नेपाल बार एशोसिएशनया २७ क्वःगु केन्द्रीय कार्यसमितिया निर्वाचन निति अध्यक्ष पदया न्याम्हेसिया उम्मेदवार ब्यूगु दु।

प्रमुख निर्वाचन अधिकृत वरिष्ठ अधिवक्ता रामकृष्ण निरौलाया कथं वरिष्ठ अधिवक्ता प्राडा विजयप्रसाद मिश्र, वरिष्ठ अधिवक्ता रमण कुमार श्रेष्ठ, अधिवक्ता राजु कैती, अधिवक्ता उज्वल घिमिरे व अधिवक्ता आशीष पौडेलं उम्मेदवार ब्यूगु दु।

थ्व हे वइगु चैत २३ गते न्हुगु कार्यसमितिया निति निर्वाचन जुइत्यःगु खः। महासचिवय् वरिष्ठ अधिवक्ता केदारप्रसाद कोइराला, अधिवक्ता हरिशरण कार्की व अधिवक्ता यज्ञमणि न्यौपाने न उम्मेदवारी ब्यूगु खः।

येँ महानगरपालिकाया प्रमुख प्रशासकीय अधिकृतय् सहसचिव सरोज गुरागाईंयात हे निरन्तर यायेगु संघीय मामिला लिसे सामान्य प्रशासन मन्त्रालयं पौ छ्वया हःगु दु।

बुधवाः प्रमुख प्रशासकीय अधिकृत सरोज गुरागाईंयात संघीय मामिला नाप सामान्य प्रशासन मन्त्रालयय् ज्या यायेत वातावरण दयका बिइत इनाप याना पौ च्वंगु दु।

पौ वये कथं बुधवाः हे मन्त्रीस्तरीय निर्णयपाखे गुरागाईयात हे निरन्तरता बिइगु येँं महानगरय् पौ छ्वया हःगु संघीय मन्त्रालयया प्रवक्ता कालिप्रसाद पराजुली धाःगु दु।

सेयर बजाः लगातार घटे जुयाच्वंगु दु। म्हिगः बिहीवाः स्वया २.७० ल्याखं कुहावया नेप्से परिसूचक २८१८ ल्याः कायम जुगु खः। अथेहे कारोबार रकम न कुहावःगु दु।

म्हिगः १० अर्ब ९७ करोडया कारोबार जुगुलि थौ १० अर्ब १० करोड जुगु दु। मुक्क ९९ गु कम्पनीया भाः थहावःगुलि १३२ गु कुहावःगु दु सा १२ गु स्थिर जूगु दु।विकास बैंक सेक्टर दकलय् अप्पो १.८६ प्रतिशत थहावःगु दु सा बैंकिङ ०.०३, उत्पादन ०.२४, माइक्रोफाइनान्स ०.०५ प्रतिशतं थहावंगु दु।

फाइनान्स ०.२३, होटल लिसे पर्यटन ०.५७, हाइड्रोपावर ०.०६, लगानी ०.१४ लिसे जीवन बीमा ०.८०, निर्जीवन बीमा ०.०४, मेमेगु ०.७१ नाप व्यापार ०.२४ प्रतिशत घटे जूगु दु। स्वंगू कम्पनी गार्डियन माइक्रोलाइफ इन्स्योरेन्स, भूगोल इनर्जी, उपकार लघुवित्तया भाः १० प्रतिशतं थहावंगुलि राप्ती हाइड्रोपावर ९.९१, महालक्ष्मी विकास बैंकया भाः ७.८४ प्रतिशतं थहावःगु दु।

गुराँस लघुवित्त ७.६ व लाइफ इन्स्योरेन्स कर्पोरेसन ६.३५ प्रतिशतं भाः कुहावःगु दु। निगु पुनर्बीमा कम्पनी हिमालयन रिइन्स्योरेन्स व नेपाल पुनर्बीमाया १–१ अर्ब स्वया अप्पो कारोबार जूगु दु।

हिमालयन रिको १ अर्ब १२ करोड लिसे नेपाल पुनर्बीमा १ अर्ब ८ करोडया कारोबार जूगु दु। उगु कम्पनीलिपा कारोबारया आधारय् एनआरएन इन्फ्रास्ट्रक्चर, घलेम्दी हाइड्रोपावर लिसे फस्र्ट माइक्रोफाइनान्स न्ह्यने लागु दु।

प्रधानमन्त्री केपी शर्मा ओलीं ‘नेपाल पल्प एण्ड पेपर इण्डष्ट्रिज’या थौं उलेज्या यानादीगु दु।

महोत्तरीया गौशालाय् ग्वसाः ग्वःगु छगु ज्याझ्वः दथुइ प्रधानमन्त्री ओलीं उगु उद्योगया उलेज्या यानादीगु खः। आइएमई ग्रुपं स्थापना याःगु उगु उद्योग सञ्चालनय् वये धुंकाः छ्यलातये धुंकूगु भ्वँपाखें नेपालय् हे न्हूगु भ्वँ उत्पादन याये फइगु धाःगु दु।

गुकिया हुनिं भ्वँया आयातय् म्ह्वः जुइ धाःसा उद्योगं थ्यं मथ्यं स्वसःम्हसित रोजगारी बिइ धाःगु दु। नेपालय् दँय् दसं थ्यंमथ्यं १ लख ५० द्वः मेट्रिकटन भ्वँ खपत जुयाच्वंगु दु।

नेपाली समाजय् हिंसापाखें दलित मिसापिं अप्वो प्रभाबित जूगु खनेदूगु दु। मुक्कं यानाः दक्व मिसातय्सं फया वयाच्वंगु हिंसा दलित मिसा तय्सं नं फयाच्वंगु दु।

थुकिया अतिरिक्त दलित मिसा तय्सं जातीय, पितृसत्ता, वर्गीय, आर्थिक, सामाजिक हुनिं थप हिंसा फयेमाला च्वंगु थी थी अध्ययनपाखें खनेदूगु दु। दलित महिला संघ (फेडों) २०८१ स याःगु अध्ययन कथं नेपाल प्रहरीया विवरणय् हिंसापीडित दलित मिसाया मुक्कं ल्याः ११.५४ प्रतिशत दु। हिंसापीडित दलित मिसा मचाया ल्याः १९.४४ प्रतिशत दु।

राष्ट्रिय महिला आयोगय् अभिलेख जूगु घटना मध्ये ११.३४ प्रतिशत दलित मिसानापं स्वापू दूगु दु। ओरेक नेपालया अभिलेख कथं हिंसापीडित मिसा मध्ये दलित मिसाया ल्याः २७ प्रतिशत दु। इन्सेकया अभिलेखय् नं निगूगु अप्वः हिंसाय् लाःपिं मिसाय् दलित दु। गुकीइ दलित मिसा २२.५८ प्रतिशत दु। न्ह्यथना तःगु तथ्याङ्क पीडकया पाखें उजुरीं जक वःगु खः।

अझं हिंसाया ग्याः चिकु व न्यायिक प्रक्रियाय् म्ह्वः जक उपस्थितिया हुनिं नं दलित मिसानापं स्वाना च्वंगु अप्वो यानाः हिंसाया घटनात पिहां मवःगु अधिकारकःमितय् दाबी दु। दलित व दलित मिसातय्त जुइगु विभेद व दमनया ग्याना पूगु कथं अन्तरजातीय इहिपाय् खनेदूगु फेडों धाःगु दु। अन्तरजातीय इहिपा याःपिं ७१.७ प्रतिशत मिसा तय्सं प्रत्यक्ष वा अप्रत्यक्ष कथं ग्यानाः बाय् धम्की फयाः च्वनेमाःगु दु। नापनापं सार्वजनिक थासय् दुव्र्यवहार व अपमान फयेमाःपिं ७०.८ प्रतिशत दु।

चरित्र हत्या बाय् चरित्रयात अपू कथं काइगु सामाजिक मनोवृत्तिया हुनिं अप्वः दलित मिसातय् जीवन प्रभावित जूगु फेडोया महासचिव रेणु सिजापतीं धयादिल। अन्तरजातीय इहिपा याःपिं तिपूपाखें बूपिं २५.८ प्रतिशत मस्तय्गु जन्मदर्ता हे जूगु मदु । गुकिंयानाः इमित स्कुल भर्नाय् तकं समस्या जुयाच्वंगु व सरकारं बिइगु थी थी सेवा सुविधा तकं काये मपूmगु महासचिव सिजापतिं धयादिल।