Display Style:
Column Style
नेवाः आर्थिक मुद्दाय् ह्याउँनिभाः न्ह्यज्याइगु
लहनान्यूज | तछलागा सप्तमी ११३७ (जुन १७ २०१७)
छगू इलय् नेपालभाषाया साहित्य ख्यलय् सक्रिय जुयाच्वंगु ह्याउँनिभाः नेपालभाषा ग्वाहालि पुचः आः ह्याउँनिभाः पुचःया नामं नेवाः समुदायया आर्थिक मुद्दा ज्वनाः न्ह्यज्याइगु जूगु दु ।
स्वीदँ न्ह्यः नीस्वंगु पुचः हाकनं छकः येँय् मुनाः नेवाः समुदायया समसामयिक मुद्दाय् सक्रिय जुइगु क्वःछ्यूगु खः ।
समसामयिक मुद्दाय् नं विशेष रुपं आर्थिक क्रान्तिया मुद्दाय् केन्द्रित जुइगु उगु मुनां क्वःछ्यूगु खः ।
वर्तमान ईयात लिनाः न्ह्याःवनेगु आज्जु काःगु मुनां खुम्ह दुजःया ज्यासना पुचः नं ल्यःगु दु । ज्यासना पुचलय् राकेश मास्केयात कजि ल्यःगु दु ।
मेपिं न्याम्ह दुजलय् मनरत्न शाक्य, अनुपसिं सुवाल, धीरेन्द्र बहादुर राजभण्डारी, सोहनलाल प्रधान व धनबहादुर महर्जनयात ल्यःगु दु ।
श्रेष्ठ अपहरणया खँय् देय् दबूपाखें भत्सर्ना
लहनान्यूज | तछलागा षष्ठी ११३७ (जुन १६ २०१७)
तुलसीपुर नेवाः समाजया पूर्व नायः राजकुमार श्रेष्ठयात तत्काल अपहरणमुक्त यायेत नेवाः देय् दबुलिं जोडदार माग याःगु दु ।
देय् दबुलिं थौं विज्ञप्ति जारी यासें वंगु ज्येष्ठ २६ गते श्रेष्ठयात अपहरण यानायंकाः थौंतलें मुक्त मयाःगु खँय् नेवाःतयगु राष्ट्रिय संगठन नेवाः देय् दबूया गम्भीर ध्यानाकर्षण जूगु धाःगु खः ।
उगु हे विज्ञप्तिपाखें दबुलिं समाजसेवी लिसें दाङ तुलसीपुरया स्थानीय व्यवसायी श्रेष्ठयात अपहरणमुक्त याकेत सम्बन्धित निकाय व सरोकारवालातयत जोडदार माग याःगु दु ।
अपरहण थुज्वःगु ज्या कायरतापूर्ण जूगु धासें दबुलिं विज्ञप्ति मार्फत अपहरणया ज्यायात घोर भत्सर्ना नं याःगु दु ।
अपहरण गुकथं जुल :
तुलसीपुर नेवाः समाजया पूर्व नायः लिसें तुलसीपुरस्थित बुटवल वस्त्रालय न्ह्याका वयाच्वंम्ह व्यवसायी श्रेष्ठ वंगु शुक्रबाः अपहरणय् लाःगु खः ।
वंगु शुक्रबाः पलख लिपा लिहांवये धकाः छेँय् नं पिहांवंम्ह श्रेष्ठयात हतियारधारी पुचलं अपहरण यानायंकूगु प्रहरीं धाःगु दु ।
श्रेष्ठ गयावंगु बा १२ च १०७१ नम्बरया गाडी धाःसा सल्यानया रिमस्थित शितल बजारय् लूगु खः ।
श्रेष्ठलिसें घोराहियाम्ह रणबहादुर घर्ती नं अपहरणय् लाःगु खः ।
प्रहरीया कथं घर्ती भारतीय नम्बर प्लेटया गाडीइ न्ह्यःने वनाच्वंगु खःसा अपहरणकारीपिन्सं श्रेष्ठया गाडियात ताकेयानाः अप्पां कयेकेवं न्ह्यःने वनाच्वंगु घर्ती गयाच्वंगु भारतीय नम्बर प्लेटया गाडी नं दिकूगु खः ।
घर्तीं श्रेष्ठयात अपरहण यायेत वःपिं अपहरणकारीतयत म्हस्यू धायेवं इमिसं घर्तीयात नं अपहरण यानायंकूगु धाःगु दु ।
संगीतकःमि राजेश व रवियात मातृशोक
लहनान्यूज | तछलागा चतुर्थी ११३७ (जुन १३ २०१७)
गायक रवि हाडा व संगीतकार राजेश हाडाया मां जानकि हाडा मन्त ।
निमोनिया ल्वचं कयाच्वंम्ह मदुम्ह जानकी हाडा केएमसि अस्पताल सिनामंगलय् वासः याकेगु झ्वलय् म्हिगः चान्हय् १२ः०७य् मदुगु खः ।
लिपांगु इलय् वयकःया जँलास्येँया नं समस्या खनेदुगु खःसा न्ह्यपुइ हि नं कुंगु खः ।
थनिं झिन्हु न्ह्यः आकाझाकां निमोनियाया समस्यां अचेत जूम्ह वयकःयात केएमसि अस्पताल यंकूगु खः । वयां लिपा वयकःयात भेन्टिलेटरय् तयाः वासः यानाच्वंगु खः ।
उगु इलंनिसें अचेत हे जुयाच्वंम्ह वयकः म्हिगः चान्हय् मदुगु खः ।
मदुम्ह हाडाया थौं सुथय् पशुपति आर्यघाटय् अन्त्येष्टि यायेधुंकूगु दु ।
थौं ज्याःपुन्हि, दँया दक्कले ताःहाकःगु दिं
लहनान्यूज | तछलाथ्व पुन्हि ११३७ (जुन ९ २०१७)
थौं तछलाथ्व पुन्हि, नेवाःतय् थौंया दिंयात ज्याःपुन्हिया रुपं हनाच्वंगु दु ।
थौंया दिंयात दँया दक्कले ताःहाकःगु दिं कथं काइ । लिसें थौंया दिनय् छुं नं ज्या याये मत्यःगु दिं कथं नं कयातःगु दु ।
थौं छुं नं ज्या मयाइगु दिं जूगुलिं थौंकन्हय् ज्याःपुन्हियात नेवाः समाजयागु मौलिक श्रमिक दिवस कथं नं व्याख्या यायेगु यानाहःगु दु ।
थौं हे यलया लायकुलिइ च्वंगु मल्ल जुजुया सिंहासनयात कृष्ण देगःया फलय् ब्वयेगु याइ । लिसें थौं हे यलया कात्ति दबुलिइ श्रीनिवास मल्लं च्वयातःगु ३२पु भजन हालेगु नं याइ ।
कात्ति दबुलिइ च्वनाः ३२ ग्वारा थानाः दाफा म्ये हालेगु याइ ।
थौंया दिं ताःहाकः नं जुइगु व ज्या नं मयाइगु जूगुलिं म्हाइपु छ्यायेत पुचः मुनाः भजन हालेगु यानातःगु धापू दु ।
हलिमय् जुन २१यात ताःहाकःगु न्हि नालातःगु दुसा सन् १९८१ निसें थुकुन्हु हे विश्व संगीत दिवस हनेगु यानाच्वंगु दु ।
तर नेवाः समाजय् धाःसा मल्लकालंनिसें हे दँया दक्कले ताःहाकःगु दिं ज्याःपुन्हियात संगीत महोत्सव वा संगीत दिवसया हे रुपं हनेगु याःगु खनेदु ।
खास्तिइ तःगु डिजिटल स्क्रीन चीकल
लहनान्यूज | तछलाथ्व द्वादशी ११३७ (जुन ६ २०१७)
येँया खास्तिइ (बौद्धय्) तयातःगु डिजिटल स्क्रीन थौं चीकूगु दु ।
व्यवसायिक छ्यलाबुलाया नितिं अनया स्थानीय गुथि छगुलिं उगु स्क्रीन तःगु खःसा सम्पदा प्रेमीपिनिगु व्यापक आलोचन धुंकाः थौं प्रहरीं चीकूगु खः ।
थौं न्हिछि धइथें बिकाः येँ महानगरपालिका, पुरातत्व विभाग, नगर प्रहरी, गुथि संगठन, बौद्ध विकास समिति लिसेंया संघसंस्थाया प्रतिनिधिया टोलीं स्क्रिन चीकूगु खः ।
थौं अन तयातःगु स्क्रीन दक्वं लिकायेधुंकूगु दुसा ल्यं दुगु ज्वलं नं कंस बिहिबाः तक्क चीकेगु गुथिं न्ह्यथंगु दु । प्राविधिक मगानाः ज्या थौं पूमवंगु न्ह्यथंगु दु ।
खास्तिया हे छगू गुथिं छन्हुया लागिं धासें विज्ञापन क्यनेगु आज्जुं उगु डिजिटल स्क्रिन तःगु खः ।
उगु स्क्रीन तयेधुंकाः ऐतिहासिक व धार्मिक क्षेत्रय् अथे स्क्रिन तयाः बौद्ध स्तुपा कुरुप खनेदुगु धासें व्यापक आलोचना जूगु खः ।
