नेवाः समुदायया मिसापिं भाषा, संस्कृति संरक्षणनाप राजनीतिक कथं न्ह्याः वनेमाः धका  सम्बद्ध मनूतयेस धाःगु दु। १ सय १५ क्वःगु अन्तर्राष्ट्रिय नारी दिवसया लसताय् बोधिचर्या नेपालया ग्वसालय् यल महानगरपालिका – २१ नाप सहकार्य व छय्लाबुला ज्यासःया ग्वहालिं नेवाः समुदायया मिसा पिनिगु सशक्तिकरणय् चुनौती व अवसर विषय जुगु छगु ज्याझ्वलय् वक्तापिन्स अथे धयादीगु खः।

ज्याझ्वःया मूपाहाँ वाग्मती प्रदेश सरकारया सामाजिक विकास मन्त्री हरिप्रभा खड्गी श्रेष्ठं व्यवस्था ह्यूपाः हयेगु निति न्हापा थे न्ह्यलुवाः मिसा नेततयेस थे आःया मिसापिनिगु स्थिति अज्यागु मदु धका धयादीसे राजनीतिक अधिकारया सदुपयोग यायेत मिसापि न्ह्याः वनेमाः धका बःबियादील। संविधानं ब्यूगु  मिसा सम्बन्धी अधिकार याःगु अभ्यास यायेमाः धका धयादीसे वयकलं धयादीगु दु संघ, प्रदेश व स्थानीय तहया निर्वाचनय् मिसापिनिगु उम्मेदवारया ल्याः अप्पो यायेमाः धका धयादीगु खः। वयकलं धयादीगु दु ‘चुनावया टिकट कायेगु निसे बिइगु, अवसर वल धाःसा ज्या याना क्षमता प्रमाणित यायेगु अधिकार संविधानं ब्यूगु दु।उकिया मिसापि छेँ न पिहावय्माः।’

ज्याझ्वलय् यल महानगरपालिका– २१ वडाया अध्यक्ष रविन्द्र महर्जनं नेवाः समुदायया राजनीतिक दलय् वने मज्यु धइगु अप्पोसिगु न्ह्यपूइ तयेगु ज्या जुयाच्वंगु दु, उकियात हिलेगु ज्या यायेमाः। ‘ राजनीतिइ याना हे झीगु देय्, समाजया अवस्था हिलेगु खः। राजनीति धइगु दक्को दयकेगु निति खः। राजनीतिइ मवनेगु खःसा नेवाः समुदायया सरोकार दुगु ख्यः लिउने लाइ।’ वडाअध्यक्ष महर्जनं धयादीगु खः।

स्थानीय राजनीतिककर्मी सुप्रभा शाक्यं समाज व राजनीतिक दलय् आःयागु पितृसत्तात्मक बिचाः व संस्कार नापं ल्वाना हे मिसा ल्वाना हे न्ह्याः वनेमाः धका धयादीगु खः। ‘ पार्टीइ मिसापिन्त टिकट बिलकि चुनाव त्याइगु व मत्याइगु यक्को शंका याइ। पार्टी पिने बालापि स्वया थः मनू माः धका बिचाः दु। पितृसत्तात्मक बिचाः हावी दु। थुकियात चिइका न्ह्या वनेगु हे सशक्तिकरण जुइगु खः।’ लोकह्वाम्ह गायिका निशा देशारं मिसा शक्तियात थुइका थःपिन्स सिर्जनाया कर्मय् न्ह्या वनेमाः धका धयादीगु खः। थीथी पंगः चिइका न्ह्या ने फत धका मिसापिनिगु जीवनया लक्ष्य पुरा यायेत सूना नं पने फइ मखु धका गायिका देशारं धयादीगु खः।

हस्तकला उद्यमी सविता सिं महर्जनं मिसापिन्स थःथःगु ख्यलं न्ह्या वनं धाःसा यक्को अवसर वइ धका धयादीगु खः। मिसापिन्त जुइगु विभेद, पुरातन बिचाः नं मिसापि न्ह्या वनेत थाकुगुलि उकियात सामना यासे न्ह्या वन धाःसा हे सशक्त जुइ धका उद्यमी महर्जनं धयादीगु खः। बोधिचर्या नेपालया अध्यक्ष अनिल शाक्यं मिसापि शोषित, पीडित जुयाच्वतले मिजंपि सुख व शान्तिपूर्वक म्वाय् मफइगु धका धयादीसे मिसापिनिगु क्षमता विकास व विभेद क्वचाकेगु निति हे मिजंपि नापनापं न्ह्या वनेमाःगुलि बः बियादीगु खः

नेपाल भाषाया शिक्षिका गंगा बज्राचार्यं स्थानीय तहय् नेपालभाषाया माध्यमं ब्वकूगु नीतिं भाषा, संस्कृतिइ न्ह्यःजाःपि यक्को मिसापिन्त बालागु अवसर वःगु दु धका धयादीगु खः। मिस नेवाः– ११४५ उपाधिया विजेता प्रलिशा शाक्यं बिना विभेद थःगु लक्ष्यय् न्ह्या वनेगु स्थिति व प्रतिभा न्ह्यः ब्वये न्ह्यावनेगु आत्मविश्वासपूर्वक न्ह्या वनेमाः धका धयादीगु खः। बोधिचर्या नेपालया कार्यकारिणी दुजः संगीता शाक्यं मिसापिन्स छेँ दुने जक लिकूने मज्यु धका धयादीगु खः।

उगु ज्याझ्वलय् मिस नेवाः ११४५ उपाधि त्याकूम्ह नाप थीथी उपाधि विजेता तय्त नेवाः परम्परा कथं खेँ सगं बिउगु खः।

प्रधानमन्त्री केपी शर्मा ओलीं मन्त्रिपरिषदया बैठक सःतूगु दु।बहनि ६ः३० बजे प्रधानमन्त्री निवास बालुवाटारय् च्वनिइगु कथं बैठक सःतूगु दु धका प्रधानमन्त्रीया सचिवालयं धाःगु दु।

बैठकय् लिपागु समसामयिक घटना नापं सरकारया नियमित ज्याया बारे सहलह यायेत्यःगु धका धाःगु दु।

थापाथलीइ मङ्गलबाः सुथय् तःज्याःगु मेलम्ची खानेपानी आयोजनाया मू पाइपलाइन मर्मत जूगु दु।

काठमाडौँ उपत्यका खानेपानी लिमिटेड (केयुकेएल)या प्राविधिक टोलीं तःज्याःगु पाइपलाइन थौं सुथय् ४ ता इलय् मर्मत पूवंकूगु केयुकेएलया इन्जिनियर प्रकाश बरालं धयादीगु खः।

नेपाल मेडिकल कलेजं स्टाफ नर्सतय्त क्रिटिकल केयरया तालिम ब्यूगु दु। कलेजं थःगु ३६ म्ह स्टाफ नर्सतय्त क्रिटिकल केयर सम्बन्धी विषय निन्हुया तालिम सञ्चालन याःगु दु।

नर्सेस एशोसिएशन अफ नेपालनाप समन्वयया ग्वसालय् क्रिटिकल केयरया तालिमय् ब्बति काःपिन्त मुटु रोग, सघन उपचार, इमरजेन्सी भेन्टिलेटर उपचार सम्बन्धी तालिम ब्यूगु खः।

क्रिटिकल केयर नर्सेस एशोसिएशन अफ नेपाल अन्तरगत एनसिसि डेभलपमेन्ट फाउण्डेशनया अध्यक्ष लक्ष्मी केसी भण्डारी, फाउण्डेशनया कविता सिटौला, श्रेयष्मा रेग्मी, श्रृष्टी अर्याल, सपना खड्का, प्रभा श्रेष्ठपिन्स विषयगत तालिम ब्यूगु खः। क्रिटिकल केयरया तालिमय् नेपाल मेडिकल कलेजय् वइपि विरामीतय्त उपचार लिसे स्याहारय् ग्वहालि जुइगु भलसा काःगु दु।

’आइसियूया मोडालिटीयात अझ बालइगु भलसा कयागु दु। तालिम लिपा छिकपिन्स नेपालय् जुइमा नेपालं पिने जुइमा क्रिटिकल केयर न्ह्यागु हे अस्पतालय् ज्या यायेत सक्षम जुइ।’ प्रबन्ध निर्देशक डा.यासमिनं धयादीगु दु।

काठमाडौं विश्वविद्यालयया कुलपति नाप प्रधामनमन्त्री केपी शर्मा ओलीं उपकुलपतिया उम्मेदवारपिनिगु ल्याः स्वइगु जुगु दु।

समितिं नां सिफारिस यायेत लिवाःगुलि प्रधानमन्त्री ओलीं समितिया सदस्यतयेत सःता नां सिफारिस यायेत लिवागु खँय् च्यूता तयादीगु खः। वःगु फागुन २ व ३ गते सर्ट लिस्टय् झीम्हेसिगु अन्तर्वार्ता क्वचाये धुकुगु खःसा समितिं नां सिफारिस याःगु मदुनि।

समितिं केयूया पूर्व उपकुलपति प्राडा सुरेशराज शर्मा संयोजक, सदस्यय् डा.अर्जुन कार्की व पूर्वसचिव जनार्दन नेपाल खः। स्वम्ह सदस्य दथुइ सहमति मजुया केयूया उपकुलपतिया निति नां सिफारिस याःगु मदुनि। झीम्ह मध्ये स्वम्हेसिगु नां समितिं सिफारिस यायेमाःगु खः।

थः यःम्ह मनूया नां सिफारिस यायेत स्वयेवं समितिइ च्वपि स्वम्ह सदस्य दथुइ सहमति मजुइवं केयूया अधिकारी तयेस धाःगु दु।

उपकुलपतिइ अच्युत वाग्ले, कन्हैया झा, जर्नादन लामिछाने, बालचन्द्र लुँइटेल, विभूति रञ्जन झा, वेदमणी दाहाल, भोला थापा, राजेन्द्र प्रसाद कोजु, श्याम नारायण लाभ व सुबोध शर्मा पिनिगु नां दुथ्याःगु दु।