Display Style:
Column Style
मदुम्ह तुलाधरया शवयात्रा फोटो फिचर
नृपेन्द्रलाल श्रेष्ठ | कौलागा त्रयोदशी ११३८ ( नोभेम्वर ५ २०१८ )
थौं सोमवाः मदुम्ह तुलाधरया शवयात्रा लाजिम्पातं असं, न्यँत, क्षतपाति जुया शोभाभगवतीइ च्वंगु कर्णदीपय् थ्यंकाः मदुम्ह तुलाधरया अन्तिम दाहसंस्कार यागु खः ।
फोटो फिचर
\
यलय् मिखादान सम्बन्धि जनचेतना ज्याझ्वः
नृपेन्द्रलाल श्रेष्ठ | कौलागा पंचमी ११३८ ( अक्टुवर २९ २०१८ )
यल महानगरपालिका वडा ११या स्वास्थ्य कार्यालय समिति, नेपाल आँखादान समाज, तापाहिति मिसा पुचः व लायन्स क्लब अफ यूएन पार्कया मंकाः ग्वसालय् मिखादान सम्बन्धि सचेतना ज्याझ्वः याःगु दु ।
समाजसेवी मोतिशान्ति शाक्यया संयोजकत्वय् जूगु उगु ज्याझ्वलय् यल महानगरपालिकाया महिला विकास अधिकृत महेश्वरी रावत विष्ट मूपाहांकथं झायादीगु खः ।
यल महानगर ११ वडाया वडाध्यक्ष ईन्द्रमान महर्जनया सभाध्यक्षताय् जूगु उगु ज्याझ्वलय् नेपाल आँखादान समाजया नायः जगतनाथ महर्जन विशेष पाहांकथं झायादीगु खः ।
अथे हे लायन्स डिष्ट्रिक अफ ३२५ ए तु गर्भनर सुदर्शनधर प्रधानाङ्ग, ११ वडा महिला स्वास्थ्य उप समितिया कजि पूण्यकुमारी शाक्य, नेपाल आँखादान समाजया महासचिव शान्तराम महर्जन, अधिबक्ता चण्डेश्वरी श्रेष्ठ पाहांकथं झायादीगु खः ।
ज्याझ्वलय् कजि मोतिशान्ति तुलाधरं मिखादान यात कि लिपा मिखां मखनीगु अन्धविश्वासयात चीकेमाःगु खँ धयादिसें सी धुंकाः जक मिखाया नानी काइगु जूगुलिं मिखादान याय्गु नितिं जनचेतना थनेमाःगु खँ कनादिल । वय्कलं छम्हेस्यां मिखादान याइबलय् निम्हेस्यां मिखां खनीगु जूगुलिं थजाःगु सचेतना ज्याझ्वः त्वाःत्वालय् याय्माःगु खँय् बः बियादिल ।
जनचिकित्सालययात स्वास्थ्य सम्बन्धि हलंज्वलं लःल्हात
लहनान्युज | कौलागा पंचमी ११३८ ( अक्टुवर २९ २०१८ )
नेपाल भारत मैत्री समाजं येँया न्ह्योखाय् च्वंगु जनचिकित्सालययात थ्यंमथ्यं स्वंगू लख तका बराबरया स्वास्थ्य सम्बन्धि हलंज्वलं लःल्हाःगु दु ।
समाजया सभापति प्रेम लस्करीं चिकित्सालयया नायः विमला मानन्धरयात उगु हलंज्वलं लःल्हाःगु खः ।
येँ महानगरपालिकाया प्रमुख विद्यासुन्दर शाक्य, उप प्रमुख हरिप्रभा खड्गी श्रेष्ठ, भारतीय दुतावासया न्हापांम्ह सचिव उपस्थित जुयादीगु उगु ज्याझ्वलय् उकथं स्वास्थ्य सम्बन्धि हलंज्वलं लःल्हाय्गु ज्या जूगु खः ।
थ्व हे झ्वलय् अमेरिकाया वासिङ्गटनय् च्वंगु इभरग्रीन अस्पतालपाखें अल्सरया ल्वगिपिनिगु नितिं माःगु कोलस्टोमी ब्याग नं लःल्हात ।
स्थानीय जनताया ग्वाहालिं २०३९ बैशाखय् पलिस्था जूगु उगु चिकित्सालयपाखें उगु लागाया जनतायात निःशुल्क वासः याय्गु ज्या जुयाच्वंगु दु ।
भाषासेवी लक्ष्मण नेवाः वासः यायेत अमेरिकाय्
लहनान्युज | कौलागा पंचमी ११३८ ( अक्टुवर २९ २०१८ )
भाषासेवी लक्ष्मण नेवाः थौंकन्हय् अमेरिकाया बोस्टन शहरय् च्वंगु सिएचए एभर्ट अस्पतालय् क्यान्सर ल्वय्या वासः यानाच्वनादीगु दु ।
वय्कः आः डा. देवशीस मिश्रया रेखदेखय् किमो कया च्वनादीगु दुसा डा. फिलिप ग्रेया रेखदेखय् एमडब्लू मेरोज वेकफिल्डय् रेडिएशन कया च्वनादीगु दु ।
भाषासेवी नेवाःयात वि.सं. २०७३सालया शुरुइ सोंया क्यान्सर खनेदुगु खः । वय्कलं येँया ह्याम्स, वीर अस्पताल, बि एण्ड बि अस्पताल व भक्तपुर क्यान्सर अस्पतालय् नं वासः याकादीगु खः ।
वि.सं. २०२२ सालनिसें भाषा व सामाजिक ख्यलय् सक्रिय जुयाच्वनादीम्ह नेवाःयात वय्कलं यानादीगु योगदानया कदर यासें २०७३ साल मंसीरय् येँ व त्रिशुलीया थीथी १३गू भाषिक व सामाजिक संस्थापाखें अभिनन्दन याःगु खः ।
पत्रकार आशाकाजी महर्जनया निति ग्वहालि पुचः निस्वन
लहनान्युज | कौलागा तृतिया ११३८ ( अक्टुवर २७ २०१८ )
नीन्यादँ निसें पत्रकारिता ख्यलय् योगदान याना वया च्वनादीम्ह फोटो पत्रकार आशाकाजी महर्जनयात जलास्येँ ल्वचं कया उसाँय मदया च्वंगु दु ।
उगु वासः यायेत न्हि द्धःछि मयाक वासः खर्च माला च्वंगु दु । छु न्हि जक हाकन मिखाय् न समस्या वःगु दु ।
वासः यायेत ग्वाहलि यायेगु निति नेवाः पत्रकार राष्ट्रिय दबुया सचिवालय् छगु मुज्याँ यासें दबुया न्वकु नृपेन्द्रलाल श्रेष्ठया कजिसुइ सुनिल महर्जन, केके मानन्धर, सुरेन्द्रभत्त श्रेष्ठ व रचना श्रेष्ठया छगु कमिति निस्वगु दु ।
वय्कलं गोरखापत्र न्हिपौ, कान्तिपुर, समाचार–पत्रनिसें नेपालभासं पिथनीगु नांजाःगु पत्रिका विश्वभूमि व न्हूगु विश्वभूमिइ न ज्या यानादीधुंकूगु दु ।
येँ महानगरपालिका वडा नं १३ बाफल चखुमार्गय् च्वनीम्ह पत्रकार महर्जन विश्वभुमि निसें गोरखापत्र न्हिपौ, कान्तिपुर, नेपाल समाचारपत्र व कमाण्डर पोष्टय् ज्या यानादीं धुकुगु खः ।
वय्कःया स्वास्थ्य उपचारया नितिं आर्थिक संकलन यायेत बैंकय् खाता चायेकेगु प्रक्रिया तकं न्ह्यज्याकूगु दु ।
स्वापू नितिं नृपेन्द्रलाल श्रेष्ठ ९८५१०९८०९५, श्रीकृष्ण महर्जन ९८४१७५२५८३ व केके मानन्धर ९८५१०८६५६३
