राष्ट्रियसभाया थौंया बैठक न्ह्याःगु दु। राष्ट्रियसभाया थौंया बैठकय् थी थी न्यागू अध्यादेश निर्णयार्थ पेस याइगु ज्याया धलः दूगु संसद् सचिवालयं धाःगु दु।

सुशासन प्रवद्र्धन नापं सार्वजनिक सेवा प्रवाह सम्बन्धी छुं छुं नेपाल ऐनयात संशोधन यायेगु अध्यादेश, २०८१, आर्थिक कार्यविधि नापं वित्तीय उत्तरदायित्व (न्हापांगु संशोधन) अध्यादेश, २०८१, निजीकरण (न्हापांगु संशोधन) अध्यादेश, २०८१, आर्थिक नापं व्यावसायिक वातावरण सुधार व लगानी अभिवृद्धि सम्बन्धी छुं छुं नेपाल ऐनयात संशोधन यायेगु अध्यादेश, २०८१ व सहकारी सम्बन्धी छुं छुं नेपाल ऐनयात संशोधन यायेगु अध्यादेश, २०८१ यात बैठकय् पेस यायेत्यंगु खः।

थुगु अध्यादेश प्रतिनिधिसभां बहुमतं पारित जुइ धुंकूगु दु। अथे हे, राष्ट्रियसभाया थौंया बैठकय् स्वास्थ्य नापं जनसङ्ख्या मन्त्रालयलिसे सम्बन्धित मौखिक न्ह्यसःया सम्बन्धित मन्त्री तय्सं लिसः बिइगु ज्याया धलः दु। थौं हे अख्तियार दुरुपयोग अनुसन्धान आयोगया आर्थिक दँ २०८०÷८१ या वार्षिक प्रतिवेदन नं सभाय् पेस याइ।

उद्योग वाणिज्य नापं आपूर्ति मन्त्रालयया संयोजन नापं नेपाल चेम्बर अफ कमर्श व नेपाल बिजनेश इन्स्टिच्युट (एनबिआई)या ग्वसालय् येँय् अन्तरराष्ट्रियस्तरया बिजनेस समिट जुइत्यंगु दु।

दिगो व आत्मनिर्भर अर्थतन्त्र धइगु नारा ज्वनाः निक्वःगु संस्करणया नेपाल बिजनेस समिट वइगु वैशाख ७ गते जुइत्यंगु दु धका ग्वसाः खलः नेपाल चेम्बर अफ कमर्शं धाःगु दु। उद्योग व्यवसायनापं मुक्कं अर्थतन्त्रलिसे सम्बन्धित व्यक्तित्वतय्गु गाक्क ब्वति दूगु न्हापांगु संस्करणया समिट नं येँय् हे क्वःचाःगु खः।

समिटय् सङ्घीय सरकारया उच्च राजनीतिक नापं प्रशासनिक अधिकारी, प्रदेशया मुख्यमन्त्री, स्थानीय निकायया प्रमुख, स्वदेशी नापं विदेशी विषयविज्ञ, अर्थविद्, बैंकिङ ख्यःया ज्ञाता, दातृ निकायया प्रतिनिधि, निजी ख्यःलिसे स्वानाच्वंगु अग्रणी संस्थाया नेतृत्वगण, बैङ्क नापं वित्तीय संस्थाया नायः, सञ्चालक नापं उच्च अधिकारी, लब्धप्रतिष्ठित उद्योगी नापं व्यवसायी, नवप्रवद्र्धनीय ख्यलय् ज्या यानाच्वंपिं युवा नापं मिसा, आईटी नापं डिजिटल प्रविधिइ स्वानाच्वंपिं युवा, वैदेशिक रोजगारपाखें लिहाँवःपिं उद्यमशील जनशक्ति नापं उच्च शिक्षा कयाच्वंपिं विद्यार्थीनापं न्यासःस्वयांअप्वःया ब्वति दइगु एनबिआईया कार्यकारी अध्यक्ष नापं सम्मेलन आयोजक कमिटीया कजि विशाल गैरें कनादिल।

एनबिआईया कार्यकारी अध्यक्ष नापं सम्मेलन आयोजक कमिटिया कजि गैरें निगू तःधंगु अर्थतन्त्र दूगु जःलाखःला देय् चीन व भारतदथुइया न्ह्याइगु साँघु दयेकाः आन्तरिक लगानीयात हःपाः व बाह्य लगानीयात आकर्षित यानाः दिगो बैंकिङ विकासपाखें औद्योगिकरण, कृषि, पर्यटन, जलविद्युत्, वनपैदावार, प्रविधि, साना नापं मध्यम उद्योगया स्तरोन्नति, स्वउद्यमशीलता नापं स्टार्टअप व्यवसायलिसेंया ख्यलय् लगानी चकंकेगुलिसें दिगो व तब्याःगु आर्थिक विकासया निंतिं समिट प्रस्थान बिन्दु जुइगु धारणा तयादिल। 

काठमाण्डौ सुनचाँदी ब्यबसायी सघंया नायः रोहिणा शाक्यया अबु सूर्यरत्न शाक्य ८९ दँय् मन्त। वयकः म्हिगः वासः यायेगु झ्वलय् केएमसी अस्तलालय् मदुगु खः।

वयकःया अन्तिम संस्कार शोभाभगवति कर्णदीपय् याःगु खः।मदुम्ह शाक्य राष्ट्रिय सहकारी महासंघया पुलाम्ह महाप्रवन्धक व केन्द्रिय सहकारी प्रशिक्षण केन्द्रया पुलाम्ह प्राचार्य लिसें सहकारी अभियानय् समर्पित जुयादीम्ह खः।

थौ स्वया ३७ दँ न्ह्यः येँया इतुंबहालय् खुयायंकूगु ऐतिहासिक महत्वं जाःगु स्वपाः पौभाः नेपाः लितः हःगु दु। अमेरिकाया न्यूयोर्कं नेपाः लिहाँ वःपिं विजयमान सिंहलिसेंया पुचलं थथे उगु पौभाः ज्वनाः वःगु खः।

न्यूयोर्कया अदालतय् ताःई मुद्दा जुयाच्वंगु उगु पौभाःयात कयाः अन्ततः नेपाःया हे जूगु ठहर यासें गनयागु पौभाः खः अन हे छ्वयेगु निर्णय याःगु खः।

इतुंबहाः संरक्षण समाजया नायः प्रज्ञारत्न शाक्यं इतुं बहाःया पौभाः नेपाः थ्यंगु लिं लसता प्वंकादीगु दु। लिसें वय्कलं थुगु पौभाः नेपाः थ्यंकेगु नितिं कानूनी प्रक्रियाया ज्या आपालं यायेमाःगु खँ नं कनादिसें थथे खुयायंकूगु पौभाः नेपाः थ्यंसां इतुंबहालय् न्हापा गथे खः अथेहे पौभाः तयेत अझ नं ई काइगु खँ धयादीगु दु।

लुम्बिनीइ प्यक्वःगु अन्तर्राष्ट्रिय त्रिपिटक वाचन बुधवाः उलेज्या यानादीगु दु। उपप्रधान लिसे शहरी विकास मन्त्री प्रकाशमान सिंहं छगु ज्याझ्वः दथुइ त्रिपिटक (पाठ)या उलेज्या यानादीगु खः।

अखिल नेपाल भिक्षु महासंघया ग्वसालय् व लुम्बिनी विकास कोषनाप थीथी संस्थाया ग्वहालि लुम्बिनीस्थित मायादेवी द्यःया थाय् त्रिपिटक वाचन सुरू जूगु खः। उपप्रधान शहरी विकास मन्त्री प्रकाशमान सिंहं हलियक जुयाच्वंगु अस्थिरताया संकेत खनेदुगु अवस्थाय् बुद्धया शिक्षां शान्ति कायम याये फइगु धका धयादीगु खः।

वयकलं बुद्धया शिक्षायात पुर्नताजगी याना त्रिपिटक पाठं हलियक च्वपिन्त लुम्बिनीपाखे शान्ति सन्देश वनिइ धका धयादीगु खः।उगु ज्याझ्वलय् लुम्बिनी विकास कोषया उपाध्यक्ष डा. ल्हारक्याल लामा, संघनायक नेपालया भिक्षु बोधिसेन महास्थविरपिन्स थःथःगु खँ तयादीगु खः।