सेयर बजाः थौ सोमवाः नेप्से २७९६ ल्याखय् थ्यःगु दु। न्हापागु कारोबार दिं स्वया थौ ४०.७६ ल्याखय् थ्यःगु दु।

कुल २१ अर्ब ८६ करोड तका बराबरया कारोबार जूगु दु। थौ १६३ गु कम्पनीया भाः थहावःगु दु सा ७८गु कक्पनीया भाः कुहावःगु दु सा छगु स्थिर जूगु दु। होटल लिसे पर्यटन समूह दकलय् अप्पो ६.६९ प्रतिशतं थहावःगु दु।

अथेहे मेमेगु ५.७३, हाइड्रोपावर ३.०९, लगानी ३.५२, जीवन बीमा ३.२३, निर्जीवन बीमा १.२५ प्रतिशतं थहावःगु दु। बैंकिङ ०.५०, विकास बैंक ०.१५ व फाइनान्स ४.६१ प्रतिशत कुहावःगु दु। उत्पादन ०.५१ लिसे माइक्रोफाइनान्स सूचक ०.७५ प्रतिशतं कुहावःगु दु।

रुरु जलविद्युत्, सीईडीबी हाइड्रोपावर, सगरमाथा जलविद्युत्, कुथेली बुकरी स्मल हाइड्रोपावर, भगवती हाइड्रोपावर, माथिल्लो मैलुङखोला, भिजन लुम्बिनी ऊर्जा, मुक्तिनाथ कृषि कम्पनी, सिटी होटल, माउन्टेन हाइड्रो नेपाल, हाथवे इन्भेस्टमेन्ट कम्पनीया भाः १० प्रतिशतं थहावःगु दु। रावा इनर्जीया ९.८ नाप हिमालयन रिइन्स्योरेन्सया ९.७ प्रतिशतं थहावःगु दु।

नेपाल फाइनान्सया भाः १० प्रतिशतं कुहावःगु दु। हिमालयन लघुवित्तया ७.६, गुहेश्वरी मर्चेन्ट बैंकया ६.२, श्रीइन्भेस्टमेन्ट फाइनन्सया ६.२ व समृद्धि फाइनान्सया ६.१ प्रतिशतं कुहावःगु दु। कारोबार रकमया आधारय् हिमालयन रिइन्स्योरेन्स, एनआरएन इन्फ्रास्ट्रक्चर, सानिमा माइ हाइड्रोपावर, शिवम् सिमेन्ट व माउन्टेन इनर्जी न्ह्यने खने दु।

नबिल बैंकया मू नाफा १० प्रतिशतं अप्वःगु दु। वंगु आर्थिक दँ २०८०÷८१ या सार्वजनिक च्यागूगु त्रैमासिकया वित्तीय विवरण कथं बैंकं उगु अवधिइ ७ अर्ब ६ करोड शुद्ध नाफा कमे याःगु दु।

थ्व न्हापाया आर्थिक दँया तुलनाय् १० दशमलव २३ प्रतिशत अप्वः खः।वंगु आर्थिक दँ २०७९÷८० य् बैंकं ६ करोड ४० करोड शुद्ध नाफा कमे याःगु खः।बैंकया शुद्ध ब्याज आम्दानी म्हो जूसां नं नाफा अप्वःगु खनेदु।

बैंकया शुद्ध ब्याज आम्दानी ८.६ प्रतिशतं म्हो जूगु दु। शुल्क व कमिशन आम्दानी अप्वःगु व ऋण घाटा प्रावधान (इम्पेयरमेन्ट चार्ज) म्हो जूगुलिं नाफाय् ग्वाहालि जूगु खनेदु ।बैंकया छगू शेयर आम्दानी २६ तका ९ पैसा खः। थ्वसिबें न्ह्यः छगू शेयर आम्दानी २३ हजार ६७ पैसा जूगु खः।

छगू शेयर वितरणयोग्य आम्दानी १४ तका २६ पैसा खः।बैंकया निष्किय कर्जा कुहावःगु दु। वंगु इलय् थुज्वःगु कर्जा कुल कर्जा १.१८ प्रतिशत जूगु खःसा आः १.०७ प्रतिशत जूगु दु। अथे हे सिडि रेसियो नं ८३ प्रतिशत दु। थुकिं बैंकयाके अप्वः लगानी यायेत पर्याप्त स्रोत दु धइगु संकेत बी।

अथे हे आधार कर नं कुहां वयाः ७.६३ प्रतिशत थ्यंगु दु। वंगु इलय् थुज्वःगु आधार दर ९.५२ प्रतिशत खः। बैंकया रिजर्भ कोषया आकार २८ अर्ब ६५ करोड दुसा चुक्ता पुँजी २७ अर्ब ५० करोड दु।बैंकया मू व्यवसायिक ऋण प्रवाह १२.९४ प्रतिशतं अप्वःगु दु । बैंकं असारया अन्त्यतक ३ खर्ब ७३ अर्ब त्यासा निकासा याःगु दु।

थौ गुलाथ्व पारु स्वयम्भूइ थौनिसे लच्छियक मेला सुरु जुगु दु। स्वयम्भू व्यवस्थापन नाप संरक्षण महासमितिं विश्वसम्पदा स्वयम्भू व वया जःखःसम्पदास्थलय् दर्शन यायेगु निति अप्पो ल्याखय् भक्तजनत वइगु भलसा कयातःगु दु।

थेरवाद, महायान व वज्रयान सम्प्रदायया अनुयायी राष्ट्रिय लिसे अन्तर्राष्ट्रिय ख्यलं करिव न्यागु लख भक्तजनत वइगु भलसा कयातःगु दु।

सुदूरपश्चिम प्रदेशया मुख्यमन्त्रीइ नेपाली कांग्रेस संसदीय दलया नेता कमलबहादुर शाह नियुक्त जूगु दु।

थौ आइतवाः सुथय् नेकपा एमालेया समर्थनय् दाबी पेस यागुलि शाहयात प्रदेश प्रमुख नजिर मियाँ न मुख्यमन्त्रीइ नियुक्त याःगु दु। शाह निक्वःगु पटक सुदूरपश्चिमया मुख्यमन्त्रीइ नियुक्त जूगु खः।

थ्व स्वया न्ह्यः २०७९ माघ २६ गते मुख्यमन्त्री जुयादीम्ह शाह चैत २२ गते राजनीतिक समीकरण हिलेवं राजीनामा बिउगु खः।

बुगंद्यःया रथजात्रा लिपागु दिं थौ भोटो क्यने ज्या जूगु दु। सहकालया द्यः कथ कयातम्ह बुगंद्यःया रथजात्रा लिपागु दिं क्यने ज्या याइगु चलन दु।

राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानमन्त्री केपी शर्मा ओलीलगायत वशिष्ठ मनूपिनिगु उपस्थितिइ भोटो क्यनिइग्ु ज्या गुठी संस्थानपाखे क्यनिइगु याइ।

किवदन्तीया कथं बुगंद्यःया रथयात्रा सुरु जुइ धुका नागराज कर्कोटया लानीया मिखा स्याइ। वयागु मिखा छम्ह सामान्य किसानं लंका बिइ धुका नागराज लय्ताया बहुमूल्य मणि दुगु भोटो किसानयात लःल्हाइ।

छन्हु बुँइ ज्या यानाच्वंगु इलय् उगु भोटो तनिइ। उगु भोटो मालेगु झ्वलय् बुगंद्यःया रथयात्राय् उम्ह किसान खनिइ अथेहे उगु भोटो मेम्ह मनूख न दाबी याइ। वया लिपा विवाद जुइ। वहे भोटायात विवाद समाधान यायेगु निति सार्वजनिक कथं प्रमाण ज्वना भोटो दाबी पेश यायेगु लागि भोटो क्यनिइगु चलन न्ह्याउगु धका धयातःगु दु।

वास्तविक हकदारं दाबी याः मवतले उगु भोटो बुगंद्यःया हे जुइ धायेगु याना तःगु दु।