्यय् मफुगु दु । आः चुनाव गबलय् जुइ धइगु खँ लिपा सुचं बिइइ धकाः दबूया नायः शाक्य सुरेनं जानकारी बियादीगु खः ।
नातिबज्र बिचाः मुँज्या जुल
नृपेन्द्रलाल श्रेष्ठ | पोहेलाथ्व षष्ठी ११३९ (जनवरी १२ २०१८)
भाषासेवी नाप साहित्यकार नातिबज्र बज्राचार्य मदुगुलिं थौ येँया भोताहिति दगु बहालय् बिचाः मुँज्या यानाः वयकःया योगदानयात लुमक्यःगु ज्या जुगु दु ।
थौं जुगु उगु बिचाः मुज्याय् नेवाः देय् दबू, प्रतिभा साहित्यिक परिवार, च्वसापासा, नेपालभाषा ऐकेदेमि, नेवाः जागरण मञ्चं मंकाः ग्वसालय् जुगु खः ।
उगु बिचाः मुँज्याय् जनकवि दुर्गालाल श्रेष्ठं व लोककबि राजभाई जकःमिं नातिबज्रयात लुमंका चिनाखँ ब्बनादीगु खः ।
अथेहे नेवाः न्ह्यलुवाः मल्ल के. सुन्दर, साहित्यकार राजा शाक्य, साहित्यकार डा.पुष्पराज राजकर्णिकार, त्रिरत्न शाक्य, गायक जुजु कजि रंजित पिन्सं नं नातिबज्रया योगदानयात कयाः नुँगः खँ प्वंकादिगु खः ।ग्वसाः खलः पाखें नेवाः देय् दवूया नायः नरेश ताम्राकारं दुःखं कपिं छेँ जःपिन्त विचाः हायकादिगु खः ।
साहित्यकार शरद कसाः नं न्ह्याकादिगु उगु मुज्याय् थथिी ख्यःया ब्यक्तिपिन्सं मदुम्ह नातिबज्रया किपाय् स्वा देछाना छगू मिनेट मौन धाराणा याःगु खः । ः
मंकाः धुकुपाखें लिपि गुथियात तिर्थ–हिरा सिरपा लःल्हात
नृपेन्द्रलाल श्रेष्ठ | पोहेलाथ्व षष्ठी ११३९ (जनवरी १२ २०१८)
मंकाः धुकु बचत तथा ऋण सहकारी संस्थाया झिक्वःगु दँ मुज्या क्वचाःगु दु ।
उगु दँ मँुज्याया लसताय् तिर्थ – हिरा सिरपा थुगुसि नेपाल लिपि गुथियात लः ल्हाःगु दु ।
थुगु सिरपाया दाता भाषा सेवी भाईराजा तुलाधरं थः मां अवुया नामं निस्वना दीगु खः ।
ज्याझ्वलय् मूपाहाँ कथं जनकवि दुर्गालाल श्रेष्ठं लिपि गुथिया नायः निरञ्जन तवःयात स्वीद्वः तका नगद व हनापौं लःल्हानादीगु खः ।
नेवाः न्ह्यलुवाः मल्ल के. सुन्दरं थुगुसी सिरपा ताः लाःगु संस्थाया नां घोषणा यानादिगु खः ।
उगु ज्याझ्वलय् साहित्यकार राजा शाक्य, नेवाः न्ह्यलुवाःपिं मल्ल के. सुन्दर व गणेश साय्मिपिन्स थःथःगु नुगः खँ तयादिगु खः । ज्याझ्वः मंकाः धुकुया नायः बालकृष्ण प्रजापतिया सभाधक्ष्यताय् जुगु खः ।
छ्याकःल्वहं प्रहरीया नियन्त्रणय्
लहनान्युज | पोहेलाथ्व पंचमी ११३९ (जनवरी ११ २०१८)
किपुलिइ पुष २७ गतेयात हाकूगु न्हि कथं हंगु दु । नेवाः प्रदेशय् आदिवासी जनजाति जागरण अभियान, आदिवासी जनजाति महासंघ, आदिवासी जनजाति महिला महासंघ, आदिवासी जनजाति राष्टिय आन्दोलन नेपाल जाना थौं शुक्रवाः अथे हाकुन्हि हंगु खः ।
किपूया नगां दोवाटो लागाय् छगू सभा याःगु खः । उगु सभाय् आदिवासी जनजाति अभियान्ता श्रीकृष्ण महर्जनं पृथ्वी नारायण शाहयात गुगु नं हालतय् राष्टिय एकता प्रतिकया रुपय् आदिवासी जनजाति नेवाःतय्सं स्वीकार यायेफइमखु धकाः धयादिल ।
उगु इलय् पृथ्वीनारायण शाहया फौजं युद्ध याःगु अले युद्धया नियम अःखः तकं मनूतय्त स्याना बिउगु घटनायात न्ह्यथसें पृथ्वीनारयाण शाहलिसे युद्धयाःम्ह किपूया योद्धा कीर्तिलक्ष्मीया किपाः तकं सार्वजनिक यानादीगु खः । अले किपुलिइ कीर्तिलक्ष्मीया सालिक तयेगु ज्या जनस्तरं यायेगु जुइ धयादिल ।
उगु सभाय् आदिवासी जनजाति महिला महासंघया नानु थामी व जनजाति नेता कुमार राई नं गुगु नं हालतय् पृथ्वीनारायण शाहयात राष्टिय एकताया प्रतिकया रुपय् स्वीकार यायेफइमखु धकाः धयादिल । वय्कःपिन्सं नेपालय् पृथ्वीनारायण शाह नं सुरु याःगु विभेद आः तक नं कायम दु उकिं संघर्ष यायेमाःगु आवश्यकता दु धयादिल ।
नेवाः प्रदेशय् आदिवासी जनजाति जागरण अभियानया कजि अर्जुन महर्जनं न्ह्याकादीगु उगु ज्याझवलय् कीर्तिलक्ष्मीया बारे अनुसन्धानकर्ता विनोद महर्जनं कनादीगु खः ।
अनं लिपा नाराबाजी याना जुलुस सहित किपूया छ्याकःल्वहं दुगु लागाय् वंगु खः । उगु इलय् प्रहरीं छ्याकःल्वहंयात घेराबन्दी यानातःगु खः । च्वय्या आदेश कथं धकाः छ्याकःल्वतय् थुकलं बिइगु जुइमखु धकाः प्रहरीं धायेवं छगू कथं अन तनाव ब्वलंगु खः ।
थौं किपुलिइ तनावया दथुइ जूगु सभाय् आदिवासी जनजातिया न्ह्यलुवाः आडकाजि शेर्पां पृथ्वीनारायण शाहयात गुगु नं हालतय् राष्टिय एकताया प्रतिकया रुपय् स्वीकार यायेगु जुइमखु धयादिसें पृथ्वीनाराण शाह धाइम्ह युद्ध अपराधी खः धकाः धयादिल ।
अथे हे नेपाल आदिवासी जनजाति महासंघया छ्याञ्जे गोविन्द छन्त्यालं पृथ्वीनारायण शाह नं सुरु याःगु विभेद आः तक नं कायम जुयाच्वंगु दु धयादिसें आदिवासी जनजातितय्सं थःपिनिगु हक अधिकार प्राप्त मजूतले आन्दोलन जारी याइ धयादिसें छ्याकःल्वतय् थुकलं तकं मबिइकेगु कथंया गुगु कथं राज्य क्वहां वल थ्व बास्तवय् नेवाः नापं आदिवासी जनजातिय्गु परम्परातय् तकं तःधंगु पंगः खः धयादिल ।
थःपिं निरन्तर रुपं आन्दोलन याना वनेगु जुइ धयादिल । अनं लिपा अभियान्त श्रीकृष्ण महर्जनं छ्याकःल्वतय् थुकलं बिइकेगु ज्याय् पंगः थंगु अवस्थाय् नं छ्याकःल्वहंया मेगु नमुना तया मंकाः कथं थुकलं बिइगु जुइ धकाः घोषणा यानादिल । अले मंकाः कथं थुकलं बिइगु ज्या तकं याभःगु खः । छ्याकःल्वतय् किपूमितय्सं न्हापांनिसें पृथ्वीनारायण शाहया नामय् थुकलं बिया वयाच्वंगु खः ।
किपुलिइ युद्ध लिपा नं किपूमितय्त अन्याय याना न्हाय् म्हुतुं ध्यंगुलिं उकिया विरोधया प्रतिक कथं पृथ्वीनारायण शाहया नामय् थुकलं बिइगु याना वयाच्वंगु खः । लिपांगु इलय् वया छ्याकःल्वतय् दँय् दसं पुष २७ गते थुकलं बिइगु याना वयाच्वंगु खः ।
