Display Style:
Column Style
गुंगू नगरपालिकायात महानगरपाखें छगू छगू करोड
लहनान्युज | सिल्लाथ्व पंचमी ११३९ (फ्रेअवरी १० २०१९)
येँ महागरपालिकां येँ देशय् दुने लाःगु फुक्क हे नगरपालिकातय्त छगू छगू करोड तका ग्वाहालि याःगु दु । राजधानी समेत जुयाच्वंगु येँ देय्या फुक्क हे नगरपालिकात समृद्ध जुइमा धकाः थथे येँ महागरपालिकां ग्वाहालि दां बिउगु खः ।
थौं आइतवाः राष्ट्रिय सभागृहय् याःगु छगू ज्याझ्वलय् येँ मनपाया मेयर विद्यासुन्दर शाक्य व उपमेयर हरिप्रभा खड्गी श्रेष्ठं येँ देसय् थुगुसी तिनि घोषणा जूगु गुंगू न्हूगु नगरपालिकाया मेयरपिंत छगू छगू करोड तकाया चेक लःल्हानादीगु खः ।
छगू करोड तका प्राप्त याःपिं नगरपालिकातय्सं थ्व दांपाखें थःथःगु नगरपालिकाय् हरियाली पार्क दयेकेगु ज्याय् छ्यलेगु सम्झौतापत्रय् नं म्हिगः हे हस्ताक्षर जूगु खः ।
चेक हस्तान्तरण यायेगु उगु ज्याझ्वलय् न्ववासें मेयर विद्यासुन्दर शाक्यं येँ देय्या फुक्कं नगरपालिकात बांलात धाःसा उकिं आन्तरिक पर्यटक अप्वइगु व सरकारं सन् २०२० य् यायेत्यंगु भिजिट नेपाल दँयात नं तिबः बीगु विश्वास प्वंकादिल । लिसें वय्कलं पिनेया धू येँय् दुमकायेगु लागिं आः महानगर दुहां वयेगु मू नाकाय् हे सवारी साधनयात लखं सिलाः जक दुकायेगु ग्वसाः बारे बिचाः यानाच्वनागु खँ नं कनादिल ।
येँ क्षेत्र नं. ९ या सांसद कृष्णगोपाल श्रेष्ठं येँ मनपां बिउगु थ्व दांयात हरेक नगरपालिकां सदुपयोग याइगु विश्वास प्वंकादिल ।
ज्याझ्वलय् संखरापुर नपा (सक्व)या मेयर सुवर्ण श्रेष्ठ, तारकेश्वरया रामेश्वर बोहरा, बुढानिलकण्ठया उद्धव खरेल, किपूया रमेश महर्जन, गोकर्णेश्वरया सन्तोष चालिसे, नागार्जुनया मोहन बस्नेत, चन्द्रागिरिया घनश्याम गिरी, दक्षिकाली मोहन बस्नेत व कागेश्वरी–मनहरा नपायात चेक लःल्हानादीगु खः । टोखा नगरपालिकायात न्हापा हे छगू करोड बीधुंकूगु दु ।
मरुसतलय् प्यंगः थां थन
नृपेन्द्रलाल श्रेष्ठ | सिल्लाथ्व पंचमी ११३९ (फ्रेअवरी १० २०१९)
७२ तःभुखाचं पूर्णरुपं क्षति जूगु सम्पदा मरुसतः (काष्ठमण्डप) पुनःनिर्माणया झ्वलय् जवं खवं न्ह्यःने ल्यूने यानाः प्यंगः थां थौं थने ज्या जुगु दृु । ह
नुमानध्वाखा तयातःगु प्यगः थां नेपाली सेना प्रहरी व स्थनियबासिपिन्सं क्वबिया बिधिगतरुपं तःजिक सांस्कृतिक बाजं सहित मरुसतलय् यंकुगु खःसा मूथां व निनाःया मंकाः संकल्प पूजा लिपा मरुसतःया जवं खवं न्ह्यःने ल्यूने यानाः प्यंगः थां थंगु खः ।
मरुसतः पुनःनिर्माण समितिं येँ महानगरपालिकाया मेयर विद्यासुन्दर शाक्यया मूपाहाँसुइ उगु ज्याझ्वलय् उपमेयर हरिप्रभा खडगी श्रेष्ठ वडा अध्यक्षपिंनिगु न ब्यक्तिपिं उपस्थित जुगु खः ।
राजनीतिक अभियानया खुक्वःगु दँमुँज्या
लहनान्युज | सिल्लाथ्व पंचमी ११३९ (फ्रेअवरी १० २०१९)
नेवाः राजनीतिक अभियानया खुक्वःगु दँमुँज्या जूगु दु । संस्थाया नायः सानुकाजी महर्जन सभाधक्ष्यताय् प्रेम राज शिल्पकारं न्ह्याकादीगु उगु ज्याझ्वलय् पाहाँ कथं संस्थाया संरक्षक नेवाः ह्यलुवाः डा. महेशमान श्रेष्ठ झायादीगु खः ।
नेवाः तय्त राजनैतिक रुपं सचेतयासे नेवाः राज्य नीस्वनाः नेवाः स्वशासन हयेगु तातुनाः खुदँ न्ह्यःनिसें न्ह्याका वयाच्वनागु खँ मुँज्या नायः महर्जनं प्रतिवेदन न्ह्यब्वयेगु झ्वलय् तयादीगु खः ।
उगु ज्याझ्वलय् बिद्या चित्रकारं लसकुस न्वचू तयादीगु खःसा आर्थिक प्रतिवेदन खगेन्द्र जोशीं न्ह्यब्वयादीगु खः ।
दँमुँज्यां न्हुगु नेतृत्वय् श्रीकृष्ण मानन्धर नायः, प्रेमराज शिल्पकार न्वकु, यादवलाल कायस्थ न्वकू, बिद्या चित्रकार छ्याञ्जे, रमिता बज्राचार्य ल्यू छ्याञ्जे, आर्थिक पुचलय् खगेन्द्र जोशी व बिष्णु चित्रकार, मदनसेन बज्राचार्य लगायत मेपिं १७ म्ह दुजः नापं मुक्कं नीखुम्हसिगु कमिटि नीस्वंगु दु ।
ल्याय्म्हतय्त ‘सामाजिक उद्यामशीलता’या अनलाइन कोर्ष
लहनान्युज | पोहेलागा औंसी ११३८ (फ्रेअवरी ४ २०१९)
सामाजिक उद्यामशीलताया विषयसल्यायम्हतय्त थुकइकेगु आज्जु ज्वनाः युथ इन्टरप्रिनर्सशीप क्लबपाखें छगू अनलाइन कोर्ष न्ह्याकूगु दु ।
ख्वपया सरस पाठशालाय् छगू ज्याझ्वःया दथुइ थुगु कोर्ष काःपिन्त दसिपौ लःल्हाय्गु व मकाःपिन्त थुगु कोर्षया विषयस जानकारी बीगु ज्याझ्वः ग्वसाःग्वःगु खः । सामाजिक उद्यामशीलताया विषयस थुइकूसें ल्यायम्हतय्त स्वरोजगार जुइकेगु व थः व थःगु समाजया नितिं योगदान बीफय्केगु हे थुगु कोर्षया मू आज्जु खः ।
नेपाःया थीथी थाय्या मुक्कं स्वीन्याम्हेसिन थुगु कोर्ष क्वचाय्कूगु खः । कोर्ष काय्धुंकूपिन्त ‘द अर्गनाइजेसन फर इन्डिजेन्ट टट्स् (त्वा)’या संस्थापक नायः इन्द्रप्रसाद खाइतुं दसिपौ लःल्हानादीगु खः ।
ज्याझ्वलय् सिम्ला ज्ञावा लामां थुगु कोर्षया विषयस प्रस्तुतिकरण यानादीगु खःसा तालिमय् ब्वति कयादीपिन्सं तालिमयात कयाः थःथःगु अनुभव कनादीगु खः ।
ज्याझ्वलय् सरस पाठशाला, प्रोक्सिमा इन्टरनेशनल एकेदमि, सरस हस्तकला, लियो क्लब अफ सूर्यविनायक नापं थीथी संस्थाया प्रतिनिधिपिन्सं नं न्ववानादीगु खः ।
शुभकाजीया नेतृतवय् शाक्य महाविहार सङ्घ
लहनान्युज | पोहेलागा औंसी ११३८ (फ्रेअवरी ४ २०१९)
शाक्य महाविहार संघया न्हापांगु तःमुँज्यां शुभकाजी शाक्यया नेतृत्वय् १५म्ह दुजः दुगु न्हूगु ज्यासना पुचः नीस्वन ।
कार्यसमितिया न्वकूकथं अमीरमान शाक्य व गौतम शाक्य, मूछ्याञ्जे संघरत्न शाक्य, छ्याञ्जे राजेश शाक्य, दांभरि चैतन्यराज शाक्य व ल्यूदांभरि दीलिपरत्न शाक्य निर्विरोधकथं ल्यःगु खः ।
अथे हे दुजलय् विजयरत्न असंबरे, रोशनबहादुर शाक्य, सुरेश शाक्य, आनन्दरत्न शाक्य, धर्मरत्न शाक्य, अमिरकुमारी शाक्य, दुर्गादेवी शाक्य व ज्योति शाक्य च्वनादीगु दु ।
ज्याझ्वलय् सङ्घया शाक्यवंशया पहिचानया नितिं उत्कृष्ट योगदान याःगुलिं कीर्तिपुण्य महाविहार, लगं बहाःया हर्षमुनि शाक्ययात ‘शाक्य रत्न’ उपाधि व मैत्रीपूर महाविहार, क्वाःबहाःया चक्रेश्वर धूपरत्न शाक्ययात ‘ध्रुबतारा सम्मान’ लःल्हा?गु खः ।
थ्व हे झ्वलय् ३ नं प्रदेशसभाया सांसद राजेश शाक्यं स्वनिगःया महाविहारया मौलिक स्वरुपय्हय्त व सरकारपाखें नियमित आर्थिक ग्वाहालिया नितिं छगू महाविहार व्यवस्थापन समिति नीस्वनेमाःगु बिचाः प्वंकादीगु खःसा ३ नं. प्रदेशया हे सांसद शोभा शाक्यं शाक्य व बज्राचार्यतय्गु थाय्वाय् बाहाः व बही त्वःताः मेथाय् च्वंवनाच्वंगु खँय् च्यूता प्वंकादिल ।
