Display Style:
Column Style
नातिवज्रया अन्तिम संस्कार क्वचाःल
नृपेन्द्रलाल श्रेष्ठ | थिंलागा त्रयोदशी ११३९ (जनवरी ३ २०१९)
भाषासेवी नाप नेपालभाषाया कवि नातिबज्र बज्राचार्ययात थौं शोभा भगवतीया कर्णदीपय् अन्तिम दाहसंस्कार जूगु दु ।
मदुम्ह नातिबज्रयात वय्कःया काय् लुजः बज्राचार्यं मिँ तःगु खः ।
थौं मदुम्ह नातिबज्रया छेँ भोताहितिया दगु बहालं शवयात्रा यानाः कर्णदीपय् थ्यंकूगु खः । वय्कःया सिथं यंकूगुलि आपालं नेपालभाषाया साहित्यकारलिसें नेपालभाषाया कार्यकर्ता्पिनिगु उपस्थिति दूगु खः ।
कन्ह्यः भोताहितिं मुना नेपालभाषाया साहित्यकारलिसें नेपालभाषाया कार्यकर्तािपं छेँय् सुथसिया ८ ताः इलय् वनिगु ज्याझ्वः दुगु नेवाः न्ह्यलुवा मल्ल के सुन्दर लहनान्युजयात जानकारी बियादीगु दु ।
भाषासेवी नातिवज्र वज्राचार्यया मन्त
लहनान्युज | थिंलागा त्रयोदशी ११३९ (जनवरी ३ २०१९)
साहित्यकार लिसें भाषासेवी नातिवज्र वज्राचार्यया म्हिगः बहनि ८.३० बजेय् बीर अस्पतालय् मन्त ।
मदुम्ह भाषासेवी नातिवज्र म्हिगः बहनिं ११ बजेय् वयकःया हे छेँय् भोताहिति दगुबहालय् हःगु खः ।
थौं बिहिवाः ११ ताः इलय् अन्तिम संस्कार याइगु जुगु दु । थौं अन्तिम दर्शानार्थ सुथय् ८ बजे निसें ११ बजेय् तक दगुबहालय् तइगु जुगु दु ।
थौं हे मदुम्ह बजाचार्ययात दाहासंस्कार यायेत शोभा भगवती यंकिगु जुगु दु ।
पुस ७ गते आकाझाकां म्हं मफयाः उपचारया निंतिं वय्कःयात वीर अस्पताल यंकूगु खः ।
येँया भोताहितिइ विसं २०२२ सालंनिसें नेपालभाषाया सफूधुकू नामं पसः तयाः भाषासेवा याना च्वनादीगु खः ।
मदुम्ह नातिवज्र नांजाःम्ह साहित्यकार नं खः । मदुम्ह बजाचार्यया जहान लिसें छम्ह काय् व छम्ह म्ह्याय् दु ।
श्रमजीवी ऐन लागू यायेत मेटो एफएमया पत्रकार तय्सं ज्ञापन पौ लःल्हात
लहनान्युज | थिंलागा एकादशी ११३९ (जनवरी १ २०१९)
येँ महानगरपालिकां न्ह्याका वयाच्वंगु मेटो एफ एम गुइ पि फुति खु मेगाहर्जया पत्रकारपिन्सं श्रमजीवी पत्रकार ऐन कार्यान्वयन यायेत माग याना ज्ञापन पौ लःल्हाःगु दु ।
थौं मंगलवाः नेपाल पत्रकार महासंघ मेटो एफ एम प्रतिष्ठान शाखाया संस्थापक नायः श्रीकृष्ण महर्जनं उगु कथंया ज्ञापन पौ महानगरपालिकाया सूचना प्रविधि विभागया प्रमुखयात लःल्हाःगु खः । पत्रकार नापं ज्याझ्वः न्ह्याकामिपिन्सं मंकाः कथं ल्हाःछिं तया ज्ञापन पौ लःल्हायेगु ज्या महानगरपालिकाया विभागया ज्याकू राष्ट्रिय सभागृह लागाय् हे लःल्हाःगु खः ।
मेटो एफ एम स्थापना कालंनिसेेंं झिंगुदँ न्ह्यःनिसें निरन्तर रुपं ज्या याना वयाच्वंपिं पत्रकार व ज्याझ्वः न्ह्याकामिपिं आः तक नं करारय् लानाच्वंंगु अवस्थाय् श्रमजीवी पत्रकार ऐन कथंं स्थायी यायेमाःगु माग याना अथे ज्ञापन पौ लःल्हाःगु खः ।
ज्ञापन पौ लःल्हानाकासें विभागिय प्रमुख राज्य प्रकाश प्रधानाडं थःम्हं फुगु कथंया कुतः यायेगु नापं पत्रकार व संचाःकःमितय्गु मागयात च्वय् छ्या बिइ धकाः बचं बियादीगु खः । मेटो एफ एमय् नीछम्ह पत्रकार ज्याझ्वः न्ह्याकामिपि ज्या यानाच्वंगु दु ।
येँ महानगरपालिका स्वयं हे स्थानीय सरकार जूगु अवस्थाय् सरकारं हे दयेकूगु श्रमजीवी पत्रकार ऐन लागू याना पत्रारपिन्त स्थायी यायेमाःगु पत्रकारतय्गु माग खः ।
लमुंकेबहःजू स्थायी यायेमाःगु माग याना पत्रकारपिन्सं इलय् ब्यलय् आन्दोलन नं याना वयाच्वंगु खः ।
विसरामया नेतृत्वय् ललितपुर हस्तकला संघ
नृपेन्द्रलाल श्रेष्ठ | थिंलागा नवमी ११३९ (दिसेम्वर ३१ २०१८)
ललितपुर हस्तकला संघया १२क्वःगु दँमुँज्यापाखें विसराम महर्जनया अध्यक्षताय् झिंस्वम्ह दुजः दुगु न्हूगु ज्यासना पुचः ल्यःगु दु ।
उगु समितिया न्वकुलिइ रवि महर्जन, मूछ्याञ्जेय् रमेश सिं महर्जन, छ्याञ्जेय् प्रदीप बज्राचार्य व दांभरिइ सुभानन्द धाख्वाः ल्यःगु दु ।
अथे हे दुजलय् कपिल शाक्य, सबु महर्जन, सुरेन्द्र महर्जन व राकेश शाक्ययात ल्यःगु दु ।
प्रधानमन्त्री ओलीं पत्रकार गुरुङया ’निरन्तर नेतृत्व’ सफूया उलेज्या
नृपेन्द्रलाल श्रेष्ठ | थिंलागा नवमी ११३९ (दिसेम्वर ३१ २०१८)
प्रधामनन्त्री केपी ओलीं पत्रकार डण्ड गुरुङं च्वयादीगु ’निरन्तर नेतृत्व’ सफू छगु ज्याझ्वः दथुइ पितब्बज्या यानादीगु दु ।
येँया टुँनिख्यलय् तमु तयेगु नःखः ल्होछार लसताय जुयाच्वंगु ज्याझ्वलय् प्रधानमन्त्री ओलीं उगु सफू पित ब्बज्या यानादीगु खः ।
बेलायतय् तमूपिनिगु सामाजिक संस्थाया रुपय् स्थापना जुइ त्यःगु संघर्षयात कया उगु सफू पत्रकार गुरुङ्ग च्वयादीगु खः ।
उगु सफूतिइ तमु धिं युकें आतक च्याःगु नेतृत्वया अनुभव न दुथ्या ।
ल्होछारया लसताय् बेलायतय् न उगु सफू पितब्बज्या जुगु खः ।
गण्डकी प्रदेशया योजना नाप अर्थ मामिलामन्त्री किरण गुरुङं बेलायतया रेडिङइय् तमुधिं युकें ग्वसाः ग्वगु ज्याझ्वलय् ल्होछार न पितब्बज्या यानादीगु खः ।
