Display Style:
Column Style
क्यालेन्डर पितब्बज्या
नृपेन्द्रलाल श्रेष्ठ | कौलाथ्व पुन्हि ११३८ ( अक्टुवर २४ २०१८ )
क्रियटिभ दी स्टुडिया ग्वसालय् नेपाल संवत ११३९या क्यालेन्डर पितब्बज्या जुगु दु । उगु ज्याझ्वलय् नांजाःम्ह वरिष्ठ फोटोग्राफर राजभाई सुवाल, ज्योतिष ज्ञानेन्द्र प्रसाद जोशी, पुलांम्ह मिस नेवाः सुनिता डंगोल व मोडल सृष्टि महर्जनं मंकाः कथं उलेज्या यानादीगु खः ।
नांजाःम्ह वरिष्ठ फोटोग्राफर राजभाई सुवालं झिंच्यादँ न्ह्यःनिसें मदिक्क नेपाल संवतया क्यालेन्डर पिथनाःवया च्वंगु खः । थुगुसिया न क्यालेन्डरया निरन्तर बिइसे छगू ज्याझ्वःया ग्वसाः ग्वया पितब्ज्या यानादीगु दु ।
थुगुसिया क्यालेन्डरय् झीगु जीवनया माःगु पञ्चतत्वयात न्ह्यब्बसे राजभाई सुवालया हे थःगु क्रियटिभ दी स्टुडियोपाखें पिकाःगु खः। थुकीइ सृष्टि महर्जन मोडल यानादीगु खः कथं खनेदयाच्वंगु दु ।
ज्याझ्वलय् क्यालेन्डरया राजभाई सुवाल, ज्योतिष ज्ञानेन्द्र प्रसाद जोशी, क्यालेन्डरया संयोजक कमला महर्जन सुवाल व पुलांम्ह मिस नेवाः सुनिता डंगोलं क्यालेन्डरयात कथाः थःथःगु नुगःखँ तयादीगु खः ।
विराट गुथिं कवि प्रधानयात हन
लहनान्युज | कौलाथ्व पुन्हि ११३८ ( अक्टुवर २४ २०१८ )
विराट नेपालभाषा साहित्य सम्मेलन गुथिया ५७ क्वःगु साहित्य सम्मेलनय् शताब्दी पुरुष सत्यमोहन जोशीया मूपाहाँसुइ ख्वपय् झःझः धायेक क्वचाःगु दु ।
साहित्य सम्मेलनं ख्वपया पुलांम्ह कवि योगेन्द्र प्रधानयात हनाबना यासें सम्मेलनया नायः कृष्णभक्त बोडें हनापौ लःल्हानादीगु खः । ज्याझ्वलय् कवि प्रधानयात नेपाल साहित्य मन्दिरपाखे तिलक कायस्थ, सिद्धिदास प्रतिष्ठानपाखें नरेन्द्र भक्त हाडा, कुतः पिकाकःपाखें विमल ताम्राकार व विष्णु ताम्राकार, याता जःपाखें सौरभ शाक्य व न्ह्यज्याः खलःपाखें सुशीला श्रेष्ठपिन्सं थःथःगु संस्थापाखें हनापौ लःल्हागु खः ।
थःगु नुगः खँ तयेगु झ्वलय् त्रिरत्न शाक्यं प्रधानया व्यक्तित्व व नेपालभाषा ख्यलय् यानादीगु योगदानयात कुदादीगु खः ।
विराट गुथिपाखें ने.सं.११३८ या एसइइ जाँचय् नेपालभाषाय् दकले अप्व ल्याः हःम्ह कन्या मन्दिर माबिया मलिना स्थापितयात नेपालभाषा पदक देछागु खः ।
साहित्य सम्मेलनय् हरिशरण राजोपाध्याय, श्याम आशा, धर्म राज राजकर्निकार, शरद कसाः, न्हुछेभक्त कवां, महेशमान लँजुवाः, महेन्द्र गोपाल कर्माचार्य, नविन प्रकाश श्रेष्ठ, रिता महर्जन, रेणु श्रेष्ठ, रजनीमिला, शशीकला मानन्धर, केदार सितु, पुष्प राज राजकर्णिकार, केश रत्न शाक्य, लगायत पिन्सं थःथःगु साहित्य ब्वना न्यंकादीगु खः ।
अथेहे लोककवि राजभाई जकःमिं च्वयादीगु म्ये जुजुकाजि रञ्जित व पवित्र कसाः शरद कसाः, रिता महर्जन, रोशन कुमार राजभण्डारी सुरेन्द्र ब्याञ्जु पिसं म्ये हाला न्यंकादीगु खः ।
ज्याझ्वलय् योगेन्द्रभक्तयात कया थीथी व्यक्तिपिन्सं च्वयादीगु च्वसू मुना ‘कवि योगेन्द प्रधान’ सफूनं पितब्वज्या जूगु दु ।
उगु ज्याझ्वलय् नेवाः न्ह्यलुवा पद्म रत्न तुलाधर, प्रा. नर्मदेश्वर प्रधान, नरेन्द्र भक्त हाडा, पूर्ण बैद्य, लक्ष्मण राजबंशी, मातृका पोखरेल, सरस्वती बातीपिं पाहाँकथं झायादीगु खः । प्रदिप शाक्यं न्ह्याकादीगु उगु ज्याझ्वलय् बाबुकाजी साःछेँ श्रेष्ठ लसकुस न्वचू तयादीगु खःसा हिरण्य प्रताप सांगामिं सुभाय् देछानादीगु खः ।
बुखँ व किपा नेवाः सुचना केन्द्र
मध्यपुर थिमि बचतया दँमुँज्या क्वचाल
लहनान्युज | कौलाथ्व षष्ठी ११३८ ( अक्टुवर १५ २०१८ )
मध्यपुर थिमि बचत तथा ऋण सहकारी संस्थाया झिछक्वःगु दँ मुज्या क्वःचागु दु ।
उगु ज्याझ्वलय् मध्यपुर थिमि नगरपालिकाया मेयर मदनसुन्दर श्रेष्ठ सहकारी ऐन २०७४ यात पुस मसान्त दुने पारित यायेगु खँ न्ह्यथनादिल ।
संस्थाया नायः कृष्णकाजी मानन्धरया सभाधक्ष्यताय् जुुगु उगु ज्याझ्वलय्नगरया उप प्रमुख अन्जना मधिकर्मी, ४ नम्बर वडाया वडाध्यक्ष कुमार श्रेष्ठ, समाजसेवी रमेश थापा श्रेष्ठ, कृष्णलाल गोजा श्रेष्ठ, जिल्ला समन्वय समितिया सदस्य उमेश श्रेष्ठ, रामकेशरी श्रेष्ठ, सहकारी संघ भक्तपुरका न्वकु पन्चकृष्ण श्रेष्ठ, सिवाः साय्मि खलःया नायः अष्टरत्न मानन्धर व थिमि लागाया थीथी सहकारी संस्थाया प्रतिनिधित सहभागी जुगु खँ धाःगु दु ।
उगु दँमुँज्यां दाकृष्णकाजी मानन्धरया नेतृत्वय् न्हययेम्ह दुजः दुगु सञ्चालक समिति निस्वंगु दु ।
पुनर्ग्ठित समितिा न्वकू संजय कुमार श्रेष्ठ, छ्याञ्जे सुन्दरलाल श्रेष्ठ, दांभरी प्रेमसुन्दर श्रेष्ठ व दुजलय् अनिल श्रेष्ठ, रमेश थुसा श्रेष्ठ र डा. उज्ज्वल जोशी च्वनादिगु दु । लेखा सुपरिवेक्षण समितिया संयोजक सुन्दर श्रेष्ठ लिसें दुजपिन्त राजकुमार नापित व कृष्णसुन्दर प्रजापति निर्वा्चित जुगु दु ।
“जीवन्त संस्कृतिहरु” सफू विमोचन
नृपेन्द्रलाल श्रेष्ठ | कौलाथ्व पंचमी ११३८ ( अक्टुवर १४ २०१८ )
“जीवन्त संस्कृतिहरु”या प्रकाशकपिं डा. हेरम्ब बहादुर राजभण्डारी व स्नेहलता राजभण्डारीं छगु ज्याझ्वः दथुइ दुर्दाइ गुठीया दँमुज्याय् विमोचन याःगु दु ।
उगु “जीवन्त संस्कृतिहरु” सफूया च्वमि रेखा शाक्य व शरण डंगोलं स्वनिगलय् जुइगु थी थी जात्राया च्वसू नाप जात्रायाःगु कि पा दुथ्याका तःगु दु ।
सफूया प्रकाशक डा. राजभण्डारीं झीगु भाषा व तजिलजि झीगु मौलिक पहिचान खः धयादीसे थुकियात ल्यःकेत झी हे न्ह्यचिलेमा धयादीगु खः ।
एसइइ पास जूपिन्त हन
लहनान्युज | कौलाथ्व पंचमी ११३८ ( अक्टुवर १४ २०१८ )
युवा संघ २५ वडा नं पाखें मोहनी , स्वन्ति व न्हूदँ नेपालसम्बत ११३९ या लसताय् भिन्तुना कालबिल नाप एसइइ पास जूपिन्त हने ज्याझ्वः जुगु दु ।
ध्वाखा बहालय् जूगु उगु ज्याझ्वलय् मूपाहाँ कथं प्रदेश नं ३ या सांसद वसन्त मानन्धरया झायादीगु खः।
उगु ज्याझ्वलय् मूपाहाँ मानन्धरपाखेंं दसिपा तत्कालिन वडा नं २७ या पूर्व अध्यक्ष बाबुराजा महर्जनं खादा क्वखाएका दीगु खःसा पुलांम्ह वडा सदस्य संजय राज शर्मां क्यलकुलेटर लःल्हानादीगु खः ।
संघया २५ वडाया सचिव संजिब श्रेष्ठंं लसकुस यानदीगु उगु ज्याझ्वलय् दुजः रमिता कमल स्थापित व सल्लाहकार बाबुराजा महर्जनपिन्सं नुगः खँ तयादीगु खः ।
