Display Style:
Column Style
लगनय् ऐतिहासिक दिगुद्यःपुनर्निर्माण
लहनान्युज | कछलागा सप्तमी ११३८ (नोभेम्वर २९ २०१८)
येँ महानगरपालिकाया मेयर विद्यासुन्दर शाक्य येँमनपा २१ वडा लगः त्वालय् ऐतिहासिक कीर्तिपुण्य महाविहारया कुलदेवता (दिगुद्यः) पुनर्निर्माण ज्याझ्वः न्ह्याःगु दु ।
थौं उगु दिगुद्यलय् विशेष पूजा यासेें जीर्ण दिगुद्यःया पुनर्निर्माण ज्याझ्वः जुगुु खः ।
उगु कीर्तिपुण्य महाविहार स्वनिगःया हे पुलांगु महाविहार मध्यय् छगु खः । उगु महाविहार दुने दिगुद्यः स्थानीय शाक्य समुदायया इष्टद्यः खः ।
सिद्धार्थ गौतम बुद्धयात गृहनगर कपिलवस्तुपाखें लिना हपिं शाक्यपिन्सं कान्तिपुरय् वया थन दिगुद्यः स्थापना याःगु विश्वास याना तःगु खः।
थुगु द्यःग करिब ५० लाख तकां निर्माण यायेगु त्यःगु खःसा थुुगु दिगुद्यः खुलाया दुने सम्पन्न यायेगु लक्ष्य तया तःगु दु ।
किपूलि शिवदेवया शालिक तयेगु माग
लहनान्युज | कछलागा षष्ठी ११३८ (नोभेम्वर २८ २०१८)
आदिवासी जनजाति जागरण अभियानं किपूया भत्क्यापाटी लागाय् पृथ्वीनारायण शाहया मखु शिवदेव तृतियया शालिक तयेत माग याःगु दु ।
छुं दिं न्ह्यः जक किपूया भत्क्यापाटीया छुं छगू पुचः पाखें पृथ्वीनारायण शाहया शालिक तयेत सिफारिसया नितिं निवेदन दर्ता याःगु खः ।
उगु इलय् उपमेयर सरस्वती खड्कां टोकलगेयाना पृथ्वीनारायण शाहया शालिक तयेगु नितिं निवेदन दर्ता जुल धकाः छथ्वःसिनं प्रचार प्रसार यानाच्वंगु नापं समाजिक सञ्जाल फेसबुकय् तकं ब्यापक रुपं चर्चा यानाच्वंगु अवस्थाय् नेवाः प्रदेशय् आदिवासी जनजाति जागरण अभियानपाखें सराकार क्यना बुधवाः नगरपालिकाय् ज्ञापन पौ बिइगु ज्या याःगु खः ।
किपुलिइ स्वक्वः तक पृथ्वीनारायण शाह नं आक्रमण याःगु अले दक्ले लिपा एकपक्षिय रुपं पृथ्वीनारायण शाहया फौजं युद्ध हे मयासे त्यात धकाः घोषणा याना लिपा प्रतिशोधया भावना किपूमितय् न्हाय् म्हुतु व न्हाय्पं तकं ध्याना बिउगु खँ न्ह्यथसें किपूमि तय्सं राजतन्त्रयात गबलें नं स्वीकार मयाःगु अले आः संघीय गणतन्त्र वये धुंकाः नं पृथ्वीनारायण शाहया शालिक किपू नगरय् तल धाःसा उकिं जातीय नापं सामाजिक सदभाव स्यन धाःसा उकिया जिम्मेवारी सरोकारवालां हे कायेमाली धकाः ख्याच्वः तकं ज्ञापनपतिइ बियातःगु खः ।
अथे हे किपूया निर्माता शिवदेव तृतिया शालिक तयेगु आधार दुगुलिं बरु भत्क्यापार्टी शिवदेवया शालिक तयेमाः धकाः तकं माग याःगु खः ।
उगु ज्ञापन पौ लःल्हानाकासें उप मेयर सरस्वती खड्कां थःम्हं पृथ्वीनारायण शाहया शालिक तये मज्यू धकाः धयागुयात एकपक्षिय रुपं प्रचार याःगुलिं थः नं अजूचाल धकाः धयादिल । थः न्हापांनिसें कम्युनिष्ट जूगुलिं गुगु नं हालयत् सार्वजनिक थासय् किपू नगर दुने पृथ्वीनारायण शाहया शालिक तयेके बिइगु जुइमखु धकाः बचं बियादीगु खः ।
नेवाः प्रदेशय् आदिवासी जनजाति जागरण अभियानया कजि अर्जुन महर्जनं ल्हाःचिं तयादीगु उगु ज्ञापन पौ लःल्हायेगु झ्वलय् आदिवासी जनजाति अभियान्तातपिं नजरराम महर्जन, श्रीकृष्ण महर्जन, धर्म महर्जन, विनोद महर्जन, कृष्णहरी महर्जन लागयतयापिं सहभागी जुया थःथःगु खँतसें उपमेयर खड्कालिसे सहलह ब्याकेगु ज्या नं जूगु खः ।
वय्कःपिन्सं किपूमितय्गु भावनाया अःखः ज्या जुल धाःसा उकिं जातीय नापं सामाजिक सद्भाव स्यनेफु धकाः ख्याच्वः बियादीगु खः
दुर्गालालया लाखामरि भ्वय् पिहावल
नृपेन्द्रलाल श्रेष्ठ | कछलागा दुतिया ११३८ (नोभेम्वर २५ २०१८)
जनकवि दुर्गालाल श्रेष्ठया पुलागु मचाम्ये चुलिचिया चं चंया लिधंसाय् स्वंगू थीथी भासं पिदंगु किपाः थौं यलया केशवनारायण चुकय् सफूया मंकाः कथं चिखिफ्यनेज्या जूगु दु ।
थुगु सफुतिइ बिनिता बुद्धाचार्य, मृगजा बज्राचार्य, सुमन महर्जन, सुरेन्द्र महर्जन आसिस शाक्य व सम्भव महर्जनपिसं सफुतिइ किपा च्वयादीगु खः ।
सफू पब्लिकेशन व क्युहोतेज कोवया ग्वसालय् पिथंगु थुगु सफू जनकवि दुर्गालाल श्रेष्ठ, मदनकृष्ण श्रेष्ठ, सुमन श्रेष्ठ, न्ह्यू बज्राचार्यपिन्स मंकाः कथं चिखिफ्यनेज्या यानादीगु खः ।
थुगु सफू नेपालभाषा, खस नेपाली, अंग्रेजी स्वंगू भासं पिथंगु खः ।
यल मनपाया कार्ययोजना बिषय पत्रकार सम्मेलन
नृपेन्द्रलाल श्रेष्ठ | कछलागा दुतिया ११३८ (नोभेम्वर २५ २०१८)
यल महानगरपालिकाया मेयर चिरिबाबु महर्जनं थौ छगु पत्रकार सम्मेलन याना थःगु बिदेश भ्रमण व आतक ज्या यानागु नाप भविष्य यायेगु कार्ययोजना बिषय खँय् जानकारी बियादीगु दु ।
मेयर महर्जनं थःम्हेसिया यानागु बिदेश भ्रमण महानगरपालिकायात गुकथ न आर्थिक भार मलाइ कथं यानागु खँ न न्ह्यथनादीगु खः ।
अथेहे मेयर महर्जनं मोहनि बलय् ७६ दँ दुपिं जेष्ठ नागरिकयात न्याद्धः तका बिइगु ब्यवस्था यानागु, शताब्दीपुरुष सत्यमोहन जोशीयात सवारी, सुरक्षा व मोवाइलया सुविधा बियागु, यलयात ३५ औ हस्तनगरी नगरया घोषणा यायेत तालागु नाप स्मार्ट स्ट्रिट लाइटया याकन हे जुइ त्यःगु दु धकाः थौं या पत्रकार सम्मेलन पाखं जानकारी बियादीगु खः ।
थँहितिइ नेवाः नखः हन
लहनान्युज | कछलागा दुतिया ११३८ (नोभेम्वर २५ २०१८)
नेपाल सम्बत ११३९ न्हूदँया लसताय् शनिवाः थँहितिइ नेपाल सम्बत न्हूदँ राष्ट्रिय समारोह समिति ११३९ व नेपाल मैत्री अध्ययन मण्डल पुस्तकालयया ग्वसालय् थीथी सफू, सिडी ब्वज्या नापं नेवाः नसा–त्वंसाया थीथी परिकार ब्वज्याः याःगु दु ।
उगु ज्याझ्वलय् येँ महानगरपालिकाया मेयर बिद्यासुन्दर शाक्य मूपाहाँ कथं झायादीगु खः । ज्याझ्वलय् मूपाहाँ मेयर शाक्यं नेपाल संवतयात नेपाल सरकारपाखें राष्ट्रिय मान्यता बिउसा न ब्यवहारय् छ्यलाबुला मजुया च्वंगु दु धयादीगु दु ।
अथेहे उगु ज्याझ्वलय् येँमनपाया उपप्रमुख हरिप्रभा खड्गाी श्रेष्ठं, समारोह समितिया सल्लाहकार लक्ष्मीदास मानन्धर १७ न.वडा अधक्ष्य नबिन मानन्धर लगायत थीथी व्यक्तिपिनिगु ब्वति दुगु खः ।
ज्याझ्वलय् सुरवीर बज्राचाय, दीपा महर्जन, रत्नशोभा महर्जन लगायत कलाकारपिन्स म्येहालादीगु खःसा हुलाप्याखं न क्यनादीगु खः ।
बुखँ नेवाः सुचना केन्द्र किपा राजेन्द्र रंजित
